¿Nitu lanikan komo makgtanukan kʼtaskuwan?

Bárbara * katuwa tuku xʼakxilha chu xkgaxmata akxni aktsujku xwanit. Na xwan pi xkatachuwinanit xparientes tiku nikgonita. Bárbara chu Joaquín akxtum xʼakxilhkgo libro xla taskuwan chu lu katsinikgolh la nalikgalhtawakgakgo cartas xla tarot. Akxni katsinikgolh likgalhtawakgakgo katsikgolh pi tlan xlitlajakgolh lhuwa tumin chu chuna kakitaxtunilh kxnegocioskan. Milh kilhtamaku cartas kawanikgolh pi wi tiku lixkajni likatsikgo xʼamakgolh kalakgatlakgnikgo xmalakchakan chu kawanikgolh la natlawakgo xlakata nitu xkatlawanika.

MASKI tapuwan pi taskuwan titaxtunita kilhtamaku akxni xtatlawa, la uku lhuwa tiku lu lakgatikgo chu lu litatsamanit kakilhtamaku. Lhuwa latamanin linkgo tuku lakpuwankgo pi nakamakgtaya, likgamankgo nema wanikan tabla ouija chu kakgalhskinkgo skuwananin xlakata nakatsikgo tuku aku nala o nitu nakaʼakgspula. Kʼakgtum artículo nema xlimin xatítulo «Lucifer y las computadoras», nema xmin krevista Focus xalak Alemania, uma tuku xwan «Internet tlawanit pi lhuwa latamanin nakanajlaniparakgo taskuwan».

¿Xkatsiya pi Biblia lichuwinan xlakata taskuwan? Max kaks nalilakawana wantuku wan xlakata taskuwan.

¿Tuku wan Biblia xlakata taskuwan?

Limapakgsin nema xkamaxkinit Dios israelitas xwan: «Ni xliʼanat kmilakgstipan [...] tiku nawan tuku aku nala, tiku liskuja magia, nipara wa tiku nawan pi wi tuku naʼakgspula achatum, tiku putsa skuwana, nipara tiku nakgalhskin skuwana, tiku lakputsanani tuku aku nala, nipara chatum tiku katachuwinan ninin. Xlakata putum tiku chuna tlawa Jehová nipara tsinu akxilhputun» (Deuteronomio 18:10-12). ¿Tuku xlakata Jehová ni akxilhputun tuku xla taskuwan?

Tuku lichuwinaw xapulana limasiya pi lhuwa lakpuwankgo pi tlan katachuwinankan tiku nikgonita chu lakpuwankgo pi wa xʼespiritujkan tiku nikgonit katachuwinankgo skuwananin. Wa uma tuku masiyakgo lhuwa takanajla, pi tiku nikgonita lamakgo la espíritus. Pero, Biblia ni chuna masiya wata wan pi «wantiku nikgonit, xlakan nialh tuku katsikgo» (Eclesiastés 9:5). Lichuwinan pi linin xtachuna la akxni  liwana lhtatakan, chu ni katsikan tuku lama (Mateo 9:18, 24; Juan 11:11-14). * Pero ¿tuku xlakata wankgo latamanin pi katachuwinalh tiku nikgonita? ¿Tuku xlakata katuwa tuku akxilhkgo makgapitsin?

Akxni katachuwinankan espíritus

Evangelios lichuwinankgo pi akxni Jesús latamalh kkatiyatni, katachuwinalh espíritus. Anta kMarcos 1:23, 24 wan pi chatum «xaxkajwala spiritu» wanilh Jesús «kkatsi nti wix». ¿Katsiya pi espíritus na lakgapaskgoyan? Pero wix, ¿tuku katsiya xpalakatakan?

Akxni Jehová nina xtlawa latamanin pulana katlawalh lhuwa ángeles. Umakgolh lu lakgtliwakgan ni xtachuna la lakchixkuwin (Job 38:4-7; Hebreos 2:6, 7). Lu lakgskgalalan chu lu lakgtliwakgan, katlawaka xlakata natlawakgo xtalakaskin Dios. Chuna wa salmista akxni kilhtlilh: «Kalichiwinantit ixlilanka kintikukan [Jehová] wakg wixin lakgtliwekgen ixángeles, wixin ti tlawayatit ixlimapakgsin» (Salmos 103:20).

Biblia wan pi milh kilhtamaku makgapitsi ángeles katachuwinankgolh latamanin pero Jehová nitu xkamaxkinit talakaskin. ¿Tuku xlakata katachuwinalh? Xapulana ángel kaʼakgskgawilh Adán chu Eva xlakata xtamakgatlinikgolh Jehová. Uma tlawalh pi xlilakgapaska Satanás, Akgskgawini, tiku nitlan tuku limawakanan chu xtalatlawana Dios (Génesis 3:1-6).

Alistalh makgapitsi ángeles «ni tamakgaxtakgkgolh ntani [...] [k]xputawilhkan» kʼakgapun chu tlawakgolh xmaknikan la xla lakchixkuwin xlakata xkatatawilakgolh xalakswan lakpuskatin unu kkatiyatni (Judas 6; Génesis 6:1, 2). Umakgolh ángeles tiku ni kgalhakgaxmatkgolh Dios chu xkamanan kamakgapekuankgolh latamanin. Wa xkuentajkan xlakata xʼanalh lhuwa lachipat katiyatni, xlitsama tiku lakatsalakgo limapakgsin. Pero, Dios masputulh putum latamanin tiku nitlan xlikatsikgo akxni makamilh lanka munkaklat kxkilhtamaku Noé. Max wix kgaxpatnita uma tuku tilalh (Génesis 6:3, 4, 11-13).

Xlakata lhuwa senalh, ángeles tiku xlamakgo kkatiyatni espíritus wamparakgolh. Pero, Malakatsukina nialh kamaxkilh talakaskin anta nakatatawilakgo makgapitsi ángeles xlakata kalakgmakganka, xtachuna la xkawilika «ntani luwa akgtsisa» (2 Pedro 2:4, 5). Biblia kawani, «demonios» uma ángeles tiku ni kgalhakgaxmatkgolh Dios (Santiago 2:19). Wa uma tiku matlawinankgo taskuwan.

¿Tuku putsakgo demonios?

Demonios katachuwinankgo latamanin xlakata ni nakakninanikgo xaxlikana Dios, Jehová. Tuku katsinikgo tlawakgo, chu litliwakga nema kgalhikgo skuwananin kaj limakglhtikgo kilhtamaku tiku kastalanikgo chu tlawakgo pi ni nalakgapaskgo xaxlikana Dios chu nila tlan natalalinkgo.

Tlan nakatsiyaw atanu tuku na tlawaputunkgo demonios akxni likgalhtawakgayaw tuku wanilh Jesús xmapakgsinankan, Satanás wanilh pi xʼama maxki «putum tamapakgsin xalak kakilhtamaku chu takaknin nema xkgalhi». ¿Tuku xlakaskin? Akgskgawini skinilh «komo wix nakintatsokgostaniya chu nakinkakninaniya», Satanás chu demonios lakaskinkgo nakamaxkikan kakni. Pero Jesús nikxni maxkilh kakni atanu komo ni wa Jehová (Mateo 4:8, 9, NM).

La uku, demonios ni katachuwinankgo latamanin. Wata maklakaskin tuku max nalakpuwanaw pi nitu  kintikatlawanin la tiku maklakaskinkgo bola xla cristal, limaklakaskinkgo baraja xla tarot, tuwan nema litlawakan té, kape nema akgataxtu ktaza, tapixnu nema lakpuwankgo pi nakamakgtaya chu horóscopos. ¡Ni kamasta talakaskin naʼakgskgawiyan! Ni xlikana nakatsiya tuku ni lakgapasa komo namakgtanuya ktaskuwan. Demonios limaklakaskinkgo taskuwan xlakata lhuwa tiku lakgatikgo chu kaliʼakgskgawikgo latamanin xlakata ni nakakninanikgo Jehová. Akxni nila kamatlawikgo pi latamanin namakgtanukgo ktaskuwan lhuwa tuku nitlan katlawani. Komo chuna akgspulaman ¿tuku tlan natlawaya xlakata namakgxtakgkgoyan?

Tuku natlawaya xlakata namakgxtakgkgoyan

Ni kamasta talakaskin naʼakgskgawikgoyan: espíritus tiku katachuwinankgo latamanin ni talalinkgo Dios chu nakamalakgsputukan (Judas 6). Kaj litaxtukgo tiku nikgonita chu akgsaninanin. ¿La xmakgkatsi komo xkatsi pi wi tiku mi amigo litaxtuma chu kaj tlawaniputunan tuku nitlan? O ¿tuku xtlawa komo xkatsi pi tiku lakgapasti kʼInternet kaj kaʼakgskgawi latamanin xlakata nakatatalakgxtumi? Komo natlawayaw xtalakaskin demonios tlakg tuwa kitaxtu. Ni kakgalhi putum tuku natlawa pi nalakgtalakatsuwikgoyan demonios. ¿Tuku tlan natlawaya?

Akxni katsinikgolh tuku xwan kBiblia xlakata taskuwan, makgapitsi latamanin xala makgasa kachikin Efeso xlakaskinka akxilhkgolh namasputukgo tuku xkgalhikgo xla taskuwan. Biblia wan pi «anta xlakatin lilhuwa ntilhkuyukgolh», maski lu lhuwa xtapalh xwanit (Hechos 19:19, 20). La uku lhuwa anan xlakata taskuwan ni kajwatiya libros, litamakgtay nema kgalhikgokan xlakata lakpuwankgo pi nitu katilanikgolh, tabla ouija, na lhuwa tuku anan kʼInternet. Mililakxtlawat putum tuku natlawa pi natalalipinkgoya demonios.

¿Kalakapastaka Joaquín chu Bárbara, tiku pulana kalichuwinaw akxni matsukiw uma artículo? Cartas xla tarot xkamakatsininit pi wi tiku «lixkajni likatsikgo» xʼama kalakgapaxialhnan kxchikkan chu kawanilh pi ni xkakgaxmatnikgolh chu nitu xkamakglhtikgolh. Pero akxni Connie chu Gudrun, xtatayananin Jehová, lakgatlakgkgolh xmalakchakan kawanikgolh pi xkalinima xalakwan xalaksasti xlakata xaxlikana Dios, xlakan kakgaxmatnikgolh. Alistalh lichuwinankgolh xlakata taskuwan, chu xtatayananin Jehová limasiyanikgolh Biblia tuku wan xlakata taskuwan. Joaquín chu Bárbara tsukukgolh takgalhtawakgakgo xtatayananin Jehová.

Joaquín chu Bárbara tunkun makgxtakgkgolh tuku xla taskuwan. Xtatayananin Jehová kawanikgolh pi demonios ni xlakgatikgolh komo nialh xkatlawanikgolh kuenta. Akxni makgxtakgkgolh taskuwan lu lhuwa taʼakglhuwit tsukukgolh kgalhikgo chu lhuwa tuku xkatlawani demonios. Chali chali akxni xtsiswan lu xpekuankgo, demonios nialh lu kasakgalikgolh akxni talakgpalikgolh kʼatanu chiki. Akxni lu nitlan xtitaxtumakgolh kamakgtayalh tuku wan uma texto: «Kkgalhiy litliwakga nema putum kmatlaniy, xlakata tiku kimaxkiy litliwakga» (Filipenses 4:13, NM). Jehová kasikulunatlawalh xlakata makgxtakgkgolh taskuwan, chu demonios tsinu tsinu kamakgxtakgkgolh. La uku Joaquín chu Bárbara xatapaxuwan skujnanimakgo xaxlikana Dios.

Anta kBiblia kinkawaniyan pi putum tiku makglhtinamputunkgo xtasikulunalin Jehová, natlawakgo uma: «Dios nti nkatamakamastanitit, na kalakgapaxtokgtit [o katatlankaninitit] Akgskgawini, chuna nakatsalaniyan. Wa Dios nti nkatalakatsuwinitit, na nakatalakatsuwiniyan xla» (Santiago 4:7,8). Komo lakaskina, Tiku kgalhi Putum litliwakga namakgtayayan xlakata namakgxtakgkgoyan demonios. Akxni Joaquín chu Bárbara lakapastakkgo tuku titaxtukgolh wankgo pi xlikana tuku wan Salmo 121:2: «Ki Dios kimalakgachani tamakgtayan».

[Notas nema wilakgo kpágina]

[Tuku wan página 11]

Taskuwan tlawa pi latamanin nila natalalinkgo Dios

[Tuku wan página 12]

«Wa Dios nti nkatalakatsuwinitit, na nakatalakatsuwiniyan xla.» (SANTIAGO 4:7, 8)