Magmaya sa Atong Paglaom
Magmaya sa Atong Paglaom
“[Dunay] paglaom sa kinabuhing walay kataposan nga gisaad sa Diyos, nga dili makabakak, sa wala pa ang kanhing kapanahonan.”—TITO 1:2.
AGIG REPASO
Nganong nahibalo kita nga may kalipay sa langit dihang ang usa ka dinihogan nagmatinumanon hangtod sa kamatayon?
Sa unsang paagi ang katumanan sa paglaom sa ubang karnero nalangkit nianang sa mga dinihogan?
Aron matuman ang atong paglaom, unsang “balaang mga buhat sa panggawi” ug “mga buhat sa diyosnong pagkamahinalaron” ang angay natong ipakita?
1. Sa unsang paagi ang paglaom nga gihatag ni Jehova motabang nato sa paglahutay?
SI Jehova mao “ang Diyos nga nagahatag ug paglaom,” si apostol Pablo miingon. Siya midugang nga si Jehova ‘makapuno kanato sa tanang kalipay ug kalinaw pinaagi sa atong pagpanuo, aron kita modagaya sa paglaom uban ang gahom sa balaang espiritu.’ (Roma 15:13) Kon buhi ang atong paglaom, kita makalahutay sa bisan unsang situwasyon ug atong mahuptan ang kalipay ug kalinaw. Dinihogan man kita o sa ubang karnero, ang atong paglaom maoy “angkla sa kalag, nga seguro ug malig-on.” (Heb. 6:18, 19) Panahon sa kalisdanan, kita makapangupot sa atong paglaom aron dili kita magduhaduha o mawad-ag pagtuo.—Basaha ang Hebreohanon 2:1; 6:11.
2. Unsa ang duha ka paglaom nga gihuptan sa mga Kristohanon karon? Nganong ang ‘ubang karnero’ interesado sa paglaom sa mga dinihogan?
2 Ang matag Kristohanon karon dunay paglaom. Ang nahibilin sa “gamayng panon” sa mga dinihogan dunay paglaom sa imortal nga kinabuhi sa langit ingong mga hari ug saserdote uban ni Kristo sa iyang Gingharian. (Luc. 12:32; Pin. 5:9, 10) Ang mas daghang “dakong panon” sa ‘ubang karnero’ dunay paglaom nga mabuhing walay kataposan sa paraisong yuta nga mandoan sa Mesiyanikong Gingharian. (Pin. 7:9, 10; Juan 10:16) Dili angayng kalimtan sa ubang karnero nga ang ilang kaluwasan nagdepende sa ilang aktibong pagpaluyo sa dinihogang “mga igsoon” ni Kristo nga nia pa sa yuta. (Mat. 25:34-40) Ang mga dinihogan makadawat sa ilang ganti, ug ang paglaom sa ubang karnero seguradong matuman usab. (Basaha ang Hebreohanon 11:39, 40.) Ato unang susihon ang paglaom sa mga dinihogan.
ANG “BUHI NGA PAGLAOM” SA MGA DINIHOGAN
3, 4. Sa unsang paagi ang mga dinihogan “gipahimugso pag-usab ngadto sa usa ka buhi nga paglaom,” ug unsa kana nga paglaom?
3 Si apostol Pedro mihimog duha ka sulat para sa mga dinihogan, kinsa iyang gitawag nga “mga pinili.” (1 Ped. 1:1) Naghatag siyag mga detalye bahin sa kahibulongang paglaom sa gamayng panon. Sa iyang unang sulat, si Pedro miingon: “Bulahan ang Diyos ug Amahan sa atong Ginoong Jesu-Kristo, kay sumala sa iyang dakong kaluoy kita iyang gipahimugso pag-usab ngadto sa usa ka buhi nga paglaom pinaagi sa pagkabanhaw ni Jesu-Kristo gikan sa mga patay, ngadto sa usa ka dili-madunoton ug wala-mahugawi ug dili-malawos nga panulondon. Gitagana kini sa mga langit alang kaninyo, kinsa gipanalipdan sa gahom sa Diyos pinaagi sa pagtuo alang sa kaluwasan nga andam nang igapadayag sa kataposang yugto sa panahon. Niining butanga kamo nagmaya pag-ayo.”—1 Ped. 1:3-6.
4 Ang limitadong gidaghanon sa mga Kristohanon nga gipili ni Jehova nga makig-uban kang Kristo sa langitnong Gingharian “gipahimugso pag-usab” ingong inanak sa espiritu nga mga anak sa Diyos. Sila gidihogan sa balaang espiritu aron mahimong mga hari ug saserdote uban ni Kristo. (Pin. 20:6) Si Pedro miingon nga kining ‘pagkahimugso pag-usab’ mohatag kanilag “usa ka buhi nga paglaom.” Gitawag niya kini nga “dili-madunoton ug wala-mahugawi ug dili-malawos nga panulondon,” nga gireserba kanila “sa mga langit.” Dili ikatingala nga ang mga dinihogan “nagmaya pag-ayo” sa ilang buhing paglaom! Apan ang katumanan niana nagdepende sa ilang pagkamatinumanon.
5, 6. Nganong ang mga dinihogan angayng magpabiling matinumanon?
5 Sa iyang ikaduhang sulat, giawhag ni Pedro ang mga dinihogan nga ‘buhaton ang kutob sa ilang maarangan aron maseguro ang ilang pagkatinawag ug pagkapinili.’ (2 Ped. 1:10) Angay nilang paningkamotan nga maugmad ang mga hiyas sama sa pagtuo, diyosnong pagkamahinalaron, inigsoong pagbati, ug gugma. Si Pedro miingon: “Kon kining mga butanga anaa kaninyo ug nagaawas, kini magpugong kaninyo sa pagkahimong dili aktibo o dili-mabungahon.”—Basaha ang 2 Pedro 1:5-8.
6 Si Kristo miingon sa dinihogang mga ansiyano sa kongregasyon sa Filadelfia sa Asia Minor: “Tungod kay gibantayan mo ang pulong bahin sa akong paglahutay, ako usab magaamping kanimo gikan sa takna sa pagsulay, nga moabot sa tibuok gipuy-ang yuta, aron sa pagsulay sa mga nagapuyo sa yuta. Ako moabot sa madali. Pangupti pag-ayo ang imong nabatonan, aron nga walay usa nga magkuha sa imong purongpurong.” (Pin. 3:10, 11) Kon ang usa ka dinihogan dili magmatinumanon, dili niya madawat “ang dili-malawos nga purongpurong sa himaya” nga gisaad ngadto sa mga pinili nga magmatinumanon hangtod sa kamatayon.—1 Ped. 5:4; Pin. 2:10.
PAGSULOD NGADTO SA GINGHARIAN
7. Unsang kahibulongang paglaom ang gihisgotan ni Judas sa iyang sulat?
7 Sa mga tuig 65 K.P., ang igsoon ni Jesus sa inahan nga si Judas misulat ngadto sa mga dinihogan. Siya miingon nga sila mao ang “mga tinawag.” (Jud. 1; itandi ang Hebreohanon 3:1.) Sa sinugdan, siya nagsulat kanila bahin sa paglaom sa kaluwasan nga gihuptan sa tanang dinihogan. (Jud. 3) Bisag dunay ubang dinaliang butang nga iyang gitagad, sa hinapos sa iyang mubong sulat, gihisgotan niya ang kahibulongang paglaom sa mga dinihogan. Siya miingon: “Karon ngadto sa usa nga makahimo sa pagbantay kaninyo gikan sa pagkapandol ug sa pagpadayag kaninyo nga walay lama sa panan-aw sa iyang himaya uban ang dakong kalipay, ngadto sa bugtong Diyos nga atong Manluluwas pinaagi kang Jesu-Kristo nga atong Ginoo, maiya ang himaya, kahalangdon, gahom ug awtoridad sa nangaging panahon nga walay kataposan ug sa pagkakaron ug hangtod sa panahon nga walay kataposan.”—Jud. 24, 25.
8. Nganong nahibalo kita nga may kalipay sa langit dihang ang usa ka dinihogan nagmatinumanon hangtod sa kamatayon?
8 Buot gayod sa mga dinihogan nga ang matag usa kanila panalipdan sa Diyos batok sa pagkapandol nga motultol sa kalaglagan. Ang ilang paglaom mao nga sila banhawon ni Jesu-Kristo ingong hingpit nga espirituhanong linalang aron makaatubang sa presensiya sa Diyos uban ang dakong kalipay. Dihang ang usa ka dinihogan mamatay nga matinumanon, siya seguradong ‘bangonon sa lawas nga espirituhanon,’ nga banhawon diha sa “pagkadili-madunoton . . . , sa himaya.” (1 Cor. 15:42-44) Kon may ‘labaw nga kalipay sa langit tungod sa usa ka makasasala nga naghinulsol,’ unsa pa kaha dihang ang usa sa mga igsoon ni Kristo nagmatinumanon hangtod sa kamatayon! (Luc. 15:7) Si Jehova ug ang matinumanon nga espirituhanong mga linalang magmaya duyog sa dinihogan nga nakadawat sa iyang ganti “uban ang dakong kalipay.”—Basaha ang 1 Juan 3:2.
9. Sa unsang paagi ang pagsulod sa matinumanong mga dinihogan ngadto sa Gingharian “dagayang itagana” kanila? Sa unsang paagi kini nga paglaom makaapektar sa mga dinihogan nga nia pa sa yuta?
9 Sama kang Judas, si Pedro misulat sa mga dinihogan bahin sa ganti nga ilang madawat kon sila magmatinumanon. Siya miingon: “Dagayang itagana kaninyo ang pagsulod ngadto sa walay kataposang gingharian sa atong Ginoo ug Manluluwas nga si Jesu-Kristo.” (2 Ped. 1:10, 11) Ang pagsulod ngadto sa Gingharian “dagayang itagana” kanila, nga nagpasabot nga sila mosulod sa langit uban ang dakong himaya. Kini usab lagmit nagtumong sa daghang panalangin nga ilang madawat sa langit. Sila malipay ug magpasalamat pag-ayo dihang maghinumdom sa ilang pagkamatinumanon. Kini nga paglaom magpalig-on sa mga dinihogan nga nia pa sa yuta nga magpabiling matinumanon.—1 Ped. 1:13.
‘ANG PASUKARANAN SA PAGLAOM’ SA UBANG KARNERO
10, 11. (a) Unsa ang paglaom sa ubang karnero? (b) Sa unsang paagi ang katumanan sa yutan-ong paglaom nalangkit kang Kristo ug “sa pagpadayag sa mga anak sa Diyos”?
10 Si apostol Pablo misulat bahin sa mahimayaong paglaom sa dinihogang “mga anak sa Diyos” ingong “kaubang mga manununod” ni Kristo. Dayon iyang gihisgotan ang kahibulongang paglaom nga gihatag ni Jehova sa dili maihap nga ubang karnero: “Ang maikagong pagpaabot sa [tawhanong] kalalangan nagahulat sa pagpadayag sa mga anak sa Diyos [ang mga dinihogan]. Kay ang kalalangan gipailalom sa pagkawalay-pulos, dili pinaagi sa kaugalingong kabubut-on niini kondili pinaagi kaniya nga nagsakop niini, pinasukad sa paglaom aron nga ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”—Roma 8:14-21.
11 Gihatag ni Jehova ‘ang pasukaranan sa paglaom’ sa katawhan dihang gisaad niya nga luwason sila gikan sa “orihinal nga halas,” si Satanas nga Yawa, pinaagi sa sinaad nga “binhi.” (Pin. 12:9; Gen. 3:15) Ang pangunang bahin sa binhi mao si Jesu-Kristo. (Gal. 3:16) Ang kamatayon ug pagkabanhaw ni Jesus mao ang pasukaranan sa paglaom sa katawhan nga motultol sa kagawasan gikan sa pagkaulipon sa sala ug kamatayon. Ang katumanan niini nga paglaom nalangkit “sa pagpadayag sa mga anak sa Diyos.” Ang hinimayang mga dinihogan mao ang ikaduhang bahin sa “binhi.” Sila ‘madayag’ dihang sila motabang kang Kristo sa paglaglag sa daotang sistema ni Satanas. (Pin. 2:26, 27) Kini moresulta sa kaluwasan sa ubang karnero kinsa makalabang sa dakong kasakitan.—Pin. 7:9, 10, 14.
12. Ang pagpadayag sa mga dinihogan magdalag unsang kahibulongang mga benepisyo sa katawhan?
12 Sulod sa Usa ka Libo ka Tuig nga Pagmando ni Kristo, mahupayan gayod ang katawhan! Nianang panahona, ang “mga anak sa Diyos” ‘madayag’ sa laing paagi. Sila molihok ingong mga saserdote uban ni Kristo ug motabang sa katawhan nga makadawat sa mga benepisyo sa iyang halad. Dihang ang Gingharian sa Diyos magmando na ibabaw sa yuta, ang masinugtanong katawhan anam-anam nga ‘mahigawas gikan sa pagkaulipon sa pagkadunot.’ Sila mahigawas sa epekto sa sala ug kamatayon. Kon sila magpabiling matinumanon kang Jehova sulod sa Milenyo ug sa kataposang pagsulay human niana, ang ilang ngalan permanenteng mahisulat sa “linukot nga basahon sa kinabuhi.” Ilang mabatonan ang “mahimayaong kagawasan sa mga anak sa Diyos.” (Pin. 20:7, 8, 11, 12) Usa gayod kana ka mahimayaong paglaom!
HUPTING BUHI ANG ATONG PAGLAOM
13. Sa unsa gipasukad ang atong paglaom? Kanus-a madayag si Kristo?
13 Ang duha ka sulat ni Pedro nakatabang sa mga dinihogan ug sa ubang karnero nga mahuptang buhi ang ilang paglaom. Iyang gipatin-aw nga ang ilang paglaom wala ipasukad sa ilang binuhatan, apan sa dili takos nga kalulot ni Jehova. Siya misulat: “Ibutang ang inyong paglaom diha sa dili-takos nga kalulot nga igahatag kaninyo inigpadayag ni Jesu-Kristo.” (1 Ped. 1:13) Si Kristo madayag dihang iyang gantihan ang iyang matinumanong mga sumusunod ug laglagon ang mga daotan.—Basaha ang 2 Tesalonica 1:6-10.
14, 15. (a) Unsay angay natong buhaton aron mahuptang buhi ang atong paglaom? (b) Unsay gitambag ni Pedro?
14 Aron mahuptang buhi ang atong paglaom, angay natong isentro ang atong pagtagad ug kinabuhi sa nagsingabot nga “adlaw ni Jehova.” Ipahinabo niini ang kalaglagan sa presenteng “mga langit,” o tawhanong pagmando, ug “yuta,” ang daotang katilingban sa tawo ug ang “mga elemento” niini. Si Pedro misulat: “Unsang matanga nga mga tawo kamo unya . . . , nga nagapaabot ug nagabutang kanunay sa hunahuna sa presensiya sa adlaw ni Jehova, nga pinaagi niini ang mga langit nga nagadilaab mangaugdaw ug ang mga elemento tungod sa hilabihang kainit mangatunaw!”—2 Ped. 3:10-12.
15 Ang presenteng “mga langit” ug “yuta” pulihan sa “bag-ong mga langit [Gingharian ni Kristo] ug usa ka bag-ong yuta [bag-ong yutan-ong katilingban].” (2 Ped. 3:13) Dayon si Pedro pintok nga nagtambag kon unsay buhaton aron padayong ‘magpaabot,’ o mahuptang buhi ang atong paglaom, sa gisaad nga bag-ong kalibotan: “Busa, mga hinigugma, sanglit nagapaabot kamo niining mga butanga, buhata ang kutob sa inyong maarangan nga sa kataposan makaplagan kamo niya nga walay buling ug walay lama ug anaa sa pakigdait.”—2 Ped. 3:14.
PAGKINABUHI UYON SA ATONG PAGLAOM
16, 17. (a) Unsang “balaang mga buhat sa panggawi” ug “mga buhat sa diyosnong pagkamahinalaron” ang angay natong ipakita? (b) Sa unsang paagi matuman ang atong paglaom?
16 Dili lang nato huptang buhi ang atong paglaom kondili angay usab kitang magkinabuhi uyon niini. Angay natong tinoon nga kita ang matang sa tawo nga giuyonan ni Jehova. Ang “balaang mga buhat sa panggawi” naglakip sa atong ‘paghupot ug maayong panggawi taliwala sa mga nasod,’ pinaagi sa pagbuhat kon unsay matarong. (2 Ped. 3:11; 1 Ped. 2:12) Kinahanglang duna kitay ‘gugma sa atong taliwala.’ Kana naglakip sa pagpaningkamot nga mahuptan ang panaghiusa sa atong tibuok-kalibotang panag-igsoonay ug bisan diha sa atong kongregasyon. (Juan 13:35) Ang “mga buhat sa diyosnong pagkamahinalaron” mao ang mga butang nga atong ginahimo aron magpabiling suod kang Jehova. Kini naglakip sa tim-os nga mga pag-ampo, adlaw-adlawng pagbasa sa Bibliya, seryosong personal nga pagtuon, pamilyahanong pagsimba, ug regular nga pagsangyaw sa “maayong balita sa gingharian.”—Mat. 24:14.
17 Buot natong tanan nga mahimong matang sa tawo nga uyonan ug luwason ni Jehova dihang iyang laglagon kining daotang sistema. Sa ingon atong masinati ang katumanan sa atong paglaom, ang “paglaom sa kinabuhing walay kataposan nga gisaad sa Diyos, nga dili makabakak, sa wala pa ang kanhing kapanahonan.”—Tito 1:2.
[Mga Pangutana sa Pagtuon]
[Hulagway sa panid 22]
Ang mga dinihogan “gipahimugso pag-usab ngadto sa usa ka buhi nga paglaom”
[Hulagway sa panid 24]
Hupting buhi ang paglaom diha sa imong pamilya
