I Gat Rong Long Mekim Wok Bilong Ol Spirit Nogut?

Kirap long taim Barbara a i yangpela yet, em i bin lukim ol visen na harim ol nek. Em i bilip olsem em i save toktok wantaim ol wanblut i dai pinis. Em wantaim man bilong em Joachim i ritim ol buk i stori long wok bilong ol spirit nogut, na ol i save gut long ritim ol kas tarot. Ol kas i tokim ol olsem ol bai kisim bikpela mani, na tru tumas ol i kisim bikpela mani long rot bilong wok bisnis. Wanpela taim, ol kas i givim tok lukaut long ol olsem ol man nogut bai kam long haus bilong ol na i tokim ol long samting ol i mas mekim bilong sakim ol.

TRU sampela man i ting olsem bilip long wok bilong ol spirit nogut em samting bilong bipo, tasol planti man long nau i gat laik long save long ol samting i gat narakain strong. Long olgeta hap ol man i save werim ol paspas, yusim ol Wija bod, na toktok wantaim ol glasman bilong save long samting bai painim ol long bihain o bilong banisim ol long ol samting nogut. Long wanpela atikol i gat nem “Laptop na Lusifa,” nius Focus bilong Jemani i tok: “Intenet i strongim gen wok bilong ol spirit nogut.”

Yu save olsem Baibel i toktok long wok bilong ol spirit nogut? Ating bai yu kirap nogut long kisim save long tok bilong Baibel long dispela samting.

Baibel i Tok Wanem Long Wok Bilong Ol Spirit Nogut?

Lo em God i bin givim long lain Israel bilong bipo i tok: “Yupela i no ken larim ol manmeri bilong yupela i mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim tewel bilong ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut.” (Lo 18:10-12) Bilong wanem Baibel i mekim kain strongpela tok olsem long wok bilong ol spirit nogut?

Olsem tok long kirap bilong dispela stori i kamapim, planti man i bilip olsem ol man i stap laip ol inap toktok wantaim ol man i dai pinis, na tu, ol i bilip olsem olkain save ol man i kisim long wok bilong ol spirit nogut i kam long ol man i dai pinis. As bilong ol kain bilip olsem em  tok ol misin i skulim ol man long en, olsem taim man i dai em i go stap long ples spirit. Tasol Baibel i tokaut klia olsem: “Ol man i dai pinis, ol i no inap save long wanpela samting.” (Saveman 9:4, 5) Baibel i stori long ol daiman olsem ol i slip i dai, na ol i no save long wanpela samting. b (Matyu 9:18, 24; Jon 11:11-14) Sapos olsem, ating bai yu askim, Olsem wanem ol man inap kisim ol narakain save i kam long ples spirit? Wanem samting i as bilong en?

Toktok Wantaim Ol Spirit Nogut

Ol Gutnius i stori olsem taim Jisas i stap long graun em i bin toktok wantaim ol spirit. Mak 1:23, 24 i stori long wanpela “spirit nogut” i tokim Jisas olsem: “Mi save yu husat tru.” Ol spirit nogut i save tu long yu. Tasol olsem wanem? Yu save long ol?

Paslain long God i wokim ol man, em i bin wokim planti pikinini spirit, olsem ol ensel. (Jop 38:4-7) Laip bilong ol ensel i narapela kain long laip bilong ol man. (Hibru 2:6, 7) Ol i gat bikpela strong na save, na God i wokim ol long bihainim laik bilong em. Man bilong raitim song i tok: “Yupela olgeta ensel bilong Bikpela, yupela i gat bikpela strong. Yupela i save bihainim tok bilong en, yupela i save putim yau gut long tok bilong en.”—Song 103:20.

Baibel i tokaut olsem bihain ol ensel i kirap mekim ol samting em God i no orait long en. Bilong wanem ol i mekim olsem? Fes ensel husat i bin mekim olsem, em i bin yusim pasin giaman bilong pulim namba 1 man na meri, em Adam na Iv, long lusim God em Man Bilong Wokim ol. Taim em i mekim olsem, em i kamap Satan na Devil, olsem man bilong bagarapim gutnem na birua long God.—Stat 3:1-6.

Bihain, sampela narapela ensel i “lusim ples stret bilong ol” long heven, na ol i tanim i kamap man, na ol i kirap maritim ol naispela meri bilong graun. (Jut 6; Stat 6:1, 2) Ol dispela bikhet ensel na ol traipela hapkas pikinini bilong ol i mekim nogut tru long ol man na pretim ol, olsem na pasin bilong “pait na bikhet” i pulap tru long graun. Ating yu save pinis long stori bilong Baibel long olsem wanem God i pinisim ol man nogut long rot bilong Bikpela Tait long taim bilong Noa.—Stat 6:3, 4, 11-13.

Taitwara i mekim na ol spirit nogut i mas senisim gen bodi na i go bek long ples spirit. Tasol God i no larim ol i go bek long “ples stret bilong ol,” nogat, em i kalabusim ol na i olsem “ol i stap long ol hul i tudak tru.” (2 Pita 2:4, 5) Baibel i kolim ol dispela bikhet ensel olsem “ol spirit nogut.” (Jems 2:19) Ol i as bilong ol wok bilong ol spirit nogut.

Ol Spirit Nogut i Gat Wanem Laik?

Namba 1 laik bilong ol spirit nogut em long pulim ol man long lusim pasin bilong lotuim God tru, em Jehova. Dispela narakain strong em ol man bilong mekim wok bilong ol spirit nogut i tok ol i gat, em bilong pulim na pasim tingting bilong ol man bambai ol i no ken kisim save long God na pas gut wantaim em.

Namba 2 laik bilong ol spirit nogut i stap ples klia long samting em lida bilong ol Satan i bin mekim bilong traim Jisas. Satan i laik givim “olgeta kingdom bilong graun wantaim ol nambawan gutpela samting bilong ol” long Jisas. Orait, Satan i laik bai Jisas i mas givim wanem samting long em? Em i tok: “Brukim skru na lotu long mi.” Tru tumas, Satan na ol spirit nogut i laik bai ol man i mas lotuim ol. Tasol Jisas i sakim dispela tingting na em i no lusim God na lotu i tru.—Matyu 4:8-10.

 Long nau, ol spirit nogut i no save toktok wantaim ol man long ples klia olsem ol i bin mekim long Jisas, nogat. Ol i wok long pulim ol man long rot bilong ol samting olsem glas bal, ti lip, kas tarot, na horoskop. No ken larim ol dispela samting i pulim yu! Ol dispela samting i no rot bilong kisim ol narakain save i kam long ples spirit. Ol man i laik kisim save long olkain wok bilong ol spirit nogut, na ol spirit nogut i save yusim dispela bilong pulim na kalabusim ol man bambai ol i no ken lotuim Jehova. Taim ol dispela samting i no pulim ol man, orait ol spirit nogut i save pretim na mekim nogut long ol man em ol i kalabus pinis long olkain wok bilong ol. Sapos dispela samting i painim yu, yu inap mekim wanem bilong lusim dispela kalabus?

Rot Bilong Sakim Wok Bilong Ol Spirit Nogut

Yu mas save olsem ol spirit husat i toktok wantaim ol man, ol i birua bilong God na ol bai bagarap. (Jut 6) Ol i save giaman na mekim ol man i ting olsem ol i spirit bilong ol man i dai pinis. Yu bai pilim olsem wanem sapos yu painimaut olsem wanpela man i tok em i pren bilong yu, tasol em i giaman na i laik pulim yu long lusim ol samting we inap helpim yu? Yu bai mekim wanem sapos yu painimaut olsem yu no bin save na yu poromanim wanpela man long Intenet na em i man bilong mekim pasin sem? Pasin bilong wok wantaim ol spirit nogut, dispela samting i nogut moa. Yu mas mekim olgeta samting yu inap mekim bilong lusim dispela pasin. Olsem wanem yu ken mekim olsem?

Taim ol manmeri long Efesus bilong bipo i kisim save long tok bilong Baibel long wok bilong ol spirit nogut, ol i luksave olsem ol i mas bagarapim ol buk i stori long ol dispela samting, maski ol buk i gat bikpela pe tru. Ol i “kukim [ol buk] long ai bilong olgeta manmeri.” (Aposel 19:19, 20) Long nau i gat kain kain samting bilong wok bilong ol spirit nogut olsem ol buk, paspas, Wija bod, na Intenet. Yu mas sakim olgeta kain samting we inap pulim yu long insait long wok bilong ol spirit nogut.

Tingim tupela marit em yumi stori long ol long kirap bilong dispela atikol. Ol i lukluk long ol kas tarot na ol i kisim tingting olsem ol man nogut bai kam long haus bilong ol na ol i no ken harim tok o kisim sampela samting long ol. Tasol taim Connie na Grudrun, tupela Witnes Bilong Jehova, i kam long haus bilong ol na tokim ol olsem ol i bringim gutnius bilong God, Joachim na Barbara i orait long harim tok bilong ol. Ol i toktok i go na ol i kirap stori long wok bilong ol spirit nogut, na Connie na Gudrun i kamapim ol stretpela save bilong Baibel long dispela samting. Kirap long dispela taim, Connie na Gudrun i kirap stadi long Baibel wantaim ol.

I no longtaim na Joachim na Barbara i lusim olgeta wok bilong ol spirit nogut. Ol Witnes i bin tokim ol olsem ol spirit nogut bai i no amamas long dispela samting. Na tru tumas, ol spirit i mekim nogut tru long tupela na tupela i karim bikpela hevi. Inap sampela haptaim, long olgeta nait ol i pret, olsem na ol i muv i go long narapela haus na dispela i helpim ol. Taim ol i karim ol dispela hevi, ol i bilip strong long tok bilong Filipai 4:13, em i tok: “God i givim pawa long mi, na long dispela rot mi gat strong long mekim olgeta samting.” Jehova i blesim hatwok bilong ol, na bihain ol spirit nogut i no wok long bagarapim ol moa. Long nau, Joachim na Barbara i amamas long lotuim God tru, em Jehova.

Olgeta man husat i laik bai Jehova i blesim ol, Baibel i kirapim ol olsem: “Yupela i mas daunim yupela yet na stap aninit long God. Tasol yupela i mas sakim Satan, na em bai lusim yupela na ranawe. Yupela i mas i go klostu long God, na em bai kam klostu long yupela.” (Jems 4:7, 8) God Jehova inap helpim yu long kamap fri long ol spirit nogut, na em bai mekim olsem sapos yu laik. Taim Joachim na Barbara i tingim bek olsem wanem ol i bin kamap fri na ol i no insait moa long wok bilong ol spirit nogut, tupela i wanbel long tok bilong Song 121:2, em i tok: “[Bikpela] wanpela tasol i save helpim mi.”

[Ol Futnot]

[Rait long pes 21]

Wok bilong ol spirit nogut i pasim ol man long kamap pren bilong God

[Rait long pes 22]

“Yupela i mas i go klostu long God, na em bai kam klostu long yupela.”—JEMS 4:8