Tuyangalala Muna Vuvu
Tuyangalala Muna Vuvu
“[Vena ye] vuvu kia moyo a mvu ya mvu, una kasia nsilu o Nzambi, ona kalendi vuna ko, e tandu ya mvu ya mvu nsukinina.” —TITO 1:2.
YUVU YA LUFIMPU
․․․․․
Aweyi tuzayidi vo kiese kikalanga kun’ezulu vava Nkristu akuswa kefwanga ye kwikizi?
․․․․․
E vuvu kia mameme makaka aweyi kinina ngwizani ye ki’Akristu akuswa?
․․․․․
Muna mona ndungan’a vuvu kieto, nkia mavangu ma “nkal’ambote” yo ‘vumi wa Nzambi’ tufwete songanga?
1. E vuvu katuvana o Yave aweyi kilenda kutusadisila mu zizidila e mpasi?
PAULU wa ntumwa wavova vo Yave i “Nzambi a vuvu” ona lenda ‘kutuzadisa ye kiese yo luvuvamu muna kwikila, twawokelw’e vuvu, muna ngolo za mwand’avelela.’ (Roma 15:13) Avo vuvu kieto kiwokele, tukala ye kiese yo luvuvamu yo zizidila mpasi zilenda kutulwakila. ‘Nze mbw’a nzaza yovo luvaku lusimbanga nzaza, e vuvu kiasìkila, kiasiama’ i kisimbanga Akristu akuswa yo mameme makaka. (Ayib. 6:18, 19) Avo tuna ye vuvu kiasikila ke ‘tukukumunwa’ ko muna ntangw’a mpasi. Dikutusadisa mu kumika lukwikilu lweto yo lembi katikisa.—Tanga Ayibere 2:1; 6:11.
2. Nkia vuvu kiaswaswana bena kiau Akristu o unu? Ekuma “mameme makaka” besilanga sungididi muna vuvu kia akuswa?
2 Akristu bezingilanga mu lumbu yayi yambaninu vuvu kiaswaswana bena kiau. Nsadiswa za “finkambi-kambi,” i sia vo Akristu akuswa bena ye vuvu kia vwila moyo ulembi fwanga kun’ezulu. Besala kumosi yo Kristu s’atinu ye nganga muna Kintinu kiandi. (Luka 12:32; Lus. 5:9, 10) E “ndong’ayingi” ya “mameme makaka” bena ye vuvu kia zinga yakwele mvu muna paradiso ova ntoto muna Kintinu kia Masia. (Lus. 7:9, 10; Yoa. 10:16) Mameme makaka bafwete wo zaya vo muna vuluzwa bafwete yikama “abunzi” a Kristu bakinu ova ntoto. (Mat. 25:34-40) Akuswa yo mameme makaka besinga tambula nsendo au. (Tanga Ayibere 11:39, 40.) Yambula twabadika ntete e vuvu kia akuswa.
“VUVU KIAMOYO” KI’AKRISTU AKUSWA
3, 4. Aweyi Akristu akuswa ‘bewutulukilanga muna vuvu kia moyo?’ E vuvu kiaki i nki?
3 Petelo wa ntumwa muna nkanda miole kasonekena Akristu akuswa, wabayikila vo ‘asolwa.’ (1 Pet. 1:1) Muna nkanda miami mambu mayingi kavova mu kuma kia vuvu kia finkambi-kambi. Muna nkand’andi antete, Petelo wasoneka vo: “Okembelw’o Nzambi w’Es’andi a Mfumu eto Yesu Kristu, ona wina vo, muna nkenda zandi zayingi, watuwutulwila muna vuvu kiamoyo, muna lufuluku lua Yesu Kristu, muna mafwa, mun’evwa dilembi wolakana, yo safuka, yo vempoka, dinulundìlu mun’ezulu, yeno nuyingidilwanga muna nkum’a Nzambi, muna lukwikilu muna luvuluku luakubama, muna sengomonwa muna ntangw’ambaninu. Kina nuyangalele.”—1 Pet. 1:3-6.
4 E buka kiakete ki’Akristu kasola Yave kimana bayala kumosi yo Kristu muna Kintinu ki’ezulu, ‘bewutulukanga’ nze wan’antete a Nzambi. Bekuswanga muna mwand’avelela se atinu ye nganga kumosi yo Kristu. (Lus. 20:6) Petelo wavova vo ‘luwutuluku’ lwalu lukubavanang’e “vuvu kiamoyo” kayikila vo “evwa dilembi wolakana, yo safuka,” dialundilwa “mun’ezulu.” Ka lukatikisu ko, akuswa ‘betoma yangalelanga’ e vuvu kiau kia moyo. Kansi, e vuvu kiaki muna lungana kio, bafwete zindalala ye kwikizi.
5, 6. Ekuma Akristu akuswa bafwete sila sungididi kiasimbinina mbok’au ezulu?
5 Muna nkand’andi anzole, Petelo wawondelela Akristu akuswa vo ‘balut’o sia sungididi kiasikidisa nsumwa, ye nsolw’au.’ (2 Pet. 1:10) Bafwete sianga sungididi kia yima fu ya Kikristu nze lukwikilu, vumi wa Nzambi, nzolani a ungudi yo zola. Petelo wavova vo: “Omama, ovo meno yo wokela, mekunukondesa wolo, yo unlomba.”—Tanga 2 Petelo 1:5-8.
6 Muna nsangu katwika kw’akuluntu akuswa muna mwanda muna nkutakani ya Filadelefia kuna Ásia Menor, Kristu ona wafulwa wavova vo: “Wau olundidi e diambu dia luzindalalu luame, omono mpe ikulunda muna ola a ntontwa, ina ikwiz’ova nza yawonso, yatont’awana ben’ova nza. Nkwizidila: edi wina diau, simbinina dio, ke vakal’on’obaka kolow’aku.” (Lus. 3:10, 11) Avo Nkristu akuswa osumukini, ke tambula diaka e “kolow’a nkembo ko, ina ilembi vempoka” eyi yasilwa nsilu kw’awana bezindalala ye kwikizi yamuna lufwa.—1 Pet. 5:4; Lus. 2:10.
NKOTA MUNA KINTINU
7. Nkia vuvu kia nkembo kayika Yuda muna nkand’andi?
7 Muna mvu wa 65 wa tandu kieto, Yuda wa mbunzi a Yesu muna nkand’andi kasonekena akw’andi Akristu akuswa, wabayikila vo ‘asumwa.’ (Yuda 1; tezanesa ye Ayibere 3:1) Kana una vo wakala y’ekani dia soneka nkand’andi mu kuma kia vuvu kia Akristu awonso akuswa, entete wabasonekena diambu diakaka bafwana toma sila e sungididi. (Yuda 3) I bosi, kuna mfoko a nkand’andi wayika e vuvu kia nkembo ki’Akristu akuswa vo: “Kuna kwa ndion’olenda kunulunga-lunga nwalembi t’esakuba, yo kunusia vana ndose a nkembo andi, nwakondwa twangu, kuna kiese kiayingi, kuna kwa ndiona wina kaka vo i Nzambi wa Mvuluzi eto, muna Yesu Kristu wa Mfumu eto, nkembo, nene, nkuma, e wisa, vava ke kiakedi tandu ko, y’owau, yamu mvu ya mvu.”—Yuda 24, 25.
8. Adieyi tutanganga muna Yuda 24 disonganga vo kiese kikalanga kun’ezulu vava kuswa kefwanga ye kwikizi?
8 Dialudi, Akristu akwikizi akuswa bevavanga vo Nzambi kabatanina muna konso diambu dilenda kubates’esakuba yo kubafila ku lufwasu. Bena ye vuvu vo Yesu Kristu osinga kubafula muna mafwa nze vangwa yalunga ya mianda yo kubasunzula ye kiese kiawonso vana ndose a Nzambi. Ka lukatikisu ko, vava Nkristu akuswa kefwanga ye kwikizi, ‘ofulwanga se to kiamwanda,’ kia ‘lembi wola . . . muna wete.’ (1 Kor. 15:42-44) Wau vo ‘kiese kiayingi kikalanga kun’ezulu muna diambu dia nsumuki mosi ovilukilu o ntima,’ yindula kiese kikalanga kun’ezulu vava mpangi akuswa a Kristu kefwanga ye kwikizi. (Luka 15:7) Yave ye vangwa ya mianda ya kwikizi beyangalalanga kumosi ye konso kuswa otambwidi nsendo andi.—Tanga 1 Yoane 3:2.
9. Aweyi ‘bevambulwilwa’ Akristu akwikizi muna nkot’au muna Kintinu? E vuvu kiaki aweyi kisadisilanga nsadiswa z’akuswa bakinu ova ntoto?
9 Petelo wasonekena mpe Akristu akuswa vo, avo basidi sungididi kia sikidisa nsumw’au ye kwikizi, ‘i mpambwilwa bevambwilwa kikilu e nkota muna kintinu kia mvu ya mvu kia Mfumu eto wa Mvuluzi Yesu Kristu.’ (2 Pet. 1:10, 11) Vava Petelo kasoneka vo akuswa muna nkot’au muna Kintinu ‘bevambwilwa’, edi kazola songa vo bekota kun’ezulu ye kiese kiawonso. Nanga nsambu zina besinga vwa kun’ezulu kayika. Akuswa vava besungamena kwikizi kiau basonga, beyangalala yo vutula matondo. Ka lukatikisu ko, e vuvu kiaki kikumikanga nsadiswa z’Akristu akuswa bakinu ova ntoto mu ‘kamina tuketo twa nyindu miau muna salu.’—1 Pet. 1:13.
“MPUNGU-VUVU” KIA MAMEME MAKAKA
10, 11. (a) Nkia vuvu kiavewa kwa mameme makaka? (b) E vuvu ki’awana bezingila ova ntoto aweyi kinina ngwizani yo Kristu kumosi yo ‘lusengomoko’ lwa “wan’a Nzambi”?
10 Paulu wa ntumwa wayikila “wan’a Nzambi” ana bakuswa muna mwanda vo “akw’evwa kumosi yo Kristu.” I bosi, wayika vuvu kia nkembo kavana Yave kwa ndong’ayingi ya mameme makaka vo: “E mpunguvuvu a nsema [wantu] ivingila lusengomoko lua wan’a Nzambi [akuswa]. O nsema wasakidikwa muna fûka, ke ku zolela kiandi ko, muna diambu dia ndiona wasakidika wo kaka, muna vuvu kia nsema kibeni wavevoka muna kibundu kia uwolezia, yamuna vevoka kwa nkembo a wan’a Nzambi.”—Roma 8:14-21.
11 Yave wavana “e mpungu-vuvu” kwa wantu vava kasia nsilu wa “mbongo” yikubavevola muna wisa kia “niok’ankulu” una vo, Nkadi ampemba wa Satana. (Lus. 12:9; Etu. 3:15) Yesu Kristu i wantete muna “mbongo” yayi. (Ngal. 3:16) Muna lufwa yo lufuluku lwandi, Yesu wasikidisa e vuvu kina vo i nkubilwa yivevola wantu muna ubundu w’esumu yo lufwa. E vuvu kiaki kilungana muna “lusengomoko lua wan’a Nzambi.” Akristu akuswa i ndambu yazole muna “mbongo.” Besinga ‘sengomonwa’ vava besala kumosi yo Kristu muna fwasa nza yayi yambi ya Satana. (Lus. 2:26, 27) Ediadi ditwasa luvevoko kwa mameme makaka ana bevuluka muna mpasi zayingi.—Lus. 7:9, 10, 14.
12. O lusengomoko lwa akuswa nkia nsambu lutwasa kwa wantu?
12 O Luyalu lwa Kristu Lw’ezunda dia Mvu lusinga twasa luvevoko kw’ekanda dia wantu muna “nsema” wawonso. Muna ntangwa yayina, o “wan’a Nzambi” a nkembo besala kumosi yo Kristu nze nganga muna twasa nsambu za kimenga kia lukûlu lwa Yesu kwa wantu awonso. Muna Kintinu ki’ezulu, o “nsema” i sia vo ekanda dia wantu diyantika vevolwa mun’esumu yo lufwa. Malembe-malembe, wantu alemvoka ‘bevevoka muna kibundu kia uwolezia.’ Avo bazindalala ye kwikizi kwa Yave muna lutonto lwa nsuka kuna mfoko Ezunda dia mvu, nkumbu zau zisonama kimakulu muna ‘nkand’a moyo.’ Bevwa ‘luvevoko lwa nkembo a wan’a Nzambi.’ (Lus. 20:7, 8, 11, 12) Ekwe vuvu kiakiese!
TUKALA YE VUVU KIASIKILA
13. Ayeyi i nkubilw’a vuvu kieto? O lusengomoko lwa Kristu nkia ntangwa lukala?
13 Petelo mana kasoneka muna nkanda miandi miau miole, mesadisanga Akristu akuswa yo mameme makaka bakala ye vuvu kiasikila. Watoma dio songa vo ke mu ngolo za yau kibeni ko bevwilanga e vuvu kiaki, kansi muna nsambu za Yave. Wavova vo: “Nulungalala, yo toma sikidisa vuvu kieno muna nsambu zitwaswa kwa yeno, muna lusengomoko lua Yesu Kristu.” (1 Pet. 1:13) O lusengomoko lwa Kristu lukala vava kesenda alandi andi akwikizi yo twasa mfundis’a Yave kwa yimpumbulu yawonso.—Tanga 2 Tesalonika 1:6-10.
14, 15. (a) Nkia diambu tufwete sungamenanga muna kala ye vuvu kiasikila? (b) Nki’elongi kavana Petelo?
14 Muna kala ye vuvu kiasikila, tufwete sungamenanga vo e “lumbu kia Yave” kifinamene. Muna lumbu kiakina, Yave ofwasa “ezulu” ye “nza” ina owau, i sia vo tuyalu ye kintwadi kia yimpumbulu “ye vangwa yawonso ina mo.” Petelo wavova vo: “Nkia mpil’a wantu ozevo nukal’oyeno . . . , nusiang’e vuvu yo sutilang’e ngiz’a lumbu kia Nzambi, kina kina vo, ezulu, wau dikwam’o tiya, dizeloka, o mazuku mezeloka muna mbangazi?”—2 Pet. 3:10-12.
15 “Ezulu” ye “nza” ina owau ivingilwa “kw’ezulu diampa [Kintinu kia Kristu] ye nz’ampa [kintwadi kiampa kia wantu ova ntoto].” (2 Pet. 3:13) Petelo wavana elongi diasikididi dilenda kutusadisa mu kala ye vuvu kiasikila muna nsilu ezulu diampa ye nz’ampa. Wavova vo: “Dianu vo, azolwa, wau nusia mambu mam’e vuvu, nusia sungididi nwawanuka kuna luvuvamu, nwakondw’ekeya yo lusembo vana ndose andi.”—2 Pet. 3:14.
TUSONGANGA VO E VUVU KIETO KIASIKILA
16, 17. (a) Nkia mavangu ma “nkal’ambote” yo ‘vumi wa Nzambi’ tufwete songanga? (b) E vuvu kieto aweyi kisinga lunganena?
16 Muna songa vo e vuvu kieto kiasikila, tufwete zingilanga ngwizani ye vuvu kiaki. Tufwete sianga sungididi muna kimwanda kieto. Tufwete kalanga “nkal’avauka,” i sia vo tufwete songanga mavangu ma “nkal’ambote vana vena zula.” (2 Pet. 3:11; 1 Pet. 2:12) Tufwete ‘zolaziananga’ yo vanga wawonso muna tatitidila ‘kintwadi kia wan’angudi mu nza yawonso’ ye muna nkutakani eto. (Yoa. 13:35) O mavangu ma “vumina Nzambi” kayika Petelo i mana tuvanganga muna kala ye ngwizani ambote yo Yave. Nze samba, tanga Nkand’a Nzambi lumbu yawonso, kala y’elongi dia yeto kibeni, Nsambila ya Esi Nzo yo samuna ‘nsangu zambote za kintinu.’—Mat. 24:14.
17 Konso muntu mu yeto ozolele vwa edienga dia Yave yo vuluzwa vava nza yayi yambi “izeloka.” Dialudi vo, tusinga mona ndungan’a vuvu kieto, i sia vo tusinga vwa “moyo a mvu ya mvu, una kasia nsilu o Nzambi, ona kalendi vuna ko, e tandu ya mvu ya mvu nsukinina.”—Tito 1:2.
[Yuvu ya Longoka]
[Foto ina muna lukaya lwa 22]
Akristu akuswa ‘bewutulukanga muna vuvu kiamoyo’
[Foto ina muna lukaya lwa 24]
Nukala ye vuvu kiasikila muna nzo eno
