Kontinyen montre ki nou predikasyon i en travay irzan

“Anons Laparol, ensiste dan tou lokazyon.”​—2 TIM. 4:2.

ESKI OU KAPAB EKSPLIKE?

Akoz bann Kretyen dan premye syek ti vwar predikasyon konman en travay irzan?

Ki mannyer nou kapab kontinyen konsider nou minister konman irzan?

Akoz nou travay predikasyon i pli irzan la konmela ki oparavan?

1, 2. Ki kestyon ki ganny souleve konsernan predikasyon?

TRAVAY serten dimoun se pour sov lavi lezot. Ler zot pe fer sa, laplipar di tan zot bezwen fer li vit. Par egzanp, bann ponpye i degaze pour ariv kot en lakaz ki pe brile akoz zot konnen ki lavi bann dimoun i kapab an danze.

² Konman Temwen Zeova, nou anvi ed dimoun pour sov zot lavi. Pour sa rezon, nou pran nou misyon pour anons sa bon nouvel lo Rwayonm o serye. I vre, nou travay i irzan, me byensir nou pa pou tay an bonnavini pour akonplir nou travay. Zapot Pol ti donn sa konsey: “Anons Laparol, ensiste dan tou lokazyon.” (2 Tim. 4:2) Dan langaz Grek, sa lekspresyon ki’n ganny tradwir “ensiste dan tou lokazyon” i osi kapab vedir ‘fer en keksoz dan en fason irzan.’ Kwa ki enplike dan konsey zapot Pol? Akoz nou travay i irzan? Ki mannyer nou montre ki nou predikasyon i en travay irzan?

AKOZ NOU TRAVAY PREDIKASYON I IRZAN?

3. Ler dimoun i aksepte oubyen refize ekout sa mesaz lo Rwayonm, ki konsekans sa i kapab annan?

³ Ler ou mazin konsekans ki i kapab annan lo lavi bann dimoun si zot ekout nou mesaz oubyen non, sa i fer ou realize ki i vreman irzan pour ou anons sa bon nouvel avek lezot. (Rom. 10:13, 14) Parol Bondye i dir: “Ler mon dir en move dimoun: ‘Ou pou sirman mor,’ e i vreman aret fer sa pese e i fer sa ki zis e drwat, . . . i pou sirman kontinyen viv. I pa pou mor. Okenn son bann pese ki i’n fer pa pou ganny mazinen kont li.” (Ezek. 33:14-16) Anfet, Labib i dir sa bann ki anons sa bon nouvel: “Ou ava sov ou lekor ek tou bann ki ekout ou.”​—1 Tim. 4:16; Ezek. 3:17-21.

4. Akoz sa travay predikasyon dan premye syek ti irzan?

⁴ Pol ti demann Timote pour ensiste dan son minister. Sa ti osi enplik konsider son minister konman en keksoz irzan. Pour nou konpran akoz i ti donn  sa konsey, annou egzamin konteks sa verse. Nou lir: “Anons Laparol, ensiste dan tou lokazyon ki prezante, favorab ou pa favorab, konvenk dimoun, reprimande, ankouraze ansenny avek bokou pasyans. Parski en letan pe vini, kot dimoun pou nepli siport lansennyman laverite. Me zot pou swiv zot prop dezir; zot pou rasanble en kantite ansennyan otour zot pour dir zot sa ki zot zorey i oule tande. Zot pou nepli oule ekout laverite.” (2 Tim. 4:2-4) Zezi ti’n predir ki bokou Kretyen ti pou rezet laverite. (Mat. 13:24, 25, 38) I ti irzan pour Timote “anons Laparol” menm avek bann manm kongregasyon pour ki bann Kretyen pa les zot ganny anbete avek bann fo lansennyman ki ti paret atiran. Lavi sa bann dimoun ti an danze. Be ki nou kapab dir lo nou letan ki nou viv ladan?

5, 6. Ki bann lansennyman popiler ki nou rankontre dan predikasyon?

⁵ Bann fo larelizyon Kretyen in devlope e propaze partou kote. (2 Tesa. 2:3, 8) Ki sa bann lansennyman ki dimoun i oule tande? Dan bokou landrwa, menm si evolisyon i ganny eksplike avek bann term syantifik, anfet sa lansennyman in vin parey en larelizyon ki pa krwar dan Bondye. I ganny promote en pe parey en larelizyon e i annan en lefe lo lafason ki dimoun i vwar Bondye e tret lezot. En lot lansennyman byen popiler i dir ki Bondye pa enterese avek nou e alor nou osi nou pa merit enterese avek li. Akoz plizyer milyon dimoun in ganny atire par sa bann lansennyman ki fer zot dormi spirityelman? Akoz tou le de i annan sa menm mesaz, ‘Ou kapab fer sa ki ou oule akoz ou pa bezwen rann kont avek personn.’ Sanmenm sa mesaz ki bokou dimoun i oule tande.​—Lir Psonm 10:4.

⁶ Me i annan lezot keksoz ki dimoun i oule tande. Serten ki ankor al legliz i kontan ler zot bann ansenyan i dir zot: ‘Nenport kwa ki ou fer, Bondye i kontan ou.’ Bann pret ek paster i dir lezot sa ki zot oule tande ler zot konvenk zot ki bann seremoni, Lanmes, lafet relizye ek bann zidol i fer zot ganny benediksyon Bondye. Dimoun ki asosye avek sa bann larelizyon pa realize ki zot lavi i an danze. (Ps. 115:4-8) Si nou lev zot spirityelman e ed zot konpran sa ki Labib i vreman dir, zot kapab ganny bann benediksyon atraver Rwayonm Bondye.

KI MANNYER NOU MONTRE KI NOU PREDIKASYON I EN TRAVAY IRZAN?

7. Ki nou kapab fer pour montre ki nou travay i irzan?

⁷ En bon sirizyen i bezwen konsantre antyerman lo son travay akoz i konnen ki lavi dimoun i dan son lanmen. Dan nou travay predikasyon, nou kapab montre ki sa ki nou pe fer i irzan par konsantre dan sa travay. Par egzanp, nou kapab reflesir lo bann size, kestyon oubyen lenformasyon ki kapab enteres bann dimoun ki nou zwenn. Si nou konsyan ki nou travay i enn ki irzan, nou pou fer bann azisteman dan nou progranm pour ki nou vizit dimoun ler ki zot pou pli pare pour ekout nou.​—Rom. 1:15, 16; 1 Tim. 4:16.

8. Ki normalman ou bezwen fer dan en sityasyon irzan?

⁸ Nou osi montre ki nou travay i irzan par lafason ki nou etablir nou bann priyorite. (Lir Zenez 19:15.) Meton ou’n al kot dokter pour ganny rezilta ou bann tes e i dir ou: “Ou konnen, ou bezwen azir deswit. Ou annan zis en mwan pour adres sa sityasyon.” Tre probab, ou pa ti pou sorti an tayan parey en ponpye ki pe al tenny dife. Me ou ti pou ekout li, apre ou ti pou al kot ou e reflesir seryezman lo ou bann priyorite.

9. Akoz nou kapab dir ki Pol ti konsider son minister konman irzan ler i ti Efez?

 ⁹ Atraver sa ki Pol ti dir bann ansyen Efez, nou kapab vwar ki pour li, anons sa bon nouvel dan distrik Lazi ti en keksoz byen irzan. (Lir Akt 20:18-21.) Aparaman, depi sa premye zour ki i ti ariv dan sa landrwa, i ti byen okipe pe anons sa bon nouvel kaz an kaz. Deplis, pour apepre de-z-an, i ti annan labitid pour “diskite e ansennyen” tou le zour dan lekol Tiranis. (Akt 19:1, 8-10) I kler ki lefet ki Pol ti konsyan ki sa travay ti irzan, sa ti annan en lefe lo lafason i ti viv son lavi. I vre ki nou ganny ankouraze pour konsider predikasyon konman en travay irzan, me nou pa devret santi nou anba presyon pour fer li. Toudmenm, predikasyon i merit vin en priyorite dan nou lavi.

10. Akoz nou merit kontan ki bann Kretyen ti konsider predikasyon konman irzan apepre 100-t-an pase?

¹⁰ Legzanp en pti group Etidyan Labib ki ti konmans pres sa bon nouvel avan 1914 i montre nou ki savedir akonplir en travay irzan. Menm si i ti annan zis detrwa mil zot, zot ti konpran ki sa travay ti irzan e avek en gran devouman zot ti travay dir dan predikasyon. Zot ti pibliy bann sermon dan plizyer santenn zournal e organiz “Photo-Drama of Creation,” en prezantasyon bann film ek slayd kouler. Dan sa fason, zot ti reisi anons sa bon nouvel avek plizyer milyon dimoun. Si zot pa ti’n azir dan en fason irzan, konbyen nou ki ti pou’n ganny sans tann sa mesaz Rwayonm?​—Lir Psonm 119:60.

KONTINYEN KONSIDER OU MINISTER KONMAN IRZAN

11. Akoz serten in aret konsider zot minister konman irzan?

¹¹ Bann distraksyon i kapab anpes en dimoun vwar travay predikasyon konman enportan. Satan i servi bann keksoz dan sa lemonn pour distrer nou e fer nou konsantre lo bann keksoz personnel oubyen bann ki pa sitan enportan. (1 Pyer 5:8; 1 Zan 2:15-17) Serten ki oparavan ti met servis Zeova konman en priyorite dan zot lavi in arive perdi zot devouman. Par egzanp, Demas, en Kretyen dan premye syek ki ti en “kanmarad travay” Pol ti a lafen di zour les li ganny distrer par sa move lemonn Satan. Olye kontinyen vin en sours lankourazman pour zapot Pol ki ti pe fer fas avek bann leprev, Demas ti abandonn li.​—Filem. 23, 24; 2 Tim. 4:10.

12. Ki loportinite nou annan la konmela e ki loportinite nou pou gannyen pour touzour?

¹² Pour ki nou minister i reste en keksoz irzan dan nou lavi, nou bezwen reziste sa lanvi pour fer bann keksoz ki kapab distrer nou avek nou travay predikasyon. Nou bezwen plito travay dir pour “ganny vre lavi.” (1 Tim. 6:18, 19) San okenn dout ou konnen ki anba dominasyon Rwayonm Bondye, lavi eternel lo later pou gou akoz ou pou annan sa loportinite pour fer en ta keksoz enteresan. Me pour lemoman, i pli enportan pour nou ed lezot sirviv Armagedon.

13. La ki nou’n vin Kretyen, ki mannyer nou kapab konsider nou travay konman irzan?

¹³ Lefet ki laplipar dimoun dan lemonn otour nou pe dormi spirityelman, kwa ki kapab ed nou pour kontinyen konsider nou travay konman irzan? Nou kapab reflesir lo lefet ki en letan nou osi nou ti pe dormi dan fernwanr. Me parey Pol in dir, nou’n ganny reveye e Kris in ekler nou. Aprezan, nou annan sa privilez pour ekler lezot. (Lir Efezyen 5:14.) Apre ki i ti’n dir sa, Pol ti ekrir: “Fer byen atansyon ki mannyer zot viv. Pa viv konman bann dimoun inyoran, me konman bann dimoun saz. Servi byen tou bann lokazyon ki prezant devan zot, parski sa letan ki nou pe viv ladan i move.” (Efe. 5:15, 16, nou ki’n met an italik.) Parmi tou sa bann move keksoz  ki pe arive, annou “servi byen” nou letan pour fer bann aktivite ki pou fer nou reste eveye spirityelman.

NOU PE VIV DAN EN LEPOK SPESYAL

14-16. Akoz nou travay predikasyon i sitan irzan la konmela?

¹⁴ Nou travay predikasyon in toultan irzan, me la i pli irzan ankor. Depi 1914, bann diferan eleman sa siny ki ganny dekrir dan Parol Bondye in vin pli kler. (Mat. 24:3-51) Lavi dimoun i an danze plis ki zanmen oparavan. Malgre bann lagreman ki zot in sinyen tou dernyenman, serten pei i ankor annan apepre 2,000 bonm nikleer ki’n pare pour ganny large. Bann lotorite in raport bokou lensidan kot bann materyo nikleer in swadizan perdi. Eski bann teroris i annan serten sa bann materyo? Bann eksper i dir ki limanite ti kapab fasilman ganny detrir par lager ki en teroris i konmanse. Me, pa zis lager ki en menas pour limanite.

¹⁵ The Lancet ek University College London ti dir dan en rapor an 2009 ki “sanzman klima i sa pli gro menas pour lasante limanite dan venteentyenm syek.” I ti osi dir: “Sanzman klima pou annan en lefe lo lasante laplipar dimoun dan bann lannen ki pe vini e i pou en danze lo lavi ek lasante plizyer bilyon dimoun.” Sa bann dezas i kapab partou kote, ki enkli nivo delo ki monte, lasesres, lavalas, lepidemi, siklonn ek bann lager akoz napa ase resours natirel. Vreman, sa bann lager ek dezas pe menas legzistans limanite.

¹⁶ Serten dimoun i panse ki menas en lager nikleer ki pou deklans bann levennman ki pou akonplir sa “siny” ki Zezi ti predir. Me laplipar pa konpran vre sinifikasyon sa siny. Pour bokou lannen aprezan nou kapab vwar realizasyon sa siny e sa i montre ki prezans Zezi konman en Lerwa i en realite e lafen sa move lemonn i pros. (Mat. 24:3) Bann diferan laspe sa siny i pli evidan la konmela ki zanmen oparavan. Dimoun i bezwen leve dan zot sonmey spirityel e nou minister i kapab ed zot fer sanmenm.

17, 18. (a) Ki lefe sa “letan ki nou pe viv” ladan i annan lo nou minister? (b) Kwa ki kapab motiv dimoun pour sanz zot pwennvi lo mesaz Rwayonm?

¹⁷ I pa reste bokou letan pour nou prouv nou lanmour pour Zeova e fini nou travay predikasyon pandan sa bann dernyen zour. Sa ki Pol ti dir bann Kretyen Ronm dan premye syek i annan en pli gran lenportans ankor pour nou: “Zot devre konnen dan ki letan nou pe viv. Ler in arive pour zot reveye dan zot sonmey. Delivrans i pli pre avek nou ki ler nou ti kwar pour premye fwa.”​—Rom. 13:11.

¹⁸ Bann levennman ki’n ganny predir pou arive dan bann dernyen zour i kapab fer dimoun konsyan zot bezwen spirityel. Serten i konsyan ki imen i bezwen led ler zot vwar ki mannyer bann gouvernman imen pa pe reisi rezourd bann kriz ekonomik, menas nikleer, krim, vyolans ek destriksyon lanvironnman. Lezot ankor i konmans enterese avek bann keksoz spirityel akoz bann problenm familyal, maladi, divors oubyen lanmor en dimoun ki zot kontan. Atraver nou travay predikasyon, nou kapab ed sa bann dimoun.

NOU GANNY MOTIVE AKOZ NOU KONSYAN KI NOU MINISTER I IRZAN

19, 20. Lefet ki bokou Kretyen i konsyan ki letan i irzan, ki sa in motiv zot pour fer?

¹⁹ Bokou Kretyen in ogmant lakantite letan ki zot pase dan predikasyon akoz zot konsyan ki zot minister i irzan. Par egzanp, en zenn koup Ekwador ti deside senplifye zot lavi apre ki zot ti asiste sa lasanble an 2006 ki ti koz lo gard ou lavi senp. Zot ti fer lalis bann keksoz ki zot pa ti bezwen e dan trwa mwan zot ti aret reste dan zot apartman trwa lasanm e konmans reste dan en apartman en lasanm.  Zot ti vann serten keksoz e pey zot bann det. Zot ti apre konmans fer pionye asistan e parey sirveyan rezyonal ti’n ankouraz zot, zot ti al servi dan en kongregasyon kot i ti annan plis bezwen.

²⁰ En frer sorti Nor Lanmerik ti ekrir: “Ler mwan ek mon madanm nou ti asiste en lasanble 2006, nou ti’n batize depi 30 an. Ler nou ti pe retourn kot nou apre lasanble, nou ti diskit lo konman nou ti kapab aplik sa konsey pour senplifye nou lavi. (Mat. 6:19-22) Nou ti annan trwa lakaz, en bout later, bann loto deliks, en bato ek en karavann. Nou ti santi nou anbarase, alor nou ti mazin pour antreprann servis a plen tan. An 2008, nou osi nou ti vin pionye ordiner parey nou fiy. I vreman gou pour travay kot a kot avek nou bann frer ek ser! Nou’n kapab servi kot i annan plis bezwen. Lefet ki nou’n fer plis pour Zeova, nou’n vin pli pros avek li. Pli gran benediksyon ki nou’n gannyen i ler nou vwar lakontantman lo figir bann dimoun ler zot ekout e konpran laverite dan Parol Bondye.”

21. Kwa ki pous nou pour azir?

²¹ Nou konnen ki pou arive avek sa move lemonn tre byento, sa i zour “zizman kan bann move dimoun pou ganny detri.” (2 Pyer 3:7) Sa ki nou’n aprann atraver Parol Bondye i motiv nou pour nou anons avek devouman sa gran ladetres ki pou arive byento e osi lo sa nouvo lemonn ki pou vini apre. Nou konsider nou travay konman vreman irzan akoz i anmenn en vre lespwar pour bann dimoun. Par fer sa travay ki vreman irzan, nou demontre nou lanmour pour Bondye ek nou prosen.

[Kestyon]