Khuyini Embi Ngokusebenzelana Nemimoya?

Kusukela asesemncani, uBarbara * bekabona iimbono, ezwa amezwi begodu gade akholelwa bona bekathintana neenhlobo ezihlongakeleko. Yena nendodakwakhe, uJoachim, bebafunda iincwadi zemimoya begodu baba nobukghoni bokufunda amakarada wetjhudu. Lokhu bekutjho bona bebazokufumana imali enengi, mbala kwaba njalo ngebhizinisi labo. Langelinye, amakarada la abayelelisa bona abantu abayingozi bazokuza emzinabo begodu abatjela bona kufuze benzeni bona bazivikele.

NANYANA ukukholelwa emimoyeni kubonakala kusidala, ukuba nekareko emimoyeni kurhatjheke khulu. Abantu abanengi bafaka izinto abathi zibalethela itjhudu, basebenzisa ama-Ouija boards, begodu bathintana nemimoya bona babikezele ingomuso namtjhana bazivikele eentweni ezilimazako. Esihlokweni esithi: “Laptop and Lucifer,” umagazini weJarimani i-Focus wathi: I-Internet ibangela ikareko nokululukela nanyana yini ebandakanya ubuloyi.

Uyazi bona iBhayibhili iyakhuluma ngemimoya? Lokho ekutjho ngendaba le kungakurara khulu.

Lokho IBhayibhili Ekutjhoko Ngemimoya

Umthetho uZimu awunikela abantu bakhe bakwa-Israyeli wekadeni uthi: Akukafuzi kufumaneke kuwe . . . nanyana ngubani obhulako, owenza imilingo namtjhana ngubani othukulako namtjhana umloyi, nanyana ngubani oloya abanye namtjhana obuza kwabanemimoya namtjhana umbikezeli wengomuso onekghono nanyana ngubani obuza kwabafileko. Ngombana nanyana ngubani owenza iintwezi uyinto enyenyisako kuJehova. (Duteronomi 18:10-12) Kubayini umthetho kaJehova ukwala kangakangaka ukusebanzelana nemimoya?

Njengombana indaba esivule ngayo itjengisa, abanengi bakholelwa bona abaphilako bangakhuluma nabafileko begodu umlayezo ovela emimoyeni ubuya kwabafikeko. Iinkolelo ezinjalo zivela kilokho okufundiswa ziinkolo ezinengi—bona ekufeni abantu baphila endaweni yemimoya. Kodwana okuphambene nefundiso le, iBhayibhili ikubeka ngokukhanyako: “Abahlongakeleko, abazi litho.” (UMtjhumayeli  9:5) Ihlathulula abahlongakeleko kwanga balele ubuthongo obukhulu, abangazi litho elenzekako. * (Matewu 9:18, 24; Jwanisi 11:11-14) Njengombana kunjalo, ungabuza, Singakuhlathulula njani okuhlangabezanwe nakho abantu abanakho ngamandla angaphezu kwewemvelo? uyini umthombo wokuthintana okunjalo?

Ukuthintana Nephasi Lemimoya

Umlando wamavangeli utjengisa bona nekasephasini, uJesu wathintana nemimoya. UMarkosi 1:23, 24 ubika bona ‘umoya omumbi’ watjela uJesu: “Ngiyakwazi bona ungubani.” Ngokunganakuzaza, imimoya nawe iyakwazi bona ungubani. Kodwana wena uyayazi bona ibobani?

Ngaphambi kobana uZimu abumbe abantu, wabumba amadodana womoya amanengi namtjhana iingilozi. (Jobhi 38:4-7) Iingilozi zenziwe zaba ngaphezu kwabantu. (KumaHebheru 2:6, 7) Zinamandla begodu zihlakaniphe khulu, zibunjelwe ukwenza intando kaZimu. UmRhalani wabhina: ‘Mdumiseni [uJehova], nina ngiilozi zakhe ezinamandla, enihlonipha imilayo yakhe.’—IRhalani 103:20.

IBhayibhili iveza bona ngokukhamba kwesikhathi ezinye zeengilozi zathoma ukuzihlanganisa nabantu ngendlela uZimu angayivumeliko. Ngawuphi umnqopho? Yokuthoma ukwenza njalo yadukisa abantu bokuthoma u-Adamu no-Efa, bona babe kude noZimu uMbumbabo. Ngokwenza njalo, yazenza ngokwayo uSathana uDeveli, umhlebi nomphikisi kaZimu.—Genesisi 3:1-6.

Ngokukhamba kwesikhathi, iingilozi “zatjhiya ikhaya lazo” ezulwini, zambatha iimzimba yabantu, zathoma ukuhlala nabafazi abakarisako ephasini. (KaJuda 6; Genesisi 6:1, 2) Iingilozi ezizinhlubukezi nabantwana bazo abavangeneko zatlhorisa abantu, kangangobana iphasi lathoma ‘ukuzala inturhu.’ Kungenzeka ujayelene nomlando weBhayibhili wokobana uZimu watjhabalalisa isizukulwana esinenturhu nesimbi ngoKukhulamungu ngesikhathi sakaNuwa.—Genesisi 6:3, 4, 11-13.

Amanzi kaKukhulamungu akatelela imimoya bona imbathe iimzimba yomoya begodu ibuyele endaweni yomoya. Kodwana uMbumbi akhenge ayivumele ukubuyela ‘ekhaya layo’ lokuthoma. Kunalokho, yalinda endaweni embi khulu ukudlula ‘umgodi onzima tshu.’ (2 KaPitrosi 2:4, 5) IBhayibhili yaqalisa eengilozini ezizinhlubuki bona ‘madimoni.’ (KaJakobosi 2:19) Zimamandla wemimoya emimbi.

Lokho Okufunwa Madimoni

Umnqopho wemimoya emimbi ethintana nabantu kokuthoma kubaphambukisa ekukhulekeleni uZimu weqiniso, uJehova. Izipho namtjhana amandla inengi lalabo abasebenzisa imimoya abathi banawo kuphambukisa abantu kwaphela ekufumaneni ilwazi elingeziweko ngoZimu nokwakha ubuhlobo naye.

Umnqopho wesibili wamadimoni ungabonwa kilokho uSathana, umrholawo, alinga ukukwenza kuJesu. USathana wathembisa uJesu “boke ubukhosi bephasi nobukhulu balo.” Khuyini uSathana agade afuna ukuyifumana ngalokho? Wathi: ‘Guqa ungikhulekele.’ Mbala, uSathana namadimoni bafuna ukukhulekelwa. Kodwana uJesu wawala umqondo wokutjhiya uZimu nokukhulekela kweqiniso.—Matewu 4:8-10.

 Namhlanje, imimoya emimbi ayikavami ukuthintana nabantu ngokunqophileko njengombana yenza ngoJesu. Kunalokho, ifuna ukurareja abangakatjheji ngokuzithabisa okubonakala kunganangozi, ngezinto ezifana nama-crystal balls, amatlhari wetiye, amakarada wetjhudu ama-pendulums, nama-horoscopes. Ungadukiswa zizinto ezinjalo! Imikghwa le ayisiyo indlela engokwemvelo yokuthintana nephasi lemimoya. Imimoya emimbi isebenzisa iindlelezi ukukara nokudlelezela abantu ngomnqopho wokubaphambukisa ekukhulekeleni uJehova. Nengabe lokho akuphethi umnqophwayo, imimoya emimbi le irutharutha abantu begodu ibabangele iimraro labo ebararejwe ngiyo. Nengabe lokho kunjalo ngawe, khuyini ongayenza bona uzokwazi ukutjhaphuluka kiyo?

Indlela Ongaphunyurha Ngayo Emimoyeni

Ungenzi umtjhapho, imimoya ekhuluma nabantu imanaba kaZimu, ibekelwe ukutjhatjalaliswa. (KaJuda 6) Ibazenzisi nabaleyi mala, ezenza abantu abahlongakeleko. Ungazizwa njani nengabe ufumana bona loyo ebewucabanga bona mnganakho gade amzenzisi, ofuna ukukuphambukisa kwaphela eentweni ezihle ofuna ukuzenza? Bewuzokwenzani nengabe ufumana bona ungazi uthome ubungani nomuntu otlhorisa abanye ngokomseme ku-Internet? Ukurarejwa madimoni kuyingozi ukudlula lokho. Kufuze wenze koke ongakwenza ukuqeda ubungani obunjalo. Ungenzanjani?

Ngemva kokufunda bona iMitlolo ifundisani ngemimoya, ezinye izakhamuzi ze-Efesu zabona kutlhogeka ukutjhisa iincwadi zabo zemilingo, nanyana bezidura kangaka. “Bazitjhisa phambi kwabantu.” (IZenzo 19:19, 20) Namhlanjesi izinto ezihlobene nemimoya akusizo iincwadi, izinto ebathi ziletha itjhudu, ama-Ouija boards, nezinye izinto ezinjalo kwaphela, kodwana godu nezinto esizibona kumakhomphyutha namathelevitjhini. Balekela nanyana yini ebonakala iyindlela yemimoya.

Khumbula isibili ekukhulunywe ngaso ekuthomeni kwesihlokwesi. Emakaradeni waso wetjhudu, saphetha ngokuthi abantu abayingozi bazokuza emzinaso kodwana asizobalalela namtjhana samukele nanyana yini kibo. Nanyana kunjalo, lokha uConnie noGudrun, aboFakazi BakaJehova ababili bafika emzinabo bathi babalethele iindaba ezimnandi ngoZimu, uJoachim noBarbara bakhetha ukulalela. Ingcocwabo yafika endabeni yemimoya, begodu uConnie noGudrun babanikela ilwazi elinembileko elivela eMitlolweni ngayo. Kwathonywa isifundo seBhayibhili saqobe.

Msinyana uJoachim noBarbara banqunta ukulahla zoke izinto ebezibathintanisa namadimoni. AboFakazi bahlathulula bona imimoya angekhe ikuthabele lokho. Eqinisweni, uJoachim noBarbara baqalana nobudisi begodu bathuswa kusahlelwa madimoni. Kwesikhatjhana, gade basaba ubusuku ngabunye babe bafudukela kenye indlu okwabatjhaphulula ekusabenokho. Kibo boke ubudisobu, isibilesi saba nethemba emezwini waKwebeFilipi 4:13 athi: “Nginaso isisongo sokujamelana nalokho koke, ngamandla uKrestu angiphe wona.” UJehova wabusisa umzamwabo, begodu imimoya yalisa ukubahlubayeza. Namhlanje, uJoachim noBarbara bakhulekeli abathabileko bakaZimu weqiniso, uJehova.

IMitlolo ikhuthaza boke abozokufumana isibusiso sakaJehova ithi: “Nje-ke zithobeni kuZimu, nijamelane noSathana, uzanibaleka. Tjhidelani kuZimu, naye uzatjhidela kini.” (KaJakobosi 4:7, 8) UJehova uZimu uzokusiza bona utjhaphuluke emtheleleni wamadimoni, nengabe uyafuna. Nebaqala emva ekutjhaphulukeni emimoyeni, uJoachim noBarbara bavumelana ngehliziyo yoke namezwi weRhalani 121:2 athi: “Isizo lami livela [kuJehova].”

[Imitlolo yaphasi]

[Umkhangiso osekhasini 11]

Ukusebenzisa imimoya kuvimbela abantu ekubeni nobuhlobo obuhle noZimu

[Umkhangiso osekhasini 12]

“Tjhidelani kuZimu, naye uzatjhidela kini.”—KaJakobosi 4:8