Rikchan-rikchanlla predicasun

“Diospa palabrantayá willakuy, chaytaqa utqayllamanyá ruray” (2 TIM. 4:2, NM).

¿ATIWAQCHU KUTICHIYTA?

¿Imanasqam punta cristianokuna rikchan-rikchanlla predicarqaku?

¿Imaynam hinalla rikchan-rikchanlla kayta atichwan?

¿Imanasqam kunan tiempopi aswan rikchan-rikchanlla predicananchik?

1, 2. Utqayllaman Diospa Palabranta willakunapaq Pablopa nisqanmanta, ¿ima tapukuykunatam rurakuchwan?

RUNAKUNATA salvaypi llamkaqkunaqa, anchatam kallpanchakunku utqayllaman chayta ruranankupaq. Rimasun bomberokunamanta, paykunaqa imapas kañakuptinqa utqayllamanmi rinku pitapas salvanankupaq.

² Jehová Diospa testigonkunapas munanchikmi runakunata yanapayta chaynapi salvakunankupaq. Chaymi predicanapaq Diospa kamachiwasqanchikta rikchan-rikchanlla ruranapaq kallpanchakunchik. Arí, manamá chaytaqa apurawllamanqa ruranchikchu. Hinaptinqa, ¿imatam apostol Pabloqa niyta munarqa: “Diospa palabrantayá willakuy, chaytaqa utqayllamanyá ruray”, nispanqa? (2 Tim. 4:2, NM.) ¿Ima ninantaq utqayllaman predicayqa? ¿Imanasqam chaynata ruranapaq kallpanchakunanchik?

¿IMANASQAM ANCHA ALLIN PREDICAYNINCHIKQA?

3. ¿Imam pasanqa Diosmanta willakuyta uyariqkunatawan mana uyariqkunata?

³ Predicasqanchikwan runakuna salvakunankumanta piensaspaqa, yaqachá kallpanchakusun Diosmanta astawan willakunapaq (Rom. 10:13, 14). Diosmi nin: “Sichum mana allin ruraq runata niyman: ‘Qamqa wañunkipunim’ nispa hinaptin payñataq huchanmanta wanakuspan allin arregloman hina allintaña ruraspan [...] kawsaspanqa kawsakunqapunim, manam wañunqachu. Hucha rurasqanqa manam yuyasqañachu kanqa”, nispa (Eze. 33:14-16). Jehová Diosqa paymanta willakuqkunamanqa nintaqmi: ‘Salvakunkim, salvankitaqmi uyarisuqnikikunatapas’, nispa (1 Tim. 4:16; Eze. 3:17-21).

4. ¿Imanasqataq astawan kallpanchakunanku karqa predicanankupaq?

⁴ Timoteota utqayllaman Diosmanta willakunanpaq  Pablopa nisqanmanta allinta entiendenapaqqa, qawasunchik imakunamantaraq rimasqanta. Nirqam: “Diospa palabrantayá willakuy, chaytaqa utqayllamanyá ruray allin tiempopipas chaynataq mana allin tiempopipas, runakunatapas faltanta qawachispayá qaqchay, kallpanchay hinaspa tukuy pacienciawan sumaqta yachachiy. Chayamunqam tiempokuna allin yachachikuykunataqa manaña chaskinankupaq, paykunaqa achkallaña yachachikuqkunata huñukuruspam munasqallankuta uyarinqaku. Cheqap kaq yachachikuykunamantam karunchakurunqaku hinaspam imaymana rikchaq cuentokunataña allinpaq hapinqaku”, nispa (2 Tim. 4:2-4, NM). Jesusqa ñam willakurqaña cheqap yachachikuymanta achka karunchakunankuta (Mat. 13:24, 25, 38). Chay willakusqan cumplikunanpaqña kachkaptinmi, Timoteoqa astawan kallpanchakunan karqa predicananpaq chaynapi cristianomasinkuna chay pantay yachachikuykunawan mana intuchikunankupaq. Achkamá peligropi kachkarqaku. ¿Ima nichwantaq kunan tiempomanta?

5, 6. ¿Ima yachachikuykunatam runakuna uyariyta munanku?

⁵ Kunan tiempopiqa astawanmi chay pantay yachachikuykunaqa kachkan (2 Tes. 2:3, 8). ¿Ima yachachikuykunatam runakunaqa uyariyta munanku? Kunanqa monomanta rikuriramusqanchik nisqa yachachikuytam religionninkuta hinaña qawanku. Kay yachachikuy sasa entiendenapaq kaptinpas, achka runakunam chaypiqa anchata creenku. Runakunaqa yachachinkutaqmi ñoqanchikmanta Dios mana nanachikusqanta, chaymi ninku Diospi mana iñinapaq. ¿Imanasqataq wara-waranqantin runakunaqa kay yachachikuykunapi hapipakunku? Kay iskaynin yachachikuyninkunam runakunata piensachin Diosman mana cuentata qospanku munasqankuta ruranankupaq. Chaytamá achka runakunaqa uyariyta munanku (leey Salmo 10:4).

⁶ Wakin runakunaqa munankutaqmi iglesianpi yachachiqninkuna kayna ninankuta: “Imataña ruraptikipas, Diosqa kuyasunkim”, nispa. Sacerdotekunawan pastorkunaqa runankunatam ninku iglesiankuman, cultonkuman, fiestankunaman riptinku hinaspa taytacha-mamachakunata yupaychaptinku Dios bendecinanmanta. ¡Chay runakunaqa manamá cuentata qokunkuchu pantaypi kasqankutaqa! (Sal. 115:4-8.) Ichaqa, atichwanmi paykunata yanapaytaqa hinaspa Bibliapa nisqanta entiendechiytapas. Chaynapim paykunapas hamuq tiempopi bendicionkunata chaskinqaku.

¿IMA NINANTAQ UTQAYLLAMAN PREDICAYQA?

7. ¿Imaynatam rikchan-rikchanlla kasqanchikta qawachinchik?

⁷ Huk doctor operaspanqa, rikchan-rikchanllam chayta ruranan chay runa mana wañunanpaq. Predicaspapas rikchan-rikchanlla kasqanchiktaqa qawachichwanmi, runakunapa ima yachay munasqankupi piensaspa chaynataq tiemponkupa kasqanman hina watukuspa (Rom. 1:15, 16; 1 Tim. 4:16).

8. ¿Ima ninantaq rikchan-rikchanlla rurayqa?

⁸ Rikchan-rikchanlla kasqanchikqa qawakunqataqmi imakunata puntapi churasqanchikpi (leey Genesis 19:15). Piensariy, huk doctormi imawan onqosqanchikta qawaspan niwanchikman huk killalla hampikunapaq tiemponchik kasqanmanta. Manachá bomberokuna hinachu utqayllamanña lloqsirusunqa. Aswanqa doctorpa ima niwasqanchiktachá uyarisun hinaspapas tanteakusunchá imakunata puntapi churanapaq.

9. ¿Imanasqam nichwan Efeso llaqtapi kaspan Pablo rikchan-rikchanlla predicasqanmanta?

⁹ Pablopa rikchan-rikchanlla kasqanqa qawakunmi Asia lawpi predicasqanmanta Efeso congregacionpi ancianokunaman willakusqanpi (leey Hechos 20:18-21). Yaqachusmi Asia lawpi Efeso llaqtaman chayarusqanmantapacha,  Pabloqa wasin-wasin runakunaman Diosmanta willakurqa. Chaymantapas iskay watapunim Tiranno sutiyoq runapa escuelanpi sapa punchaw yachachirqa (Hech. 19:1, 8-10). Chayna rikchan-rikchanlla predicasqanqa sutillam qawakurqa sapa punchaw rurayninkunapi. Hinaptinqa, utqayllaman otaq rikchan-rikchanlla predicanapaq Biblia niwaspanchikqa, ¿niwachkanchikchu llumpay sasa rurana kasqanta? Manam. Aswanqa niwachkanchikmi ima rurayninchikmantapas puntapi churanapaq.

10. ¿Imanasqataq 100 wata ñawpaqtaraq iñiqmasinchikkunapa rikchan-rikchanlla predicasqankumanta kusikunanchik?

¹⁰ Yaqa 1914 kaq watapim, chayna rikchan-rikchanlla predicasqankuta Biblia estudiaqkuna qawachirqaku, Diosmanta willakuyta qallaykuspanku. Aslla kaspankupas, predicay ancha allin kasqanta qawaspankum ganaswan predicayta qallaykurqaku. Pachaknintin periodicokunapim Diosmanta willakurqaku hinaspa colorniyoq televisionpi hina qawachiqku “Foto-Drama de la Creación”, nisqata. Chayna rurasqankuwanmi wara-waranqantin runakunaman Diosmanta yachachirqaku. Sichu rikchan-rikchanlla Diosmanta mana willakunmankuchu karqa, hinaptinqa ¿yaqachu ñoqanchikpas Jehová Diosmanta uyarichwan karqa? (Leey Salmo 119:60.)

AMA SAQESUNCHU RIKCHAN-RIKCHANLLA PREDICASQANCHIKTA

11. ¿Imanasqam wakin cristianokunaqa manaña rikchan-rikchanllachu predicanku?

¹¹ Imaymana kusirikuykunaqa rikchan-rikchanlla predicasqanchiktam yanqacharunman. Kay Pachapi Satanaspa munaychakusqan kaqkunaqa, munasqallanchikta hinaspa mana ancha allin kaqkunallata maskanapaqmi hikutawanchik (1 Ped. 5:8; 1 Juan 2:15-17). Ñawpaqpi Diospa munayninta puntapi churaqkunamantam wakinqa iskayrayarunku tukupay tiempopi kawsasqanchikmanta. Chaynam tarikurqa punta cristianokunapa tiemponpi Demas sutiyoq cristiano. Pablopa predicaqmasin kaspanpas, kay Pachapi kaqkunawanmi inturachikurqa. Sasa tiempokunapi Pablota yanapananmantaqa saqerurqam (File. 23, 24; 2 Tim. 4:10).

12. ¿Imapim kunanqa yanapakuyta atichwan, hinaspa imakunatam hamuq tiempopi rurayta atisun?

¹² Pi cristianopas rikchan-rikchanlla kasqanta mana yanqachananpaqqa, manam kay Pachapi kaqkunawanqa intuchikunanchu. Astawanmi kallpanchakunan ‘wiñay kawsayta haypananpaq’ (1 Tim. 6:18, 19). Yachanchikmi Diospa Munaychakusqanpiqa sumaqllaña huertapi wiñaypaq kawsaspanchik, tukuy imatapas rurananchikmanta. Kunanqa Diospa piñakuyninmanta runakuna salvakunankupaqmi yanapananchik, kayqa manam haykapipas rurakunqañachu.

13. ¿Imaynatam ñoqanchikqa rikchan-rikchanlla kachwan?

¹³ Yaqa lliw runankuna iñiyninkupi puñusqa kasqankurayku, ¿imaynatam ñoqanchikqa rikchan-rikchanlla kachwan? Yuyarisun, ñawpaqpiqa ñoqanchikpas puñusqa hinam iñiyninchikpi tarikurqanchik. Ichaqa huk punchawmi, Pablopa nisqanman hina Cristomanta yachachikuynin kanchaykuwaptinchik iñiyninchikpi rikcharirurqanchik. Kunanñataq kusikuypaq ñoqanchikña hukkunata yanapachkanchik (leey Efesios 5:14). Apostol Pablom qellqarqa: “Allintayá qawakuychik imaynam kawsasqaykichikta. Amayá kawsaychikqa mana yachayniyoqkuna hinachu aswanqa yuyayniyoqkuna hinayá. Tiempoykichiktapas amayá usuchiychikchu, kay punchawkunaqa mana allinllañam”, nispa (Efe. 5:15, 16). Tiemponchiktaqa iñiyninchikpi kallpanchawananchikpaq kaqkunapiyá servichikusun, chaynapi rikchan-rikchanlla kananchikpaq.

MANA ALLIN TIEMPOKUNAPIM KAWSANCHIK

14-16. ¿Imanasqam ancha allin predicayninchikqa?

¹⁴ Rikchan-rikchanllamá haykapipas predicana karqa, ichaqa astawanraqmi kunan  tiempokunapiqa. Bibliapa lliw willakusqankunam 1914 watamantapacha sutilla qawakurqa ima tiempokunapi kawsasqanchikta yachanapaq (Mat. 24:3-51). Manam haykapipas runakunaqa wañuy patapiqa tarikurqakuchu. Apu nacionkuna hatu-hatun bombakuna manaña kananpaq acuerdoman chayaptinkupas, hinallam yaqa iskay waranqa chayna bombakuna kapunku qonqayllamanta kachaykunankupaq. Autoridadkunam willakunku pachaknintin chayna bombakuna “suwasqa” kasqanmanta. ¿Yaqachu terrorista runakunapa makinman chayarunman karqa? Yachayniyoq runakunapa nisqanman hinaqa, runakunas wañuchinakuyta qallaykuchwan terrorista runakuna guerrata qallaykuptinqa. Ichaqa manam hatun guerrakunallawanchu runakunaqa tukuruchwan.

¹⁵ Londres lawpi reqsisqa qellqapa nisqanman hinaqa, 2001 watamantapachas “kay Pachapi lliw kawsaqkunaqa wañuy patapi hina tarikun llumpay chiriwan rupay kasqanrayku”. Nintaqmi: “Kay Pachapi llumpay chiriwan rupayqa hamuq watakunapiqa lliw runakunatam llumpayta sasachanqa”, nispa. Kay Pachapi wakin sitiokunas yaqa chinkachisqa hina kanman lamar qocha astawan huntaruptin, para mana kaptin, hatun lloqllakuna kaptin, sinchi wayra-para kaptin hinaspa guerrakuna kaptinpas. Arí, guerrakunawan hatun desgraciakunam runakunata wañuy patapi tarichin.

¹⁶ Wakinkuqa piensankumanpaschá chay hatun bombakunawan guerra qallaykuptin, tukupay tiempopi kawsasqanchik chayllaraq qawakunanmanta. Ichaqa yaqa lliw runakunam chaykunamantaqa mana allintachu entiendenku. Ñam chunkantin watakunaña tukupay tiempopi kawsasqanchikqa sutilla qawakurqa, chayqa qawachintaqmi Jesucristo kamachiyta ña qallaykusqanta hinaspa mana allinkunapa puchukayninpas hichpallaña kasqantapas (Mat. 24:3). Kunan tiempopim chaykunaqa aswan sutillaña qawakun. Chaymi runakunaqa iñiyninkupi rikcharinanku, chaypaqmi hinalla predicananchik.

17, 18. a) ¿Imapim yanapawanchik ‘ima tiempopi’ kawsasqanchikmanta yachasqanchik? b) ¿Imataq runakunata yanapanman Diosmanta uyarinankupaq?

¹⁷ Pisi tiempollañam kachkan kuyakuyninchikta Jehová Diosman qawachinanchikpaq hinaspa kay tukupay tiempopi predicasqanchik tukurunanpaqpas. Kunan tiempopiqa aswan allinmi Romapi cristianokunaman Pablopa kayna nisqanta kasukuyqa: “Yachachkankichikmi ima tiempopim kawsasqanchikta. Ñam rikcharinaykichik horaña. Cristoman iñisqanchik punchawmantam ña hichpamuchkanña cuerponchik salvaykuwananchikpaq punchaw” (Rom. 13:11).

¹⁸ Yaqapaschá wakin runakunaqa tukupay tiempopi lliw pasakunan kaqkunata qawaspanku Jehová Diosmanta yachayta munanmanku. Wakinñataqmi gobiernokuna imapas sasachakuyta mana allichay atisqankuta qawaspanku. Gobiernokunaqa manamá atinkuchu qollqemanta, guerrakunamanta hinaspa kay Allpa pacha qachachakusqanmanta sasachakuykunata allichaytaqa. Wakinñataqmi Diosmanta yachayta munanmanku familiankupi pipas onqoruptin otaq wañukuptin hinaspa huk sasachakuykunaraykupas. Chay runakunatam predicaspanchik yanapayta atichwan.

RIKCHAN-RIKCHANLLA KAYQA YANAPAKUNMI

19, 20. ¿Imatam achka iñiqmasinchikkuna rurarqaku rikchan-rikchanlla kaspanku?

¹⁹ Rikchan-rikchanlla kasqankum wakin iñiqmasinchikkunata yanaparqa astawan predicanankupaq. Ecuador nacionmanta casado iñiqmasinchikkunam, 2006 watapi huk punchaw asambleaman risqankumanta qepaman tantearurqaku mana tukuy imayoq kawsanankupaq. Kimsa killa pasaruptinmi taksa wasillapi yachanankupaq astakururqaku, wakin kapuqninkunata rantikuruspankum imapas manukusqankuta  allicharurqaku. Pisi tiempollamantam precursor auxiliar kayta qallaykurqaku hinaspam watukuq ancianopa nisqanman hina huk lawman astakurqaku astawan yanapakunankupaq.

²⁰ Estados Unidos nacionmantam huk iñiqmasinchik nin: “2006 watapim señoraywan huk punchaw asambleaman risqaykupiqa, 30 wataña bautizasqa kachkarqaniku. Carroykuwan wasiykuman kutichkaspaykum, parlarqaniku asambleapi mana ancha kapuqniyoq kanapaq uyarisqaykuta imayna kasukunaykumanta (Mat. 6:19-22). Ñoqaykupaqqa karqam kimsa wasiyku, allpayku, sumaq carroyku, taksa barcoyku hinaspa wasiman rikchakuq carroykupas. Mana yachaywan kawsasqaykuta musyakuspaykum, tantearurqaniku precursor kanaykupaq. 2008 watapim chayna serviyta qallaykurqaniku warmi churiywan kuska. ¡Maynatam kusichiwarqaku huk sonqolla iñiqmasiykunawan kuska servisqaykuqa! Mana ancha predicaqkunapa kasqanpipas yanapakurqanikum, chaykunam astawan Diosman asuykachiwarqaku. Llumpaytam kusikuniku runakuna cheqap yachachikuykunata uyarispanku anchata kusikuptinku”, nispa.

21. ¿Imamanta yachaymi kallpanchawanchik rikchan-rikchanlla predicanapaq?

²¹ Yachanchikmi ‘juicio punchaw chaynataq mana allin runakunapa puchukanan tiempo’ chayaykamunanpaqña kasqanta (2 Ped. 3:7, NM). Bibliamanta yachasqanchikkunam kallpanchawanchik llumpay ñakariy punchawmantawan mosoq pachapi kawsakuymanta willakunapaq. Munanchikmi rikchan-rikchanlla sumaq suyakuymanta runamasinchikman willaytaqa. Chaynata ruraspaqa, Jehová Diostawan runamasinchik kuyasqanchiktam qawachisun.

[Kay yachachikuypa tapukuyninkuna]