Keda ku Bo Sentido di Urgensia
“Prediká e palabra, okupá bo kuné ku urgensia.”—2 TIM. 4:2.
1, 2. Kua preguntanan ta lanta enkuanto e mandato pa ‘prediká ku urgensia’?
GENERALMENTE, hende ku tin trabou di salba bida ta traha ku un sentido di urgensia. Bomberonan, por ehèmpel, ta reakshoná mesora riba un yamada di emergensia pasobra nan sa ku bida di hende por ta na peliger.
2 Komo Testigu di Yehova, nos tambe ke yuda salba bida di hende. P’esei, nos ta tuma e mandato pa prediká e bon notisia di Reino mashá na serio. Pero maske nos trabou ta urgente, nos no ta hasié anshá. Kiko apòstel Pablo tabata ke men anto ora el a urgi nos pa ‘prediká e palabra i okupá nos kuné ku urgensia’? (2 Tim. 4:2) Kon nos por prediká ku urgensia? I dikon nos trabou ta asina urgente?
DIKON NOS TRABOU DI PREDIKÁ TA URGENTE?
3. Kiko lo ta e resultado si un hende aseptá òf rechasá e mensahe di Reino?
3 Ora nos pensa kon importante nos trabou di prediká ta, esta, ku e por salba bida di hende, nos lo komprondé kon urgente ta pa papia ku otronan tokante e bon notisia. (Rom. 10:13, 14) E Palabra di Dios ta bisa: “Ora mi bisa e malbado: ‘Lo bo muri sigur,’ i e bira for di su piká i praktiká huisio i hustisia, . . . e lo biba sigur; e lo no muri. Ningun di su pikánan ku el a kometé lo no wòrdu rekordá kontra dje.” (Eze. 33:14-16) Sí, Beibel ta bisa proklamadónan di e mensahe di Reino: “Lo bo salba bo mes i tambe esnan ku ta skucha bo.”—1 Tim. 4:16; Eze. 3:17-21.
4. Dikon Timoteo tabatin ku prediká ku urgensia den promé siglo?
4 Pa nos por komprondé dikon Pablo a urgi Timoteo pa prediká ku urgensia, nos mester analisá nos teksto sentral huntu ku un parti di su konteksto, ku ta bisa: “Prediká e palabra, okupá bo kuné ku urgensia den tempu faborabel i den tempu difísil, reprendé, spièrta seriamente, stimulá, ku tur pasenshi i arte di siña. Pasobra lo yega un tempu ku nan lo rechasá siñansa sano; ma di akuerdo ku nan mes deseo, nan lo rondoná nan mes ku maestronan ku ta konta nan loke nan tin gana di tende. Nan lo sera nan orea pa e bèrdat.” (2 Tim. 4:2-4) Sí, manera Hesus mes a profetisá, hende lo a bini ku siñansanan falsu den kongregashon. (Mat. 13:24, 25, 38) Ta p’esei tabata urgente pa Timoteo “prediká e palabra” asta den kongregashon pa e kristiannan no bai tras di siñansa falsu. Bida di hende tabata den wega. Awor, kiko di nos tempu?
5, 6. Kua ta algun siñansa falsu ku hende ta kere den dje?
5 Apostasia a oumentá i plama den nos tempu. (2 Tes. 2:3, 8) Ki siñansa falsu ta atraé hende awe? Un di nan ta e siñansa di evolushon. Por lo general, hende ta splika e teoria di evolushon ku términonan sientífiko. Pero debí ku den hopi pais nan ta promové e teoria akí ku asina un zelo, komo si fuera ta un siñansa religioso e ta, e ta korumpí e konsepto ku hende tin di Dios i di otro hende. Un otro siñansa falsu ku ta popular ta ku Dios no ta interesá den nos, i p’esei nos tampoko no tin nodi di mustra interes den dje. Dikon e siñansanan akí ta atraé miónes di hende i pone nan pega soño den sentido spiritual? Wèl, ámbos siñansa ta promové e mesun mensahe akí: ‘Bo por hasi loke bo ke pasobra bo no tin ku duna kuenta na ningun persona.’ Esaki ta un mensahe ku hopi hende gusta tende.—Lesa Salmo 10:4.
6 Pero tin mas siñansa falsu ku ta atraé hende. Por ehèmpel, algun baidó di misa gusta pa nan pastornan bisa nan, ‘Maske kiko boso hasi, Dios stima boso.’ Otro kosnan ku hende gusta tende i ku nan lidernan di iglesia i pastornan ta siña nan ta ku seremonia, sakrifisio di misa, fiesta religioso i imágen ta trese bendishon di Dios. E baidónan di misa ei no ta realisá den ki peliger nan ta. (Sal. 115:4-8) P’esei, si nos por lanta nan for di soño i yuda nan komprondé e mensahe di Beibel, nan tambe por benefisiá di e Reino di Dios.
KIKO TA NIFIKÁ PREDIKÁ KU URGENSIA?
7. Kon nos por demostrá nos sentido di urgensia?
7 Un bon siruhano ta ehersé su profeshon ku sumo kuidou pasobra bida di hende ta den wega. Pa kristiannan berdadero, e trabou di prediká ta sumamente urgente, i p’esei nos ta dediká tur nos atenshon na dje. Por ehèmpel, nos ta pensa riba pregunta- òf tópikonan ku kisas por lanta interes di hende ku nos topa. Ademas, nos ta kla pa adaptá nos skèdjel i sali den sirbishi ora hende ta mas dispuesto pa skucha.—Rom. 1:15, 16; 1 Tim. 4:16.
8. Kon un persona ta reakshoná generalmente ora algu ta urgente?
8 Un otro manera pa demostrá nos sentido di urgensia ta di pone prioridat. (Lesa Génesis 19:15.) Ban bisa bo a bai dòkter pa tuma resultado di algun tèst ku bo a hasi, i e dòkter ta bisa bo onestamente: “Tende, bo tin un problema ku nos mester trata urgentemente. Bo tin nèt ún luna pa tuma un desishon.” Kiko lo bo hasi? Lo bo kore sali for di su ofisina manera un bombero ku ta reakshoná riba un yamada di emergensia? Klaru ku nò. Kasi sigur, lo bo sinta skucha kiko e dòkter ta rekomendá bo, bai kas i pensa seriamente riba e asuntu i pone prioridat.
9. Dikon nos por bisa ku Pablo a prediká ku urgensia tempu e tabata na Efeso?
9 Loke Pablo a bisa e ansianonan di Efeso enkuanto su predikashon den e distrito di Asia tambe ta yuda nos mira kon urgente e trabou di prediká tabata p’e. (Lesa Echonan 20:18-21.) Aparentemente, for di e promé dia ku Pablo a yega Asia, el a kuminsá prediká e bon notisia di kas pa kas. Banda di esei, “tur dia e tabata duna diskurso den e sala di konferensia di e skol di Tirano.” Anto el a hasi esaki dos aña largu. (Echo. 19:1, 8-10) Pablo su rutina a mustra bon kla ku e trabou di prediká tabata urgente. E yamada pa ‘prediká e palabra ku urgensia’ no ta pa laga nos sinti ku e trabou di prediká ta pisá pa nos. Mas bien, e ta indiká ku e trabou di prediká mester ta e kos di mas importante den nos bida.
10. Dikon nos mester ta kontentu ku algun kristian a prediká ku urgensia un 100 aña pasá?
10 Promé ku 1914, un grupo chikitu di Studiante di Beibel a kuminsá prediká e bon notisia. Nan ehèmpel a mustra bon kla kiko ke men prediká ku urgensia. Aunke nan tabata un grupo chikitu di algun mil hende so, nan a realisá ku tabata urgente pa prediká e mensahe di Reino i a hasi esei ku entusiasmo. Nan a publiká nan sermonnan den sientos di korant i a presentá un kombinashon di pelíkula i slide ku nan a yama “Foto-Drama di Kreashon.” Di e manera ei, miónes di hende a haña e bon notisia. Si nan no tabatin un sentido di urgensia, kuantu di nos awe lo a tende e mensahe di Reino?—Lesa Salmo 119:60.
WAK PA BO NO PÈRDÈ BO SENTIDO DI URGENSIA
11. Kiko a pone algun ruman pèrdè nan sentido di urgensia?
11 Distraishon por pone un hende kuminsá konsiderá e trabou di prediká komo algu di ménos importansia. E meta di Satanas su mundu ta pa pone nos kore tras di nos kosnan personal i okupá nos mes ku asuntunan di ménos importansia. (1 Ped. 5:8; 1 Huan 2:15-17) I algun ruman ku un tempu tabata zeloso den Yehova su sirbishi a pèrdè nan sentido di urgensia. Demas por ehèmpel, un kristian di promé siglo ku tabata ‘kompañero di trabou’ di Pablo, a laga kosnan di mundu distraé di manera ku el a stòp di apoyá Pablo. Sí, en bes di sigui fortalesé Pablo den tempu di angustia, el a bandon’é.—Flm. 23, 24; 2 Tim. 4:10.
12. Ki oportunidat nos tin awor, i ki oportunidat nos lo tin pa semper?
12 Pa nos por keda ku nos sentido di urgensia, nos mester evitá di kai den e tentashon pa disfrutá di tur loke bida tin di ofresé. Nos mester traha duru pa “haña un gara firme riba loke realmente ta bida.” (1 Tim. 6:18, 19) Probablemente, bo ta konvensí ku bida eterno bou di e gobernashon di e Reino di Dios lo duna bo oportunidat amplio pa hasi hopi kos interesante. Pero ta aworakí so nos tin e oportunidat di yuda hende sobrebibí Armagedon.
13. Komo kristian, kiko nos por hasi pa keda ku nos sentido di urgensia?
13 Mirando ku mayoria di hende den mundu ta drumí den sentido spiritual, nos mester tene kuidou pa nos no pèrdè nos sentido di urgensia. Kon nos por evitá esei? Wèl, ta bon pa nos kòrda ku un tempu nos tambe tabata drumí den skuridat den sentido spiritual. Pero manera Pablo a bisa, nos a lanta for di soño i Kristu a bria riba nos. P’esei awor, nos tin e privilegio di ta kargadó di lus. (Lesa Efesionan 5:14.) Pablo a bisa tambe: “Paga bon tinu pa e manera ku boso ta kana no ta manera hende imprudente sino manera hende sabí, usando boso tempu di e mihó manera, pasobra nos ta biba den tempunan malu.” (Efe. 5:15, 16) Sí, nos ta bibando den un mundu malbado; pues laga nos ‘usa nos tempu’ bon i hasi kosnan ku ta yuda nos keda spiritualmente lantá.
NOS TA BIBANDO DEN UN TEMPU KRUSIAL
14-16. Dikon e predikashon di e mensahe di Reino ta mas urgente ku nunka awe?
14 Semper nos sirbishi tabata urgente, pero awor mas ku nunka. Desde 1914, nos ta mira hopi evidensia di e señal, presis manera Beibel a profetisá. (Mat. 24:3-51) Awe mas ku nunka bida di hende ta na peliger. Apesar di e akuerdonan ku nashonnan poderoso a sera resientemente, ainda nan tin un 2.000 bòm nuklear kla pa usa. Outoridatnan a raportá sientos di kaso di material nuklear ku ta supuestamente pèrdí. Kisas algun di e materialnan ei ta den man di terorista? Segun opservadónan, fásilmente teroristanan por inisiá un guera ku por kaba ku humanidat kompleto. Pero no ta guera so por eksterminá e rasa humano.
15 Na 2009, e revista The Lancet i University College London a publiká un artíkulo ku ta bisa ku “kambio di klima ta e menasa di mas grandi pa salú di hende den siglo 21.” E artíkulo ta sigui bisa: “Kambio di klima lo afektá salú di mayoria di pueblo den e siguiente dékadanan i pone bida di míles di miónes di hende mas i mas na peliger.” Kambio di klima por kousa destrukshon rònt mundu. Dikon? Pasobra esaki ta pone nivel di laman subi, kousa sekura, inundashon, epidemia, orkan i guera debí na skarsedat di rekurso. Sí, guera i desaster natural sigur ta un menasa pa sosiedat humano.
16 Algun hende ta pensa ku si bini un guera nuklear, esaki lo resultá den e susesonan ku ta kumpli ku “e señal” di e último dianan ku Hesus a profetisá di dje. Pero, mayoria di hende no sa kiko ta e berdadero nifikashon di e señal. Dikon nos ta bisa esei? Pasobra e señal ta bisto pa dékadanan kaba i ta indiká ku Kristu su presensia ta un realidat i ku e fin di e era malbado akí ta aserkando rápidamente. (Mat. 24:3) Nunka promé tabatin asina tantu evidensia di e rasgonan di e señal. Ta tempu pa hende lanta for di soño spiritual. I mediante nos predikashon, nos por yuda nan lanta.
17, 18. (a) Ki efekto e “tempu” akí tin riba nos? (b) Kiko por motivá hende pa kambia nan punto di bista di e mensahe di Reino?
17 Ta un poko tempu so a sobra nos pa demostrá nos amor pa Yehova i pa kompletá e trabou di prediká ku el a duna nos pa hasi den e último dianan akí. Loke Pablo a bisa e kristiannan di promé siglo na Roma tin un nifikashon asta mas grandi awe. El a bisa nan: “Boso sa den ki tempu nos ta biba. Ya ta ora pa boso lanta for di soño, pasobra nos salbashon ta mas serka ku tempu nos a bira kreyente.”—Rom. 13:11.
18 E kosnan ku ta sosodé den e último dianan akí por hasi hende konsiente di nan nesesidat spiritual. Otronan ta bira konsiente ku hende tin mester di yudansa ora nan mira ku gobièrnu humano no por solushoná problema ekonómiko, kaba ku violensia i armanan nuklear ni evitá daño na nos medio ambiente. Otronan ta bira konsiente di nan nesesidat spiritual debí na e situashonnan ku nan ta enfrentá den famia, manera por ehèmpel, problema serio ku salú, divorsio òf morto di un ser kerí. Ora nos ta partisipá den sirbishi, nos ta pone nos mes disponibel pa yuda e hendenan akí.
MOTIVÁ PA UN SENTIDO DI URGENSIA
19, 20. Kon un sentido di urgensia a motivá hopi kristian pa kambia nan estilo di bida?
19 Debí na nan sentido di urgensia, hopi kristian ta sinti nan motivá pa hasi mas den sirbishi. Por ehèmpel, un pareha yòn di Ecuador a disidí di simplifiká nan bida despues di a asistí na e dia spesial di asamblea na aña 2006: “Mantené Bo Wowo Simpel.” Nan a traha un lista di e kosnan ku nan no tabatin mester di dje, i denter di tres luna nan a muda for di nan apartamento di tres kamber pa un apartamento di ún kamber. Nan a bende algun kos i a eliminá tur debe. Djis despues, nan a kuminsá traha pionero ousiliar i, riba sugerensia di e superintendente di sirkuito, nan a bai sirbi den un kongregashon kaminda tabatin mas nesesidat.
20 Un ruman hòmber di Nort Amérika a skirbi: “Tempu ku ami ku mi kasá a asistí na e asamblea di sirkuito na aña 2006, nos tabatin 30 aña batisá. Den outo bayendo kas, nos tabata kòmbersá tokante e kambionan ku nos por hasi pa simplifiká nos bida i asina kumpli ku e konsehonan ku nos a haña. (Mat. 6:19-22) Nos tabatin tres kas, tereno, outonan luhoso, un boto i un karavana. Nos a sinti ku nos tabata manera kristiannan bobo i a disidí di hasi sirbishi di tempu kompleto nos meta. Na aña 2008, nos a djòin nos yu muhé den e trabou di pionero regular. Ta dushi pa traha den estrecho kompania ku nos rumannan! Nos a haña oportunidat di sirbi kaminda tin mas nesesidat. Anto hasiendo mas pa Yehova a hala nos mas serka dje. Loke ta duna nos goso tambe ta e privilegio di mira kon kontentu hende ta bira ora nan tende i komprondé e bèrdat di e Palabra di Dios.”
21. Kiko ta motivá nos na akshon?
21 Nos sa kiko ta spera e mundu malbado akí pronto: “e dia di huisio i di destrukshon di hende malbado.” (2 Ped. 3:7) Nos konosementu di e Palabra di Dios ta motivá nos pa prediká zelosamente tokante e binidero gran tribulashon i e mundu nobo. Ku urgensia, nos ta sigui prediká e mensahe ku ta duna hende berdadero speransa. Ora nos ta partisipá plenamente den e trabou urgente akí, nos ta demostrá berdadero amor pa Dios i pa nos próhimo.
[Preguntanan di Estudio]
