¿Layqeriospi chhapukuy allinchu?

Bárbara * sipasita kashaspa wañusqasta mosqoypi uyarisqanta, wañusqa familiaresninwan parlasqanta ima nin. Pay, qosan ima yatiri librosta, cartas de tarot nisqata ima, sumajta leeyta yachaj kanku. Uj pʼunchay chay cartasnejtaj ashkha qolqeta gananankuta yacharqanku, cartas nisqanman jinataj uj negociopi ganayta qallarerqanku. Waj pʼunchay chay cartasnejta, wasinkuman sajra runas rinankuta, imaynatachus chay runasmanta jarkʼakunankuta ima yacharqanku.

WAKINQA, ñaupa runaslla layqeriospi creej kanku, kunanqa manaña nispa ninku, chaywanpis ñaupajmanta nisqaqa kunan astawan tukuynejpi chaykunapi creeshanku. Runasqa, sajramanta jarkʼakunankupaj wallqasta churakunku, ouija tablas nisqapi pujllanku, qhepaman imachus kananmanta yachanankupaj layqaspaman ima rinku. Alemaniamanta Focus revistapi “Lucifer y las computadoras” nisqapi “Internetqa runasta astawan layqeriosman tanqashan” nerqa.

Biblia layqeriosmanta parlasqanta, ¿yacharqankichu? Imatachus nisqan ichá mayta tʼukuchisonqa.

¿Imatá Biblia yachachin?

Ñaupa tiempomanta Israel llajtaman Jehová Dios kay leyta qorqa: “Amapuni ni mayqenniykichej [...] adivino kaychejchu, nitaj qhepaman imachus kananmantapis yachaj tukunkichejchu. Ama layqapis kankichejchu, ama mayqentapis layqachinkichejchu, ama adivinosta tapukunkichejchu, amallataj aysirista tapukunkichejchu. Tata Diosqa millachikun chaykunata ruwajkunamantaqa”, nispa (Deuteronomio 18:10-12). ¿Imaraykutaq Dios layqeriosta millachikun?

Kay yachaqanaj qallariyninpi yachakusqanchejqa, ashkha runas wañusqaswan parlayta atikusqanta, wañusqaspa espiritusninku layqasnejta chayri aysirisnejta imatapis willasqankuta creesqankuta rikuchiwanchej. Ajinata creenku, wañoj janaj pachaman ripusqanta ashkha religiones yachachisqankurayku. Chaywanpis Bibliaqa chayta mana yachachinchu, astawanqa nin: “Wañusqasrí mana imatapis yachankuchu”, nispa (Eclesiastés 9:5).  Chantapis Bibliaqa, wañuyta sinchʼi puñuywan kikinchan, imaraykuchus wañusqasqa mana ni imata sientenkuchu (Mateo 9:18, 24; Juan 11:11-14). * Chantá, ¿imaraykú ashkha runas wañusqaswan parlasqankuta ninku? ¿Pitaj chaypaj juchayoj?

¿Pikunataj kay espíritus kanku?

Evangelio librosqa, Jesús Jallpʼapi kashaspa espirituswan parlasqanta ninku. Kay Marcos 1:23, 24 “millay supay[...]” uj runaman yaykuspa Jesusta nerqa: “Noqa yachani pichus kasqaykita”, nispa. Arí, sajra espiritusqa pichus qan kasqaykitapis yachallankutaj. Chaywanpis, ¿qan pikunachus paykuna kasqankuta yachankichu?

Jehová Diosqa, runasta manaraj ruwashaspa, ashkha angelesta ruwarqa. Kay angelesqa, mana runas jinachu kanku (Job 38:4-7; Hebreos 2:6, 7). Manaqa kallpayoj, yachayniyoj ima kanku, Diospa munayninta ruwanankupajtaj ruwasqas karqanku. Chayrayku salmista nerqa: “Angeles, Tata Diosta yupaychaychej, qankuna kallpayojkuna, kamachisqasninta juntʼajkuna”, nispa (Salmo 103:20).

Bibliaqa, wakin ángeles Jehová Diosta mana valechispa runaswan parlasqankuta nin. ¿Imapajtaj? Kay angelesmanta ujnenqa, Adanta, Evata ima chʼaukiyarqa, Diosmanta karunchachinanpaj. Chayraykutaj Kuraj Supayman, Diospa enemigonman tukorqa, llullakuspa qhasimantataj tumparqa (Génesis 3:1-6).

Aswan qhepamantaj waj ángeles “maypichus tiyakunankuta[...] saqerqanku” runaman tukuspataj, kay Jallpʼaman jamorqanku kʼachita sipaskunawan tiyanankupaj (Judas 6; Génesis 6:1, 2). Kay churanakoj ángeles, mirayninku ima, runasta mayta manchacherqanku. Paykunaraykutaj, “kay pachaqa imaymana juchawan juntʼa karqa, chejninakuywan ima”. Chayraykutaj Diosqa, Noej tiemponpi Jatun Paranejta sajra runasta chinkacherqa. Ichapis chay Jatun Paramanta parlajta uyarerqanki (Génesis 6:3, 4, 11-13).

Kay pachaman yaku juntʼaykusqanraykutaj, chay angelesqa, runa cuerponkuta saqespa cieloman kuterqanku. Chaywanpis Diosqa, ‘maypichus tiyakorqanku’ chayman kutejta manaña saqerqachu, manaqa “wijchʼorka juicio punchʼaycama wiskʼaska canancupaj” (2 Pedro 2:4, 5, Dios Parlapawanchej). Bibliaqa, chay churanakoj angelesta ‘supaykuna’ nispa sutichan (Santiago 2:19). Paykuna layqerioswan runasta chʼaukiyashanku.

¿Imatá supaykuna munanku?

Supaykunaqa, imaymanamanta runasta chʼaukiyanku, cheqa Dios Jehovata mana yupaychanankupaj. Yuyachinkutaj layqeriosnejta qhepaman imachus kananta yachayta atisqankuta, chaywanpis chaykunata apaykachanku runas Diosmanta mana cheqata yachanankupaj, nitaj qayllaykunankupaj.

Imatawanchus supaykuna munasqanta yachallasunmantaj, Satanás, Jesusman imatachus nisqanpi. Pay nerqa: “Qonqorikuspachus yupaychawanki chayqa”, “tukuy kay pachantimpi kaj llajtasta, qhapaj kapuyninkutawan” qosqayki nispa. Satanás, supaykunasnin ima yupaychananchejta munanku. Chaywanpis Jesusqa, ni jaykʼaj payta yupaychayta munarqachu, manaqa cheqa Dios Jehovallata (Mateo 4:8-10).

 Kay tiempopi supaykunaqa, runaswan manaña ñaupajpi jinachu parlanku. Manaqa, coca qhawaynejta, cartas qhawaynejta, layqeriyosnejta, yatirisnejta, mosqoykunanejta ima chʼaukiyashanku. ¡Ama chaykunaman urmaychu! Imaraykuchus kaykunamanta ni mayqen, qhepaman imachus kananta willanankupaj atiyniyojchu kanku. Manaqa supaykuna chaykunanejta runasta, Jehová Diosta mana yupaychanankupaj chʼaukiyashanku. Chay tojllasman urmachiyta mana atispaqa, tojllasninkupi kajkunata mayta ñakʼarichinku. Ajinapi rikukuspa, ¿imaynatá makinkumanta kacharichikuwaj?

¿Imaynatá kacharichikusunman?

¡Ama chʼaukiyachikuychu! Runaswan parlaj espiritusqa, Diospa enemigosnin kanku, chinkachisqa kanankupajtaj juchachasqa kashanku (Judas 6). Paykunaqa, llullas kanku, wañusqa runaman tukuspa rikhurinku ima. ¿Imatá ruwawaj uj amigoyki waj runaman tukuspa ñakʼarichisuyta munasqanta yachaspa? Chayri, ¿imatá ruwawaj Internetpi rejsisqayki runa, qhariwarmi jina puñuykuyta qanwan munajtin? Supaykunaman qayllaykoyqa, astawanraj ñakʼarichisunkiman. Chayrayku tojllasninkumanta karunchakunaykipaj tukuy imata ruwanayki tiyan. ¿Imaynamantá?

Éfeso llajtamanta wakin runas, Diospa Palabran layqeriosta juchachasqanmanta yachakuytawan, yatiri librosninkuta ashkha qolqe valejtinpis “tukuypa rikunantataj ruphaykucherqanku” (Hechos 19:19, 20). Layqeriosqa mana yatiri librosllapichu, jarkʼakunapaj walqasllapichu, tabla de ouija nisqallapichu tarikun, manaqa Internetpi, videojuegospi, peliculaspi ima tarikullantaj. Layqerioswan chhapusqa imas kapusojtenqa ruphaykuchiy.

Kay yachaqanapi, Barbaramanta, Joaquinmanta ima parlarerqanchej. Paykunaqa, cartas de tarot nisqanejta “sajra” warmis wasinman rinankuta, mana uyarinankuta, ni imata japʼikunankuta ima yacharqanku. Chaywanpis Jehovamanta sutʼinchajkunamanta iskay hermanas Connie, Gudrun sutiyoj wasinkuman rejtinku, cheqa Diosmanta willarqanku. Bárbara, Joaquín ima, layqeriosta ruwashasqankuta, chay hermanasman willarqanku, chay hermanastaj layqeriosta Biblia juchachasqanta rikucherqanku. Chayraykutaj chay qhariwarmeqa, Bibliamanta yachakorqanku.

Pisi tiemponmantaj, kay qhariwarmeqa layqeriospi manaña chhapukorqankuchu. Jehovamanta sutʼinchajkunaqa, supaykuna mana jinallata saqenankuta nerqanku. Chaymantapachataj Joaquín, Bárbara ima ashkha chʼampaykunapi rikukorqanku, supaykunataj mayta ñakʼaricherqanku. Sapa chʼisi mayta manchachikoj kanku, waj wasiman ripuspapuni supaykunamanta samakorqanku. Ñakʼarishajtinku kay Salmo 55:22 nisqan mayta kallpacharqa, chaypi nin: “Payqa sinchʼita sayachisonqa. Payqa cheqan runata ni jaykʼaj urmajta saqenqachu”, nispa. Jehovaqa, chay qhariwarmita layqeriosta saqesqankumanta bendecerqa, tiemponmantaj supaykunaqa, paykunamanta ayqerqanku. Kunantaj Joaquín, Bárbara ima cheqa Dios Jehovata may kusiywan yupaychashanku.

Bibliaqa, Diospa bendicioninta japʼinapaj “Diosman kʼumuykukuychej. Kuraj Supaypa contranta sinchʼita sayaychej, paytaj qankunamanta ayqenqa. Diosman astawan qayllaykuychej; paypis qayllamusonqachej”, niwanchej (Santiago 4:7, 8). Chayta ruwanki chayqa, Tukuy Atiyniyoj Dios supaykunamanta kacharichisonqa. Joaquín, Bárbara ima llakiyninkupi Jehová Dios mayta yanapasqanrayku, Salmo 121:2 nisqanta, paykunapis ninku: “Yanapayneyqa Tata Diosmanta jamun”, nispa.

[Sutʼinchaykunasnin]

[11 paginapi sutʼinchaynin]

Layqeriosqa, Diosman qayllaykunapaj mana yanapawanchejchu

[12 paginapi sutʼinchaynin]

“Diosman astawan qayllaykuychej; paypis qayllamusonqachej.” (SANTIAGO 4:7, 8)