តើការទាក់ទងនឹងពួកវិញ្ញាណខុសឬទេ?
តើការទាក់ទងនឹងពួកវិញ្ញាណខុសឬទេ?
តាំងពីក្មេងមក នាងបាបារ៉ា * មានភ្នែកទិព្វ ឮសំឡេងពួកវិញ្ញាណ ហើយគាត់ជឿជាក់ថា គាត់អាចទាក់ទងជាមួយនឹងសាច់ញាតិដែលបានស្លាប់។ នាងនិងប្ដីឈ្មោះយ៉ូអាគីម បានអានសៀវភៅជាច្រើនដែលទាក់ទងនឹងពួកវិញ្ញាណ ហើយពួកគេក៏បានក្លាយទៅជាគ្រូទាយសន្លឹកបៀឆុត។ សន្លឹកបៀទាំងនេះទាយថា ពួកគេនឹងទទួលបានលុយយ៉ាងច្រើន ហើយនេះបានកើតឡើងមែនពេលពួកគេធ្វើជំនួញ។ នៅថ្ងៃមួយ គាត់ទាយសន្លឹកបៀនោះឃើញថា នឹងមានមនុស្សដែលបង្កគ្រោះថ្នាក់មកលេងផ្ទះរបស់ពួកគេ ហើយបៀនោះបានប្រាប់អំពីវិធីដែលពួកគេគួរការពារខ្លួន។
ទោះជាការទាក់ទងនឹងពួកវិញ្ញាណមើលទៅដូចជាហួសសម័យក៏ដោយ តែមនុស្សជាច្រើននៅគ្រប់កន្លែងមានចំណាប់អារម្មណ៍ទៅលើវត្ថុស័ក្ដិសិទ្ធិនិងអំណាចអធិធម្មជាតិ។ មនុស្សទូទាំងពិភពលោកពាក់វត្ថុស័ក្ដិសិទ្ធិ និងទៅរកគ្រូខាបព្រលឹងដើម្បីប្រាប់អំពីជោគវាសនារបស់ពួកគេ ឬដើម្បីការពារពួកគេពីរឿងអាក្រក់។ ក្នុងអត្ថបទមួយនៃទស្សនាវដ្ដីរបស់អាឡឺម៉ង់បានបញ្ជាក់នូវចំណុចសំខាន់មួយថា «ប្រព័ន្ធអ៊ីនធឺណិតជាដើមហេតុដែលទាក់ទាញឲ្យមានចំណាប់អារម្មណ៍កាន់តែខ្លាំងទៅលើរឿងអាបធ្មប់» (“Laptop and Lucifer,” the German magazine Focus)។
តើលោកអ្នកដឹងទេថា គម្ពីររៀបរាប់អំពីការទាក់ទងនឹងពួកវិញ្ញាណ? អ្វីដែលគម្ពីររៀបរាប់អំពីរឿងនេះប្រហែលជាធ្វើឲ្យលោកអ្នកភ្ញាក់ផ្អើល។
អ្វីដែលគម្ពីររៀបរាប់អំពីការទាក់ទងនឹងពួកវិញ្ញាណ
ច្បាប់ដែលព្រះបានឲ្យដល់រាស្ត្ររបស់លោកនៅស្រុកអ៊ីស្រាអែលពីបុរាណបានបញ្ជាក់ថា៖ «នៅក្នុងពួកឯង មិនត្រូវឲ្យឃើញមានអ្នកណាមួយ ដែលធ្វើ[ជា] . . . គ្រូទាយ គ្រូគន់គូរនក្ខត្តឫក្ស គ្រូអង្គុយធម៌ គ្រូអាបធ្មប់ គ្រូសន្ធាប់ គ្រូខាប គ្រូគាថា ឬគ្រូអន្ទងខ្មោចណាឡើយ ដ្បិតអ្នកណាដែលប្រព្រឹត្តការទាំងនោះ ជាទីស្អប់ខ្ពើមដល់ព្រះយេហូវ៉ាណាស់»។ (ចោទិយកថា ១៨:១០-១២) ហេតុអ្វីបានជាច្បាប់របស់ព្រះប្រឆាំងយ៉ាងខ្លាំងចំពោះការទាក់ទងនឹងពួកវិញ្ញាណ?
ដូចបទពិសោធន៍ដែលយើងបានរៀបរាប់ខាងលើ មនុស្សជាច្រើនជឿថា មនុស្សរស់អាចទាក់ទងនឹងមនុស្សស្លាប់បាន ហើយអាចទទួលព័ត៌មានពីពួកគេ។ ជំនឿបែបនេះ មានដើមកំណើតមកពីអ្វីដែលសាសនាជាច្រើនបានបង្រៀន ពោលគឺពេលដែលមនុស្សស្លាប់ទៅ ពួកគេនៅតែរស់ក្នុងពិភពវិញ្ញាណ។ ក៏ប៉ុន្តែ ផ្ទុយទៅនឹងសេចក្ដីបង្រៀននេះ គម្ពីរបញ្ជាក់យ៉ាងច្បាស់ថា៖ «មនុស្សស្លាប់ឥតដឹងអ្វីឡើយ»។ (សាស្ដា ៩:៥) គម្ពីររៀបរាប់ថា មនុស្សដែលស្លាប់ប្រៀបដូចជាអ្នកដែលកំពុងដេកលក់យ៉ាងស៊ប់ ដោយមិនដឹងថាមានអ្វីកើតឡើងនៅជុំវិញពួកគេទេ។ * (ម៉ាថាយ ៩:១៨, ២៤; យ៉ូហាន ១១:១១-១៤) បើដូច្នេះ លោកអ្នកប្រហែលជាឆ្ងល់ថា តើយើងអាចពន្យល់យ៉ាងណាអំពីមនុស្សដែលធ្លាប់ទាក់ទងនឹងពួកវិញ្ញាណ? តាមពិត តើពួកគេបានទាក់ទងជាមួយនឹងអ្នកណា?
ការទាក់ទងនឹងពួកវិញ្ញាណ
កំណត់ហេតុក្នុងសៀវភៅដំណឹងល្អបង្ហាញថា ពេលដែលលោកយេស៊ូនៅផែនដី លោកធ្លាប់និយាយជាមួយនឹងពួកវិញ្ញាណ។ ក្នុងគម្ពីរនៅសៀវភៅម៉ាកុស ១:២៣, ២៤ បានចែងថា៖ «វិញ្ញាណអសោចមួយ»បានប្រាប់លោកយេស៊ូថា៖ «ខ្ញុំដឹងច្បាស់ថាអ្នកជាអ្នកណា»។ ពួកវិញ្ញាណក៏ច្បាស់ជាដឹងថាលោកអ្នកជាអ្នកណាដែរ។ ក៏ប៉ុន្តែ ចុះលោកអ្នកវិញ តើលោកអ្នកដឹងថាពួកវិញ្ញាណជាអ្នកណា?
មុនដែលព្រះបានបង្កើតមនុស្សជាតិ លោកបានបង្កើតទេវតាជាច្រើន គឺបុគ្គលវិញ្ញាណដែលជាកូនរបស់លោក។ (យ៉ូប ៣៨:៤-៧) ពួកទេវតាជាជីវិតមួយប្រភេទដែលខ្ពង់ខ្ពស់ជាងមនុស្ស។ (ហេប្រឺ ២:៦, ៧) ពួកគេមានឫទ្ធានុភាពខ្លាំងក្លា និងវាងវៃណាស់ ហើយពួកគេបានត្រូវបង្កើតមកដើម្បីធ្វើតាមបំណងប្រាថ្នារបស់ព្រះ។ អ្នកតែងបទទំនុកតម្កើងបានច្រៀងថា៖ «ចូរសរសើរដល់ព្រះយេហូវ៉ា អស់ពួកទេវតារបស់ទ្រង់អើយ ជាអ្នកដែលមានឥទ្ធិឫទ្ធិខ្លាំង ហើយក៏ប្រតិបត្ដិតាមបង្គាប់ទ្រង់»។—ទំនុកតម្កើង ១០៣:២០
គម្ពីររៀបរាប់ថា ក្រោយមកពួកទេវតាខ្លះចាប់ផ្ដើមទាក់ទងជាមួយមនុស្សដោយគ្មានការអនុញ្ញាតពីព្រះ។ តើពួកគេមានគោលបំណងអ្វី? ទេវតាដែលបានធ្វើដូច្នេះមុនគេបង្អស់ បានបោកបញ្ឆោតបុរសនិងស្ត្រីដំបូងឈ្មោះអាដាមនិងអេវ៉ា ដើម្បីនាំពួកគេឲ្យលែងស្ដាប់តាមព្រះដែលជាអ្នកបង្កើតពួកគេ។ ពេលវាធ្វើដូច្នេះ វាបានធ្វើឲ្យខ្លួនវាក្លាយទៅជាមេកំណាចសាថាន ដែលជាអ្នកបង្កាច់បង្ខូចនិងជាអ្នកប្រឆាំងព្រះ។—លោកុប្បត្តិ ៣:១-៦
ក្រោយមក ទេវតាផ្សេងទៀត«បានបោះបង់ចោលសភាពដើម និងស្ថានដែលខ្លួនត្រូវនៅ»ក្នុងស្ថានសួគ៌ដោយកាឡាខ្លួនជាមនុស្ស ហើយចាប់ផ្ដើមរស់នៅជាមួយនឹងស្ត្រីស្អាតៗនៅផែនដី។ (យូដាស ៦; លោកុប្បត្តិ ៦:១, ២) ទេវតាអាក្រក់ទាំងនោះនិងកូនៗរបស់ពួកវាដែលជាកូនកាត់ទេវតានិងមនុស្សបានធ្វើបាបមនុស្សជាតិឲ្យភ័យខ្លាចយ៉ាងខ្លាំង រហូតដល់ផែនដីបាន«ពោរពេញដោយអំពើឃោរឃៅ»។ អ្នកប្រហែលជាធ្លាប់ដឹងអំពីកំណត់ហេតុក្នុងគម្ពីរស្តីអំពីទឹកជំនន់ដែលព្រះបានធ្វើឲ្យមាននៅសម័យណូអេដើម្បីបំផ្លាញជំនាន់មនុស្សដ៏អាក្រក់ឃោរឃៅទាំងនោះ។—កំណើតពិភពលោក [លោកុប្បត្តិ] ៦:៣, ៤, ១១-១៣, ខ.ស.
ទឹកជំនន់បានធ្វើឲ្យពួកទេវតាអាក្រក់បោះបង់ចោលរូបកាយជាមនុស្ស ហើយត្រឡប់ទៅស្ថានរបស់ពួកវាវិញ។ ប៉ុន្តែព្រះដែលជាអ្នកបង្កើតមិនអនុញ្ញាតឲ្យពួកវាត្រឡប់ទៅ«ស្ថានដែលខ្លួនត្រូវនៅ»វិញទេ។ ផ្ទុយទៅវិញ ពួកវានៅក្នុងស្ថានភាពមួយដែលប្រៀបដូចជា«រណ្ដៅដែលមានភាពងងឹតសូន្យសុង»។ (ពេត្រុសទី២ ២:៤, ៥) គម្ពីរហៅពួកទេវតាដែលបះបោរទាំងនេះថាជា«ពួកវិញ្ញាណកំណាច»។ (យ៉ាកុប ២:១៩) ពេលមនុស្សទាក់ទងនឹងពួកវិញ្ញាណ គឺពួកគេកំពុងទាក់ទងនឹងវិញ្ញាណកំណាចទាំងនេះ។
អ្វីដែលពួកវិញ្ញាណកំណាចចង់បាន
គោលដៅទី១របស់ពួកវិញ្ញាណអាក្រក់ក្នុងការទាក់ទងជាមួយមនុស្ស គឺដើម្បីបង្វែរពួកគេចេញពីការគោរពប្រណិប័តន៍ព្រះយេហូវ៉ាដែលជាព្រះពិត។ មនុស្សជាច្រើនដែលទាក់ទងពួកវិញ្ញាណអះអាងថាពួកគេមានអំណាចឬសមត្ថភាពពិសេស ប៉ុន្តែតាមពិតនេះគ្រាន់តែជាវិធីមួយដែលពួកវិញ្ញាណអាក្រក់បំបែរអារម្មណ៍មនុស្សចេញពីការទទួលចំណេះត្រឹមត្រូវអំពីព្រះ និងរារាំងពួកគេពីការមានចំណងមេត្រីភាពជាមួយនឹងលោកប៉ុណ្ណោះ។
គោលដៅទី២របស់ពួកវិញ្ញាណកំណាចបានត្រូវបង្ហាញឲ្យឃើញច្បាស់ ដោយពិចារណាអំពីអ្វីដែលសាថានបានប៉ុនប៉ងធ្វើចំពោះលោកយេស៊ូ។ សាថានបានស្នើឲ្យលោកយេស៊ូនូវ«រាជាណាចក្រទាំងឡាយក្នុងពិភពលោកនិងភាពរុងរឿងរបស់រាជាណាចក្រទាំងនោះ»។ តើសាថានចង់បានអ្វីពីលោកយេស៊ូវិញ? វាបានជំរុញលោកថា៖ «ក្រាបប្រណិប័តន៍ខ្ញុំម្ដង»។ ប្រាកដហើយ សាថាននិងពួកវិញ្ញាណកំណាចចង់បានការគោរពប្រណិប័តន៍។ ប៉ុន្តែ លោកយេស៊ូមិនព្រមឈប់គោរពប្រណិប័តន៍ព្រះពិតទេ។—ម៉ាថាយ ៤:៨-១០
សព្វថ្ងៃនេះ ពួកវិញ្ញាណអាក្រក់កម្រទាក់ទងមនុស្សដោយផ្ទាល់ ហើយស្នើផ្ដល់អ្វីដូចក្នុងករណីលោកយេស៊ូណាស់។ ប៉ុន្តែ ពួកវាព្យាយាមដាក់អន្ទាក់ដល់មនុស្សតាមរយៈ ការទាយសន្លឹកបៀ ទាយបាតដៃ មើលហោរាសាស្ត្រប្រចាំថ្ងៃ និងមើលប្រផ្នូលជាដើម។ ពួកវាធ្វើឲ្យមនុស្សគិតថាការលេងឬធ្វើអ្វីដែលបានរៀបរាប់ខាងលើនោះមិនអាចធ្វើទុក្ខឬធ្វើឲ្យពួកគេមានគ្រោះថ្នាក់ទេ។ សូមកុំចាញ់បញ្ឆោតពួកវាដោយប្រព្រឹត្តអំពើបែបនេះឡើយ! ដោយសារការប្រព្រឹត្តទាំងនេះមិនមែនជាការប្រើកម្លាំងធម្មជាតិដើម្បីទាក់ទងជាមួយនឹងអ្វីដែលអាថ៌កំបាំងទេ។ ពួកវិញ្ញាណអាក្រក់ធ្វើឲ្យមនុស្សចាប់អារម្មណ៍យ៉ាងខ្លាំងទៅលើការប្រព្រឹត្តបែបនោះដើម្បីដាក់អន្ទាក់និងបំភាន់មនុស្សដោយមានគោលបំណងបង្វែរពួកគេពីការគោរពប្រណិប័តន៍ព្រះយេហូវ៉ា។ ប៉ុន្តែបើវាមិនអាចសម្រេចដូចបំណងនោះពួកវាច្រើនតែធ្វើបាបអ្នកដែលធ្លាក់ចូលអន្ទាក់របស់ពួកវាឲ្យរងទុក្ខវេទនាយ៉ាងខ្លាំង។ បើលោកអ្នកស្ថិតក្នុងស្ថានភាពបែបនេះមែន តើលោកអ្នកអាចធ្វើយ៉ាងណាដើម្បីរួចផុតពីឥទ្ធិពលរបស់ពួកវា?
វិធីរំដោះខ្លួន ចេញពីឥទ្ធិពលរបស់ពួកវិញ្ញាណអាក្រក់
សូមចាំឲ្យច្បាស់ថា ពួកវិញ្ញាណអាក្រក់ដែលទាក់ទងជាមួយមនុស្សគឺជាសត្រូវរបស់ព្រះ ពួកវានឹងត្រូវបំផ្លាញចោល។ (យូដាស ៦) ពួកវាជាអ្នកបោកប្រាស់ និងជាអ្នកភូតភរ ដែលធ្វើពុតជាមនុស្សស្លាប់។ បើលោកអ្នកដឹងថាជនបោកប្រាស់ម្នាក់បាន បន្លំខ្លួនធ្វើជាមិត្តភក្ដិរបស់លោកអ្នក ដោយចង់ធ្វើឲ្យលោកអ្នកខាតបង់ប្រយោជន៍ តើលោកអ្នកនឹងធ្វើយ៉ាងណា? ចុះបើលោកអ្នកបានដឹងថា តាមប្រព័ន្ធអ៊ីនធឺណិត លោកអ្នកបានទាក់ទងដោយមិនដឹងខ្លួនជាមួយនឹងបុគ្គលម្នាក់ដែលមានបំណងចង់កេងចំណេញខាងផ្លូវភេទពីលោកអ្នក តើលោកអ្នកនឹងមានប្រតិកម្មយ៉ាងណា? ប៉ុន្តែ ការទាក់ទងជាមួយនឹងពួកវិញ្ញាណកំណាចនាំឲ្យមានគ្រោះថ្នាក់ខ្លាំងជាងនោះឆ្ងាយណាស់។ លោកអ្នកត្រូវខំអស់ពីសមត្ថភាពដើម្បីកាត់ផ្ដាច់រាល់ទំនាក់ទំនងទាំងអស់ដែលលោកអ្នកមានជាមួយនឹងពួកវិញ្ញាណកំណាច។ តើលោកអ្នកអាចធ្វើយ៉ាងណា?
ក្រោយពីយល់ដឹងនូវអ្វីដែលគម្ពីររៀបរាប់អំពីពួកវិញ្ញាណអាក្រក់ហើយ នោះអ្នកក្រុងអេភេសូរពីបុរាណបានយល់ឃើញថា ពួកគេមានទម្លាប់ខ្លះដែលទាក់ទងនឹងពួកវិញ្ញាណអាក្រក់ ហើយពួកគេត្រូវបំផ្លាញចោលសៀវភៅដែលទាក់ទងនឹងវេទមន្ត ទោះបីជាសៀវភៅទាំងនោះមានតម្លៃថ្លៃក៏ដោយ។ ពួកគេបាន«ដុតចោលនៅមុខគេទាំងអស់គ្នា»។ (សកម្មភាព ១៩:១៩, ២០) សព្វថ្ងៃនេះ វត្ថុដែលទាក់ទងនឹងពួកវិញ្ញាណអាក្រក់ មិនគ្រាន់តែរួមបញ្ចូលសៀវភៅ ខ្សែគាថា យ័ន្ត និងអ្វីៗដែលស្រដៀងនឹងវត្ថុទាំងនោះប៉ុណ្ណោះទេ តែនោះក៏រួមបញ្ចូលអ្វីៗដែលយើងមើល ដូចជាហ្គេមកុំព្យូទ័រ ភាពយន្ត និងប្រព័ន្ធអ៊ីនធឺណិតដែរ។ ចូរជៀសចេញពីអ្វីៗដែលទំនងជាធ្វើឲ្យលោកអ្នកអាចទាក់ទងនឹងពួកវិញ្ញាណអាក្រក់។
សូមគិតអំពីប្ដីប្រពន្ធដែលបានរៀបរាប់នៅដើមអត្ថបទនេះ។ តាមរយៈសន្លឹកបៀនោះពួកគេបានសន្និដ្ឋានថា មានមនុស្សដែលបង្កគ្រោះថ្នាក់នឹងមកលេងផ្ទះរបស់ពួកគេ ហើយបៀនោះប្រាប់ពួកគេកុំឲ្យស្ដាប់និងទទួលរបស់អ្វីពីមនុស្សទាំងនោះ។ ក៏ប៉ុន្តែ ពេលកាននី និងហ្គុតរុន ដែលជាសាក្សីព្រះយេហូវ៉ាពីររូបបានមកមុខទ្វារផ្ទះរបស់ពួកគេដោយនិយាយថា ពួកគេមានដំណឹងល្អអំពីព្រះ នោះយ៉ូអាគីមនិងបាបារ៉ាបានសម្រេចចិត្តស្ដាប់។ ពួកគេបានសន្ទនាអំពីរឿងទាក់ទងនឹងពួកវិញ្ញាណអាក្រក់ ហើយកាននី និងហ្គុតរុនបានប្រាប់ពួកគេនូវព័ត៌មានត្រឹមត្រូវដែលមកពីគម្ពីរ។ ពួកគេក៏ចាប់ផ្ដើមពិភាក្សាគ្នាពីគម្ពីរយ៉ាងទៀតទាត់។
មិនយូរក្រោយមក យ៉ូអាគីមនិងបាបារ៉ាបានសម្រេចចិត្តកាត់ផ្ដាច់ទំនាក់ទំនងទាំងអស់ដែលពួកគេមានជាមួយនឹងពួកវិញ្ញាណកំណាច។ សាក្សីព្រះយេហូវ៉ាទាំងពីរនាក់នោះបានប្រាប់ពួកគេថា ពួកវិញ្ញាណអាក្រក់នឹងទំនងជាមិនសប្បាយចិត្តអំពីរឿងនេះទេ។ យ៉ូអាគីមនិងបាបារ៉ាពិតជាបានឆ្លងកាត់គ្រាដ៏ពិបាក ហើយពួកគាត់ក៏ត្រូវពួកវិញ្ញាណកំណាចធ្វើបាបតាមរបៀបដែលគួរឲ្យខ្លាចដែរ។ អស់មួយរយៈពេល ពួកគេបានភ័យខ្លាចរាល់យប់ ប៉ុន្តែពេលពួកគេរើទៅនៅផ្ទះផ្សេងទៀត នោះពួកគេបានធូរស្បើយខ្លះ។ ក្នុងអំឡុងពេលដែលមានរឿងនេះកើតឡើង ប្ដីប្រពន្ធមួយគូនេះបានពង្រឹងទំនុកចិត្តរបស់ខ្លួនទៅលើបណ្ដាំរបស់ព្រះក្នុងសៀវភៅភីលីព ៤:១៣ ដែលចែងថា៖ «ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។ ព្រះយេហូវ៉ាបានផ្ដល់ពរដល់ការសម្រេចចិត្តរបស់ពួកគេ ហើយនៅទីបំផុតពួកវិញ្ញាណអាក្រក់លែងធ្វើទុក្ខពួកគេទៀត។ សព្វថ្ងៃនេះ យ៉ូអាគីមនិងបាបារ៉ាមានចិត្តសប្បាយរីករាយក្នុងការគោរពប្រណិប័តន៍ព្រះយេហូវ៉ាដែលជាព្រះពិត។
បទគម្ពីរដាស់តឿនអ្នកដែលចង់ទទួលពរពីព្រះយេហូវ៉ាថា៖ «ចូរចុះចូលនឹងព្រះ តែចូរតស៊ូនឹងមេកំណាច រួចវានឹងរត់ចេញពីអ្នករាល់គ្នា។ ចូរចូលទៅជិតព្រះ ហើយលោកនឹងចូលមកជិតអ្នករាល់គ្នាដែរ»។ (យ៉ាកុប ៤:៧, ៨) បើលោកអ្នកចង់ ព្រះយេហូវ៉ាអាចជួយលោកអ្នក ហើយលោកប្រាកដជានឹងជួយលោកអ្នកឲ្យរួចផុតពីឥទ្ធិពលរបស់ពួកវិញ្ញាណកំណាច។ ពេលយ៉ូអាគីមនិងបាបារ៉ាគិតអំពីរឿងអតីតកាលដែលពួកគេបានរួចផុតពីពួកវិញ្ញាណអាក្រក់ នោះពួកគេយល់ស្របដោយអស់ពីដួងចិត្តនឹងពាក្យដែលបានសរសេរនៅទំនុកតម្កើង ១២១:២ ដែលចែងថា៖ «សេចក្ដីជំនួយរបស់ខ្ញុំមកតែពីព្រះយេហូវ៉ាទេ»។
[កំណត់សម្គាល់]
^ វគ្គ 2 ឈ្មោះបានត្រូវប្ដូរ។
^ វគ្គ 7 សម្រាប់ព័ត៌មានលម្អិតស្តីអំពីស្ថានភាពមនុស្សស្លាប់ សូមមើលជំពូកទី៦ ដែលមានចំណងជើងថា «តើមនុស្សស្លាប់ទៅទីណា?» ក្នុងសៀវភៅតើព្រះគម្ពីរពិតជាបង្រៀនយ៉ាងណា? ដែលបានបោះពុម្ពផ្សាយដោយសាក្សីព្រះយេហូវ៉ា។
[ឃ្លាអក្សរធំនៅទំព័រ២៧]
ការទាក់ទងនឹងពួកវិញ្ញាណរារាំងមនុស្សពីការមានចំណងមេត្រីភាពជាមួយនឹងព្រះ
[ឃ្លាអក្សរធំនៅទំព័រ២៨]
«ចូរចូលទៅជិតព្រះ ហើយលោកនឹងចូលមកជិតអ្នករាល់គ្នាដែរ»។—យ៉ាកុប ៤:៨
