Ki nou lesperans i gard nou dan lazwa
Ki nou lesperans i gard nou dan lazwa
“[I annan] lesperans lavi eternel. Bondye ki pa zanmen manti ti promet nou sa lavi avan konmansman letan.”—TIT 1:2.
REVIZYON
Ki mannyer nou konnen ki i annan lazwa dan lesyel ler en Kretyen swazir i reste fidel ziska lafen?
Ki mannyer realizasyon lespwar lezot mouton i relye avek lespwar bann Kretyen swazir?
Pour vwar realizasyon nou lespwar, ki nou pou fer pour montre ki nou annan “en lavi sen” ek “respe pour Bondye”?
1. Dan ki fason sa lesperans ki Zeova in donn nou i kapab ed nou fer fas avek difikilte?
ZAPOT Pol ti dir ki Zeova i sa “Bondye ki donn lesperans.” I ti osi dir ki Zeova i ‘ranpli nou avek lazwa ek lape parfe dan lafwa e rann nou ris avek lesperans par pisans Sent-Espri.’ (Rom. 15:13) Si nou ris avek lesperans, menm ler nou fer fas avek nenport ki sityasyon difisil, nou leker pou ranpli avek lazwa ek lape. Pour bann Kretyen swazir, osi byen ki lezot Kretyen, en tel lesperans pou vin parey “en lank solid e ferm pour nou lam.” (Ebr. 6:18, 19) Nou lesperans i parey en keksoz ki nou graponnen kan nou pas dan movetan ki anpes nou ganny antrennen, doute oubyen mank lafwa.—Lir Ebre 2:1; 6:11.
2. Ki sa de lespwar bann Kretyen i annan ozordi e akoz ‘lezot mouton’ i enterese avek lespwar ki bann Kretyen swazir i annan?
2 Bann Kretyen ki pe viv dan sa letan lafen i swa annan lespwar pour viv dan lesyel oubyen lo later. Bann Kretyen swazir ki ankor lo later e ki form parti “pti troupo” i annan lespwar pour ganny lavi imortel dan lesyel konman bann lerwa ek pret ansanm avek Kris dan son Rwayonm. (Lik 12:32; Rev. 5:9, 10) Sa “gran lafoul” ki form parti ‘lezot mouton’ i annan lespwar pour viv pour touzour dan Paradi lo later konman bann sitwayen Rwayonm Bondye. (Rev. 7:9, 10; Zan 10:16) Lezot mouton pa devret zanmen oubliye ki zot delivrans i depan lo sipor ki zot donn “bann frer” Zezi ki ankor lo later. (Mat. 25:34-40) Tou le de, bann Kretyen swazir ek lezot mouton i asire ki zot pou resevwar zot rekonpans. (Lir Ebre 11:39, 40.) Premyerman, annou egzamin lespwar ki bann Kretyen swazir i annan.
“LESPERANS VIVAN” BANN KRETYEN SWAZIR
3, 4. Dan ki fason bann Kretyen swazir i ganny en nouvo nesans ek “en lesperans vivan” e ki lesperans zot pou gannyen?
3 Zapot Pyer ti ekrir de let pour bann ki pou viv dan lesyel ki i ti apel “bann ki’n ganny swazi.” (1 Pyer 1:2) I ti donn bann detay konsernan sa zoli lespwar ki sa pti troupo i annan. Dan son premye let, Pyer ti ekrir: “Ki Bondye e Papa nou Senyer Zezi-Kri i ganny beni! Dan son gran konpasyon i’n donn nou en nouvo lavi avek en lesperans vivan par rezireksyon Zezi-Kri, dan en leritaz ki i’n rezerve pour zot dan lesyel, ki pa kapab ni gate, ni sali, ni fletri. Sa leritaz i pour zot ki par lafwa, Pisans Bondye [in] garde ziska ki delivrans i arive, pare pour ganny revele dan lafen letan. Zot rezoui pour sa.”—1 Pyer 1:3-6.
4 Zeova in swazir en serten kantite Kretyen ki pou travay ansanm avek Kris dan son gouvernman dan lesyel e i’n donn zot en “nouvo lavi” oubyen en nouvo nesans konman bann garson spirityel Bondye. Zot ganny swazir par lespri sen pour vin bann lerwa ek pret avek Kris. (Rev. 20:6) Pyer i dir ki sa nouvo nesans i donn zot “en lesperans vivan,” ki i dir i “pa kapab ni gate, ni sali, ni fletri” e sa lavi in ganny rezerve pour zot “dan lesyel.” I pa etonan alor ki zot “rezoui” en kantite akoz sa lesperans vivan! Zot lespwar pou vin en realite si zot reste fidel.
5, 6. Akoz bann Kretyen swazir i bezwen fer en kantite zefor pour ki zot lespwar dan lesyel i sir?
5 Dan son dezyenm let, Pyer ti ankouraz bann Kretyen swazir pour “fer en pli gro zefor pour reste atase avek Bondye ki’n apel zot, e swazir zot.” (2 Pyer 1:10) Zot bezwen fer en kantite zefor pour devlop bann kalite Kretyen parey lafwa, devouman, lafeksyon fraternel ek lanmour. Pyer ti dir: “Se sa bann kalite ki zot devre posede, e si zot posed tousala an labondans i ava rann zot aktif e prodiktif dan konnesans nou Senyer Zezi-Kri.”—Lir 2 Pyer 1:5-8.
6 Zezi ti dir bann ansyen parmi bann Kretyen swazir dan kongregasyon Filadelfi, Lazi Miner: “Parski ou’n obei mon lord avek perseverans, mon pou protez ou pandan bann letan maler ki pe vini pour teste bann zabitan later. Mon pe vini byento. Gard byen for sa ki ou posede pour ki personn pa aras ou ou kouronn.” (Rev. 3:10, 11) Si en Kretyen swazir pa reste fidel i pa pou resevwar “kouronn laglwar ki pa zanmen terni.”—1 Pyer 5:4; Rev. 2:10.
ZOT POU ANTRE DAN RWAYONM
7. Ki sa zoli lespwar ki Zid ti mansyonnen dan son let?
7 Apepre lannen 65 N.L., Zid, demi frer Zezi ti ekrir en let pour bann Kretyen swazir parey li menm e i ti apel zot bann ki’n “ganny apele.” (Zid 1; konpar Ebre 3:1.) I ti’n anvi ekrir zot en let konsernan lespwar glorye ki zot bann Kretyen ki’n ganny apele dan Rwayonm Bondye ki dan lesyel i “posede an komen.” (Zid 3) Menm si i ti annan lezot size pli enportan pour koz lo la, a lafen son pti let, i ti koz lo sa zoli lespwar ki bann Kretyen swazir i annan. I ti ekrir: “Aprezan pour sa enn ki kapab prezerv zot e anpes zot tonbe, e fer zot paret san fot e avek gran lazwa dan prezans son laglwar, pour li, sel Bondye, nou Sover par Zezi-Kri nou Senyer, nou rann glwar, grander, pisans ek lotorite, avan tou letan, aprezan e pour touzour.”—Zid 24, 25.
8. Dapre Zid 24, kwa ki montre ki i annan bokou lazwa dan lesyel ler en Kretyen swazir i reste fidel ziska lanmor?
8 Sak Kretyen swazir i definitivman anvi ki Bondye i protez li e anpes li tonbe pour ki i pa ganny detrir. Zot annan lespwar ki Zezi Kri pou resisit zot konman bann lespri parfe pour vin dan prezans Bondye avek en gran lazwa. Ler en Kretyen swazir i mor fidelman, i annan lasirans ki i pou “resisite glorifye” “avek en lekor spirityel” ki “pa kapab pouri.” (1 Kor. 15:42-44) Si i annan “plis lazwa dan lesyel pour en sel peser ki sanz son lavi,” zis mazin sa lazwa dan lesyel ler en Kretyen swazir i mor fidelman. (Lik 15:7) Zeova ek bann lanz fidel pou dan en “gran lazwa” ler bann Kretyen swazir i resevwar zot rekonpans.—Lir 1 Zan 3:2.
9. Dan ki sans bann Kretyen swazir ki fidel i antre libreman dan Rwayonm e ki lefe sa i annan lo zot ler zot ankor lo later?
9 Zapot Pyer ti osi ekrir bann Kretyen swazir lo sa menm size. I ti dir zot ki si zot reste fidel “zot pou ganny drwa antre libreman dan Rwayonm eternel nou Senyer e Sover Zezi-Kri.” (2 Pyer 1:10, 11) Ler Pyer ti dir ki zot ti pou antre libreman dan Rwayonm Bondye, i kapab ki i ti pe refer avek lefet ki zot ti pou antre dan lesyel avek gran laglwar. Sa i osi kapab pe refer avek bann gran benediksyon ki sa bann ki’n fer en kantite zefor pour fini sa lakours lavi pou gannyen dan lesyel. Zot kapab rapel lafason ki zot ti fidelman viv zot lavi avek en gran lakontantman ek lapresyasyon. San okenn dout, sa lespwar i donn bann Kretyen swazir ki ankor lo later lafors pour “gard zot lespri touzour alert.”—1 Pyer 1:13.
“LESPWAR” POUR LEZOT MOUTON
10, 11. (a) Ki lespwar lezot mouton i annan? (b) Ki mannyer lespwar bann ki pou viv lo later i relye avek Kris ek lefet ki bann ‘garson Bondye pou ganny revele’?
10 Zapot Pol ti ekrir bann “garson Bondye” ki osi bann “zeritye ansanm avek Kris” konsernan zot lespwar glorye. Apre i ti osi mansyonn sa lespwar merveye ki Zeova in donn tou bann ki form parti lezot mouton. I ti ekrir: “Lemonn antye ki Bondye in kree pe esper avek pasyans sa moman kan Bondye pou revel son bann garson [bann Kretyen swazir]. Parski lemonn antye in ganny kondannen pour vin en nanryen ditou non pa par son prop swa, me akoz sa enn ki’n fer li soumet me avek en lespwar ki sa kreasyon pou ganny libere en zour avek pouvwar destrikter ki pe gard li dan lesklavaz, pour partisip dan laliberte ek laglwar bann zanfan Bondye.”—Rom. 8:14-21.
11 Zeova ki ti donn sa “lespwar” limanite ler i ti promet pour sov bann imen anba pouvwar Satan oubyen Dyab, “sa serpan lantikite,” gras a sa “desandans” ki ti ganny promet. (Rev. 12:9; Zen. 3:15) Zezi i parti prensipal sa ‘desandans.’ (Gal. 3:16) Atraver lanmor ek rezireksyon Zezi, bann imen i annan sa lespwar solid ki zot kapab ganny libere avek pese ek lanmor. Sa lespwar i relye avek lefet ki ‘bann garson Bondye pou ganny revele.’ Bann Kretyen swazir i dezyenm parti sa ‘desandans’ e zot pou ganny “revele” ler zot pou detrir sa move lemonn Satan ansanm avek Zezi. (Rev. 2:26, 27) Sa aksyon pou anmenn delivrans pour lezot mouton ki pou sirviv gran ladetres.—Rev. 7:9, 10, 14.
12. Ler bann Kretyen swazir i ganny revele, ki byenfe sa pou anmennen pour limanite?
12 “Lemonn antye” pou ganny soulaze pandan Renny Mil An Kris, pa i vre! Sa letan, bann “garson Bondye” pou ganny “revele” dan en lot fason ankor ler zot pou akonpli zot servis konman pret avek Kris e ler zot pou ed limanite pour benefisye avek sakrifis Zezi. Konman bann sitwayen sa Rwayonm dan lesyel, “lemonn antye” pou progresivman ganny libere avek lefe pese ek lanmor. Bann imen obeisan pou ptitapti ganny “libere en zour avek pouvwar destrikter” pese. Si zot reste fidel avek Zeova tou dilon sa Renny Milener e pas sa dernyen tes ki pou swiv apre sa, zot non pou ganny ekrir dan en fason permanan dan “liv lavi.” Zot pou eksperyans “laliberte ek laglwar bann zanfan Bondye.” (Rev. 20:7, 8, 11, 12) Pa sa i en lespwar ekstraordiner!
GARD NOU LESPWAR VIVAN
13. Nou lespwar i baze lo kwa e kan ki Kris pou ganny revele?
13 Dan sa de let ki Pyer ti ekrir, i annan bokou lenformasyon ki kapab ed bann Kretyen swazir ek lezot mouton pour gard zot lespwar vivan. I ti montre ki zot lespwar pa baze lo sa ki zot fer me lo labonte ekstraordiner Zeova. I ti ekrir: “Gard zot lespri touzour alert, reste touzour vizilan e met tou zot lesperans dan lagras ki zot pou gannyen ler Zezi-Kri pou ganny revele.” (1 Pyer 1:13) Kris pou ganny revele ler i vin rekonpans son bann disip fidel e egzekit zizman Zeova lo bann move dimoun.—Lir 2 Tesalonisyen 1:6-10.
14, 15. (a) Pour nou gard nou lespwar vivan, ki nou bezwen konsantre lo la? (b) Ki konsey Pyer ti donnen?
14 Pour gard nou lespwar vivan dan nou lespri e dan nou lavi, nou bezwen konsantre lo “zour” Zeova. Sa zour, “lesyel” setadir bann gouvernman imen pou ganny detrir e “later,” setadir sosyete imen e osi bann “eleman” pou ganny detrir. Pyer ti ekrir: “Ki kalite lavi zot devre viv . . . , letan zot pe esper sa zour, an fezan zot mye pour fer sa zour vin pli vit, sa zour kan lesyel pou alimen e ganny detri, e tou bann eleman pou fonn avek dife!”—2 Pyer 3:10-12.
15 “Lesyel” ek “later” pou ganny ranplase avek en “nouvo lesyel [gouvernman Kris] ek en nouvo later [nouvo sosyete imen].” (2 Pyer 3:13) Apre sa, Pyer ti donn en konsey serye pour nou kapab kontinyen espere ouswa gard nou lespwar vivan konsernan sa nouvo lemonn. I ti dir: “Alor, mon bann byenneme, an atandan sa zour fer tou zefor posib, pour Bondye trouv zot pir, san defo e dan lape avek li.”—2 Pyer 3:14.
VIV ANNAKOR AVEK NOU LESPWAR
16, 17. (a) Ki nou devret fer pour montre ki nou annan “en lavi sen” ek “respe pour Bondye”? (b) Ki mannyer nou lespwar pou ganny realize?
16 Nou devret gard nou lespwar vivan e nou devret osi viv annakor avek nou lespwar. Nou devret veye kalite dimoun ki nou ete spirityelman. “En lavi sen” i enplik “annan [en] bonn kondwit parmi bann payen” setadir annan en bon standar moral. (2 Pyer 3:11; 1 Pyer 2:12) Nou bezwen “kontan kanmarad.” Sa i enplik fer tou sa ki nou kapab pour gard linite avek nou bann frer ek ser dan lemonn antye e osi avek bann ki dan nou kongregasyon. (Zan 13:35) Sa ki nou fer i montre si nou “annan respe pour Bondye,” andotmo si nou annan en relasyon pros avek Zeova. Sa i enkli nou bann lapriyer, ensi ki lir Labib tou le zour, letid personnel o profon, ladorasyon fanmir e fer nou mye pour anons “sa Bonn Nouvel Rwayonm.”—Mat. 24:14.
17 Nou tou nou anvi vin sa kalite dimoun ki Zeova i kontan e aprouve e ki i pou sove ler sa lemonn Satan pou ganny “detri.” Alor, nou “lesperans lavi eternel” pou vin en realite akoz “Bondye ki pa zanmen manti ti promet nou sa lavi avan konmansman letan.”—Tit 1:2.
[Kestyon]
[Portre lo paz 22]
Bann Kretyen swazir i ganny “en nouvo lavi avek en lesperans vivan”
[Portre lo paz 24]
Gard sa lespwar vivan dan ou fanmir
