Maan e jran su kpa titi e di junman’n

“Kan Nyanmiɛn ndɛ’n jran su kpa kle sran mun maan be wun i wlɛ.”​—2 TIM. 4:2.

?AMUN KWLA YIYI NUN?

?Ngue ti yɛ Klistfuɛ klikli’m be jrannin su kpa be boli jasin fɛ’n niɔn?

?Ngue yɛ e kwla yo naan e ɲin w’a kpaman Ɲanmiɛn junman dilɛ’n su ɔ?

?Ngue ti yɛ jasin fɛ’n i bolɛ’n w’a yo cinnjin w’a tra laa ɔ?

1, 2. ?Jasin fɛ’n m’ɔ fata kɛ e jran su kpa e bo’n i su kosan benin mun yɛ é wá tɛ́ su ɔ?

 BE NGA sran’m be delɛ yɛ ɔ ti be junman’n, be cuɛncuɛnman be ja ase be junman’n i dilɛ’n nun. I wie yɛle pɔmpie’m be liɛ’n. Kɛ be flɛ be’n, be kɔ trɛlɛ afin be si kɛ sran’m be nguan’n o wie nuan.

² E Zoova i Lalofuɛ mun e klo kɛ é úka sran mun naan be ɲan nguan. I sɔ’n ti’n, e faman Ɲanmiɛn Sielɛ’n i jasin fɛ’n i bolɛ’n e kanman ngowa. Sanngɛ e seman kɛ junman’n ti cinnjin ti’n é tɔ́ su é dí i sa. ?Ɔ maan kɛ akoto Pɔlu seli kɛ ‘kan Nyanmiɛn ndɛ’n jran su kpa kle sran mun maan be wun i wlɛ’n,’ i bo’n yɛle benin? (2 Tim. 4:2) ?Wafa sɛ yɛ e kwla jran su kpa e bo jasin fɛ’n niɔn? ?Yɛ ngue ti yɛ e junman’n ti cinnjin sɔ ɔ?

?NGUE TI YƐ Ɔ FATAMAN KƐ E JRANJRAN E JASIN FƐ’N BOLƐ’N I WUN ƆN?

3. ?Sɛ sran kun sɔ Ɲanmiɛn Sielɛ’n i jasin fɛ’n nun’n, wafa sɛ yɛ i bo’n gúa mɛ́n i ɔ? ?Yɛ sɛ w’a sɔman nun’n nin?

³ Kɛ e wun kɛ jasin fɛ’n mɔ e bo’n ti’n sran kun kwla ɲan nguan’n, e wun i wlɛ kpa kɛ ɔ ti cinnjin kɛ e kan Ɲanmiɛn ndɛ’n e kle sran mun. (Rɔm. 10:13, 14) Ɲanmiɛn Ndɛ’n se kɛ: “Sɛ kusu n se klunwifuɛ’n kɛ ɔ nin wulɛ fata’n, sɛ ɔ yaci i nzuɛn tɛ’n, naan ɔ yo sa ng’ɔ ti kpa’n, b’ɔ ti i nuan su’n, [...] ɔ́ nyɛ́n i ti, ɔ su wu-man. Be wla su kpɛn-mɛn i sa tɛ ng’ɔ yoli be’n i wie fi su kun.” (Eze. 33:14-16) Sran kwlaa ng’ɔ bo Ɲanmiɛn Sielɛ’n i jasin’n, Biblu’n se i kɛ: “Á dé ɔ bɔbɔ nin be nga be ti ɔ ndɛ’n.”​—1 Tim. 4:16; Eze. 3:17-21.

4. ?Ngue ti yɛ sran nga be kle ato ndɛ’n be ti’n, jasin fɛ’n i bolɛ’n yoli cinnjin Klistfuɛ klikli’m be blɛ su ɔ?

⁴ Pɔlu seli Timote kɛ ɔ jran su kpa bo jasin fɛ’n. Kɛ ɔ ko yo naan y’a wun like nga ti yɛ ɔ seli i sɔ’n i wlɛ’n, maan e kanngan ndɛ mma nga e like suanlɛ’n taka su’n, ɔ nin i sin ndɛ mma wie mun. Ɔ seli kɛ: “Sɛ a nyan ɔ ti o, sɛ a nyan-man ɔ ti o, kan Nyanmiɛn ndɛ’n jran su kpa kle sran mun  maan be wun i wlɛ. Sran ng’ɔ yo sa’n ijɔ i, wla be fanngan, tra wɔ anwlɛn kpa kle be. Afin cɛn wie lele’n, sran’m be su fa-man ndɛ nanwlɛ’n su kun, bé yó sa ng’ɔ yo be bɔbɔ be fɛ’n, yɛ bé kúnndɛ sran kpanngban kpa kɛ be kle be like ng’ɔ yo be fɛ’n. Be su sie-man be su nanwlɛ’n su kun.” (2 Tim. 4:2-4) Zezi kusu kannin kɛ sran wie’m bé wá jáso su bé klé ato ndɛ mun asɔnun’n nun. (Mat. 13:24, 25, 38) Kɛ i sɔ blɛ’n mántan’n, ɔ yoli cinnjin kɛ Timote “kan Nyanmiɛn ndɛ’n” kle sran mun naan i kpa bɔbɔ’n, ɔ kɛn i asɔnun’n nun wie. I liɛ’n sran sɔ’m be su faman be ato ndɛ’n lakaman asɔnun’n nunfuɛ mun. Sran’m be nguan’n trannin wie nuan. ?Yɛ andɛ li?

5, 6. ?Kɛ é bó jasin fɛ’n, ndɛ benin yɛ sran nga e to be’n be nun sunman be lafi su ɔ?

⁵ Andɛ lika sunman nun’n sran’m be jaso Ɲanmiɛn sulɛ kpafuɛ’n nun yɛ be kle ato ndɛ mun. (2 Tɛs. 2:3, 8) ?Ndɛ benin yɛ sran’m be klo i kpa andɛ ɔ? Lika sunman nun’n, wafa nga sran’m be fa kan ninnge nga be su be’n be ndɛ juejue su’n, i sɔ kunngba’n yɛ be fa kan kɛ klɔ sran fin ndo’n niɔn. Siansi’n su yɛ be jran be kɛn i sɔ liɛ’n i ndɛ ɔ. Sanngɛ w’a kaci i liɛ kɛ Ɲanmiɛn sulɛ wafa kun sa. Wafa nga be bu Ɲanmiɛn nin be wiengu mun’n i kwlaa taka i sɔ’n su. Like kun ekun mɔ sran’m be kle mɔ w’a tru kpa’n yɛle kɛ Ɲanmiɛn i ndɛ nunman e ndɛ nun. Ɔ maan ɔ fataman kɛ i kusu i ndɛ lo e. ?Ngue ti yɛ i sɔ ndɛ mɔ be yo maan sran’m be nin Ɲanmiɛn be afiɛn’n ti nun’n, sran kpanngban be klo i tielɛ ɔ? Yɛle kɛ like klelɛ wafa nɲɔn sɔ’m be yo maan sran’m be bu i kɛ be kwla yo like kwlaa nga be klo’n, naan sran fi nunman lɛ m’ɔ́ úsa be sa ɔ. Ndɛ kɛ ngalɛ’n sa’n yɛ sran’m be klo i tielɛ ɔ.​—An kanngan Jue Mun 10:4 nun.

⁶ Sanngɛ ndɛ wie mun ekun be o lɛ mɔ sran’m be bu be nanwlɛ ɔ. Be nga be te kɔ asɔnun’n, be nun wie’m be klo kɛ be se be kɛ kannzɛ sa nga be yo’n, ɔ ti sɛ ɔ ti sɛ’n sanngɛ Ɲanmiɛn klo be titi. Wie’m be kusu’n, be klo kɛ be plɛti nin be pastɛli’m be se be kɛ ninnge kɛ cɛn dilɛ nin waka sran nin foto mɔ be fa wla be Ɲanmiɛn sulɛ nun’n ti’n, Ɲanmiɛn yrá be su. Asɔnun kɔfuɛ sɔ’m be siman kɛ ndɛ su be su. (Jue. 115:4-8) Sanngɛ sɛ e kwla uka be naan be wun Biblu’n nun ndɛ nanwlɛ’n i wlɛ’n, bé tínnge. Ɔ maan ye nga Ɲanmiɛn Sielɛ’n wá yó sran mun’n, bé ɲán wie.

?JASIN FƐ’N MƆ BE JRAN SU KPA BE BO’N I BO’N YƐLE BENIN?

7. ?Wafa sɛ yɛ e kwla kle kɛ e jran su kpa e di e junman’n niɔn?

⁷ Dɔɔtrɔfuɛ nga ɔ kpaci sran nun’n, i kpafuɛ’n, i akunndan kwlaa o i junman’n su kpa, afin sɛ w’a yoman sɔ’n sran kwla wu i sa nun. Kɛ e kɔ jasin fɛ’n bolɛ’n, wafa nga e kwla kle kɛ e jran su kpa e di e junman’n yɛle kɛ maan e akunndan’n kwlaa tran e junman’n su. Wafa nga e kwla yo sɔ’n yɛle kɛ ndɛ nga e ko kan’n, ɔ nin kosan nga e ko usa m’ɔ́ yó sran’m be cinnjin’n maan e dun mmua e bu be akunndan kpa. Kɛ mɔ e si kɛ ɔ fata kɛ e jran su kpa e di e junman’n ti’n, e kwla kaci dɔ nga e fa bo jasin’n naan y’a ko nian sran’m be osu blɛ nga be kwla tie e ndɛ’n i kpa’n i nun.​—Rɔm. 1:15, 16; 1 Tim. 4:16.

8. ?Kɛ be se kɛ e jran e junman’n su kpa e di’n, i wie yɛle benin?

⁸ Kɛ be se kɛ e jran e junman’n su kpa e di’n, i wie yɛle kɛ maan e dun mmua e yo ninnge nga be ti cinnjin kpafuɛ’n. (An kanngan Bo Bolɛ 19:15 nun.) Maan e se kɛ e ɔli dɔɔtrɔ naan be ko niannin e mmoja. I sin’n, dɔɔtrɔ bian’n flɛ e i biolo nun lɔ kpɛkun ɔ se e kɛ: “Nian, ɔ tukpacɛ’n ti tɛ kpa. Lele m’ɔ́ fá dí anglo kun’n ɔ fata kɛ a fa ajalɛ.” ?Sɛ be se e sɔ’n, é fín biolo nun lɔ é fíte pla, é kó tɔ́ ayre wie su é yó? E su yoman sɔ. Sanngɛ ajalɛ nga e ko fa naan y’a yo juejue’n, é mínndɛ kɛ dɔɔtrɔ’n kan kle e. I sin’n é kɔ́ awlo e ko bu ninnge ng’ɔ ti cinnjin kɛ e yo be’n be akunndan.

9. ?Ngue ti yɛ e kwla se kɛ i nun mɔ Pɔlu o Efɛzi lɔ’n, w’a jranjranman jasin fɛ’n i bolɛ’n wun ɔn?

⁹ Kɛ akoto Pɔlu bó jasin fɛ’n Azi mɛn’n nun lɔ’n, w’a fa kanman ngowa. Sɛ e kanngan i su fluwa ng’ɔ klɛli ko mannin Efɛzi lɔ asɔnun  kpɛnngbɛn mun’n i nun’n, é sí wafa nga kɛ bé dí junman’n be jrɛnjrɛnmɛn i wun’n i kpa. (An kanngan Sa Nga Be Yoli’n 20:18-21 nun.) Le kunngba ng’ɔ juli lɔ’n, ɔ boli jasin fɛ’n i bolɛ bo awloawlo’m be nun. Asa ekun’n, “ɔ kleli be like cɛn kwlaa Tiranis i suklu sua’n nun” sɔ lele afuɛ nɲɔn. (Yol. 19:1, 8-10) Kɛ mɔ Pɔlu wunnin i wlɛ kɛ ɔ fataman kɛ ɔ cuɛncuɛn i ja ase’n ti’n, i sɔ’n ɲannin ta ninnge nga ɔ yo be aliɛ ba kwlaa nun’n be su. Jasin fɛ’n mɔ be waan kɛ é bó’n e jran su kpa e bo’n, nán maan e bu i kɛ ɔ fataman kɛ e yo like uflɛ kun ti yɛ be kɛn i sɔ be kle e ɔ. Sanngɛ ɔ fata kɛ jasin fɛ’n bolɛ’n yo e cinnjin tra like kwlaa.

10. ?Kɛ Biblu’n nun like suanfuɛ’m b’a jranjranman jasin fɛ’n i bolɛ’n i wun laa’n, ngue ti yɛ i sɔ’n yo e fɛ ɔ?

¹⁰ Ka naan afuɛ nga be flɛ i kɛ 1914 w’a ju’n, sran akpasua kaan kun mɔ be ti Biblu’n nun like suanfuɛ’n be boli jasin fɛ’n i bolɛ bo. Kɛ be se kɛ sran di junman ɔ jrɛnjrɛnmɛn i wun’n, yɛle be liɛ’n. Blɛ sɔ’n nun’n nn be juman akpi kpanngban, sanngɛ be wunnin i wlɛ kɛ blɛ nga be o nun’n ti i liɛ ngunmin naan ɔ fata kɛ be bo jasin fɛ’n juejue su. Be klɛli jasin fɛ’n zronali lele 2.000 tra su nun, yɛ be fali foto wie mun be yoli kɛ flimu sa kpɛkun be fali sran’m be nɛn sieli su. Be flɛli i kɛ “ Photo-Drame de la Création ”. I sɔ’n mɔ be yoli’n ti’n sran akpinngbin kpanngban be tili jasin fɛ’n. ?Sɛ ɔ ti kɛ b’a jranman su kpa b’a boman Ɲanmiɛn Sielɛ’n i jasin fɛ’n, nn e nun sunman é kwlá tí jasin fɛ’n andɛ?​—An kanngan Jue Mun 119:60 nun.

E NIAN E WUN NAAN Y’A BOMAN JUNMAN’N I WUN KOKOWA

11. ?Ngue ti yɛ sran wie’m be ɲin wa kpali Ɲanmiɛn i sulɛ’n su ɔ?

¹¹ Ninnge wie’m be kwla yo naan sran kun w’a bumɛn i kun kɛ jasin fɛ’n i bolɛ’n ti cinnjin. Satan siesieli i mɛn’n naan e ɲin tran e bɔbɔ e ninnge liɛ mun, ɔ nin ninnge nga be timan cinnjin’n be su. (1 Piɛ. 5:8; 1 Zan 2:15-17) Sran wie mɔ blɛ kun nun’n, Zoova i sulɛ’n yɛ be fa sieli like kwlaa ɲrun’n, kɛ ɔ́ kɔ́ i ɲrun’n be ɲin wa kpali i sulɛ’n su. I wie yɛle Demasi liɛ’n. Laa’n ɔ ti akoto Pɔlu i ‘wiengu junman difuɛ.’ Sanngɛ mɛn’n nun ninnge’m be klolɛ’n wa sacili i akunndan’n. Blɛ kekle kun nun’n, kɛ ɔ yo naan ɔ suɛn i niaan’n i bo titi’n, w’a yoman sɔ. Ɔ wanndili i.​—Flm. 23, 24; 2 Tim. 4:10.

12. ?Kɛ é sé yɛ’n, ngue yɛ e le i wun atin ɔn? ?Yɛ e ɲrun lɔ’n, ngue yɛ é ɲɛ́n i wun atin ɔn?

¹² Sɛ e waan é jrán su kpa titi é dí e junman’n, ɔ fata kɛ e jran ninnge nga be kwla yo naan e ɲin w’a kpa jasin fɛ’n bolɛ junman’n su’n be ɲrun kekle. Ɔ fata kɛ e mian e ɲin kpa naan e ‘nyan nguan sakpa’n.’ (1 Tim. 6:18, 19) Ɔ ti su kɛ amun lafi su kɛ Ɲanmiɛn Sielɛ’n wá yó maan é ɲán anannganman nguan asiɛ’n su. Yɛ blɛ sɔ’n nun’n, é ɲán atin é yó ninnge kpanngban mɔ be man aklunjuɛ ɔ. Sanngɛ, atin nga e le i dɔ nga su e uka sran mun naan b’a fin Armagedɔn alɛ’n nun b’a fite’n, e su ɲɛnmɛn i kun.

13. ?Ngue yɛ e kwla yo naan e ɲin w’a kpaman Ɲanmiɛn junman dilɛ’n su ɔ?

¹³ Be nga be sin yia e yɛ’n, Ɲanmiɛn i klun sa yolɛ nun’n, be su lafi kpa. ?I sɔ’n ti’n, ngue yɛ e kwla yo naan e ɲin w’a kpaman Ɲanmiɛn junman dilɛ’n su ɔ? E kwla bu i nun nga e bɔbɔ e te o aosin nun mɔ e lafi kɛ be sa’n i akunndan. Be tinngeli e yɛ Klist maan e wunnin ase kɛ Pɔlu fa kannin’n sa. Ɔ maan kɛ é sé yɛ’n, e kwla fa Ɲanmiɛn ndɛ’n e kle sran mun naan b’a wun ase. (An kanngan Efɛzfuɛ Mun 5:14 nun.) Pɔlu klɛli i kɛ: ‘An nian amun nantilɛ bɔ an fa nanti’n i su kpa. Nán an yo kɛ sran b’ɔ wun-man sa wlɛ’n sa, sanngɛ an yo ngwlɛlɛfuɛ. Kɛ amu’an nyan amun ti’n, nán an tran lɛ ngbɛn, an yo like ng’ɔ yo sa ye’n, afin blɛ nga e o nun yɛ’n ti tɛ.’ (Efɛ. 5:15, 16) Mɛn tɛ nga nun’n, ɔ ti cinnjin kpa kɛ blɛ kan nga e le i’n, e fa yo ninnge nga be kwla yo naan e nin Zoova e afiɛn’n w’a mantan titi’n.

BLƐ NGA E O NUN YƐ’N TI I LIƐ NGUNMIN

14-16. ?Ngue ti yɛ jasin fɛ’n i bolɛ’n w’a yo cinnjin w’a tra laa ɔ?

¹⁴ Jasin fɛ’n nga Klistfuɛ’m be bo’n, ɔ ti junman cinnjin titi sɔ. Sanngɛ siɛn’n w’a yo cinnjin  kpa w’a tra laa’n. Kɛ ɔ fɛ i afuɛ nga be flɛ i 1914 nun’n, sa nga Ɲanmiɛn Ndɛ’n kannin kɛ bé jú’n, e wun be nun sunman. (Mat. 24:3-51) Ninnge nga be kwla nunkun sran mun’n b’a sɔn b’a tra laa’n. Mɛn nun nvle nga be le kwlalɛ kpa’n, be trali aenguɛ kɛ be su faman alɛ wlaman be wiengu sin. Kusu nn bɔmbu ngblingbli nga be le be mɔ be kwla fa kun alɛ be ja nun lɛ’n, ɔ ju i liɛ 2.000. Mɛn siefuɛ’m be kɛn i kpɛ sunman kɛ bɔmbu ngblingbli sɔ’m be nun wie’m b’a tu nun. Be waan be ninnge sɔ’m b’a mlin. Atrɛkpa’n, i sɔ ninnge liɛ’n wie tɔli kakawlongafuɛ’m be sa nun. Sran wie’m be waan sɛ kakawlongafuɛ kun man alɛ kun su’n, asiɛ’n su sran’m be kwla wie nunnun. Sanngɛ nán alɛ ngunmin ti yɛ sran’m be kwla wu ɔ.

¹⁵ Afuɛ nga be flɛ i 2009 nun’n, dɔɔtrɔ fluwa kun i klɛfuɛ mun nin Angle’m be lɔ inivɛsite kun be klɛli blɛ nga e o nun yɛ’n i su ndɛ seli kɛ: “Like ng’ɔ kwla fa awunyalɛ dan kpa yi i klɔ sran’m be su’n yɛle lika m’ɔ kacikaci’n mɔ maan lika’n lo annzɛ ɔ jɔ dan’n.” Be kɛnnin i ekun kɛ sa sɔ’m be ti’n, sran sunman be kwla tɔ tukpacɛ yɛ sran akpi ngbinngbin kpanngban be kwla wu. Lika i kacikaciIɛ sɔ’n i sin sa ng’ɔ kwla ju lika sunman nun’n, yɛle jenvie’n m’ɔ yi dan’n, ɔ nin wawa m’ɔ kpɛn tɛtɛ kpa’n, ɔ nin nzue’n m’ɔ tɔ di lika’n, ɔ nin tukpacɛ m’ɔ sa ndɛndɛ’n ɔ nin aunmuan dandan mun yɛ asiɛ’n i su ninnge nga be su wie’n, be ti alɛ nga be kun’n. Nanwlɛ, e wun i weiin kɛ alɛ nin sa kekle’m be kwla nunnun klɔ sran mun.

¹⁶ Mɛn’n i awieliɛ’n i su ndɛ nga Zezi kannin’n, sran sunman be wunmɛn i wlɛ. Be nun wie’m be bu i kɛ sɛ sran’m be fa bɔmbu dandan’m be fa bo alɛ kunlɛ bo’n, i sɔ’n kwla yo maan Zezi i ndɛ sɔ’n kpɛn su. Kusu nn ninnge nga be kle kɛ Klist bali naan ɔ o lɛ’n, naan ɔ ka kaan sa mɛn tɛ nga i liɛ wíe’n, nán andɛ sa yɛ e sɔli i sɔ ninnge’m be wunlɛ ɔ. (Mat. 24:3) Zezi i ndɛ’n i su sa nga e wun be andɛ’n, kɛ ɔ fɛ i laa lele’n e nian wunmɛn i sɔ le. Dɔ nga su’n ɔ fata kɛ sran’m be wun i wlɛ kɛ ɔ ti cinnjin kɛ be nin Ɲanmiɛn be afiɛn’n sɛ. Jasin fɛ’n nga e bo’n yɛ ɔ kwla uka be ɔ.

17, 18. (a) ?Kɛ mɔ e o mɛn’n i awieliɛ blɛ’n nun’n ti’n, ngue yɛ ɔ fata kɛ e yo ɔ? (b) ?Ngue yɛ ɔ kwla yo maan sran’m be fa be ɲin sie i Ɲanmiɛn Sielɛ’n i jasin’n su ɔ?

¹⁷ Blɛ ng’ɔ ka mɔ e kwla fa kle kɛ e klo Zoova’n, ɔ nin nga é fá gúa jasin fɛ’n i bolɛ’n junman mɔ Zoova fa mannin e’n i bo’n, ɔ ti kaan sa. Ndɛ nga Pɔlu kan kleli Klistfuɛ nga be o Rɔmu lɔ laa’n, w’a yo cinnjin kpa andɛ w’a tra laa’n. I waan: “Amun bɔbɔ an si blɛ nga e o nun yɛ’n, ɔ maan amun bɔ an ti kɛ sran b’ɔ su lafi sa’n, amun tinngelɛ w’a ju, afin e ti nyanlɛ’n w’a mantan e koko a tra i nun nga e lafili Krist su i klikli nun’n.”​—Rɔm. 13:11.

¹⁸ Sa nga Biblu’n waan bé jú mɛn’n i awieliɛ blɛ’n nun’n be kwla yo maan sran’m be wun i kɛ ɔ fata kɛ be nin Ɲanmiɛn be afiɛn’n mantan. Kɛ sran wie’m be wun kɛ mɛn siefuɛ’m b’a kwlá yoman naan sran’m be wun w’a yo be fɛ’n, be fa be ɲin sie i Ɲanmiɛn Sielɛ’n i jasin fɛ’n nga e bo’n su. Mɛn siefuɛ’m b’a kwlá tuman yalɛ nga ɔ o sran’m be su’n, b’a kwlá wieman bɔmbu i wun srɛ m’ɔ kun sran mun’n. Asa kusu’n b’a kwlá jranman sran kunkunkunlɛ’n ɔ nin asiɛ’n i sacilɛ’n. Wie’m be kusu’n, be awlobo nun sa’m be ti yɛ be fa be ɲin sie i Ɲanmiɛn Sielɛ’n i jasin’n su ɔ. Ɔ kwla yo tukpacɛ, annzɛ be aja m’ɔ saci’n annzɛ be awlɛn su sran i wie’n.

KƐ BE WUNNIN JUNMAN’N I CINNJIN DAN M’Ɔ TI’N BE FALI AJALƐ

19, 20. ?Kɛ Klistfuɛ kpanngban be wunnin jasin fɛ’n bolɛ’n junman’n i cinnjin m’ɔ ti’n ngue yɛ be yoli ɔ?

¹⁹ Kɛ Klistfuɛ kpanngban be wunnin kɛ jasin fɛ’n bolɛ’n ti cinnjin dan’n be fa fali ajalɛ naan b’a bo i kpa b’a tra laa’n. I sɔ yɛ aniaan bian kun nin i yi mɔ be fin nvle nga be flɛ i Équateur be yoli ɔ. Be jali ɔ nin a cɛman. Afuɛ nga be flɛ i 2006 nun’n, be ɔli cɛn ngunmin kun aɲia mɔ i flɛlɛ’n yɛle “Maan e ɲinma’n yo kpa titi” i bo. Kɛ ɔ yoli sɔ’n be fali ajalɛ kɛ bé kpɔ́ci be ninnge wie mun. Ninnge nga be mianman be wun’n be klɛklɛli. Kɛ lele m’ɔ́ fá dí anglo nsan’n, be tuli be sua mɔ i nun sua ba’m be ti nsan’n nun be ko trannin sua nga i nun sua ba’n ti kunngba’n i  nun. Be yoli be ninnge wie’m be atɛ yɛ be tuatuali be su kalɛ ngba. Kɛ ɔ yoli sɔ’n w’a cɛman naan b’a yo cɛn kunngun atin bofuɛ. Yɛ be ɔli lika nga be mian jasin bofuɛ’m be wun lɔ’n kɛ nga akpasua sunianfuɛ’n seli be kɛ be yo’n sa.

²⁰ Aniaan bian kun m’ɔ fin Amlɛnkɛn’m be mɛn’n nun lɔ’n, ɔ klɛli i kɛ: “Afuɛ nga be flɛ i 2006 nun’n, kɛ e nin min yi é kɔ́ akpasua kun aɲia’n i bo’n, nn be yoli e batɛmu w’a di afuɛ 30. Kɛ aɲia’n wieli mɔ é sá e sin’n, e kokoli ndɛ nga be kannin be aɲia’n i bo lɔ’n be su yalɛ. Be kleli e kɛ ninnge nga be timan cinnjin’n e kpɔci be. (Mat. 6:19-22) E le sua nsan, ɔ nin asiɛ yɛ loto kpakpa mun, ɔ nin bato yɛ loto nga be siesieli i kɛ sua sa’n. Ɔ yoli e kɛ y’a yoman Klistfuɛ mɔ be si ngwlɛlɛ ɔ. I ti’n, e seli kɛ é wá kúnndɛ blɛ kwlaa nun Ɲanmiɛn junman dilɛ’n i wun atin. Afuɛ nga be flɛ i 2008 nun’n e yoli titi atin bofuɛ kɛ e wa bla’n sa. Kɛ e nin aniaan mun e boli jasin fɛ’n likawlɛ’n, nanwlɛ ɔ yoli e fɛ dan! E kwla ɔli kan be mian jasin bofuɛ’m be wun lɔ’n. Asa ekun’n, kɛ e wa ukali junman nga e di e man Zoova su’n ti’n, e nin i e afiɛn’n mantannin kpa trali laa’n. Like ng’ɔ yoli e fɛ kpa ekun’n, yɛle wafa nga kɛ sran’m be ti Ɲanmiɛn Ndɛ’n mɔ be wun i wlɛ’n be wun fa yo be’n.”

21. ?Sa benin yɛ e si i mɔ i ti’n e wla e wun ase’n bo jasin fɛ’n niɔn?

²¹ E si sa nga ɔ ka kaan sa’n ɔ́ wá jú mɛn tɛ nga su’n. Yɛle kɛ ɔ ka kan’n “cɛn nga bé bú sran nga be sro-man Nyanmiɛn’n be fɔ bɔ bé sáci be’n” ɔ́ wá jú. (2 Piɛ. 3:7) Ɲanmiɛn Ndɛ’n i nun like nga e si i ti’n, e kan ɲrɛnnɛn dan’n ɔ nin mɛn uflɛ ng’ɔ́ wá bɛ́ i sin’n be ndɛ juejue su e kle sran mun. E wun i wlɛ kɛ ɔ ti cinnjin kpa kɛ e kan kle sran’m be kɛ like kpa kun o e ɲrun lɔ naan kɛ é yó i sɔ’n ɔ fataman kɛ e cuɛncuɛn e ja ase. Kɛ e wla e wun ase e di junman cinnjin sɔ’n ju kan e sa kwla ju lɛ’n, e yi i nglo kɛ e klo Zoova nin e wiengu.

[Kosan mun]