Nˈoktukjotëgoˈoyëmë Diosë tyuunk

“Käjxwäˈx ja Diosë yˈayuk [“tuungojën tsojk”, Traducción del Nuevo Mundo (NM)].” (2 TIM. 4:2)

¿MBÄÄT XYNYIMAYTYAˈAKY?

¿Tiko ttukjotëgooytyë Diosë tyuunk pënaty tim jawyiin pyanëjkxtë Kristë?

¿Wiˈix mbäät nyaˈijtëm winmäˈänyoty ko yajtukjotëgoyäämbë Diosë tyuunk?

¿Tiko tyam mas niˈigyë yajtukjotëgoyaˈanyë tadë tuunk mä ngäjpxwäˈkxëmë oybyë ayuk?

1, 2. ¿Tijaty yajtëˈëwën jaˈäjtp ko nyaˈˈanmäˈäyëm ets ndukjotëgoˈoyëmë Diosë tyuunk?

PËNATY yaˈˈawäˈätspëtsëëmdëbë jäˈäy diˈib yajpatp oˈkën jëjpˈam, tyukjotëgooytyëbë tyuunk. Extëm nˈokpëjtakëmë bombeerë, ko yajmëgäjpxtë, pojënë jyantsy tsyoondë; pes nyijäˈädëp ko oˈkën jëjpˈamë jäˈäy yajpäättë.

² Jyobaa tyestiigëty pyudëkëyandëbë jäˈäy parë nyitsoˈoktët. Pääty ndukjotëgoˈoyëm mä nˈëwäˈkx ngäjpxwäˈkxëm ja oybyë ayuk, per kyaj nduˈunëm jäjt oˈkp. ¿Ti apostëlë Pablo myaytyäˈägan ko jyënany: “Käjxwäˈx ja Diosë yˈayuk [“tuungojën tsojk”, NM]”? (2 Tim. 4:2.) ¿Ti yˈandijpy ndukjotëgoˈoyëmë Diosë tyuunk? ¿Ets tiko yajtukjotëgoyaˈany?

¿TIKO YAJTUKJOTËGOYAˈANYË DIOSË TYUUNK?

3. ¿Wiˈix mbäät wyimbëtsemy ko ngäjpxwäˈkxëm?

³ Diˈib mbäät xypyudëjkëm parë ndukjotëgoˈoyëmë tyäˈädë tuunk, yëˈë ko nwinmäˈäyëm ko mbäädë jäˈäy nyitsoˈoky (Rom. 10:13, 14). Dios twandaˈaky mä yˈAyuk: “Kojëtsë axëkjäˈäy nˈanëëmët: Mˈoogëp, ets yëˈë jyodëmbity mä ja pyoky kyaytyey ets ttuny diˈib tëyˈäjtën, [...] ta jyukyˈäjtˈadëˈëtsët. Kyaj yˈoogët. Ni tuˈugë pyoky kyaytyey nëjkx kyayajtukjamyetsy diˈib të ttuny” (Eze. 33:14-16). Biiblyë duˈun tˈanëëmë pënaty kyäjpxwäˈkxtëp ja oybyë ayuk: “Dëˈën nëjx mnitseˈeky es nandëˈën diˈibaty mmëmëdoojëdëp” o myëdooˈijttëp (1 Tim. 4:16; Eze. 3:17-21).

4. Ko mä ja naymyujkën tyëjkë tukniˈˈijxën diˈib kyaj tyëyˈäjtënëty, ¿tiko nety jyëjpˈamëty ets yajtukjotëgoyëdë Diosë tyuunk?

⁴ Parë njaygyujkëm tiko Pablo tˈanmääyë Timoteo ets ttukjotëgoyët ja tuunk, tsojkëp nˈijxëm wiˈixë tyäˈädë bersikulo tˈaknigajpxy, jyënaˈany: “Käjxwäˈx ja Diosë yˈayuk [“tuungojën tsojk”, NM]”, jëjwijtsëmbit, jotmëkwingäjxë es yaˈëxpëk maˈxtujkën myëët. Mët ko pyäädëp  ja tiempë mä ja jäˈäyëty kyaj tnakymyëdanëyäˈändët ja ëxpëjkënë oybyë; jaˈayë tyundëp extëm ja kyujuun winmäˈänyëty, yˈëxtäˈäytyëp mayˈaampy ja yaˈëxpëjkpëty, per yëˈëyë diˈibë yëˈëjëty tsyojktëp tmëdooˈitäˈändë, es kyaj tmëdooˈitäˈändët ja tëyˈäjtën” (2 Tim. 4:2-4). Jesus të nety tnaskäjpxë ko mä ja naymyujkën tyëkëyaˈanyë tukniˈˈijxën diˈib kyaj tyëyˈäjtënëty (Mat. 13:24, 25, 38). Pääty jëjpˈamë nety etsë Timoteo ttukjotëgoyët ja Diosë tyuunk parë tpudëkët ja Dios mëduumbë ets kyaj yajwinˈëëndët mët ja tukniˈˈijxënë diˈib kyaj tyëyˈäjtënëty, pes oˈkën jëjpˈamë nety ja jyukyˈäjtën yajpäättë. ¿Ets mä tyäˈädë tiempë?

5, 6. ¿Tijaty mayë jäˈäy myëdowandëp?

⁵ Tyam të niˈigyë myëjwindëkë tukniˈˈijxën diˈib kyaj tyëyˈäjtënëty (2 Tes. 2:3, 8). ¿Ti tukniˈˈijxënë niˈigyë jäˈäy myëdowandëp? Mä mayë lugäär, tmëbëktë jäˈäy amumduˈukjotë evolución extëmë ëxpekyjyaˈay tyukniˈˈixëdë ets jyënäˈändë ko yëˈë Diosë yˈëxpëjkënë diˈib wäˈäts. Ko duˈun tyukniˈˈixëdë, ta mayë jäˈäy kyaj tnekyˈixtë Dios etsë jyiiky myëguˈuk extëm jyapäätyëty. Ja tuk pekyë tukniˈˈijxën, yëˈë ko Dios kyaj xymyëmäˈäy xymyëdäjëm, pääty, ¿tiko nmëmäˈäy nmëdäjëm? Per ¿tiko miyonkˈamë jäˈäy tmëdowäˈändë tyäˈädë majtskpë tukniˈˈijxën diˈib yajmanäjxëdëp? Yëˈko duˈunxyëp extëm yaˈˈanëëmëdë: “Tun ti mdimtunaampy, kyaj pën mguentëwitsäˈänyëty”. Ets yëˈë diˈib mayë jäˈäy myëdowandëp (käjpxë Salmo 10:4).

⁶ Per ta kanäk peky tijatyë jäˈäy myëdowandëp. Nääk diˈib ak nëjkxtëp tsäjptëgoty, yëˈë tsyojktëp ja yaˈëxpëjkpë diˈib anëˈëmxëdëp: “Dios mtsojkëp oy xytyunët ti mdimtunaampy”. Teetytyëjk etsë pastoor nan yˈanmääytyëbë jyaˈay ko Dios yˈoyˈijxypy ko tˈawdattë awinax, ko nyëjkxtë misˈäjtpë ets ko xyëdundë. Pënaty nëjkxtëp tsäjptëgoty kyaj twinmaytyë ko jotmayjëjpˈam yajpäättë (Sal. 115:4-8). Ëtsäjtëm mbäät nˈyujxëm mä të tkumanaxtë Dios ets ndukjaygyujkëm ja tëyˈäjtën diˈib yajpatp mä Biiblyë parë ttukˈoyˈattët ja kunuˈkxën diˈib yajminaambyë Diosë yˈAnaˈamën.

¿TI YˈANDIJPY NDUKJOTËGOˈOYËMË DIOSË TYUUNK?

7. ¿Wiˈix mbäät nyaˈijxëm ko ndukjotëgoˈoyëmë Diosë tyuunk?

⁷ Tuˈugë doktoor diˈib tsujkp jamë wyinmäˈäny tpëjtaktäˈäy mä ja jäˈäy ttsuky, pes oˈkën jëjpˈam yajpääty. Ëtsäjtëm nan mbäät nyaˈijxëm ko ndukjotëgoˈoyëmë Diosë tyuunk ko jam ja jot winmäˈäny nbëjtaktäˈäyëm, extëm ko nwinmäˈäyëm ti ndukmëtmaytyäˈägäˈänëm ja jäˈäy, ti nyajtëwäˈänëm o ti yˈoymyëdowëp. Ja tuk peky, yëˈë ko ninëjkxëm näˈä tiempë tmëdattë parë mëët nmaytyakëm (Rom. 1:15, 16; 1 Tim. 4:16).

8. ¿Ti nyajnigëxëˈkëm ko ndukjotëgoˈoyëm tijaty?

⁸ Ko tijaty ndukjotëgoˈoyëm, ja nyigëxeˈeky ko yëˈë jawyiin nduˈunëm (käjpxë Génesis 19:15). Extëm nˈokpëjtakëm, ko yaˈëxpëjkpëtsëmët ti päˈäm mmëdäjtypy, ets ja doktoor mˈanëˈëmxëdët: “Okˈix, yajtukjotëgoyäämbë tyäˈädë mjotmay. Jeˈeyë tuk poˈo tiempë xyˈakmëdaty parë mnayajtsoybyatëdët”. Ko duˈun myaˈˈanëëmët, kyaj mbëyëˈkpëtsëmët mä ja konsultë extëmë tuˈugë bombeerë diˈib nëjkxë jëën dyajpiˈitsäˈäny. Mmëdooˈitëp wiˈix ja doktoor mˈanëˈëmxëty etsë net nëjkx xywyinmay tijaty jawyiin mdunaampy.

9. ¿Tiko mbäät njënäˈänëm ko Pablo tyukjotëgooy mä ojts kyäjpxwaˈkxy ko yˈijty Éfeso?

⁹ Extëmë Pablo tˈanmääy ja mëjjäˈäytyëjk diˈib Éfeso, yëˈë xytyukˈijxëm ko tyukjotëgooy ja tuunk mä ojts kyäjpxwaˈkxy nuˈun ja it lugäär diˈib Asia (käjpxë Hechos 20:18-21, NM). Waˈanë Pablo, ja xëë mä jyajty ojts tninëjkxy ja jäˈäy tëjkm dëjkm parë ttukmëtmaytyakyë oybyë ayuk. Majtsk jëmëjt nanduˈun ojts nyijkxy “mä Tiranë yˈeskuelë, es jap mëët nyaygyäjxëdë [o myaytyäˈäktë] bom bom” (Apos. 19:1, 8-10). Tijatyë Pablo tyuun jabom jabom, ja ojts dyajnigëxeˈeky ko tyukjotëgooy  ja tuunk. Ko nyaˈˈanmäˈäyëm ets ndukjotëgoˈoyëmë Diosë tyuunk kyaj yëˈëjëty parë nmëkjäˈäwëm. Per jëjpˈam yajpëjtäˈägäˈänyë tyäˈädë tuunk mä jukyˈäjtën.

10. ¿Tiko mbäät ndukxondakëm ko myëgoˈpx jëmëjtëp jyamˈäjtyë Dios mëduumbë diˈib tyukjotëgooytyë Diosë tyuunk?

¹⁰ Mä kyajäˈtynyëmë jëmëjt 1914, ta niwaanë jäˈäy diˈib yˈëxpëjktëbë Biiblyë tyëjkëdë käjpxwäˈkxpë. Extëm tyuundë, yëˈë xytyukˈijxëm ti duˈun yˈandijpy ndukjotëgoˈoyëm. Oyë nety jeˈeyë tuk mil majtsk mil yajpäättë, jyaygyujkëdë ko të nety ja tiempë tpääty parë ttukjotëgoytyët mä yˈëwäˈkx kyäjpxwäˈkxtë ets ttukˈit ttukxondët. Ojts dyajpëtsëmdë diskursë mä mayë perioodikë ets dyajnäjxtë ixy jawë diˈib koloor mëët ets mä jäˈäy yuˈkxy, diˈib xyëˈäjt: “Foto-Drama de la Creación”. Ets duˈun miyonkˈamë jäˈäy ttuknijäˈäjëdë ja oybyë ayuk. Koxyëbë tyäˈädë tuunk tkatukjotëgooytyë, kyajxyëp mayë jäˈäy të tnijawëdë (käjpxë Salmo 119:60).

EXKËM MWINMAY KO KYAJ YAJTUKJOTËGOYAˈANY

11. ¿Ti näägë nmëguˈukˈäjtëm të nyaytyukwinˈëënëdë parë kyaj tnekytyukjotëgoytyë Diosë tyuunk?

¹¹ Pën nnaytyukwinˈëˈënëm tijaty jaˈäjtp yä naxwiiny, mbäät nwinmäˈäyëm ko kyaj tyimjëjpˈamëty ngäjpxwäˈkxëm. Satanás yajjaˈäjtypy tijaty parë aduˈuk nmëmäˈäy nmëdäjëm tijaty këˈëm ndukˈoyˈäjtëm ets diˈib kyaj tyimjëjpˈamëty (1 Peed. 5:8; 1 Fwank 2:15-17). Näägë nmëguˈukˈäjtëm diˈib ijty pyëjtaktëp jëjpˈamë Diosë tyuunk, kyaj tnekyˈixtë ko yajtukjotëgoyäämp. Duˈun jyajtyë tuˈugë Dios mëduumbë mä primer siiglë diˈib xyëˈäjt Demas. Yëˈë jyamyëdäjtë Pablo, per nnaytyukwinˈëˈënë tijaty yajpatp yä naxwiiny. Kyaj tnekypyudëjkë Pablo ko tpatyë jotmay, niˈigyë ojts tnikeˈeky (File. 23, 24; 2 Tim. 4:10).

12. ¿Ti tuunk tyam nmëdäjtëm ets ti nmëdatäˈänëm xëmëkyëjxm?

¹² Pën ndukjotëgoyäˈänëmë Diosë tyuunk, tsojkëp njëjpkudijëtyaˈayëm tijaty yˈawäˈänëbë tyäˈädë jukyˈäjtën ets nduˈunëmë mëjää parë nˈaxäjëm “jaˈa jaantsypyë jukyˈajtëny” (1 Tim. 6:18, 19, Nuevo Testamento de Mazatlán). Ko myinëdë Diosë yˈAnaˈamën niˈamukë jäˈäy jyukyˈatäˈändë winë xëë yä Naxwiiny ets ttunäˈändë tijaty tyukxondäˈäktëp. Per ja tuunk diˈib tyam nmëdäjtëm, yëˈë ets nbudëjkëmë jäˈäy parë nyitsoˈoktët ko myinëdë Armajedon, tyäˈädë tuunk kyaj jatëgok nyekyyajtunäˈäny.

13. Ko net tyam nDiosmëduˈunëm, ¿ti mbäät xypyudëjkëm parë ndukjotëgoˈoyëmë Diosë tyuunk?

¹³ Tyam mayë jäˈäy të tkumanaxtë Dios. Pääty, ¿wiˈix mbäät ndukjotëgoˈoyëmë Diosë tyuunk? Nˈokjamyajtsëm ko nanduˈun ijty nmäˈäjëm. Per ta ojts nyajˈyujxëm ets ojts xykyudëˈkx xykyujäjëmë Jesusë yˈëxpëjkën extëmë Pablo jyënany. Tyam, ëtsäjtëmë net xypyatëm parë ngudëˈkx ngujäjëmë wiink jäˈäy (käjpxë Éfesʉ 5:14). Ko Pablo duˈun jyënany, ta tkujäˈäyë: “Mnayjëjwijtsëmbitëdëp. Katë mjikyˈattë extëmë kujuunëty; ittë extëmë diˈibë wijy kejy. Tundë miitsëty byeen määnëmë naty mˈawäätsëdët, mët ko yˈaxëëgëty yëˈë tiempë” (Éfe. 5:15, 16). Pääty, mientrës nˈakmëdäjtëmë tiempë, nˈoktuˈunëm tijaty mbäät xypyudëjkëm parë kyaj ngumanäjxëmë Diosë tyuunk mä tyäˈädë axëëkpë jukyˈäjtën.

NDUKJUKYˈÄJTËMË TIEMPË DIˈIB NINÄˈÄNËM DUˈUN KYAYAˈIXY

14-16. ¿Tiko tyam mas niˈigyë yajtukjotëgoyaˈanyë Diosë tyuunk?

¹⁴ Duˈunyëm yajtukjotëgoy mä yajkäjpxwaˈkxy ja oybyë ayuk, per tyam mas niˈigyë yajtukjotëgoyaˈany. Desde 1914 yaˈixy wiˈix yˈadëëdäˈäy ja ijxwëˈëmën diˈib ojts yajnaskäjpxë mä Diosë yˈAyuk (Mat. 24:3-51). Ninäˈänëmë naxwinyëdë jäˈäyë jyukyˈäjtën kyayajpääty oˈkën jëjpˈam extëm tyam. Oyë nasiongë kumëjääbë të jyanaygyäjpxëdë ko tuˈugyë nyayaˈitäˈänëdë, per ja  dyaˈijnëdë listë 2,000 bombë diˈib mbäädë naxwinyëdë jäˈäy dyajkutëgoy oy myääjëty. Ets yajnigajpxy ko kanäkˈok “të tyëgoy” tijaty mëdë bombë yˈoyë, ¿waˈandaa të kyëdëkëtyë terroristë? Ëxpekyjyaˈay wyinmaytyë ko mbäät pojënë naxwinyëdë jäˈäy nyayajkutëgoyëdë ko tuˈugë terroristë dyajtsondäˈägëdë tsip. Per kyaj yëˈëyëtyë tsip diˈib pyëjtakypyë jukyˈäjtën jotmay jëjpˈam.

¹⁵ The Lancet etsë University College London, ojts jyënäˈändë: “Ko tyëgatsyë tiempë yëˈë diˈib ayoˈonbëjtakp mä siiglë 21”. Ets jyënandë ko mä tiempë myiny kyëdaˈaky, yëˈë yajpäˈämbataampy mayë jäˈäy ets miyonkˈam tˈayoˈonmoˈoyaˈany. Mbäät kyutëgoy kanäägë lugäär ko nëë tuu kyoombatët, myinëdë mëk ambë, mëk päˈäm, urakan, kyoombatëdë mejny o ko jäˈäy tsyiptundë mët ko tjaˈabëkäˈändë tijatyë naxwinyëdë yˈakmëdäjtypy. Ko tijaty yˈayoˈonbëjtaˈaky ets ko tyunyëtyë tsip yëˈë diˈib pyëjtakypy jotmay jëjpˈamë naxwinyëdë jäˈäy.

¹⁶ Ta jäˈäy diˈib winmääytyëp ets jyënäˈändë ko tuˈugë tsip tyunëdët, yëˈë nety adëëp ja “ijxwëˈëmën”. May kyaj tjaygyukëdë ti yˈandijpyë tyäˈädë ijxwëˈëmën. Per kanäk jëmëjt kujk nˈijxënë wiˈix yˈadëy ets yëˈë xytyukˈijxëm ko Kristë tam tyam yajkutuky ets ko tim tsojk jyëjpkëxäˈänyë tyäˈädë jukyˈäjtën (Mat. 24:3). Ninäˈänëm duˈun kyayaˈixy yˈadëëdäˈäyë ijxwëˈëmën extëm tyam. Pääty, tyamën ttiempëty parë jäˈäyë tsyuu myaˈay dyajkaˈaktët diˈib të tkumanaxtë Dios, ets mbäät pyudëkëdë ko nˈëwäˈkx ngäjpxwäˈkxëm.

17, 18. 1) ¿Ti mbäät nduˈunëm ko nnijäˈäjëm ti tiempë tyam ndukjukyˈäjtëm? 2) ¿Ti mbäädë jäˈäy pyudëkëty parë dyajtëgatsëdë wyinmäˈäny ets tˈaxäjëdë oybyë ayuk?

¹⁷ Jeˈeyë waanë tiempë nˈakmëdäjtëm parë ndukˈijxëmë Jyobaa ko ntsojkëm, ets nyajkëjxëm ja tuunk diˈib të xytyuknipëjkëm mä tyäˈädë tiempë jyëjpkëxanë. Tyam niˈigyë mëjwiin kajaa nyikejy extëmë Pablo tˈanmääy ja Dios mëduumbëty diˈib Roma: “Nijawëdë wiˈixë dëˈën ja tiempë yˈixyëty mä njikyˈäjtëm. Kyaj nˈokˈijtëm extëm pënëty määdëp, wijy nˈijtëm, mët ko waanë niˈigyë xymyëwingoˈonëm ja [nnitsokënˈäjtëm] këdiinëm mä tim jawyiin oj nˈaxäjëm ja Jesukristë” (Rom. 13:11).

¹⁸ Mbäät näägë jäˈäy tpëktë kuentë ko tsojkëp yˈittët oy mëdë Dios ko tˈixtë yˈadëy tijaty ojts yajnaskäjpxë mä tyäˈädë tiempë jyëjpkëxanë. Etsë wiinkpë ja tˈoymyëdowdë Diosë yˈayuk ko tˈixtë wiˈixë gobiernë kyaj tmëmadäˈäktë jotmay, extëm ko yˈayoˈonbäättë mä nyuˈkxykyäˈädë, ko kyaj mbäät tjëjpkuwäˈägë mä jäˈäy tsyiptundë mëdë bombë, nyayaˈook nyayajtëgoyëdë, nyaytyunëdë axëëk ets ko dyajwindëgoytyë naxwinyëdë. Etsë wiinkpë ja tˈoymyëdowdë ko ti ayoˈon tpäättë fyamilyë, extëm ko pyäädëdë tuˈugë mëk päˈäm, yaˈˈajääywyäˈkxtë o ko jyiiky myëguˈuk yˈooktë. Ko nˈëwäˈkx ngäjpxwäˈkxëm, mbäädë duˈumbë jäˈäy nbudëjkëm.

¿TI XYMYËJÄMOˈOYËM PARË NDUKJOTËGOˈOYËMË DIOSË TYUUNK?

19, 20. ¿Wiˈix mayë nmëguˈukˈäjtëm dyajtëgatstë jyukyˈäjtën ko tjaygyukëdë yajtukjotëgoyaˈanyë Diosë tyuunk?

¹⁹ Ko mayë nmëguˈukˈäjtëm dyaˈittë wyinmäˈänyoty ko yajtukjotëgoyäämbë Diosë tyuunk, ta mas niˈigyë dyajmëjwindëkëdë. Extëm nˈokpëjtakëm, ko tuˈugë kasäädë jäˈäy diˈib Ecuador tmëdooˈijtääytyë ja programë mä asamblee tuk xëëbë 2006, diˈib xyëˈäjt: “Nˈokmëdäjtëm ja wiin adëyë”, ta ojts ttuknibëjtäägëdë dyajnëjkxäˈändë jyukyˈäjtën adëyë. Ojts tkujayëdë tijaty kyaj tnekyyajtunäˈändë ets kyumdëgëk poˈo, ta ojts tsyënääytyëgatstë, tnikaktë tëgëëgë kyuartë ets ojts nyëjkxtë mä jeˈeyë tuˈugë kuartë. Ojts ttooktë tijaty parë ja nyuˈkxy tkëbajttë. Ko waanë yˈijty, ta tyëjkëdë tuumbë prekusoor ausilyaar ets ta ojts nyëjkxtë mä tyëgoyˈatyë käjpxwäˈkxpë extëm yˈanmääyëdë ja sirkuitë.

²⁰ Ja tuˈugë nmëguˈukˈäjtëm diˈib América  del Norte, tkujäˈäyë: “Kojëts nˈojtsy mëdëtsë nnëdoˈoxy mä asamblee 2006, ja nety kujk nyijkxy 30 jëmëjt mätsë nety të nnëbattë. Kojëts ojts njëmbijnëdë karroty, tajëts nimaytyaktë wiˈixëts mbäät nbanëjkxtë ja käjpxwijën parëts adëyë njukyˈattët (Mat. 6:19-22). Tëgëëgëtsë netyë ndëjk, nmëdäjtypyëtsë netyë ngarrë oyatypyë, ndëjkopkëts, tuˈugë lantsyë ets tuˈugëtsë ndëjk diˈib mbäät yajmënëjkxy oymyääjëty. Per tajëts njäˈäwëdë ko kyajtsë nety yajxon të nyajtundë ja tiempë etsëts ja njot nmëjääjëty, tajëts nduknibëjtakëdë parëts mas niˈigyë nmëdunäˈändë Dios. Mä jëmëjt 2008, ndëjkëdëts tuumbë prekusoor regulaar extëmëts ja nëëx tyuny. ¡Mëjwiin kajaajëts xyajxondäˈäktë kojëts tuˈugyë ndundë mëdë nmëguˈukˈäjtëm! Tëjëts ndundë mä lugäär mä mas niˈigyë tyëgoyˈatyë käjpxwäˈkxpë, ets kojëts mas niˈigyë nmëdundë Jyobaa, tajëts mas niˈigyë nmëwingondë. Diˈibëts mas nmëjjäˈäwëdëp, yëˈë kojëts nˈixtë wiˈixë jäˈäy tyëˈkxpekyë wyiin jyëjp ko tmëdoy ets tjaygyukë Diosë yˈAyuk”.

21. ¿Ti të nnijäˈäjëm ets yëˈë diˈib xypyudëjkëm parë ndukjotëgoˈoyëmë Diosë tyuumk?

²¹ Nnijäˈäjëm ti diˈib tim tsojk miin këdakp: “Yajpayoˈo[yaˈany] es [...] [kyu]tëgoyaˈany ja pekyjyaˈayëty” (2 Peed. 3:7). Ko të nnijäˈäjëmë Diosë yˈAyuk yëˈë xypyudëjkëm parë ngäjpxwäˈkxëm amumduˈukjot ko wingon yˈijnë ja mëj ayoˈon ets ko nyaxët, ta myinäˈäny ja jembyë jukyˈäjtën. Nˈokˈyaˈijtëm xëmë winmäˈänyoty ko yajtukjotëgoyäämbë tyäˈädë tuunk mä nmëtmaytyakëmë jäˈäy ets tˈawix tjëjpˈixtëdë jotkujkˈäjtën. Ko ndukjotëgoˈoyëm, yëˈë nety nyaˈijxëm ko ntsojkëmë Dios etsë nmëguˈukˈäjtëm.

[Yajtëˈëwën]