Suytʼäwisampejj kusisitäpjjañäni

“Wiñay jakañ suytʼäwirusa. Uka jakañ churañatakejj Diosajj janïr aka oraqe qalltaskipanwa phoqhañataki arsuwayi, Diosasti uk arsusajj janiw kʼariskiti.” (TITO 1:2.)

AMTAÑATAKI

¿Ajllit mä cristianojj jiwañkam Diosar serviwayki ukhajj alajjpachan wali kusisiñ utjatap kunjamatsa yattanjja?

¿Alajjpachar sarañatak ajllitanakasa ukat yaqha uwijanakas kunjamatsa suytʼäwinïpjje?

¿Kuntï suyktan uk phoqasir uñjañatakejj kunjamsa sarnaqañasa ukat kunsa lurañasa?

1. ¿Kuna suytʼäwtï Jehová Diosajj churkistu ukajj kunjamsa jan walinakan uñjasiñäni ukhajj yanaptʼistaspa?

 “SUYTʼAÑ churiri Diosajja, kusisiñampi, sumankañampi jumanakar phoqhantpan juparu iyawsapjjatam layku, ukhamat uka suytʼañanjja phoqtʼatäpjjañamataki Qollan Ajayun chʼamap toqe” sasaw apóstol Pablojj cristianonakar qellqatayna (Rom. 15:13). Kuna suytʼäwtï Jehová Diosajj churkisti uk chuymasar katjjäsiñänejja, chuymas chuyma ukat kusisitaw jikjjatasiñäni, jan waltʼäwinakar saykatañatakis chʼamañchtʼatäñäniwa. Alajjpachar sarañsa jan ukajj aka Oraqen jakañsa suyaskstanjja, “uka suytʼäwiw sum katjjäsistu [...], kunjämatejj anclajj mä barcorojj katjjäsejja ukhama” (Heb. 6:18, 19). Suytʼäwisaw jan walinakan jikjjatasiñäni ukhajj jan saranukuñatak yanaptʼistani, ukat iyawsäwisan chʼollqhëñatakisa ukat jan pächasiñatakis yanaptʼistani (Hebreos 2:1 ukat 6:11 liytʼasiñapawa).

2. Aka qhepa urunakan jakapki uka cristianonakatakejja, ¿kuna pä suytʼäwis utji, ukat kunsa yaqha uwijanakajj lurapjjañapa?

² Aka qhepa urunakan jakapki uka cristianonakajj kuna pä suytʼäwitï utjki ukwa suyasipki. “Jiskʼa tama” sasin uñtʼatäpki uka cristianonakajja, alajjpachar sarañatak suytʼäwinïpjjewa. Cristomp chikaw reyinakjama ukat sacerdotenakjam apnaqanipjjani ukat janipuniw mayampsa jiwapkaniti (Luc. 12:32; Apo. 5:9, 10). ‘Yaqha uwijanakjam’ jan ukajj “walja jaqenak[jam]” uñtʼatäpki ukanakajja, paraisoptayat Oraqen wiñay jakañ suytʼäwinïpjjewa, jupanakaw Cristomp apnaqatäpjjani (Apo. 7:9, 10; Juan 10:16). Ukampis qhespiyatäpjjañapatakejja, Criston jilanakapat aka Oraqenkasipki ukanakaruw yanaptʼapjjañapa, ukjja janipuniw armapjjañapäkiti (Mat. 25:34-40). Ajllitanakajja, kuntï suyapki uk katoqapjjapuniniwa, yaqha uwijanakasti ukhamarakiw kuntï suyasipki uk katoqapjjani  (Hebreos 11:39, 40 liytʼasiñapawa). Nayraqatjja, ajllitanakan suytʼäwipat yatjjatañäni.

AJLLITANAKAN SUYTʼÄWIPA

3, 4. ¿Kunjamatsa ajllitanakajj “machaqat na[sipjje]”, ukat kuna suytʼäwinïpjjesa?

³ Apóstol Pablojj pä cartwa ajllit cristianonakar qellqatayna, jupanakarusti ‘Jehová Diosaw ajllisipjjtam’ sarakïnwa (1 Ped. 1:1, 2). Ukanwa kuna suytʼäwinïpjjes jiskʼa tamajj uk qhanañchäna. Nayrïr cartapan akham sasaw qellqäna: “Yupaychañäni Diosaru, Jesucristo Tatitun Awkiparu, jupasti jachʼa khuyapayasiñap laykuwa jiwasarojj machaqat naciyistu, Jesucriston jiwatanak taypit jaktatap toqe. Ukasti jiwasanakarojj suytʼañanwa jakayarakistu, ukhamarakiw jumanakarojj kuntï Diosajj imarapkistus uka herencia alajjpachanjja katoqayapjjätam, ukajj janiw tukjatäkaspati, ni qʼañuchatäkaspasa, janirakiw mä panqarjamas wañskaspati. Jumanakarusti Diosajj jupar iyawsapjjatam laykojja, jachʼa chʼamapampiw taqe kunatsa imasipkaraktam, kuna qhespiyasiñatejj jumanakataki wakichatäki uka katoqapjjañamkama. Uka qhespiyasiñsti qhepa urunakaw [...] katoqasjjapjjäta. Ukatwa jumanakajj wali kusisita sarnaqasipjjtajja” sasa (1 Ped. 1:3-6).

⁴ Kunjamtï amuyktanjja, jiskʼa tamajj Cristomp chika alajjpachat apnaqanipjjañapatakejj Jehová Diosaw wawanakapjam qollan ajayupampi ajllisiwayi, ukhamatwa jupanakajj “machaqat na[siwayapjje]”. Reyinakjama ukat sacerdotenakjamaw Cristomp apnaqanipjjani (Apo. 20:6). Kunjamtï Pedrojj siskejja, “machaqat na[siñaw]” ajllitanakarojj ‘suytʼañan jakayaraki’, uka suytʼañasti alajjpachan wiñay jakañawa, “janiw tukjatäkaspati, ni qʼañuchatäkaspasa, janirakiw mä panqarjamas wañskaspati”. ¡Ukatpï “wali kusisi[täpjjejja]”! Ukampis alajjpachan wiñay jakañ katoqañatakejj jiwañkamaw Jehová Diosar servipjjañapa.

5, 6. ¿Kunatsa ajllit cristianonakajj Diosat jan jitheqtapjjañapäki?

⁵ Payïr cartapanjja akham sasaw Pedrojj qellqarakïna: “Jilatanaka, Diosajj jumanakar jawsapktam, ukhamarak ajllipktam ukanjja sum saytʼapjjañama[wa]” sasa (2 Ped. 1:10). Ajllit cristianonakajja, taqe chuymaw Diosarojj confiasipjjañapa, munasirïpjjañapa, Dios chuymäpjjañapa ukat jilat kullakanakarus munasiñampiw uñjapjjañapa. Pedrojj akham saskakïnwa: “Jumanakantejj taqe akanakajj utjanejja, ukatsti ukjja sum jilayapjjarakïta ukkhajja, jumanakan jakañamajj janiw inamayatakïkaniti” sasa (2 Pedro 1:5-8 liytʼasiñapawa).

⁶ Filadelfia (Asia Menor) markankir taman ajllit irpir chuymaninakarojja akham sasaw Jesucristojj jiwatat jaktasin säna: “Llampʼu chuymanïma satajj-jja istʼistawa, ukatarakwa jichhajj jumar imäma kuna yantʼanakatejj aka oraqpacharu jutkani ukanakatjja. Uka yantʼanakasti aka oraqen utjiri jaqenakar yantʼañatakiw jutani. Akajj jankʼakiw jutä. Sum katjjäsim kunatejj utjktam ukjja, ukhamat jan khitisa juman wajjtʼasiñamjja apaqañapataki” (Apo. 3:10, 11). Ajllit mä cristianotï Diosat jitheqtjjaspajja, janiw “wiñay corona” katoqjjaspati. Khitinakatï jiwañkam Diosar servipkani ukanakakiw corona katoqapjjani (1 Ped. 5:4; Apo. 2:10).

DIOSAN REINOPARUW MANTAPJJE

7. ¿Kuna suytʼäwitsa Judasajj cartapan qhanañchi?

⁷ Khä 65 mara jakʼanakanjja, Judasaw ‘Dios Awkin jawsatanakaru’, mä arunjja, ajllitanakar qellqäna, jupasti Jesusan taykap toqe jilapänwa (Jud. 1; ukat Hebreos 3:1 uñjjattʼarakisma). Diosan Reinopan apnaqañataki ajllitanakjamajj kuna suma suytʼäwinïpjjesa uka toqetwa parlañ munäna (Jud. 3). Cartapan yaqha toqenakampitsa parlkchejja, tukuyarojj akham sarakiwa: “Mä sapa Dios, jiwasan Qhespiyirisaraki, jupajj chʼamaniw jumanakar imañatakejja jan tinkupjjañamataki, ukatsti jan qʼañuni  kusisiñan phoqtʼata jupan kʼajkir nayraqatapan uñstapjjañamataki. Juparuya yupaychañasa, jachʼa kankañasa, chʼamasa, ukhamarak munañanïñasa churatäpan Tatit Jesucristo toqe wiñayan wiñayapataki” sasa (Jud. 24, 25).

8. ¿Kunapachatï mä ajllitajj Diosar jiwañkam serviwayki ukhajj alajjpachan kusisiñ utjatapjja kunjamatsa yattanjja?

⁸ Alajjpachar sarañataki ajllitanakajj sapa mayniw Diosar taqe chuyma serviñataki ukat jan walinakar jan saranukuñatakis wal chʼamachasipjje. Jupanakasti, Jesucristomp jaktayatäsin alajjpachar saraña ukat Jehová Diosar uñjañwa Biblian qellqatarjamajj suyasipki. Kunapachatï ajllit mä cristianojj Diosar taqe chuyma jiwañkam yupaychki ukhajja, ‘ajayu cuerpon jaktanini’, “jan jukʼamp [jiwiriraki]” (1 Cor. 15:42-44). “Mä juchararan arrepientisitapa[ttï]” alajjpachan wal kusisipjjchejja, kunapachatï ajllit mä cristianojj jiwañkam Diosar serviwayki ukhajja, jukʼampwa kusisipjjpacha (Luc. 15:7). Kunapachatï ajllit mä cristianojj jaktjjasin kuntï suykäna uk alajjpachan katoqjjani ukhajja, Jehová Diosampi angelanakapampejj “wal kusisi[pjjani]” (1 Juan 3:2 liytʼasiñapawa). *

9. ¿Kunjamsa ajllitanakarojj alajjpachar “jukʼamp suma mantañajj churatäni”, ukat aka Oraqenkasipki uka ajllitanakarojj kunjamsa uka suytʼäwejj yanaptʼi?

⁹ Apóstol Pedrojj uka pachparakwa Diosar taqe chuyma serviri ajllitanakarojj säna: “Jumanakarojj qhespiyir Jesucristo tatitusan wiñay qhapaq markaparu jukʼamp suma mantañajj churatäni” sasa (2 Ped. 1:10, 11, MT). “Jukʼamp suma mantañajj churatäni” sasinjja Pedrojj inas kunjamsa alajjpacharojj suma cristianjamajj mantapjjani uka toqet parlaskchïna. Jan ukajj tukuyañkam tʼijuri ajllitanakajj kuna suma bendiciontï alajjpachan katoqapkani uka toqet parlarakchïna. Jehová Diosar ukham taqe chuyma tukuykama servipjjatap amtasajj wal kusisipjjani ukat yuspärapjjarakiniwa. Uka suytʼäwiw ajllitanakarojj aka Oraqenkkasin kuntï lurapjjañapäki ukanakat  sum amuytʼasipjjañapatak yanaptʼi (1 Ped. 1:13).

YAQHA UWIJANAKAN SUYTʼÄWIPA

10, 11. 1) ¿Kuna suytʼäwinïpjjes yaqha uwijanakajja? 2) ¿Kunjamatsa yaqha uwijanakajj aka Oraqen wiñay jakañ suytʼäwinïpjje? ¿Ukat kunapachas uka suytʼäwipajj phoqasini ukat “Diosajj qhespiyat jaqenaka uñstayani”?

¹⁰ “Diosan wawanakapajj” alajjpachanwa ‘herencia Cristompi katoqapjjani’ sasaw apóstol Pablojj ajllitanakat parläna. Ukat yaqha uwijanakarojj kuna suma suytʼäwsa Jehová Diosajj churäna uka toqetsa akham sarakïnwa: “Wali suytʼañampiwa taqe akapachajj suytʼaski kunürutejj Diosajj qhespiyat jaqenaka uñstaykani uka. Akapachasti juchañchatawa, ukasti janiwa jupan sapa munañap laykuti, jan ukasti Diosaw ukhamäñapataki wakichawayatayna. Ukampis uka suytʼañajj utjapunïnwa, aka oraqejj librëjjañapataki tukusiña esclavöñata, Diosan wawanakapan qhespiyat jakäwipana” sasa (Rom. 8:14-21).

¹¹ Jehová Diosajj “warmin wawapaw” Supayata, mä arunjja, “katarita” qhespiyapjjätam siskäna ukhaw jaqenakar mä suytʼäwi churäna (Apo. 12:9; Gén. 3:15). Nayraqatjja, uka wawajj Jesucristönwa (Gál. 3:16). Jesusan jiwatapata ukat jaktanitapatwa jaqenakajj juchampita jiwañampita qhespiyatäñ suyasipki. Ukasti, “kunürutejj Diosajj qhespiyat jaqenaka uñstaykani” ukharakiw phoqasini. Uka “qhespiyat jaqenaka[jja]” ajllitanakawa, jupanakajj ‘warmin wawapa’ satäpjjarakiwa. ¿Kunapachas Diosajj jupanakar uñstayani? Nayraqatjja, kunapachatï ajllitanakajj jiwatat jaktasin Cristomp chika apnaqasajj Supayan aka ñanqha pachap tʼunjapkani ukhaw phoqasini (Apo. 2:26, 27). Ukaw yaqha uwijanakarojj qhespiyani, jupanakaw jachʼa tʼaqhesïwit jakkir pasapjjani (Apo. 7:9, 10, 14).

12. “Diosajj qhespiyat jaqenaka uñstaykani” ukhajja, ¿kuna bendicionanaksa jaqenakajj katoqapjjani?

¹² Criston Waranq Mara Apnaqäwipanjja taqeniw jan walinakat samarapjjani. Uka tiemponwa, “Diosajj qhespiyat jaqenaka uñstaykani” siski ukajj yaqha toqet phoqasirakini: jupanakaw Cristomp chika sacerdotenakjam servisajj kuntï Jesucriston sacrificiopajj jaqenakatak jikjjatawayki ukarjam phoqayapjjani. Cristojj Apnaqjjani ukhajj Diosar istʼiri jaqenakajj jukʼat jukʼatwa tʼaqhesiñanakat ‘librëjjapjjani’, ukhamatwa juchampit jiwañampit qhespiyatäpjjani. Jupanakatï Criston Waranq Mara Apnaqäwipan Jehová Diosaru taqe chuyma servisipkakini ukat qhepa yantʼat qhespipjjarakini ukhajja, wiñayatakiw sutinakapajj “jakañ libron” qellqantatäni ukat “Diosan wawanakapan qhespiyat jakäwipana” jakapjjani (Apo. 20:7, 8, 11, 12). ¿Ukajj suma suytʼäwipunijjaya?

TAQE CHUYM SUYASKAKIÑÄNI

13. ¿Kunjamatsa suytʼäwinïtanjja, ukat kunapachas ‘Jesucristojj jutani’?

¹³ Pedrojj Diosan amuytʼayatäsin uka pä cartap qellkäna ukajja, alajjpachar sarañataki ajllitanakarusa ukat yaqha uwijanakarusa kuna suytʼäwinïpkitï uk taqe chuyma suyasipkakiñapatakiw yanaptʼi. Uka suytäwjja janiw chʼamasampiki jikjjatawayktanti, jan ukasti Diosaw khuyapayasiñapat churistu sasaw apóstol Pedrojj akham qhanañchäna: “Mä suma jakañan sarnaqapjjarakim. Taqe chuymaraki suytʼapjjam kuntejj Diosajj khuyapayasiñapanjja jumanakar churañataki wakichaski Jesucristojj jutkani ukkhajja” sasa (1 Ped. 1:13). Kunapachatï Jesucristojj taqe chuyma arkirinakapar kuntï suyapki uk churkani ukat ñanqha luririnakarus tukjkani ukhaw ‘Jesucristojj jutani’ (2 Tesalonicenses 1:6-10 liytʼasiñapawa).

14, 15. 1) ¿Suytʼäwisajj chuymasat jan chhaqtañapatakejj kunsa lurañasa? 2) ¿Kamsasas Pedrojj ewjjtʼäna?

¹⁴ Suytʼäwisajj chuymasat jan chhaqtañapatakejja, “[Jehová] Tatitun jutañap urojja” wali jakʼankatap janipuniw armañasäkiti, ukat ukarjamaw sarnaqañasaraki. Uka uruw Jehová Diosajj “alajjpachsa” ukat “oraqsa” tukjani, mä arunjja, taqe gobiernonakaru ukat jan wali jaqenakarojj kunanakapatï utjki ukanakampach  tukjani. Ukatwa Pedrojj akham sispachäna: “Jumanakajj ¡kunja Tatit chuymas jupar wali katuyasita jakapjjañamajja! Tatitun jutañap ursti suytʼapjjam, jankʼakïñapa munasa. Uka urojj alajjpachajj ninampi nakhantatäniwa, taqe kunas ninampirakiw umatatatäni” sasa (2 Ped. 3:10-12).

¹⁵ Jichhürunakan utjki uka “oraqe” ukat “alajjpacha” lantejj “machaq oraqe”, mä arunjja, Diosar cheqpach servir jaqenaka ukat “machaq alajjpachampi”, mä arunjja, Criston gobiernopaw uttʼayatäni sasaw Pedrojj qhanañchäna (2 Ped. 3:13). Uk phoqasiñap suytʼirinakarojja, akham sasaw apóstol Pedrojj qhan ewjjtʼäna: “Munat jilatanaka, akanak suytʼkasajja taqe kunsa askpun lurapjjam, ukhamata Diosajj jumanakar sumana jikjjatañapataki, jan juchani ni kuna qʼañunsa” sasa (2 Ped. 3:14).

SUYTʼÄWISARJAM SARNAQAÑÄNI

16, 17. 1) ¿‘Tatit chuyma’ ukat Diosar “wali katuyasita” sarnaqatasjja kunjamsa uñachtʼaysna? 2) ¿Kuna suytʼäwinïktantï uk phoqasir uñjañatakejj kun lurañasasa?

¹⁶ Kuna suytʼäwinïktantï ukarjam sarnaqasaw taqe chuyma suytʼatas uñachtʼayaraktanjja. Kunjamtï Pedrojj siskänjja, Diosar yupaychäwisan kunjamsa phoqasktan uk sum amuyasiñasawa. ¿Ukajj kamsañsa muni? Nayraqatjja ‘Tatit chuyma’, mä arunjja, sarnaqäwisajj qʼomänapawa ukat ‘Diosar jan uñtʼir jaqenak taypins sum sarnaqañasawa’ (2 Ped. 3:11; 1 Ped. 2:12). Ukat maynit maynikamaw munasiñampi uñjasiñasa, ukatakejj oraqpachankir jilat kullakanakampi ukat tamasankirinakampi mayachtʼatäñataki chʼamachasiñasawa (Juan 13:35). Ukatjja, Diosar “wali katuyasita” sarnaqañasawa, mä arunjja, kuna lurañanakatï jupar jakʼachasiykistu ukanak lurañasawa, sañäni: taqe chuyma oraña ukhamarak Biblia sapür liyiña, sapaki Bibliat yatjjataña, familiana Diosar yupaychaña ukat “Diosan reinopat” taqe chuyma yatiyaña (Mat. 24:14).

¹⁷ Taqeniw Diosamp suma jaqet uñjatäña ukat aka jan wali pachajj tʼunjatäkani ukhas qhespiñ muntanjja. Jiwasatï Diosamp suma jaqet uñjatäñataki chʼamachasiñänejja, kuna suytʼäwtï ‘Diosajj janïr aka oraqe qalltaskipan arsuwayki’ uk phoqasirwa uñjañäni, “Diosasti uk arsusajj janiw kʼariskiti” (Tito 1:2).

[Qhanañchäwi]

[Jiskt’anaka]

[22 janan fotopa]

Alajjpachar sarañatak ajllit cristianonakajj ‘machaqatwa nasipjje’

[24 janan fotopa]

Suytʼäwisajj chuymasat jan chhaqtañapatak familpacha chʼamachasiñäni