Predicacionta usqhaylla aparisun

“Diospa siminta [...] willallaypuni.” (2 TIM. 4:2.)

¿KUTICHIWAQCHU?

¿Imaraykun qallariy siglopi predicación urgente aparikunan karqan?

¿Imatan ruwasunman usqhaylla predicananchista ama qonqanapaq?

¿Imaraykun kunan astawanqa Reinomanta willakuyta urgente aparina?

1, 2. Apóstol Pablo “Diospa Siminta [...] willallaypuni” nisqanwan, ¿imatan nisharqan, ima tapukuykunan chaymanta kan?

RUNAKUNAQ kawsaynin salvaypi llank’aq runakunaqa, usqhayllan chayta hunt’anku. Ejemplopaq, bomberokunaqa phawayllan rinku imapas pasarusqanmanta waqyamuqtinku, runakuna peligropi kashasqankurayku.

² Jehová Diospa testigonkunaqa runakunatan yanapayta munanchis salvakunankupaq, chaymi usqhaylla predicación apariyta ancha importantepaq qhawarinchis. Ichaqa manan kaqta mana kaqtachu chaytaqa ruwanchis, nitaq phaway-phawayllachu. Apóstol Pablon nirqan: “Diospa siminta [...] willallaypuni”, nispa (2 Tim. 4:2). Griego rimaypi “willallaypuni” simiqa, imatapas usqhaylla otaq urgente ruwaymi. Chhayna kaqtinqa, ¿imaynatan usqhaylla predicasunman? ¿Imaraykun chay llank’ayta urgente aparinanchis?

¿IMARAYKUN USQHAYLLA APARINA?

3. ¿Ima kusikuymi otaq llakikuymi kanman predicasqanchiswan?

³ Sichus yuyaykusun predicasqanchiswan kusikuy kananpi otaq llakikuy kananpi chayqa, mana tiempota usuchispan usqhaylla predicayta munasun (Rom. 10:13, 14). Diosmi Bibliapi prometen: “Huk huchasapa runatachus niyman: Cheqaqtapuni huchaykimanta wañunki, nispa, chay runataq hucha ruwayta saqepuspa allinkaqta chaninkaqtawan ruwapunman chayqa [...] kawsallanqapunin, ñawpaq millay hucha ruwasqankunapas manañan yuyarisqañachu kanqa”, nispa (Eze. 33:14-16). Chaymantapas, Reinomanta predicaqmanmi kayta prometen: “Chayta ruwaspaqa qan kikiykitan qespichikunki, hinallataq uyariqniykikunatapas”, nispa (1 Tim. 4:16; Eze. 3:17-21).

4. ¿Imaraykun qallariy siglopi predicación urgente aparikunan karqan?

⁴ ¿Imaraykun apóstol Pablo Timoteota kallpacharqan  predicacionta usqhaylla aparinanpaq? Chayta yachanapaq ñawpaqta qhawarisun imamanta rimashasqanta. Ninmi: “Diospa siminta willay, atikuqtinpas mana atikuqtinpas willallaypuni. Hinallataq tukuy pacienciawan yachachispa uyanchay, anyaykuy, kunaykuy. Hamuq tiempo chayamuqtinmi cheqaq yachachikuyta mana uyariytapas munanqakuñachu, aswanmi yanqa uyariyllata munaq kaspanku paykunaqa munayninkuman hina askha yachachiqkunata huñunqaku, hinaspan cheqaq-kayta mana uyariyta munaspa cuentokunata uyarinqaku” (2 Tim. 4:2-4). Jesusmi profetizarqan pantasqa yachachikuykuna rikhurimunanmanta (Mat. 13:24, 25, 38). Chay tiempo chayamushaqtinqa urgenten Timoteo Diospa siminta willanan karqan runakunaman cristianokunamanpas, chhaynapi mana pipas pantasqa yachachikuykunawan q’otuchikunanpaq. Askha runaq kawsayninmi peligropi kasharqan. ¿Ima nisunmanmi kay tiempomanta?

5, 6. ¿Ima reqsisqa yachachikuykunan mast’arisqa kashan?

⁵ Kay tiempopiqa mast’arisqan kashan chay pantasqa yachachikuykuna (2 Tes. 2:3, 8). ¿Ima yachachikuykuna uyariytan runakuna munanku? Askha llaqtakunapin evolución yachachikuy t’ikarishan. Científico runakunaq nisqanwan tupachispaña yachachinku chaypas, religionpi creencia hinañan kashan. ¿Imarayku? Chay yachachikuyqa Diosmanta runakunamantapas imatachus piensasqankupin afectan. Chaymantapas kallantaqmi kay allin reqsisqa yachachikuy: Diosqa manan ñoqanchispi interesakunchu, chaymi ñoqanchismanpas mana imapas qokuwananchischu. ¿Imaraykun waranqanpi runakuna uyarinku espiritualpi puñuchiq chhayna yachachikuykunata? Iskaynin yachachikuypin kay willakuy kashan: “Manan pipas cuentata mañasunkichu, ima munasqaykitapas ruwawallaqmi”, nisqa. Chaytan runakuna uyariyta munanku (leey Salmo 10:4).

⁶ Kallantaqmi hukniray rimaypas. Iglesiaman riq wakin runakunaqa munankun yachachiqninku kay ninanta: “Imaynataña kawsanki chaypas, Diosqa munakusunkin”, nispa. Sacerdotekuna pastorkunapas runaq uyariy munasqantan rimanku ceremoniakuna, misakuna, fiestakuna imagenkuna ima Diospa bendicionnin chaskinankupaq kasqanta yachachispa. ¡Chay runakunaqa manan reparankuchu peligropi tarikushasqankuta! (Sal. 115:4-8.) Ichaqa yanapasunmanmi espiritual puñuymanta rikch’arinankupaq, chhaynapi Bibliamanta yachaspa Diospa Gobiernon apamusqan bendicionkunata chaskikunankupaq.

¿IMAN KAY TIEMPOPI USQHAYLLA PREDICAY?

7. ¿Imaynatan rikuchinchis usqhaylla predicayta importantepaq qhawarisqanchista?

⁷ Huk allin doctorqa tukuy yuyaytan churanan llank’ayninman, runakunaq kawsaynin peligropi kasqanrayku. Predicay aparisqanchispipas usqhaylla apariy importante kasqantan rikuchisunman chay ruwayman yuyayta churaspa. Yaqapaschá piensarisunman ima temakunachus, tapuykunachus, otaq willakuychus runakunaman interesanman chaykunapi. Hinaspapas, horarionchista allichakuspan uyarikuq runakunaman visitasunman (Rom. 1:15, 16; 1 Tim. 4:16).

8. ¿Iman imatapas usqhaylla ruway?

⁸ Usqhaylla predicaq kasqanchisqa, imataraqchus ñawpaqta ruwasqanchispin rikukunqa (leey Génesis 19:15). Ejemplopaq, yaqapaschá doctorman risqayki qhepaman pay sut’ita nisunkiman: “Onqosqan kashanki, usqhayllan hampichikunayki, chayta ruwanaykipaqmi huk killalla plazo kashan”, nispa. Chayta yachaspaqa manachá phawayllachu lloqsiwaq imaynan bomberokuna imapas ruphashaqtin usqhaylla rinku hinata. Aswanpas doctorpa nisqanta kasukuspan wasiykiman rispa allinta yuyaykuwaq imakunatachus ñawpaqta ruwanaykipi.

9. ¿Imaraykun Pablo Efesopi predicacionta usqhaylla aparirqan?

⁹ Pablo usqhaylla predicayta importantepaq qhawarisqanqa, Efesopi umallikunaman  qelqasqanpin sut’ita reparakun; chaypin willarqan Asia provinciapi predicasqanmanta (leey Hechos 20:18-21). Yaqachus hina, chayamusqan p’unchaymantapacha runakunata visitarqan wasin-wasinta predicaspa. Chaymantapas, iskay watan “Tiranno sutiyoq runaq yachachinan wasipi sapa p’unchay” yachachirqan (Hech. 19:1, 8-10). Paypaq predicay urgente kasqanqa, sapa p’unchay ruwasqanpin rikukurqan. Predicayta usqhaylla aparinapaq kamachikuyqa manan sayk’uchiwananchispaqchu. Ichaqa predicayqa ñawpaqpin kawsayninchispi kanan.

10. ¿Imaraykun kusikunchis ñawpaqpi Biblia estudiaqkuna predicayta usqhaylla aparisqankumanta?

¹⁰ 1914 wata ñawpaqtaraqmi huk huch’uy grupo predicayta qallarirqanku, paykunaq ejemplonmi yanapawanchis usqhaylla predicay imachus kasqanta entiendenapaq. Pisillaña karqanku chaypas, repararqankun urgente predicanankuta, chaymi tukuy sonqowan chay llank’ayta aparirqanku. Discursokunatan publicarqanku 2000 más periodicokunapi, chaymantapas, a colorespin “Foto-Drama de la Creación” nisqata, peliculapi hina presentarqanku. Chhaynapin allin willakuykunata mast’arirqanku millonninpi runakunaman. Sichus mana yuyaykunkumanchu karqan predicayta usqhaylla aparinankupi chayqa, ñoqanchisqa manapaschá Reinomanta willakuyta uyarisunmanchu karqan (leey Salmo 119:60).

AMA QONQAYCHU USQHAYLLA APARINAYKITA

11. ¿Imaraykun hukkuna qonqarqanku usqhayllapaq predicación apariyta?

¹¹ Kay pachapi imaymana ruwaykunan hark’awasunman predicacionta importantepaq qhawarinanchista. Saqraq kamachisqan pachaqa sapankaq allinnillanpi, yanqa kaqkunapi ima puriymanmi tanqawanchis (1 Ped. 5:8; 1 Juan 2:15-17). Wakin cristianokunaqa qonqarqankun kay tiempopi predicación importante kasqanta. Chaymi sucederqan qallariy siglopi Demas cristianota. Pablota yanapaqña karqan chaypas, kay pachawanmi distraechikurqan. Sasachakuy tiempopi Pablo tarikushaqtin yanapaspa kallpachananmantaqa saqerparirqanmi (File. 23, 24; 2 Tim. 4:10).

12. ¿Ima llank’aypaqmi kunallanña tiempo kashan, imakunapaqmi tiempo kanqa wiñay kawsayniyoq kaqtinchis?

¹² Usqhaylla predicación aparinanchista ama qonqanapaqqa, lliw cristianon kay kawsaypa ofrecesqan kaqkunapi puriymanta cuidakunanchis. Kallpachakunan ‘cheqaq kawsayman hap’ipakunapaq’ (1 Tim. 6:18, 19). Yachasqanchis hina, Diospa Gobiernonpiqa wiñay kawsayniyoqmi kasun tukuy imatapas ruwanapaq. Ichaqa runamasinchis Armagedonpi salvakunankupaq llank’ayqa manañan qhepamanqa aparikunqañachu.

13. Kunanqa cristianotaq kanchis chayqa, ¿imaynatan usqhaylla predicayta importantepaq qhawarisunman?

¹³ Yaqa llapa runakunataq espiritualpi puñushanku chayqa, ¿imatan ruwasunman predicayninchis urgente kasqanta ama qonqanapaq? Yuyarinanchismi ñawpaqqa espiritualpi puñusqanchista, ichaqa huk p’unchaymi rikch’arichiwarqanchis. Hinan Pabloq nisqan hina, Cristoq k’anchaynin ñawpanchispi k’ancharirqan. Chaymi kunanqa hukkunaman k’anchariyta atinchis, chay ruwayqa ancha kusikunapaqmi (leey Efesios 5:14). Chayta nisqan qhepamanmi Pablo nirqan: “Allintapuni reparakuychis imaynatachus kawsashasqaykichista, ama mana yuyayniyoq hinaqa kawsaychischu, aswanpas yachayniyoq hinapuni kawsaychis. Tiempotaqa ama usuchiychischu, kay p’unchaykuna mana allin kasqanrayku”, nispa (Efe. 5:15, 16). Tiempota mana usuchispan espiritual ruwaykunapi purinanchis, chhaynapin kay millay pachapi rikch’asqa kasun.

IMPORTANTE TIEMPOPIN KAWSASHANCHIS

14, 15. ¿Imaraykun kunan astawanraq Reinomanta predicacionta urgente aparinanchis?

¹⁴ Ñawpaqpipas usqhayllan predicacionta aparikuq, kunanmi ichaqa astawanraq mana tiempota usuchinachu. 1914 watamantapachan  sut’ita rikukurqan Diospa Siminpi kaq askha señalkuna (Mat. 24:3-51). Runaq kawsayninqa manan hayk’aqpas chhayna peligropi tarikurqanchu. Chayllaraq ruwakuq acuerdokunawanpas qhapaq nacionkunapiqa yaqa 2.000 armas nucleares nisqan kashan, listollaña phatachinankupaq. Autoridadkunan willanku chay bombakuna pachakninpi “chinkasqanta”. ¿Terroristakunaq makinpichu yaqapas wakin kashanman? Investigaq runakunaq nisqanman hina, pachantinpi runakunas chinkapunman huk terroristaq qallarichisqan guerrapi. Ichaqa manan guerrallachu amenazan runakunaq kawsayninta.

¹⁵ Huk qelqakunan estudio aparisqankumanta willarqanku: “Kay XXI siglopiqa, clima cambiasqanmi astawanqa Hallp’antinpaq hatun peligro kashan”, nispa (The Lancet hinallataq Londresmanta University College). Chay informen nin: “Clima cambiasqanwanmi hamuq watakunapiqa yaqa llapa llaqtakuna afectasqa kanqaku, hinaspan waranqanpi runakunaq kawsaynin saludninkupas astawanraq peligropi tarikunqa”, nispa. Askha cheqaskunan afectasqa kanman lamar-qochaq yapakusqanwan, ch’akiriywan, lloqllakunawan, hatun wayrawan, onqoy mast’arikusqanwan ima; chaymantapas pisillaña qhepaq petróleo, mina hukkunatapas munaychakuymanta guerra kaqtin. Arí, guerrakuna, terremotokuna lloqllakuna, hukkunapas kananmi runaq kawsayninta amenazan.

16. ¿Imaynatan cristianokuna señal hunt’akusqanta qhawarinchis?

¹⁶ Wakin runaq piensasqanman hinaqa, pachantinta afectaq guerran qallarichinqa señalkunaq hunt’akuyninta. Ichaqa yaqa llapa runan chay señal imachus kasqanta mana entiendenchu. Chayqa unay watakunañan rikukushan, chaypin reparakun Cristo runakunawanña mana rikuylla kashasqanta, chhaynapi kay millay pacha tukukuyninmanña sispaykushasqanta (Mat. 24:3). Manan hayk’aqpas chay señalkunaqa kay tiempopi hina sut’ita hunt’akurqanchu. Chhaynaqa, urgenten runakuna espiritualpi puñuyninkumanta rikch’arinanku, chaypaqmi predicasqanchis yanapanqa.

17, 18. a) ¿Imapaqmi kallpachawanchis kay ‘tiempopi’ kawsasqanchis? b) ¿Iman runakunata kallpachanman Reinomanta willakuyta uyarikunankupaq?

¹⁷ Pisillañan tiempo kashan Jehová Dios munakusqanchista rikuchinapaq, hinaspa kay p’uchukay tiempopi predicay aparinapaq kamachiwasqanchis llank’ayta tukunapaq. Apóstol Pablo Roma cristianokunaman carta apachisqanqa kay tiempopin ñoqanchispaq aswan importante. Kaytan nirqan: “Ima tiempopichus kasqaykichista reparaspa, puñuymanta rikch’arinaykichis tiempoñan. Kunanqa iñisqaykichis tiempomanta aswan sispapiñan Diospa qespichinasuykichis tiempoqa kashan”, nispa (Rom. 13:11).

¹⁸ Tukukuy tiempopi señalkuna hunt’akusqanta rikuspan wakin runakunaqa Diosmanta yachayta necesitasqankuta reparanku. Hukkunataq chayta reparanku familiankupi imapas sucedeqtin, yaqapaschá onqosqa tarikuqtin, t’aqanakuy kaqtin, otaq munakusqanku runa wañupuqtin. Wakin runakunataq gobiernokuna qolqemanta sasachakuyta mana atipasqanta, armas nucleares nisqakunata, maqanakuykunata, Hallp’a pacha qhellichasqa kasqanta ima rikuspa reparanku runakuna yanapay necesitasqankuta. Servicionchista hunt’aspaqa chay runakuna yanapaytan atinchis.

KALLPACHAKURQANKU URGENTE KASQANRAYKU

19, 20. Urgente predicanankurayku, ¿imatan askha cristianokuna ruwarqanku?

¹⁹ Predicacionta urgente apariy ancha importante kasqanraykun, askha cristianokuna kallpachakurqanku astawan predicanankupaq. Ejemplopaq, Ecuador nacionmanta casado iñiqmasinchiskunan 2006 watapi huk p’unchay asambleapi uyarisqanku qhepaman, necesitasqallankuwan kawsayta yuyaykurqanku. Kay tematan uyarirqanku: “Ñawiqa allinpuni kanan”, nisqata. Huk listatan ruwarqanku mana necesitasqanku cosaskunamanta. Kinsa killamantataq astakurqanku  kinsa cuartoyoq wasimanta, huk cuartollayoqman. Wakin cosaskunatan venderqanku hinaspa manukusqankutapas pagapurqanku. Pisi tiempollamanmi precursor auxiliar kapurqanku, chaymantapas publicadorkunaq necesitakusqan iñiq t’aqapi yanapakunankupaq watukuq umalliq nisqantan kasukurqanku.

²⁰ Estados Unidosmanta huk iñiqmasin qelqarqan: “2006 watapin esposaywan asambleaman rirqayku, 30 watan bautizasqa kasharqayku. Wasiman carropi kutipushaspan parlarirqayku imaynatas necesitasqallaykuwan kawsaykuman chayta (Mat. 6:19-22). Kinsa hawapin wasiyku karqan, hallp’akunayoq, moderno carrokunayoq, huk lanchayoq, huk remolque wasiyoq iman karqayku. Repararqaykun mana yuyayniyoq cristiano hina ruwasqaykuta, chaymi decidikurqayku tukuy tiempoykuwan servinaykupaq. 2008 watapin ususiyku hina precursor regular karqayku. ¡Anchatan kusikurqayku iñiqmasikunawan kuska llank’aspa! Astawan predicaqkuna necesitakusqan llaqtakunapin servirqayku, Diospaq aswanta llank’aspataq astawan payman asuykurqayku. Kusikunapaqmi Diospa Siminta uyarispa runakunaq entiendesqankuta rikuyqa, chaytan anchata valorayku”, nispa.

21. ¿Ima yachasqanchismi kallpachawanchis predicayta usqhaylla aparinapaq?

²¹ Pisillamantan kay millay pacha “hatun taripay p’unchaypi” tarikunqa, chaypin ‘Diosta mana manchakuq runakuna muchunqaku’ (2 Ped. 3:7). Diospa Siminmanta yachasqanchismi kallpachawanchis chay manchay ñak’ariy p’unchaymanta willamunapaq, chay qhepaman mosoq pacha kanantapas. Manataqmi qonqanchischu allin willakuykunata runakunaman apariy urgente kasqanta. Chay llank’ayta aparinapaq tukuy atisqanchista ruwaspaqa, Diosta runamasinchistawan munakusqanchistan rikuchinchis.

[Tapuykuna]