¿Kʼaas wa ta tʼaan le meeniloʼ?

Bárbaraeʼ * káaj u yilik yéetel u yuʼubik baʼaloʼob desde tu x-lóoʼbayanil. Ku yaʼalik bineʼ tʼaanajaʼan xan yéetel u láakʼtsiloʼob kimenoʼob. Tsʼoʼoleʼ letiʼ yéetel Joaquín, u yíichameʼ, ku xakʼaltikoʼob libroʼob ku tʼaanoʼob tiʼ meenil, wa ocultismo, yéetel tu kaʼatúulaloʼob suukchaj u jóoʼskoʼob suerte yéetel u barajasil tarot. Yéetel lelaʼ tu yojéeltoʼob yaan u yantal yaʼab taakʼin tiʼob, ka joʼopʼ u bintiʼob maʼalob tu meyajoʼob. Junpʼéel kʼiineʼ, teʼ barajasoʼ tu yiloʼob yaan u taal kʼasaʼan máakoʼob xíimbaltikoʼob yéetel tiʼ xan tu yiloʼob bix jeʼel u kanáantkubaʼobeʼ.

MAʼ XAANEʼ yaan máaxoʼob jeʼel u tuklikoʼob chéen úuch kaʼach ku beetaʼal baʼaloʼob beyaʼ, baʼaleʼ u jaajileʼ yaʼab máakoʼob beetik xan bejlaʼeʼ. Tuláakal tuʼuxeʼ yaʼab máakoʼob ku meyajtiʼob amuletoʼob, ku báaxtikoʼob tabla ouija, ku binoʼob yiknal j-meen utiaʼal u jóoʼsaʼal u suerteʼob wa utiaʼal bin maʼ u beetaʼal loob tiʼob. Le revista alemana Focusoʼ, tiʼ junpʼéel xook ku kʼaabaʼtik «Lucifer yéetel le computadoraʼoboʼ», ku yaʼalik: «Interneteʼ tsʼoʼok u beetik u kaʼa taaktal u yilaʼal baʼaloʼob yaan yil yéetel pulyaʼajil».

¿A wojel wa le Bibliaoʼ ku tʼaan tiʼ meenil yéetel pulyaʼajil? Maʼ xaaneʼ jeʼel u jaʼakʼal a wóol yoʼolal le baʼax ku yaʼalik tu yoʼolaloʼ.

¿Baʼax ku yaʼalik le Bibliaoʼ?

Le ley tu tsʼáaj u úuchben kaajil Israeloʼ ku yaʼalik: «Mix máak ichileʼex bíin u kʼub u paal utiaʼal j-máansaʼal ich kʼáakʼ, mix u beetkuba j-meenil, mix u táabal u yaʼal baʼaxoʼob ku taal u kʼiinil, mix u beetik u j-pulyaʼajil, mix u beetik u j-wáayil, mix u bin u kʼáatchiʼit le chuchuk naʼatoʼob, mix u kʼáatankil tiʼ pixanoʼob, mix u tʼaan yéetel kimenoʼob. Tumen Yuumtsileʼ u léem pʼeek máaxoʼob beetik le baʼaloʼob[aʼ]» (Deuteronomio 18:10-12). ¿Baʼaxten u pʼeek Dios le baʼaloʼob yaan yil yéetel le meeniloʼ?

Le baʼax úuch tiʼ Bárbara yéetel Joaquín t-aʼalaj tu káajbaloʼ ku yeʼesikeʼ yaʼab máaxoʼob creertik jeʼel u páajtal u tʼaanoʼob yéetel le kimenoʼoboʼ, yéetel ku creertikoʼobeʼ letiʼe kimenoʼob núukik u tʼaan le j-meenoʼoboʼ. Letiʼobeʼ ku creertikoʼob le baʼaloʼobaʼ tumen yaʼab religionoʼob kaʼansikeʼ yaan junpʼéel tuʼux ku bin u «pixan» máak ken kíimik. Baʼaleʼ le Bibliaoʼ ku yeʼesik maʼ jaaj le baʼax ku creertaʼalaʼ tumen ku yaʼalik: «Kimenoʼobeʼ maʼ u yojloʼob mix baʼaliʼ» (Eclesiastés 9:5). Ku yaʼalik xaneʼ le kíimiloʼ bey  jeʼex ken tʼúubuk u wenel máakeʼ, ku pʼáatal maʼatech u tsʼáaik cuenta baʼax ku yúuchul (Mateo 9:18, 24; Juan 11:11-14). * ¿Baʼaxten túun yaan máakoʼobeʼ ku yaʼalikoʼobeʼ tsʼoʼok u tʼaanoʼob yéetel máaxoʼob kimenoʼob? ¿Máax beetik u yúuchul le baʼaloʼobaʼ?

U tʼaan máak yéetel le espirituʼoboʼ

Le Evangelioʼoboʼ ku yaʼalikoʼobeʼ le ka kuxlaj Jesús way Luʼumeʼ tʼaanaj yéetel juntúul espíritu. Marcos 1:23, 24, ku yaʼalikeʼ juntúul demonioeʼ tu yaʼalaj tiʼ Jesús: «Teneʼ in kʼaj óolech». ¿A wojel wa kaʼacheʼ le espirituʼoboʼ u kʼaj óolechoʼob? ¿Baʼax a wojel tu yoʼolaloʼob?

Táanil tiʼ u beetik wíinikoʼob way Luʼumeʼ, Jéeobaeʼ jach yaʼab angeloʼob tu beetaj. Letiʼobeʼ maas yaan u páajtaliloʼob tiʼ wíinik (Job 38:4-7; Hebreob 2:6, 7). Jach yaan u naʼatoʼob yéetel yaan u muukʼoʼob; beetaʼaboʼob utiaʼal u yuʼubikoʼob u tʼaan Dios. Lelaʼ bey u yaʼalik le salmistaoʼ: «¡Muʼukʼaʼan angeleʼex kiʼikiʼtʼanteʼex Yuumtsil! Teʼex ka tsʼoʼokbeskeʼex baʼaxoʼob ku yaʼalik ka a beeteʼex, teʼex, máaxeʼex a kʼubmaj a wóoleʼex a wuʼuyajtʼanteʼex» (Salmo 103:20).

Le Bibliaoʼ ku yaʼalikeʼ ka máan kʼiineʼ jujuntúul angeloʼobeʼ tʼaanajoʼob yéetel wíinikoʼob kex maʼ Jéeoba aʼaltiʼobiʼ. ¿Baʼaxten tu beetoʼob lelaʼ? Le yáax ángel beet lelaʼ tu tusaj Adán yéetel Eva utiaʼal maʼ u beetkoʼob baʼax u kʼáat Dios. Le oʼolal ku yaʼalaʼaltiʼ «Satanás le Diablooʼ», juntúul máax ku tʼaan kʼaas tu contra Dios (Génesis 3:1-6).

Tsʼoʼoleʼ uláakʼ angeloʼobeʼ «tu pʼatoʼob u kajtaliloʼob» teʼ kaʼanoʼ ka tu sutubaʼob wíinikil utiaʼal u taaloʼob way Luʼum utiaʼal u yantal baʼax u yiloʼob yéetel le koʼoleloʼoboʼ (Judas 6; Génesis 6:1, 2). Le angeloʼobaʼ yanchaj u paalaloʼob sen kaʼanal u baakeloʼob, yéetel tumen kʼasaʼanoʼobeʼ jach chʼaʼab saajkil tiʼob. Yoʼolal lelaʼ le Luʼumoʼ «chuup yanil kaʼach yéetel kʼasaʼanil». Baʼaleʼ Dioseʼ tu xuʼulsajtiʼob le ka taal le Búulkabal tu kʼiiniloʼob Noeoʼ. Maʼ xaaneʼ techeʼ a wuʼuymaj u tsikbaltaʼal lelaʼ (Génesis 6:3, 4, 11-13).

Le ka taal le Búulkabaloʼ le kʼasaʼan angeloʼobaʼ tu pʼatoʼob le wíinklil yaantiʼoboʼ, ka suunajoʼob teʼ kaʼanoʼ. Baʼaleʼ Jéeobaeʼ maʼ tu kʼamoʼob tu kaʼatéen bey u angeloʼobeʼ baʼaxeʼ tu tsʼáajoʼob bey «tiʼ taamtam jooloʼob jach éeʼjochʼeʼentak[eʼ]» (2 Pedro 2:4, NM). Le Bibliaoʼ ku yaʼalikeʼ le kʼasaʼan angeloʼobaʼ «demonioʼob» (Santiago 2:19, NM). Letiʼob beetik tuláakal le baʼaxoʼob yaan yil yéetel le ocultismo wa meeniloʼ.

¿Baʼax u kʼáat le demonioʼoboʼ?

Le demonioʼoboʼ maases ku tʼaanoʼob yéetel wíinikoʼob tumen u kʼáatoʼob ka xuʼuluk u meyajtikoʼob Jéeoba, le juntúuliliʼ jaajil Diosoʼ. Le páajtalil ku taal tiʼ le meeniloʼ, chéen ku beetik maʼ u kaanbal máak tiʼ Dios mix u biskuba tu yéetel.

Jeʼel u páajtal k-ojéeltik baʼax uláakʼ u kʼáat u beet le demonioʼob wa k-ilik le baʼax tu beetaj Satanás, le máax nuʼuktikoʼob, le ka tu yaʼalaj tiʼ Jesús jeʼel u tsʼáaik «tuláakal u nukuch kaajiloʼob yóokʼol kaab» tiʼoʼ. ¿Baʼax tu kʼáataj tiʼ Jesús ka u beete? Le Kʼaasilbaʼaloʼ tu yaʼalaj: «Wa ka xoltal a [adorarten]». Jeʼex k-ilkoʼ, Satanás yéetel u demonioʼobeʼ u kʼáat ka adorartaʼakoʼob. Baʼaleʼ Jesuseʼ chéen tu adorartaj u jaajil Dios (Mateo 4:8-10).

Teʼ kʼiinoʼobaʼ le demonioʼoboʼ óoliʼ maʼatech u tʼaanoʼob yéetel wíinik jeʼex u beetkoʼob kaʼacheʼ. Baʼaxeʼ ku yilkoʼob u lúubul  máak tu kʼaboʼob yéetel baʼaloʼob ku tuklaʼal maʼ kʼaastak, jeʼex le sáastunoʼ, u jóoʼsaʼal suerte yéetel barajas wa yéetel jeʼ, u xoʼokol u táan u kʼab máak, wa le horoscopooʼ. ¡Ilawil maʼ a woksikaba tiʼ le baʼaloʼobaʼ! Maʼ jaaj wa jeʼel u yáantkoʼob máak u yojéelt baʼaxoʼob maʼ tu páajtal u yojéeltaʼaleʼ. U jaajileʼ le demonioʼoboʼ ku aprovechartikoʼob uts tu yich máak le baʼaxoʼob yaan yil yéetel meenil utiaʼal u beetkoʼob maʼ u adorartaʼal Jéeoba. Tsʼoʼoleʼ ken u yiloʼob maʼ tu páajtal u táabsikoʼob máakeʼ, ku beetkoʼob u sen antal talamil ichil u kuxtaloʼob. Wa yaantech junpʼéel talamil beyaʼ, ¿baʼax jeʼel a beetik utiaʼal u pʼatkechoʼobeʼ?

Baʼax jeʼel u páajtal a beetkeʼ

Maʼ a chaʼik a tuʼusul: le espirituʼob ku tʼaanoʼob yéetel wíinikoʼoboʼ u enemigoʼob Dios yéetel maʼ kun xáantal ken xuʼulsaʼakoʼob (Judas 6). Le espirituʼobaʼ ku tuskoʼob máak tumen ku beetkoʼob u tuklaʼal letiʼob le máaxoʼob tsʼoʼok u kíimloʼoboʼ. ¿Bix jeʼel a wuʼuyikaba wa ka a wojéelt juntúul a amigoeʼ chéen táan u tusikech yéetel u kʼáat u beettech loob? Wa, ¿baʼax jeʼel a beetik wa ka a wojéelt a amigo ta kʼaj óoltaj teʼ Internetoʼ juntúul violador? U yoksikuba máak tiʼ baʼaloʼob yaan yil yéetel le demonioʼoboʼ maas sajbeʼentsil tiʼ leloʼ. Le oʼolaleʼ unaj a wilik a pʼatik tuláakal baʼal yaan yil yéetel le demonioʼoboʼ. ¿Bix jeʼel a beetkeʼ?

Ka tsʼoʼok u kankoʼob baʼax ku yaʼalik le Biblia yoʼolal le espiritismooʼ, jujuntúul máaxoʼob kajaʼanoʼob kaʼach Éfesoeʼ tu tóokoʼob u libroiloʼob magia. Le Bibliaoʼ ku yaʼalikeʼ «tu tóokajoʼob tu táan tuláakal» kex jach koʼoj u tojoloʼob (Beetaʼanoʼob [Hechos] 19:19, 20). Bejlaʼeʼ maʼ chéen yaan libroʼob, amuletoʼob yéetel baʼaloʼob jeʼex le tabla ouijaoʼ, baʼaxeʼ tak tiʼ uláakʼ tuʼuxoʼob, jeʼex ich Interneteʼ, yaʼab baʼaloʼob yaan yil yéetel meenil. Unaj a tupik wa a pulik tuláakal le baʼaxoʼob jeʼel u natsʼkechoʼob tiʼ le demonioʼoboʼ.

¿Kʼajaʼan wa tech Joaquín yéetel Bárbara le máax tiʼ tʼaanajoʼon tu káajbal le xookaʼ? Yéetel u barajasil le tarotoʼ tu yojéeltoʼob yaan u taal junjaats koʼoleloʼob «kʼasaʼanoʼob» xíimbaltikoʼob yéetel maʼ unaj kaʼach u yuʼubikoʼob baʼax ku yaʼalikoʼob mix u kʼaʼamal mix baʼal tiʼob. Baʼaleʼ le ka kʼoopnaj Connie yéetel Gudrun, kaʼatúul u j-jaajkunajoʼob Jéeoba, tu yotochoʼob yéetel ka tu yaʼaloʼob táan u tʼaanoʼob tiʼ le jatsʼuts baʼaloʼob ken u beet Diosoʼ, letiʼobeʼ tu yuʼuboʼob. Tu tsʼookeʼ káaj u tʼaanoʼob tiʼ baʼaloʼob yaan yil yéetel le meeniloʼ, baʼaleʼ le kaʼatúul j-Jaajkunajoʼobaʼ tu yeʼesoʼobtiʼob le baʼax ku yaʼalik le Biblia tu yoʼolaloʼ. Joaquín yéetel Bárbara túuneʼ tu kʼamoʼob junpʼéel xook yéetel le Bibliaoʼ.

Joaquín yéetel Bárbaraeʼ tu chʼaʼtukloʼob u náachkuntkubaʼob tiʼ le demonioʼoboʼ. Tu kanoʼob xaneʼ le kʼasaʼan espirituʼobaʼ maʼ kun kiʼimaktal u yóoloʼob yéetel le baʼax tu chʼaʼtukloʼobaʼ. Yoʼolal lelaʼ káaj u yantal talamil tiʼob yéetel jach beetaʼab u muʼyajoʼob tumen le demonioʼoboʼ. De áakʼabeʼ jach ku sajaktaloʼob kaʼachi, baʼaleʼ binoʼob kajtal táanxel tuʼux, ka káaj u xuʼulul u jach sajaktaloʼob. Teʼ kʼiinoʼoboʼ jach áantaʼaboʼob tumen le baʼax ku yaʼalik Filiposiloʼob 4:13 teʼ Traducción del Nuevo Mundooʼ: «Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ». Jéeobaeʼ tu beetaj u bin utsil tiʼob, yéetel ka máan kʼiineʼ xuʼul u beetaʼal u muʼyajoʼob tumen le demonioʼoboʼ. Bejlaʼeʼ Joaquín yéetel Bárbaraeʼ yéetel kiʼimak óolal táan u meyajtikoʼob Jéeoba, le u jaajil Diosoʼ.

Le Bibliaoʼ ku yaʼalik tiʼ le máaxoʼob u kʼáat u kʼamoʼob utsiloʼob tiʼ Dios: «Tsʼáabaʼex yáanal u páajtalil Jajal Dios. Tokabaʼex tiʼ Kʼaasilbaʼal, letiʼ xaneʼ bíin áalkabnakteʼex. Natsʼabaʼex tiʼ Jajal Dios, letiʼ xaneʼ bíin u natsʼuba tiʼ teʼex» (Santiago 4:7, 8). Wa a kʼáateʼ Jéeoba Dios, le Máax yaan tuláakal páajtalil tiʼoʼ, jeʼel u yáantkech a pʼat tuláakal baʼax yaan yil yéetel le demonioʼoboʼ. Bejlaʼeʼ Joaquín yéetel Bárbaraeʼ jach ku creertikoʼob le baʼax ku yaʼalik Salmo 121:2: «In wáantajileʼ bíin taalak tiʼ Yuumtsil [Jéeoba]».

[Tsolajiloʼob]

[Uláakʼ baʼax ku tsoʼolol teʼ táan juʼun 11]

Le meeniloʼ ku beetik maʼ u biskuba máak yéetel Dios

[Uláakʼ baʼax ku tsoʼolol teʼ táan juʼun 12]

«Natsʼabaʼex tiʼ Jajal Dios, letiʼ xaneʼ bíin u natsʼuba tiʼ teʼex.» (SANTIAGO 4:7, 8)