Agragsaktayo iti Namnamatayo
Agragsaktayo iti Namnamatayo
“[Adda] namnama iti agnanayon a biag a ti Dios, a saanna a mabalin ti agulbod, inkarina kasakbayan dagiti nabayagen a tiempo.”—TITO 1:2.
KAS REPASO
Kasanotayo nga ammo nga adda rag-o idiay langit no makapagtalinaed a natarnaw ti maysa a napulotan?
Kasano a ti pannakatungpal ti namnama ti sabsabali a karnero ket nainaig iti namnama dagiti napulotan?
Tapno makitatayo ti kaitungpalan ti namnamatayo, ania dagiti “nasantuan a panagbibiag” ken “ar-aramid ti nadiosan a debosion” a masapul nga ipakitatayo?
1. Kasano a makatulong ti inted ni Jehova a namnamatayo tapno makapagibturtayo?
NI Jehova “ti Dios a mangipaay iti namnama,” kinuna ni apostol Pablo. Innayonna pay a ni Jehova ‘punnuennatayo iti rag-o ken talna babaen iti panamatitayo, tapno aduantayo koma iti namnama buyogen ti pannakabalin ti nasantuan nga espiritu.’ (Roma 15:13) No aduantayo iti namnama, maibturantayo ti aniaman a tumaud a situasion ken mapno ti pusotayo iti rag-o ken talna. Kas kadagiti napulotan a Kristiano, agserbi dayta a namnama kas “sinipete maipaay iti kararua, agpadpada a sigurado ken natibker” para iti dadduma a Kristiano. (Heb. 6:18, 19) Makatulong ti namnamatayo no agpasartayo kadagiti arig bagyo a problema tapno ditay agduadua wenno saan a kumapuy ti pammatitayo.—Basaen ti Hebreo 2:1; 6:11.
2. Ania ti dua a namnama dagiti Kristiano ita, ken apay nga interesado ti “sabsabali a karnero” iti namnama dagiti napulotan?
2 Maysa laeng kadagiti dua a namnama ti nakaipamaysaan dagiti Kristiano nga agbibiag iti tiempo ti panungpalan. Dagiti natda a napulotan a Kristiano a kameng ti “bassit nga ipastoran” addaanda iti namnama nga imortal a biag idiay langit, kas ar-ari ken papadi a kadua ni Kristo iti Pagarianna. (Luc. 12:32; Apoc. 5:9, 10) Ti ad-adu a bilang ti “dakkel a bunggoy” ti “sabsabali a karnero” addaanda iti namnama nga agbiag nga agnanayon iti paraiso a daga kas iturayan ti Mesianiko a Pagarian. (Apoc. 7:9, 10; Juan 10:16) Nasken a laglagipen ti sabsabali a karnero a ti pannakaisalakanda ket agpannuray iti aktibo a panangsuportada kadagiti natda a napulotan a ‘kakabsat’ ni Kristo. (Mat. 25:34-40) No kasano a magun-odan dagiti napulotan ti gunggonada, sigurado met a magun-odan ti sabsabali a karnero ti namnamada. (Basaen ti Hebreo 11:39, 40.) Usigentayo nga umuna ti namnama dagiti napulotan.
TI “SIBIBIAG A NAMNAMA” DAGITI NAPULOTAN A KRISTIANO
3, 4. Kasano a dagiti napulotan a Kristiano agpasarda iti “baro a pannakayanak nga agturong iti maysa a sibibiag a namnama,” ken ania dayta a namnama?
3 Nangaramid ni apostol Pedro iti dua a surat agpaay kadagiti napulotan a Kristiano nga inawaganna iti ‘dagiti napili.’ (1 Ped. 1:1) Nangipaay kadagiti detalye maipapan iti nagsayaat a namnama a naited iti bassit nga ipastoran. Kinuna ni Pedro iti umuna a suratna: “Bendito koma ti Dios ken Ama ni Apotayo a Jesu-Kristo, ta maitunos iti naindaklan nga asina impaayannatayo iti baro a pannakayanak nga agturong iti maysa a sibibiag a namnama babaen ti panagungar ni Jesu-Kristo manipud kadagiti natay, nga agturong iti maysa a di agrupsa ken di natulawan ken di agkupas a tawid. Naisagana dayta iti langlangit maipaay kadakayo, dakayo a salsaluadan ti pannakabalin ti Dios babaen ti pammati maipaay iti pannakaisalakan a sisasagana a maipanayag iti kamaudianan a las-ud ti tiempo. Iti daytoy a kinapudno agragrag-okayo unay.”—1 Ped. 1:3-6.
4 Ti limitado a bilang dagiti Kristiano a pinili ni Jehova a makikadua ken Kristo iti nailangitan a Pagarian, mapasaranda ti “baro a pannakayanak” kas napulotan iti espiritu nga annak ti Dios tapno agbalinda nga ar-ari ken papadi a kadua ni Kristo. (Apoc. 20:6) Kuna ni Pedro a gapu iti dayta a “baro a pannakayanak,” naaddaanda iti “sibibiag a namnama” nga inawaganna kas “di agrupsa ken di natulawan ken di agkupas a tawid” a naisagana kadakuada “iti langlangit.” Di pakasdaawan a dagiti napulotan ‘agrag-oda unay’ iti sibibiag a namnamada! Ngem magun-odda laeng dayta a namnama no agtalinaedda a matalek.
5, 6. Apay a masapul nga aramiden dagiti napulotan a Kristiano ti amin a kabaelanda tapno agbalin a sigurado ti nailangitan a pannakaayabda?
5 Iti maikadua a surat ni Pedro, imparegtana kadagiti napulotan a Kristiano nga ‘aramidenda ti amin a kabaelanda tapno agbalin a sigurado ti pannakaayab ken pannakapilida.’ (2 Ped. 1:10) Masapul nga ikagumaanda a patanoren dagiti Nakristianuan a galad kas iti pammati, nadiosan a debosion, nainkabsatan a panagayat, ken ayat. Kuna ni Pedro: “No adda kadakayo dagitoy a banag ken aglippiasda, lapdandanto ti panagbalinyo a di aktibo wenno di nabunga.”—Basaen ti 2 Pedro 1:5-8.
6 Kinuna ti napagungar a Kristo kadagiti napulotan iti espiritu a panglakayen iti kongregasion ti Filadelfia idiay Asia Menor idi umuna a siglo: “Agsipud ta tinaginayonmo ti sao maipapan iti panagibturko, taginayonenkanto met iti oras ti pannakasubok, nga umay iti intero a mapagnaedan a daga, tapno suboken dagidiay agnanaed iti daga. Umayak a sidadaras. Itultuloymo a salimetmetan a sititibker ti adda kenka, tapno awan ti mangala iti koronam.” (Apoc. 3:10, 11) No ti maysa a napulotan a Kristiano ket saan nga agtalinaed a matalek agingga ken patay, dina magun-odan ti naikari a “di agkupas a korona ti kinadayag.”—1 Ped. 5:4; Apoc. 2:10.
ISESERREK ITI PAGARIAN
7. Ania a nagsayaat a namnama ti dinakamat ni Judas iti suratna?
7 Idi agarup 65 C.E., ni Judas a kabsat ni Jesus iti ina sinuratanna dagiti padana a napulotan a Kristiano nga inawaganna kas “naayaban.” (Jud. 1; idilig ti Hebreo 3:1.) Idi damo, kayatna nga itampok iti suratna ti nadayag a namnama ti pannakaisalakan nga ‘ik-ikutan’ ti amin a Kristiano a naayaban iti nailangitan a Pagarian ti Dios. (Jud. 3) Kaskasdi, adda sabali pay a napateg a bambanag nga insuratna. Ngem iti konklusionna, dinakamatna met laeng ti nagsayaat a namnama dagiti napulotan a Kristiano. Kinunana: “Itan iti daydiay makabalin a mangigaga kadakayo iti pannakaitibkol ken mangidatag kadakayo nga awan pakapilawanna iti imatang ti dayagna buyogen ti dakkel a rag-o, iti daydiay maymaysa a Dios a Manangisalakan kadatayo baeten ken Jesu-Kristo nga Apotayo, maadda koma ti dayag, kinatan-ok, pannakabalin ken autoridad iti isuamin a napalabas a kinaagnanayon.”—Jud. 24, 25.
8. Maitunos iti Judas 24, ania ti mangipakita nga adda panagrag-o idiay langit no mapaneknekan ti maysa a napulotan ti kinatarnawna?
8 Sigurado a kayat ti tunggal matalek a napulotan a Kristiano a masalaknibanda tapno dida maitibkol nga agresulta iti pannakadadaelda. Ti naibatay-Biblia a namnamada ket pagungaren ida ni Jesu-Kristo kas perpekto nga espiritu a parsua. Iti kasta, mabalinanda ti dumatag iti presensia ti Dios nga addaan iti dakkel a rag-o. No matay a matalek ti maysa a napulotan, sigurado ti namnamana a “maibangon a naespirituan a bagi,” mapagungar “iti di panagrupsa . . . , iti pannakaipadayag.” (1 Cor. 15:42-44) No napalalo ti “rag-o sadi langit gapu iti maysa a managbasol nga agbabawi,” panunotem laengen ti ragsak idiay langit no ti maysa a napulotan iti espiritu a kabsat ni Kristo ket agtalinaed a natarnaw agingga ken patay. (Luc. 15:7) Ni Jehova ken dagiti matalek nga espiritu a parsua makipagrag-oda iti maysa a napulotan nga umawat iti gunggonana “buyogen ti dakkel a rag-o.”—Basaen ti 1 Juan 3:2.
9. Kasano a ti iseserrek iti Pagarian ‘sibabaknang a maipaay’ kadagiti matalek a napulotan, ken ania ti epekto dayta kadagiti napulotan a natda?
9 Umasping iti dayta, kinuna ni apostol Pedro kadagiti napulotan a Kristiano a no pagbalinenda a sigurado ti pannakaayabda babaen ti kinamatalekda, ‘sibabaknang a maipaayto kadakuada ti iseserrek iti agnanayon a pagarian ti Apo ken Manangisalakantayo a ni Jesu-Kristo.’ (2 Ped. 1:10, 11) Idi kinuna ni Pedro a ti iseserrekda iti Pagarian ket ‘sibabaknang a maipaayto’ kadakuada, nalabit tuktukoyenna ti nakadaydayag nga iseserrekda idiay langit. Mabalin met a tuktukoyenna ti adu a bendision nga awatento idiay langit dagidiay mangikagumaan a makaturpos iti lumba ti biag. Tunggal malagipda ti kinamatalekda mapno ti pusoda iti rag-o ken panagyaman. Awan duadua a daytoy a namnama ti mangpabileg kadagiti natda a napulotan a Kristiano a ‘mangpatibker iti pampanunotda nga agtultuloy iti trabaho.’—1 Ped. 1:13.
‘TI NAKAIBATAYAN TI NAMNAMA’ TI SABSABALI A KARNERO
10, 11. (a) Ania a namnama ti agur-uray iti sabsabali a karnero? (b) Kasano a ti pannakatungpal ti naindagaan a namnama ket nainaig ken ni Kristo ken iti ‘pannakaipanayag dagiti annak ti Dios’?
10 Insurat ni apostol Pablo ti maipapan iti nadayag a namnama dagiti napulotan iti espiritu nga “annak ti Dios,” kas “makipagtawid” ken Kristo. Kalpasanna, dinakamatna ti naisangsangayan a namnama nga ited ni Jehova iti di nakedngan a bilang ti sabsabali a karnero: “Ti sigagagar a panagsegga ti sangaparsuaan [dagiti tattao] ket agur-uray iti pannakaipanayag ti annak ti Dios [dagiti napulotan]. Ta ti sangaparsuaan naipasakup iti kinabarengbareng, saan a babaen ti bukodna a nakem no di ket babaen kenkuana a nangipasakup iti dayta, a maibatay iti namnama a ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.”—Roma 8:14-21.
11 Inted ni Jehova ‘ti nakaibatayan ti namnama’ ti sangatauan idi inkarina a maispalda manipud iti “kadaanan a serpiente” a ni Satanas a Diablo babaen ti naikari a “bin-i.” (Apoc. 12:9; Gen. 3:15) Ti kangrunaan a “bin-i” ket ni Jesu-Kristo. (Gal. 3:16) Babaen ti ipapatay ken panagungarna, naaddaan ti sangatauan iti namnama a mawayawayaan manipud pannakaadipen iti basol ken ipapatay. Ti pannakatungpal dayta a namnama ket nainaig iti “pannakaipanayag ti annak ti Dios.” Dagiti naipadayag a napulotan ket paset ti segundario a “bin-i.” ‘Maipanayagda’ inton makikaduada ken Kristo a mangdadael iti dakes a sistema ti bambanag ni Satanas. (Apoc. 2:26, 27) Agresulta dayta iti pannakaisalakan ti sabsabali a karnero a makalasat iti dakkel a rigat.—Apoc. 7:9, 10, 14.
12. Ania dagiti nagsayaat a bendision a magun-odan ti sangatauan inton maipanayag dagiti napulotan?
12 Anian a pannakabang-arto dagiti tattao bayat ti Sangaribu a Tawen a Panagturay ni Kristo! Iti dayta a tiempo, ad-addanto a ‘maipanayag’ dagiti “annak ti Dios” inton agserbida kas papadi a kadua ni Kristo. Ken tulonganda ti sangatauan a makagun-od kadagiti bendision nga itden ti pangsubbot a daton. Kas iturayan ti nailangitan a Pagarian, mawayawayaanto ti sangatauan manipud kadagiti epekto ti basol ken ipapatay. In-inutton a ‘mawayawayaan dagiti natulnog a tattao manipud pannakaadipen iti panagrupsa.’ No agtalinaedda a matalek ken Jehova bayat ti Milenio a Panagturay ken iti maudi a pannubok inton agngudo dayta, permanententon a maisurat dagiti naganda iti “lukot ti biag.” Sumrekdanto iti “nadayag a wayawaya ti annak ti Dios.” (Apoc. 20:7, 8, 11, 12) Anian a nagdayag a namnama!
PAGTALINAEDENTAYO A NABIAG TI NAMNAMATAYO
13. Ania ti nakaibatayan ti namnamatayo, ken kaano a maipanayag ni Kristo?
13 Dakkel ti maitulong ti dua a surat ni Pedro kadagiti napulotan ken iti sabsabali a karnero tapno agtalinaed a nabiag ti namnamada. Kinunana a ti namnamada ket saan a naibatay iti aramidda no di ket iti di kaikarian a kinamanangngaasi ni Jehova. Insuratna: “Sipupuotkayo a naan-anay; isaadyo ti namnamayo iti di kaikarian a kinamanangngaasi a maiyeg kadakayo inton pannakaipanayag ni Jesu-Kristo.” (1 Ped. 1:13) Maipanayag ni Kristo inton dumteng tapno gunggonaanna dagiti matalek a pasurotna ken iwayatna ti panangukom ni Jehova kadagiti dakes a tattao.—Basaen ti 2 Tesalonica 1:6-10.
14, 15. (a) Ania ti masapul a nakaipamaysaan ti atensiontayo tapno agtalinaed a nabiag ti namnamatayo? (b) Ania ti imbalakad ni Pedro?
14 Tapno agtalinaed a nabiag ti namnamatayo, masapul a sipapanunottayo iti “aldaw ni Jehova.” Dayta koma ti mangapektar iti intero a biagtayo. Dadaelento ni Jehova ti agdama a “langlangit” wenno turay ti tao, ken iti “daga,” ti dakes a kagimongan dagiti tattao ken iti ‘elementona.’ Insurat ni Pedro: “Anian a kita ti tattao ti rebbeng a pagbalinanyo . . . , nga ur-urayenyo ken agtaltalinaedkayo a silalagip unay iti kaadda ti aldaw ni Jehova, a babaen iti dayta marunawto ti langlangit yantangay maur-uramda ket malunagto ti el-elemento yantangay nakapudpudotda unay!”—2 Ped. 3:10-12.
15 Masuktanto ti agdama a “langlangit” ken ti “daga” iti “baro a langlangit [panagturay ti Pagarian ni Kristo] ken baro a daga [baro a kagimongan ditoy daga].” (2 Ped. 3:13) Kalpasanna, silalawag nga imbaga ni Pedro no ania ti aramidentayo tapno ‘mauray’ wenno mataginayontayo a nabiag ti namnamatayo iti naikari a baro a lubong. Kinunana: “Gapuna, dungdungnguen, yantangay ur-urayenyo dagitoy a banag, aramidenyo ti amin a kabaelanyo tapno iti kamaudiananna masarakannakayo a di namulitan ken awan pakapilawanna ken sitatalna.”—2 Ped. 3:14.
AGBIAG MAITUNOS ITI NAMNAMATAYO
16, 17. (a) Ania dagiti “nasantuan a panagbibiag” ken “ar-aramid ti nadiosan a debosion” a rumbeng nga ipakitatayo? (b) Kasano a matungpal ti namnamatayo?
16 Saantay laeng a taginayonen a nabiag ti namnamatayo no di ket agbiagtayo pay a maitunos iti dayta. Masapul a siguraduentayo a datayo ti kita ti tao nga anamongan ni Jehova. Dagiti “nasantuan a panagbibiag” ramanenna ti ‘panangtaginayontayo iti nasayaat a moral a kababalin iti tengnga dagiti nasion.’ (2 Ped. 3:11; 1 Ped. 2:12) Masapul nga ‘ayatentayo ti maysa ken maysa.’ Ramanen dayta ti panangaramid iti amin a kabaelantayo a mangtaginayon iti panagkaykaysa ti sangalubongan a panagkakabsattayo, a pakairamanan ti kongregasiontayo. (Juan 13:35) Dagiti “ar-aramid ti nadiosan a debosion” ket ar-aramid a mangipakita iti nasinged a relasiontayo ken Jehova. Ramanenna ti naimpusuan a panagkararag, agraman ti inaldaw a panagbasa iti Biblia, napasnek a personal a panagadal, panagdaydayaw ti pamilia, ken aktibo a pannakiraman iti panangikasaba iti “naimbag a damag ti pagarian.”—Mat. 24:14.
17 Kayat ti tunggal maysa kadatayo a magun-od ti anamong ni Jehova ken maisalakan inton ‘marunaw’ ti agdama a dakes a sistema. Iti kasta, matagiragsaktayto ti kaitungpalan ti namnamatayo, ‘ti namnama a biag nga agnanayon a ti Dios, a dina mabalin ti agulbod, inkarina iti kasakbayan dagiti nabayagen a tiempo.’—Tito 1:2.
[Salsaludsod]
[Ladawan iti panid 22]
Mapasaran dagiti napulotan a Kristiano ti “baro a pannakayanak nga agturong iti maysa a sibibiag a namnama”
[Ladawan iti panid 24]
Pagtalinaedenyo a nabiag ti namnama iti uneg ti pamiliayo
