Neriuuterput nuannaarutigisigu
Neriuuterput nuannaarutigisigu
“[Neriuutigaarput] inuuneq naassaanngitsoq Guutip sallusuitsup itsarsuarli neriorsuutigisimasaa.” — TITUSI 1:2.
UTEQQIINEQ
Qanoq ililluta nalunngilarput tanitaq toqussi tikillugu assuarnaakkaangat qilammi nuannaartoqartartoq?
Savat allat neriuutaat tanitat neriuutaannut qanoq attuumassuteqarpa?
Neriuutitta piviusunngornera misigerusukkutsigu ‘illernartuunerput’ ‘Guutimillu mianerinnilluta inuunerput’ qanoq ililluta ersersittariaqarparput?
1. Jehovap uagutsinnut neriuutissiissutaa pinertusaarnissamut qanoq iluaqutigisinnaavarput?
JEHOVA ‘Guutiuvoq neriuuteqartitsisoq’. Apustili Paulusi taama allappoq nangillunilu allalluni Jehovap ‘immersinnaagaatigut tipaatsungaarnermik eqqissinermillu uppernermi, neriuuteqangaalersilluta Anersaap Illernartup pissaaneragut’. (Romamiut 15:13) Neriuut tamanna piviusutut isigigutsigu ajornartorsiornitsinni pinertusaarsinnaassallutalu nuannaartuarsinnaassallutalu eqqissisimajuarsinnaassaagut. Ajornartorsiorneq anorersuarsiornertut ippoq. Neriuuterpullu ‘tarnimut kitsatut ippoq, aalariartitassaanngitsoq isumannaatsorlu’, tanitaagaluarutta savanulluunniit allanut ilaagaluarutta. (Hebræerit 6:18, 19) Neriuuterput ajornartorsiortilluta iluaqutigingaarsinnaavarput sarfaanneqartutullusooq ‘qimagukkiartunnginniassagatta’ (NV), upperluartuarsinnaaniassagatta nalorninnginniassagattalu. — Atuakkit Hebræerit 2:1; 6:11.
2. Ullumikkut kristumiut qanoq neriuuteqarpat, aamma sooq ‘savat allat’ tanitat neriuutaannik soqutiginnippat?
2 Kristumiut maanna naggatissap nalaani inuusut tamarmik neriuuteqarput. ‘Savarpannguanut’ ilaasut suli nunarsuarmiittut qilammi toqujuitsutut inuunissamik neriugisaqarput. Taakkua Kristusi taassuma naalagaaffiani kunngioqatigalugulu palasioqatigissavaat. (Lukasi 12:32; Saqqummersitat 5:9, 10) ‘Savat allat’ taakkunannga amerlanerungaartut nunarsuarmi paratiisiusumi naalagaaffimmit Missiarsikkoortumit naalakkersorneqartumi naassaanngitsumik inuunissaq neriuutigaat. (Saqqummersitat 7:9, 10; Johannesi 10:16) Savat allat puiunngisaannartariaqarpaat annaanneqarumallutik Kristusip qatanngutaanik tanitanik suli nunarsuarmiittunik tapersersuisariaqarlutik. (Matthæusi 25:34-40) Tanitat akissarsisitaajumaarput, qularnanngitsumillu aamma savat allat neriuutaat piviusunngortinneqarumaarpoq. (Atuakkit Hebræerit 11:39, 40). Siullermik tanitanut neriuutissiissutigineqartoq sammeriartigu.
KRISTUMIUT TANITAT ‘NERIUGISAAT UUMASOQ’
3, 4. Jehovap qanoq ililluni tanitat ‘neriugisamut uumasumut ernioqqissippai’, tamannalu suna pillugu neriuutaava?
3 Apustilip Petrusip kristumiut tanitat, ‘qinigaasimasunik’ taasani, marloriarluni allaffigai. (1 Petrusi 1:1, 2) Petrusip allagai savarpannguit neriuutaat nuannersoq pillugu paasisaqarfiginerussavavut. Allakkamini siullerni ima allappoq: “Unnersiutigineqarli Guuti Naalakkatta Jiisusi-Kristusip Ataataa, naakkinninnersuani naapertorlugu Jiisusi-Kristusip toqusunit makinneratigut ernioqqissikkamisigut neriugisamut uumasumut — kingornussassamut aserortussaanngitsumut, mingutsinneqartussaanngitsumut toquliortussaanngitsumullu qilanni paarineqartumut pisassarititaalluni ilissinnut Guutip pissaaneranit uppernikkut sernigineqartunut annannissamut ullussani kingullerni saqqummissalluni piareersimasumut. Tamanna pillugu qiimmattassaasi.” — 1 Petrusi 1:3-6.
4 Jehovap kristumiut killilimmik amerlassusillit Kristusip naalakkersueqatissaasut toqqakkani ‘ernioqqissippai’. Jehovap taakku anersaani illernartoq atorlugu qitornavissiartaaralugillu Kristusip qilammi kunngioqatissaasut palasioqatissaasullu toqqarpai. (Saqqummersitat 20:6) Taakkua taamatut ‘ernioqqissitaanertik’ ‘uumasumik neriuuteqarsinnaalissutigaat’. Neriuut tamanna suna pillugu neriuutaava? Petrusi allappoq ‘aserortussaanngitsumik, mingutsinneqartussaanngitsumik toquliortussaanngitsumillu’ naassaanngitsumik inuunissamik neriuutaasoq qilammilu taakkununnga pisassarititaasoq. Tupinnanngilaq tanitat neriuutertik nuanningaartoq tamanna ‘qiimmattaatigimmassuk’! Neriuutertilli misigissavaat aatsaat aalajaattuarunik.
5, 6. Sooq kristumiut tanitat aalajaattuartariaqarpat?
5 Petrusip allakkami aappaanni kristumiut tanitat kajumissaarpai aalajaattuarumallutik sapinngisartik tamaat iliuuseqaqqullugit qilammi akissarsiassartik piniassagamikku. (2 Petrusi 1:10) Pissuserineqartussanik, soorlu uppernermik, Guutimik mianerinninnermik, qatanngutigiittut tunniusimaffigeqatigiinnermik asanninnermillu ineriartortitsiuartariaqarput. Petrusi ima allappoq: “Tamakkumi ilissinniippata ineriartorlutillu ilatsiinnartuussanngilasi inerititaqanngitsuussanasilu Naalakkatsinnik Jiisusi-Kristusimik ilisarsinissinni.” — Atuakkit 2 Petrusi 1:5-8.
6 Kristusip utoqqaanertat tanitat Filadelfiami Asiaaqqamiittumi ilagiinniittut ima oqarfigai: “Nikallujuissuseq pillugu oqaatsikka paarigakkit uangattaaq paariumaarpakkit ullussani misilinneqarfiusuni nunarsuarmut tamarmut nalliuttussani nunarsuarmi najugaqartut misilinneqarfissaanni. Erniinnaq aggerumaarpunga. Pigisat aalajangiunniaruk ajugaasumut niaqorusiussamik arsaarneqaqqunak.” (Saqqummersitat 3:10, 11) Kristumiu tanitaq aalajaakkunnaarsimappat “ajugaasumut niaqorusiussassaq naalannaat” qinikkanut toqussartik tikillugu aalajaattuartunut neriorsuutigineqartoq taassumunnga tunniunneqarnavianngilaq. — 1 Petrusi 5:4; Saqqummersitat 2:10.
GUUTIP NAALAGAAFFIANUT ISERNEQ
7. Neriuut nuanningaartoq suna Judasip allakkamini eqqaavaa?
7 Ukiup 65-ip missaani Jiisusip affarmik qatanngutaata Judasip kristumiut tanitat, ‘qaaqqusaasunik’ taasani, allaffigai. (Judasi 1; naleqqiuguk Hebræerit 3:1) Aallaqqaammut kristumiut tanitat tamarmik annaanneqarnissamik neriuutigisaat pillugu allaffiginiarsimagaluarpai. (Judasi 3) Pingaaruteqartulli allat pillugit allaffigisariaqarsimavai, taamaattorli allakkami naatsut naggataatungaanni kristumiut tanitat neriuutaat nuanningaartoq eqqaavaa. Ima allappoq: “Orlunissassinnut sernissussallusi naalannarsutsiminullu sassartissallusi sapinngitsup, assuarnaatsuutillusi qiimmattartillusilu, kisimi Guutiusup Naalakkatsigut Jiisusi-Kristusikkut annatsitsisitta pigai naalannassuseq ataqqinangaassuserlu, pissaaneq piginnaatitaanerlu pinngortoqanngikkallarmalli maannalu naassaanngilluinnartumillu!” — Judasi 24, 25.
8. Qanoq ililluta nalunngilarput tanitaq toqussi tikillugu assuarnaakkaangat qilammi nuannaartoqartartoq?
8 Qularnanngitsumik kristumiu tanitaq aalajaatsoq kinaluunniit piuneerussaanermik kinguneqartumik ‘orloqqunani’ Guutimit illersorneqarusuppoq. Tanitat anersaatut naammalluinnartutut Jiisusimit Kristusimit toqusunit makititaanissartik neriuutigaat. Makititaanermikkut Guutip eqqaaniilissapput. Tanitaq toqussi tikillugu aalajaassimasoq qularnanngilluinnartumik ‘anersaap pianik timeqarluni’, ‘aserujuitsuulluni’ ‘naalannassuseqarlunilu’ makikkumaarpoq. (1 Korinthimiut 15:42-44) ‘Ajortuliortoq ataaseq allamik isumataartoq qilammi nuannaarutaangaartarpat’, takorlooriaruk Kristusip qatanngutaasa ilaata toqussi tikillugu assuarnaattuarnera qilammi qanoq nuannaarutigineqartigissasoq. (Lukasi 15:7) Tanitat tamarmik immikkut akissarsiartik ‘qiimmattaatigisarpaat’, Jehovamillu pinngortitanillu anersaajusunit aalajaatsunit nuannaaqatigineqartarput. — Atuaruk 1 Johannesi 3:2.
9. Tanitat aalajaatsut Guutip naalagaaffianut qanoq ilillutik ‘iserfissarsisinneqangaarpat’, neriuullu tamanna tanitanut suli nunarsuarmiittunut qanoq sunniuteqartarpa?
9 Judasip pisimaneratut Petrusip kristumiut tanitat aalajaattuarunik akissarsiariumaagaat pillugu ima allaffigai: “Naalakkatta annaassisitta Jiisusip Kristusip naalagaaffianut naassaanngitsumut iserfissarsisinneqangaarumaarpusi.” (2 Petrusi 1:10, 11, 1936) Petrusip tanitat qilammi akissarsiassaminnut ‘iserfissarsisinneqangaarumaarneraramigit’, taakkua naalannassuseqangaarlutik qilammut isernissaat pisimasinnaavaa. Aamma pisimasinnaavai taakkua qilammi pilluaqqussutisiassarpassui. Tanitat aalajaassimanertik eqqarsaatigigaangamikku qiimmattartarlutillu qujamasungaartassapput. Kristumiut tanitat neriuutertik tamanna suli nunarsuarmiitillutik aalajaattuarnissamut nakussatsissutigisarpaat. — 1 Petrusi 1:13.
SAVAT ALLAT NERIUUTAAT
10, 11. (a) Savat allat suna neriuutigaat? (b) Nunarsuarmi inuunissamik neriugisaqarneq Kristusimut ‘Guutillu qitornaasa saqqummersitaanissaannut’ qanoq attuumassuteqarpa?
10 Apustilip Paulusip ‘Guutip qitornai’ tanitat Kristusip ‘kingornussisussaaqataatut’ neriuutaat tupinnangaartoq pillugu allaffigai. Tulliullugu Jehovap savanut allanut killeqanngitsumik amerlassusilinnut neriuutissiissutaa nuanningaartoq ima eqqaavaa: “Pinngortitammi [inuit] erinisullutik Guutip qitornaasa [tanitat] saqqummersitaanissaat utaqqivaat. Pinngortitammi naalatsigititaapput piunngitsuussusermut namminneq piumasarinngisaminnik naalatsigititsisorli pissutaalluni, neriullutillu pinngortitattaaq namminneq aniguisitaajumaartut nungujassusermi inussiaataanermit kiffaanngissuseq Guutip qitornaasa naalannarsiffissami pisassaat pigilerlugu.” — Romamiut 8:14-21.
11 Jehovap inuit neriuutissippai neriorsoramigit ‘pulateriaarsutoqqamit’ Saatanimit Diaavulumit aniguisinniarlugit ‘kinguaassaq’ neriorsuutigisaasoq iluaqutigalugu. (Saqqummersitat 12:9; 1 Mosesi 3:15) Kinguaassap tamatuma pingaarnerusortaa tassaavoq Jiisusi Kristusi. (Galatiamiut 3:16) Jiisusip toquneragut makititaaneragullu inuit ajortimut toqumullu inussiaajunnaarsitaanissamik neriugisaqarsinnaanngortinneqarput. Neriuut tamanna ‘Guutip qitornaasa’, tanitat qilammiittut, ‘saqqummersitaanissaannut’ attuumassuteqarpoq. Taakku kinguaassap pingaannginnerusortaanut ilaapput. ‘Saqqummersitaassapput’ Kristusi Saatanip pissutsinik aaqqissuussaaneranik ajortumik suujunnaarsitseqatigigunikku. (Saqqummersitat 2:26, 27) Tamanna savat allat, annikilliornartorsuarmit aniguisut, annaanneqarnerannik kinguneqassaaq. — Saqqummersitat 7:9, 10, 14.
12. Tanitat saqqummersitaanissaat inuiannut nuanningaartunik sunik pilluaqqussutitaqassava?
12 Kristusi ukiuni tusindini naalakkersuitillugu inuiaat qanoq ilorraallatsigissappat! Tamatuma nalaani ‘Guutip qitornai’ allatigut ‘saqqummersitaassapput’ Kristusi palasioqatigalugu inuiaat taassuma pilliutaanik iluaqutiginneqqullugit ikiorunikkit. Guutip naalagaaffia nunarsuarmut naalakkersuilerpat inuit naalattut ‘nungujassusermi inussiaataanermit aniguisitaajartuaarumaarput’. Ajortimut toqumullu inussiaataajunnaassapput. Ukiut tusindit ingerlaneranni ukiullu taakkua qaangiutilerneranni naggammik misilinneqarnerminni Jehovamut aalajaattuarpata taakkua atii peerneqartussaajunnaarlugit ‘inuunerup mappersagaanut’ allanneqassapput. Taakkua “kiffaanngissuseq Guutip qitornaasa naalannarsiffissami pisassaat” pissavaat. (Saqqummersitat 20:7, 8, 11, 12) Neriuut ilumut nuanningaarami!
NERIUUTIGISAT PIVIUSUTUT ISIGIUK
13. Uppernerput sumik tunngaveqarpa, aamma Kristusi qaqugu saqqummersitaassava?
13 Petrusip allakkamini marlunni allagai tanitat savallu allat neriuutiminnik piviusutut isiginninnissamut iluaqutigaat. Taanna nassuiaavoq taakkua neriuutigisartik neriuutigisinnaagaat namminneq suliatik pissutiginagit, Jehovalli taakkununnga pilluaqqussutigisai pissutigalugit. Ima allappoq: “Eqqumaniaritsi isummassigullu piareersimallusi qiterusersimallusi, saammaannerlu [ajunngissuserlu pisassarinngisaraluaq, NV] Jiisusi-Kristusi saqqummersinneqarpat ilissinnut tunniunneqartussaq kisiat neriuutigisiuk.” (1 Petrusi 1:13) ‘Jiisusi-Kristusi saqqummersitaassaaq’ ajoqersukkani aalajaatsut akissarsisikkiartorlugit ajortullu piuneerukkiartorlugit tikiukkuni. — Atuakkit 2 Thessalonikamiut 1:6-10.
14, 15. (a) Neriuuterput piviusutut isigiuarumallugu susariaqarpugut? (b) Petrusip qanoq siunnersorpaatigut?
14 Neriuuterput piviusutut isigisinnaajumallugu eqqaamajuartariaqarparput ‘Jehovap ullussaa’ qanillisoq tamatuminngalu ilisimaarinninnerput inuunitsinni sutigut tamatigut sunniuteqartillugu. Ullormi tamatumani “qilaat”, naalagaaffiit, ullumikkut atuuttut “nunalu”, inuit ajortut, tamatumanilu ‘pinngoqqaartut’ piuneerutitaassapput. Petrusi ima allappoq: “Tamatigut illernartuullusilu Guutimillu mianerinnillusi inuusariaqarpusi, Guutip ullussaata nalliunnissaa utaqqillugu piaarnerusumillu nalliunnissaa ilungersuutigalugu qilaat ikumallutik nungukkumaarmata, pinngoqqaartullu ikuallallutik aakkumaarlutik.” — 2 Petrusi 3:10-12.
15 Taava “qilaat nutaat nunalu nutaaq” atuutilissapput. Inuit naalagaaffii inuillu ajortut tamarmik Kristusip naalagaaffianik tamatumanilu innuttaasunik naapertuilluartunik taarserneqassapput. (2 Petrusi 3:13) Taava Petrusip silarsuassaq nutaaq pillugu neriuutitta piviusutut isigiuarnissaanut iluaqutissatsinnik toqqaannartumik ima siunnersorpaatigut: “Taamaattumik, asasakka, taama ittunik ilimagisaqarassi ilungersuutiginiarsiuk taassumunnga minguitsuullusilu assuarnaatsuunissarsi eqqissillusi.” — 2 Petrusi 3:14.
NERIUUTIGISANNUT NAAPERTUUTTUMIK INUUGIT
16, 17. (a) ‘Illernartuunerput’ ‘Guutimillu mianerinnilluta inuunerput’ qanoq ililluta ersersittariaqarparput? (b) Neriuuterput qanoq ililluni piviusunngussava?
16 Neriuuterput piviusutut isigiinnarnagu aamma neriuutitsinnut naapertuuttumik inuusariaqarpugut. Anersaakkut ittunik qanoq pingaartitsitiginersugut eqqumaffigisariaqarparput. ‘Illernartuujumalluta’ ilaatigut ‘Guutimik nalusut akornanni ajunngitsumik inuusariaqarpugut’ ileqqussatigut pissuserissuunitsigut. (2 Petrusi 3:11; 1 Petrusi 2:12) Qatanngutigiittut ‘asaqatigiittariaqarpugut’. Tamanna ilutigalugu ilagiinni najukkatsinniittumi ataasiussuseqartuarumalluta sapinngisarput tamaat iliuuseqartariaqarpugut. (Johannesi 13:35) ‘Guutimik mianerinnilluni inuuneq’ Jehovamut attaveqarluarumalluta iliuuserisartakkatsinnut tunngassuteqarpoq. Iliuuserisartakkanut taakkununnga ilaapput qamannga pisumik qinusarneq, ullut tamaasa Biibilimik atuartarneq, Biibilimik iternga tikillugu misissuisarneq, ilaqutariittut atuaqqissaaqatigiittarneq ‘naalagaaffimmillu iivangkiiliumik’ oqaluussissutiginneqataajuartarneq. — Matthæusi 24:14.
17 Tamatta immikkut Jehovamit akuerisaarusuppugut pissutsillu aaqqissuussaanerannik ajortumik suujunnaarsitsiffissami taassumannga annaanneqarusulluta. Taamaalillutami neriuutitta, ‘inuunerup naassaanngitsup Guutip sallusuitsup itsarsuarli neriorsuutigisimasaata’, piviusunngornera misigissavarput. — Titusi 1:2.
[Atuaqqissaarnermi apeqqutit]
[Qupp. 22-mi assiliartaq]
Kristumiut tanitat ‘neriugisamut uumasumut ernioqqissitaasarput’
[Qupp. 24-mi assiliartaq]
Ilaquttatit neriuummik piviusutut isiginnissinnaaqqullugit ikiukkit
