Lu xlakaskinka kaʼakxilhwi lichuwinanaw Dios
Lu xlakaskinka kaʼakxilhwi lichuwinanaw Dios
«Naliʼakgchuwinana ntachuwin, xaliʼankgalhin katlawa.» (2 TIM. 4:2)
¿TLAN XLICHUWINANTI?
¿Tuku xlakata lu xlakaskinka akxilhkgolh nalichuwinankgo Dios natalan kxapulana siglo?
¿Tuku natlawayaw xlakata chuntiya xlakaskinka naʼakxilhaw nalichuwinanaw Dios?
¿Tuku xlakata la uku tlakg xlakaskinka nalichuwinanaw xTamapakgsin Dios?
1, 2. ¿Tuku takgalhskinin wi xlakata: «Naliʼakgchuwinana ntachuwin»?
TIKU liskujkgo nakalakgmaxtukgo latamanin lu lakapala tlawakgo xtaskujutkan. Akgtum liʼakxilhtit, bomberos lakapala ankgo akxni katasanikan xlakata katsikgo pi max wi tiku nani komo ni sokg nachankgo.
2 Xtatayananin Jehová lu kamakgtayaputunaw nalakgtaxtukgo latamanin. Wa xlakata, lu xlakaskinka akxilhaw lichuwinanaw xlakata Tamapakgsin. Xlikana pi ni kaj lakapala o akglakgwa tlawayaw. Pero ¿tuku xkilhchanima akxni apóstol Pablo wa: «Naliʼakgchuwinana ntachuwin, xaliʼankgalhin katlawa»? (2 Tim. 4:2.) ¿Tuku wamputun lu xlakaskinka nalichuwinanaw Dios? ¿Tuku xlakata lu xlakaskinka kintaskujutkan?
¿TUKU XLAKATA LU XLAKASKINKA NALICHUWINANAW DIOS?
3. ¿Tuku nakitaxtu komo latamanin nakgaxmatkgo o ni, xlakata xTamapakgsin Dios?
3 Akxni lakpuwanaw tuku nakitaxtu komo latamanin nakgaxmatkgo o ni nakgaxmatkgo xlakata xTamapakgsin Dios, max lakapala nalichuwinamputunaw xalakwan xalaksasti tamakatsin (Rom. 10:13, 14). Dios wan: «Akxni nakwani tiku lixkajni likatsi: “Xlikana naniya”, chu xla namakgxtakga xtalakgalhin chu natlawa tuku xaʼakgstitum, [...] xla chuntiyaku nalatama. Ni katinilh. Chu ni katilakapastakka xtalakgalhin nema tlawalh» (Eze. 33:14-16). Anta kBiblia Jehová wani tiku lichuwinan xatlan tamakatsin xlakata Tamapakgsin: «Naʼakstulakgtaxtuya, chu na namalakgtaxtikgoya wanti nakgaxmatnikgoyan» (1 Tim. 4:16; Eze. 3:17-21).
4. ¿Tuku xlakata xtalakaskin pi lu xlichuwinanka Dios kxapulana siglo?
4 Xlakata nakatsiyaw tuku xlakata Pablo wanilh Timoteo pi lu xtalakaskin xlichuwinalh Dios, kaʼakxilhwi textos nema alistalh wilakgolh nema lichuwinamaw. Anta wan: «Naliʼakgchuwinana ntachuwin, xaliʼankgalhin katlawa, akxni mpi tlan mpuwana, chu akxni mpi ni lay; kamakgatakgsnikgo xtalakgalhinkan, kastakyawakgo, kamakgpuwantinikgo, [...] lakatsuku namasiyunikgoya. Xampi namin nkilhtamaku akxni nialh nakgaxmatputunkgoy wantu [...] tlan tamasiyun; [...] chu namamakgstokgkgoy makgalhtawakgananin wanti namasiyunikgoy ntu mininikgoy ni lakwan talakapastakna. Na nialh nakgaxmatputunkgo wantu talulokgtat» (2 Tim. 4:2-4). Jesús xwanita pi lhuwa xʼamakgolh makgxtakgkgo xaxlikana takanajla (Mat. 13:24, 25, 38). Wa xlakata, lu xtalakaskin pi Timoteo xlichuwinalh Dios kcongregación xlakata kstalaninanin Cristo ni xkaliʼakgskgawika ni xaxlikana tamasiy. Xlakata lhuwa latamanin kalipekua xwilakgo. ¿Chu la uku?
5, 6. ¿Tukuya talakapastakni kgalhikgo niku lichuwinanaw Dios?
5 La uku lhuwa makgxtakgkgonit xaxlikana takanajla chu talakgatuminit (2 Tes. 2:3, 8). ¿Tuku kgaxmatputunkgo latamanin? Klakalhuwa kachikinin, asta la akgtum takanajla akxilhkgo evolución. Maski científicos wa tiku lichuwinankgo evolución, la akgtum takanajla kitaxtu pero ni kanajlanikgo Dios. Atanu tuku masiyakan wa pi Dios ni kinkapaxkiyan chu wa xlakata na ni xlakaskinka naʼakxilhaw. ¿Tuku xlakata lhuwa latamanin kgaxmatkgo umakgolh talakapastakni nema laktlawa xtakanajlakan? Xlakata masiyakgo uma talakapastakni: «Katlawa tuku tlawaputuna, xlakata niti maxkiya kuenta». Chu wa uma tuku kgaxmatputunkgo (kalikgalhtawakga Salmo 10:4).
6 Pero atanu la tlan tlawakan pi latamanin nakgaxmatkgo tuku lakaskinkgo. Makgapitsi tiku ankgo kpusikulan lakgatikgo pi nakawanikan: «Maski katuwa tuku natlawaya Dios paxkiyan». Tiku pulalinkgo xtakanajlakan kawanikgo pi misas, paskua chu ídolos kasikulunatlawanit Dios. ¡Tiku kanajlakgo uma nipara tsinu katsikgo pi lu katuwa wilikgo xlatamatkan! (Sal. 115:4-8.) Pero akinin tlan nakamakgtayayaw nakatsikgo tuku xaxlikana masiya Biblia, xlakata tlan nalipaxuwakgo tuku nalimin xTamapakgsin Dios.
¿TUKU WAMPUTUN LU XLAKASKINKA NALICHUWINANAW DIOS?
7. ¿La natlawayaw xlakata nalimasiyayaw pi lu xlakaskinka nalichuwinanaw Dios?
7 Akxni chatum cirujano tlawama akgtum operación lakapala chu liwana tlawa xlakata katsi pi kalipekua chu max naniy tiku chukuma komo ni liwana natlawa. Nachuna akxni lichuwinanaw Dios, lu xlakaskinka akxilhaw akxni nalakpuwanaw tuku nakalitachuwinanaw, tuku nakakgalhskinaw o tuku katsiputunkgo latamanin. Atanu, akxni lakkaxwiliyaw tukuya hora wilakgolh latamanin chu tlan nakinkakgaxmatnikgoyan (Rom. 1:15, 16; 1 Tim. 4:16).
8. ¿La tlawakan akxni wi tuku lu xlakaskinka xlitatlawat?
8 Komo xlakaskinka akxilhaw nalichuwinanaw Dios, nalitasiya tuku pulana wiliyaw kkilatamatkan (kalikgalhtawakga Génesis 19:15). Akgtum liʼakxilhtit, akxni tlawanikana análisis chu makuchina akxilha tuku kgalhiya chu waniyan: «Lu snun wila. Kgalhiya akgtum papaʼ xlakata naputsaya tuku nalikuchuna». Xlikana pi ni natsalataxtuya kpumakuchin, xtachuna la chatum bombero tiku ama mamixi lhkuyat. Wata liwana nakgaxpata tuku nawaniyan makuchina, napina minchik chu nalakpuwana tuku tlakg xlakaskinka nema militlawat.
9. ¿Tuku xlakata wanaw pi Pablo lu xlakaskinka akxilhli nalichuwinan Dios akxni xwi kʼÉfeso?
9 Tlan nakatsiyaw la xlilakaskinka xakxilha Pablo nalichuwinan Dios xlakata tuku kawanilh lakgkgolotsin xalak Éfeso xlakata la kskujnit kʼAsia (kalikgalhtawakga Hechos 20:18-21). Max akxni chalh watiya uma kilhtamaku tsukulh kalakgapaxialhnan kʼakgatunu chiki xlakata nakalitachuwinan xalakwan xalaksasti tamakatsin. Nachuna akgtiy kata, «kʼakgtum tlanka xchik chatum chixku wanikan Tirano, wantu la xaputakgchiwin chiki xmaklakaskinkan» (Hech. 19:1, 8-10). Xtasiya pi lu xlakaskinka xakxilha la kskujnani Dios xlakata tuku xtlawa chali chali. Maski kinkastakyawakanan pi lu xlakaskinka nalichuwinanaw Dios nikaj kinkalimakgasitsiputunkanan. Pulana nawiliyaw nalichuwinanaw Dios kkilatamatkan.
10. ¿Tuku xlakata lipaxuwayaw pi liwaka akgtum ciento kata kstalaninanin Cristo lu xlakaskinka akxilhkgolh nalichuwinankgo Dios?
10 Lu tlan liʼakxilhtit kinkawilinikgon, tiku xkalilakgapaskan xLikgalhtawakgananin Biblia tiku tsukukgolh lichuwinankgo Dios akxni nina xchan kata 1914, chuna limasiyakgolh pi lu xlakaskinka xʼakxilhkgo uma taskujut. Maski nina lhuwa xwankgonit lu xkatsikgo pi lu xlakaskinka xwanit xatapaxuwan nalichuwinankgo xTamapakgsin Dios. Kperiódicos xwilikgo akglhuwa ciento xtaʼakgchuwinkan chu na xmatitaxtikgo diapositivas xacolor chu tuku xtitaxtukgo anta tlan xtatsuwikgo chu xwanikan «Foto-Drama de la Creación». Chuna tlan kalitachuwinankgolh xlakata Dios lhuwa millón latamanin. Komo ni xtilakpuwankgolh pi lu xlakaskinka xwanit chuna natlawakgo, max lhuwa akinin ni xtikgaxmatwi xlakata xTamapakgsin Dios (kalikgalhtawakga Salmo 119:60).
CHUNTIYA SKGALALH KATAWILATIT
11. ¿Tuku tlawa pi makgapitsi nialh xlakaskinka naʼakxilhkgo nalichuwinankgo Dios?
11 Tuku lilakgaputsayaw kkilatamatkan max natlawa pi nialh xlakaskinka naʼakxilhaw nalichuwinanaw Dios. Xkakilhtamaku Satanás tlawa pi katlawaw tuku lakaskinaw chu tuku ni lu xlakaskinka (1 Ped. 5:8; 1 Juan 2:15-17). Makgapitsi tiku pulana lu xlakaskinka xʼakxilhkgo nalichuwinankgo Dios alistalh nialh chuna tlawakgolh. Chuna akgspulalh Demas kxapulana siglo. Maski wa tiku xmakgtayana Pablo xwanit, pero wata wa lakgatilh tuku xʼanan kkakilhtamaku. Ni tamakgxtakgli xlakata xmakgtayalh Pablo akxni lu tuwa tuku xtitaxtuma, wata akgxtakgwililh (File. 23, 24; 2 Tim. 4:10).
12. ¿Tuku tlan natlawayaw la uku chu tuku tlan namakglhtinanaw akxni nalatamayaw xliputum kilhtamaku?
12 Xlakata chuntiya lu xlakaskinka naʼakxilhaw nalichuwinanaw Dios, ni nakgalhiputunaw putum tuku anan kkakilhtamaku. Wa lu naliskujaw xlakata «nakgalhi[yaw] wa ntu xlipan [o xaxlikana] latamat» (1 Tim. 6:18, 19). Chuna la katsiyaw, kxTamapakgsin Dios nakgalhiyaw latamat nema ni kgalhi xlisputni kParaíso xlakata natlawayaw tuku lakgatiyaw. Pero xlakata nakamakgtayayaw latamanin nalakgtaxtukgo kʼArmagedón kaj makgtum natatlawa.
13. Xlakata kstalanina Cristo akinin, ¿la natlawayaw xlakata ni naxlajwanan kintakanajlakan?
13 Xlikalanka Katiyatni lhuwa latamanin xlajwananit xtakanajlakan, ¿la natlawayaw xlakata ni nataxlajwani kintakanajlakan? Pulana akinin na kxlajwananit kintakanajlakan. Pero milh kilhtamaku kinkamalakastakwanikan. Chu akxni katsiniw xlakata Cristo skgalalh tawilaw chuna la wan Pablo. Chu la uku kinkalakgchanan nakamalakastakwaniyaw amakgapitsin (kalikgalhtawakga Efesios 5:14). Akxni xlichuwinanita uma alistalh tsokgli: «Kuentaj kakatlawakantit lantla nalatapayatit, [...] taskgalanaj, ni wa xtachuna wa nti ni akkatsi, wampi wa xtachuna nti akkatsiy. Xlitamalakgtaxtit [o nalimaxtuyaw] nkilhtamaku, xampi wa nchu yuma nkilhtamaku, [...] ni tlan» (Efe. 5:15, 16). Nalimaxtuyaw kilhtamaku xlakata namatliwakglhaw kintakanajlakan kʼuma xakalixkajni kakilhtamaku.
LAMAW KILHTAMAKU NEMA LU XLAKASKINKA
14-16. ¿Tuku xlakata la uku tlakg xlakaskinka nalichuwinanaw xTamapakgsin Dios?
14 Lichuwinankan Dios lu xlakaskinka pero la uku tlakg xlakaskinka. Kkata 1914 asta la uku akxilhmaw pi kgantaxtuma tuku lichuwinan Biblia pi xʼama la (Mat. 24:3-51). La uku tlakg kalipekua wi xlatamatkan latamanin. Maski laklanka kachikinin lakkaxwilikgonit pi nialh nalimasputunankgo bombas, pero max kgalhikgo akgtiy mil bombas nema kaxtlawakanita xlakata nalimakgninankan. Mapakgsinanin wankgo pi «kgalhankanit» tuku litlawakan bombas nucleares. ¿Pi wa kgalhikgo tiku makgninankgo chu kamakgapekuankgo latamanin? Makgapitsi latamanin wankgo pi umakgolh tiku makgninankgo chu kamakgapekuankgo latamanin tlan kaj lakapala xkinkamasputukgon. Pero ni kajwatiya guerra tlan xkamasputulh latamanin.
15 Tuku lakputsananikgolh The Lancet chu University College xalak Londres wan: «Xlakata talakgpalitilhama kakilhtamaku na lu katuwa wili kilatamatkan kʼuma siglo XXI», chuna wan: «Xlakata talakgpalitilhama kakilhtamaku kata nema namin lhuwa tuku nitlan nakaʼakgspula kachikinin chu tlakg kalipekua nawili xlatamatkan lhuwa millón latamanin». Lakalhuwa niku nalakgsputa xlakata tlakg nataliwaka chuchut nema wi kpupunu, nialh katisenalh, o lhuwa nasenan, naʼanan tajatat, namin lanka un chu natlawakgo guerra xlakata nalamakglhtiputun tuku naʼakgataxtu. Xlikana pi guerra chu tuku malakgsputunan kalipekua wili xlatamatkan latamanin.
16 Max wi tiku nalakpuwan pi lanka guerra natlawa kakgantaxtulh tuku xwankanit nema «litasiya» pi xaʼawatiya kilhtamaku wilaw. Pero lhuwa ni katsikgo tuku wamputun uma tuku xʼama litasiya. Akglhuwata kata la tasiyama uma tuku xlichuwinankanit, chu limasiya pi Cristo kinkatawilan chu nialh makgas namasputukan kakilhtamaku (Mat. 24:3, NM). Makgasa ni lu xtasiya chuna la uku uma tuku xlichuwinankanit pi nala. Lakgchanit kilhtamaku xlakata nakalitachuwinanaw Dios chu nalakastakwanankgo xlakata xtakanajlakan latamanin.
17, 18. 1) ¿Tuku kinkamatlawiyan xlakata katsiyaw pi xaʼawatiya «kilhtamaku» lamaw? 2) ¿Tuku tlawa pi makgapitsi nakgaxmatputunkgo xlakata xTamapakgsin Dios?
17 Nialh lhuwa kilhtamaku kgalhiyaw xlakata nalimasiyayaw pi paxkiyaw Jehová chu nasputa taskujut nema kinkalakgayawanitan uma xaʼawatiya kilhtamaku. Tuku kawanilh Pablo natalan xalak Roma, la uku tlakg xlakaskinka: «Katsiyaw mpi skalajwa kilhtamaku nchu lamaw, na xlimakgwata nchu natakiyaw ktalhtata; xampi tlakg lakatsuwa wi nkiliʼakgaputaxtutkan, ni xawa lantla akxni xakgasiya ntikanajlaw» (Rom. 13:11).
18 Max wi tiku nakatsiputunkgo xlakata Dios akxni naʼakxilhkgo pi kgantaxtuma tuku xwankanit pi nala. Amakgapitsi akxilhkgo pi latamanin lakaskinkgo wi tiku nakamakgtaya xlakata mapakgsinanin nila tuku tlawakgo akxni sputa tumin, nila masputukgo tiku limakgninankgo bombas, lamakgnikan chu talakgalhima Katiyatni. Chu amakgapitsi tsukukgo katsiputunkgo xlakata Dios max xlakata tuku la kxfamilia, akgtum lipekua tajatat, lakxtlawakgo xtamakgaxtokgat o niy xfamiliajkan. Chu akxni anaw lichuwinanaw Dios, tlan nakalimakgtayayaw.
XATAPAXUWAN NATLAWAYAW
19, 20. ¿Tuku tlawakgonit lhuwa natalan xlakata lu xlakaskinka akxilhkgo nalichuwinankgo Dios?
19 Xlakata lu xlakaskinka akxilhkgo, lhuwa natalan tlakg lichuwinamakgolh Dios. Akgtum liʼakxilhtit, tala chu xpuskat xalak Ecuador lakkaxwilikgolh ni lhuwa tuku nakgalhikgo kxlatamatkan akxni kgaxmatkgolh tamakxtumit xaʼakgtum kilhtamaku kkata 2006 nema wanika: «Tlan kakgalhiw kilakgastapukan». Tsokgwilikgolh tuku ni xmaklakaskinkgo chu titaxtulh akgtutu papaʼ, makgxtakgkgolh xchikkan nema xkgalhikgo chu ankgolh niku tlakg xaʼaktsu, stakgolh makgapitsi tuku xkgalhikgo chu xokgokgolh tuku xlaklinkgo. Chu ni makgas titaxtulh, precursores auxiliares wankgolh chu chuna tlawakgolh la kawanilh viajante xlakata xmakgtayanankgolh niku tlakg xtalakaskima tiku nalichuwinankgo Dios.
20 Chatum tala xalak Estados Unidos tsokgnalh: «Akxni akit chu kimpuskat kilaw klanka tamakxtumit kkata 2006, puxamakaw kata xtitaxtunit lata xaktamununitaw. Akxni xaktaspitmawa kinchikkan, klichuwinaw tlan xakmakgantaxtiw tastakyaw nema mastaka pi ni lhuwa tuku xkgalhiw kilatamatkan (Mat. 6:19-22). Xakkgalhiyaw akgtutu chiki, pukuxtu, lu xalaktapalaxla putlaw, lancha chu chiki nema tlan malakxijkan. Kakxilhwi pi ni liwana xaklakapastaknitaw tuku xaktlawanitaw, wa xlakata klakkaxwiliw putum kilhtamaku nakskujnaniyaw Dios. Kkata 2008 na precursores regulares klitaxtuw chuna la kintsumatkan. ¡Lu klipaxuwayaw akxtum kataskujaw natalan! Tlan kmakgtayananaw niku tlakg talakaskima tiku nalichuwinankgo Dios, chu akxni tlakg kskujnaniyaw tlakg ktalakatsuwiniyaw Jehová. Lanka talakgalhaman kakxilhaw akxni latamanin lipaxuwakgo chu akgatekgskgo xTachuwin Dios».
21. ¿Tuku tlawa pi lu nalichuwinanaw Dios?
21 Katsiyaw pi nialh makgas namasputukan uma kakilhtamaku: «Dios natatlaway kuinta xlipaks wanti lixkajnit tilatamakgolh» (2 Ped. 3:7). Xlakata katsiyaw tuku wan Biblia lu lichuwinanaw pi talakatsuwima lanka talakgaputsit chu alistalh namin xasasti kakilhtamaku. Chuntiya lu kalitachuwinamputunaw xaxlikana takgalhkgalhin latamanin. Akxni lu lichuwinanaw limasiyayaw pi paxkiyaw Dios chu latamanin.
[Takgalhskinin]
