Karunchakusun demoniokunapa rurasqanmanta

Bárbara * sutiyoq warmim warmallaraq kachkaspan revelacionninpi imapas pasananmanta qawayta qallaykurqa, pipas mana rimachkaptinmi rimaykunata uyarirqa. Wañusqa ayllunkunawan rimasqanmantapas nirqam. Qosan Joaquinpiwanmi espiritismomanta librokunata leerqaku hinaspam naypes cartakunawan allin qawayta yacharurqaku. Chaywan achka qollqe gananankupaq kasqanmantam cuentata qokururqaku hinaptinmi negocio rurasqankupas allin karqa. Huk punchawmi chay naypes qawasqankuwan yacharurqaku iskay warmikuna wasinkuman chayamunankumanta chaynataq mana chaskinankutapas.

ESPIRITISMO nisqankupi creeyqa yanqapaq hina kaptinpas, allpantinpim achka runakuna chaymanta yachayta munanku. Tukuy hinastinpim mana allinmanta harkachikunankupaq kaqkunata servichikunku, pukllankutaqmi tablas ouija nisqankuwanpas, layqakunatam tapukunku hamuq tiempopi mana allinkunamanta cuidakunankupaq. Alemania nacionpim huk revista nirqa: ‘Internetnintakamam achka runakuna layqa ruraymanta astawan yachayta munachkanku’ nispa. (Focus.)

¿Yachankichu espiritismomanta Biblia ima nisqanta? Ima nisqanmanta yachaspaykiqa admirakunkichá.

¿Ima nintaq Bibliaqa?

Diosmi ñawpa Israel nacionta kamachirqa: “Amam qamkuna ukupiqa kanqachu adivinaqkuna nitaq hamuq tiempomanta willakuq tukuqkunapas nitaq musyaqkunapas nitaq brujokunapas nitaq layqakunapas nitaq adivinota tapukuqkunapas nitaq mana allin espiritu tapukuqkunapas nitaq espiritistakunapas. Chaykuna ruraqtaqa Tayta Diosmi millakun”, nispa (Deuteronomio 18:10-12). ¿Imanasqataq Diosqa chay ruraykunata cheqnin?

Barbaramantawan Joaquinmanta qawamusqanchikman hinam achka runakuna piensanku espiritistakunapa yanapayninwan wañusqakunawan rimay atisqankuta. Chaynatam creenku wañusqakunapa espiritun hinalla kawsasqanmanta religionkuna yachachiptin. Bibliaqa manam chaynatachu yachachin aswanqa ninmi: “Manam imatapas yachanchu wañuqkunaqa”, nispa (Eclesiastes 9:5). Chaymantapas Bibliaqa puñuywanmi wañuytaqa tupachin, puñuspaqa manam imatapas musyanchikchu  (Mateo 9:18, 24; Juan 11:11-14). * Hinaptinqa, ¿imanasqataq ninku wañusqakunawan rimasqankuta? ¿Atichwanchu paykunawan rimayta?

¿Ima nintaq Bibliaqa demoniokunamanta?

Bibliaqa ninmi kay Pachapi Jesus kachkaptin demoniokuna paywan rimasqanmanta. Marcos 1:23, 24 nisqanman hinam Jesusta huk demonio nirqa: “Ñoqaqa reqsikim pim kasqaykita”, nispa. ¿Yachankichu qamtapas reqsisusqaykita? ¿Imatataq paykunamanta qamqa yachanki?

Runakunata manaraq unanchachkaspanmi Jehová Diosqa mana yupay atina angelkunata unancharqa. Runakunamantaqa aswan atiyniyoqmi paykunaqa kanku (Job 38:4-7; Hebreos 2:6, 7). Diospa munayninta ruranankupaqmi unanchasqa karqaku. Paykunamantam Biblia nin: ‘Angelkuna, Tayta Diostayá alabaychik. Kallpasapakuna, payllatayá alabaychik. Kamachisqan ruraqkuna alabaychik’, nispa (Salmo 103:20).

Bibliaqa nintaqmi tiempopa risqanman hina wakin angelkuna Diosta mana kasukuspan Allpa pachaman uraykamusqankumanta. ¿Imanasqa? Huknin kaq angelmi Adantawan Evata engañarurqa Unanchaqninmanta karuncharunanpaq. Chayta rurasqanwanmi chay angelqa Satanas Diabloña rikurirurqa, chay ninanqa Diospa contranpi llulla rimaq ninanmi (Genesis 3:1-6).

Wakin angelkunapas ‘saqerurqakum yachananku sitiota’ hinaspam runayaruspanku kay Allpa pachaman uraykamurqaku buenamoza warmikunawan kanankupaq (Judas 6; Genesis 6:1, 2). Chay mana kasukuq angelkunaqa churinkunapiwanmi runakunata ñakarichirqaku. Paykunapa huchanpim runakuna “dañanakuyllapiña kawsarqaku”. Chaymi Diosqa Noeypa tiempopi Sinchi parawan chay runakunata wañurachirqa. Yachankipaschá chay hatun desgraciamantaqa (Genesis 6:3, 4, 11-13).

Kay pachapi yaku huntaruptinmi chay angelkunaqa aycha cuerponkuta saqespanku cieloman kaqlla kutirqaku. Ichaqa manañam Diosqa saqerqachu qallariypi kasqanku sitioman kutinankutaqa aswanmi tantearqa ‘tutayaypi’ hinaña kanankupaq (2 Pedro 2:4, 5). Bibliam chay mana kasukuq angelkunata ‘demoniowan’ sutichan (Santiago 2:19). Paykunam espiritistakunataqa yanapan.

¿Imatam demoniokunaqa munanku?

Demoniokunaqa runakunata engañaspam Jehová Diosmanta karunchayta munanku. Layqakunapa admirakuypaq rurasqankuta qawasqankum runakunata harkan Diosmanta yachaspa payman asuykunankuta.

Chaymantapas demoniokunapa kamachiqnin Satanasmi Jesusman ‘qawachirqa kay pachapi llapallan nacionkunata chaynataq sumaq kaynintapas’. ¿Imaraykutaq chaynata rurarqa? Satanasmi nirqa: “Tukuy kaykunatam qosqayki qonqorakuykuspa adorawaptikiqa”, nispa. Kaywanpas musyanchikmi Satanaswan demoniokunaqa yupaychasqa kay munasqankuta. Jesusqa Jehová Dioslla yupaychaytam munarqa, manam huktaqa (Mateo 4:8-10).

Kay tiempopiqa demoniokunaqa manam suti rikuyllachu runakunaman rikurin. Ichaqa mana musyayllatam  kaykunata servichikun: coca qawayta, naypes cartakuna qawayta chaynataq runakunata engañanankupaq horóscopo nisqankutapas. Ama chay toqllapiqa wichiychu. Chaykunaqa manam yanapawanchikmanchu mana yachasqanchik kaqkunamanta yachanapaqqa. Demoniokunaqa espiritismowanmi otaq layqa ruraywanmi runakunata engañan Jehová Diosta mana yupaychanankupaq. Chay toqllanpi wichiq runakunatam anchata ñakarichin. Chayna tarikuspaykiqa, ¿imaynatam demoniokunamanta librakuwaq?

Imaynatam librakuwaq

Ama engañachikuychu, chay demoniokunaqa Diospa enemigonmi kanku, paykunaqa chinkachisqam kanqaku (Judas 6). Wañusqakunapa rantinpi rimaq tukuspankum runakunata engañanku. ¿Imaynataq sientikuwaq confianzapaq hapisqayki amistadniki llullakuspa engañasusqaykimanta cuentata qokuspaqa? ¿Imatataq rurawaq internetnintakama rimasqayki runa abusaq kaptinqa? Espiritismontakama demoniokunawan chaqrukuyqa ancha sasachakuypim tarichiwachwan. Paykunamanta karunchakunaykipaq kallpanchakuy. ¿Imaynatam karunchakuwaq?

Espiritismomanta Bibliapa nisqanta yacharuspankum Efeso llaqtapi kaqkuna layqa ruranankupaq libronkuta kañarurqaku. Bibliam willan ‘llapallanpa ñawpaqninpi kañasqanku’ libronkuqa achka qollqepa chanin kasqanmanta (Hechos 19:19, 20). Chay layqakunapa libronkunamanta, mana allinmanta harkachikunapaq kaqkunamanta chaynataq tablas ouija nisqankumantapas kantaqmi internetpipas espiritismomanta achka willakuykuna. Tukuy chaykunamantam karunchakunayki demoniokuna mana munaychakusunaykipaq.

¿Yuyachkankichu qallariypi rimasqanchik Barbaramantawan Joaquinmanta? Naipes cartantakamam yacharurqaku iskay warmikuna wasinman rinanmanta, yacharqakutaqmi paykunata mana uyarinankupaq nitaq imatapas mana chaskinankupaq. Chay warmikunam karqa Connie hinaspa Gudrun sutiyoq Testigokuna, paykunam wasinman chayaruspanku Jehová Diosmanta willarqaku, Barbarawan Joaquinñataqmi uyarinankupaq tantearqaku. Rimasqankuman hinam espiritismomantaña rimarqaku hinaptinmi Testigokunaqa Bibliapa ima nisqanta qawachirqaku. Chaymi Barbarawan Joaquinqa Biblia estudiayta munarqaku.

Paykunaqa chayllam demoniokunamanta karunchakunankupaq kallpanchakuyta qallaykurqaku. Testigokunapa yachachisqanwanmi cuentata qokurqaku demoniokunamanta karunchakuyqa sasa kasqanta. Chaymantapacham Joaquintawan Barbarataqa demoniokuna ñakarichirqaku. Sapa tutam manchakuypi tarikurqaku hinaptinmi huklaw wasimanña astakururqaku, chaypiqa hawkañam tarikurqaku. Chayna sasachakuypi tarikuptinkum Filipenses 4:13, NM nisqanwan kallpanchakurqaku, chaypim nin: ‘Tukuy imata ruranaypaqmi kallpayoq kani kallpata qowaqniy yanapawaptin’, nispa. Chayna kallpanchakusqankutam Jehová Dios bendecirqa hinaptinmi tiempo pasasqanman hina demoniokunaqa manaña ñakarichirqachu. Kunanqa Jehová Diostañam kusisqa servichkanku.

Jehová Diospa bendicionnin chaskiy munaqkunatam Biblia nin: ‘Diablopa contranpi qaqa hina sayaychik, chaynapim Diabloqa qamkunamanta ayqekunqa. Diosman asuykuptikichikqa paypas asuykusunkichikmi’, nispa (Santiago 4:7, 8). Demoniokunamanta librakuyta munaptikiqa Jehová Diosqa yanapasunkimanmi. Joaquinwan Barbaram demoniokunawan sasachakusqankumanta yuyarispanku tukuy sonqonkuwan reqsikunku Bibliapa kayna nisqanta: ‘Yanapakuyqa hamun Tayta Diosmantam’, nispa (Salmo 121:2).

[Willakuykuna]

[27 kaq paginapi suti rikuylla kaq willakuy]

Espiritistakunapa admirakuypaq rurasqankum runakunata harkan Dios reqsinankuta

[28 kaq paginapi suti rikuylla kaq willakuy]

“Diosman asuykuptikichikqa paypas asuykusunkichikmi.” (SANTIAGO 4:8)