Lu Wabelwe Kabakala Sepo Ya Luna
Lu Wabelwe Kabakala Sepo Ya Luna
“[Ku na ni] sepo ya bupilo bo bu sa feli, ili bo Mulimu, ya sa koni ku puma, naa sepisize kale-kale ko.”—TITE 1:2.
LUNDULULO
Lu ziba cwañi kuli ku banga ni tabo kwa lihalimu yo muñwi wa ba ba tozizwe ha zwelapili ku sepahala ku isa lifu?
Sepo ya ba lingu ze ñwi i itingile cwañi fa sepo ya ba ba tozizwe?
Haiba lu bata kuli sepo ya luna i talelezwe, ki “likezo ze kenile za muzamao” ni “likezo za busepahali ku Mulimu,” ze cwañi ze lu lukela ku bonisa?
1. Sepo ya lu file Jehova i kona ku lu tusa cwañi ku tiyela miinelo ye taata?
MUAPOSITOLA PAULUSI naa bulezi kuli, Jehova ki “Mulimu ya fa sepo.” Paulusi naa zwezipili ku bulela kuli Jehova wa kona ku ‘mi taza tabo ni kozo kaufela ka ku mu sepa kwa mina, kuli mu tale sepo ka maata a moya o kenile.’ (Maro. 15:13) Haiba lu hupulanga za sepo yeo, lu ka kona ku tiyela miinelo ye taata mi lu ka zwelapili ku ba ni tabo ni kozo. Miinelo ye taata i swana sina mañungwa. Ha lu talimana ni miinelo ye cwalo, sepo ya luna i ba “ankora ya moyo, ya niti ni ye tiile” ibe kuli lu ba Bakreste ba ba tozizwe kamba lu ba lingu ze ñwi. (Maheb. 6:18, 19) Ha lu kumalela kwa sepo ya luna ha lu na ku “yauluka.” Sepo ya luna i ka lu tusa ku zwelapili ku ba ni tumelo ye tiile ni ku sa kakanya tumelo ya luna.—Mu bale Maheberu 2:1; 6:11.
2. Bakreste kacenu ba na ni sepo ifi ni ifi? Ki kabakalañi ba “lingu ze ñwi” ha ba isa pilu kwa sepo ye ba na ni yona ba ba tozizwe?
2 Bakreste ba ba pila mwa nako ye ya maungulelo ba na ni sepo ya ku pila kwahalimu kamba fa lifasi. Ba “mutapinyana” ba ba pila fa lifasi ba na ni sepo ya ku yo pila kwa lihalimu ku si na ku shwa. Ba ka ba malena ni baprisita hamoho ni Kreste mwa Mubuso wa hae. (Luka 12:32; Sin. 5:9, 10) Ba “lingu ze ñwi” ki ba bañata hahulu ku fita mutapinyana mi ba na ni sepo ya ku pila ku ya ku ile mwa paradaisi fa lifasi mwatasaa Mubuso wa Mesia. (Sin. 7:9, 10; Joa. 10:16) Ba lingu ze ñwi ha ba swaneli ku libala kuli puluso ya bona i itingile fa ku tusa “banyani” ba Kreste ba ba tozizwe ba ba sa li teñi fa lifasi. (Mat. 25:34-40) Ba ba tozizwe ba ka amuhela mupuzo wa bona, mi ku si na ku kakanya ba lingu ze ñwi ni bona ba ka amuhela wa bona. (Mu bale Maheberu 11:39, 40.) Ha lu kaleñi ka ku nyakisisa sepo ya ba ba tozizwe.
“SEPO YE PILA” YA BAKRESTE BA BA TOZIZWE
3, 4. Jehova u tahisa cwañi kuli Bakreste ba ba tozizwe ba ‘pepwe sinca kuli ba be ni sepo ye pila’? Sepo yeo ki ifi?
3 Muapositola Pitrosi naa ñolezi Bakreste ba ba tozizwe mañolo a mabeli. Naa bizize ba ba tozizwe kuli ki “ba ba ketilwe.” (1 Pit. 1:1) Mañolo a Pitrosi a lu tusa ku ituta ze ñata ka za sepo ye nde ye ba na ni yona ba mutapinyana. Mwa liñolo la hae la pili, Pitrosi naa ñozi kuli: “Ku lumbekwe Mulimu yena Ndatahe Mulenaa luna Jesu Kreste, kakuli ka muhau wa hae o mutuna u tahisize kuli lu pepwe sinca kuli lu be ni sepo ye pila ka zuho ya Jesu Kreste kwa bafu, kuli lu yole saanda se si sa boli, se si sa nyazahali, ni se si sa undi. Saanda seo si bulukezwi mina mwa mahalimu, mina ba ba silelelizwe ki maata a Mulimu kabakala tumelo kuli mu fumane puluso ye libelezi ku patululwa mwa nako ya mafelelezo. Ka lona libaka leo, mu tabile hahulu.”—1 Pit. 1:3-6.
4 Bakreste ba palo ye nyinyani, ili ba ba ketilwe ki Jehova ku yo busa ni Kreste mwa Mubuso wa kwa lihalimu ba ‘pepiwa sinca’ sina bana ba Mulimu ba ba tozizwe. Ba tozizwe ka moya o kenile kuli ba be malena ni baprisita hamoho ni Kreste. (Sin. 20:6) Pitrosi u bulela kuli ku ‘pepiwa sinca’ ku ba fa “sepo ye pila” ili ya bulela kuli ki “saanda se si sa boli, se si sa nyazahali, ni se si sa undi” se ba bulukezwi “mwa mahalimu.” Sepo ye nde yeo i tahisa kuli ba ba tozizwe ba tabe hahulu! Kono kuli ba amuhele mupuzo wa sepo yeo ba swanela ku zwelapili ku sepahala.
5, 6. Ki kabakalañi Bakreste ba ba tozizwe ha ba lukela ku zwelapili ku sepahala?
5 Mwa liñolo la hae la bubeli, Pitrosi naa susuelize Bakreste ba ba tozizwe kuli ‘ba eze ka mo ba konela kaufela kuli ba tiise ku biziwa ni ku ketiwa kwa bona.’ (2 Pit. 1:10) Ba lukela ku eza ka taata kuli ba be ni tulemeno twa Sikreste to tu cwale ka tumelo, busepahali ku Mulimu, lilato la mizwale, ni lilato la batu kaufela. Pitrosi naa bulezi kuli: “Haiba lika zeo li ba teñi ku mina mi ili ka buñata, li ka mi tusa ku sa ina feela mu sa beleki kamba ku palelwa ku beya miselo.”—Mu bale 2 Pitrosi 1:5-8.
6 Mwa lushango lwa hae kwa baana-bahulu ba ba tozizwe ka moya mwa puteho ya mwa miteñi ya baapositola ya Filadelfia ya mwa Asia Minor, Kreste ya zuhile kwa bafu naa bulezi kuli: “Kabakala kuli u mamezi linzwi la ku itiisa kwa ka, ni na, ni ka ku sileleza mwa hora ya tiko, ye ka tahela lifasi kaufela le li yahilwe ki batu, ili ku to lika ba ba pila mwa lifasi. Ni taha kapili. U zwelepili ku swala ka taata se u na ni sona, kuli mutu a si ke a ku amuha kuwani ya hao ya bulena.” (Sin. 3:10, 11) Mukreste ya tozizwe ha naa ka palelwa ku sepahala, naa si ke a amuhela “kuwani ye kanya ya bulena ye sa undi” ye sepisizwe ba ba ketilwe ba ba zwelapili ku sepahala ku isa lifu.—1 Pit. 5:4; Sin. 2:10.
KU KENA MWA MUBUSO
7. Ki sepo mañi ye nde ya naa bulezi Juda mwa liñolo la hae?
7 Ibato ba ka silimo sa 65 C.E., Juda munyanaa Jesu, naa ñolezi liñolo Bakreste ba ba tozizwe sina yena, ba naa bizize kuli “ba ba ketilwe.” (Juda 1; mu bapanye Maheberu 3:1.) Sapili, naa batile ku ba ñolela za sepo ya puluso ye ba na ni yona Bakreste ba ba tozizwe kaufela. (Juda 3) Nihaike kuli naa kalile ka ku ba ñolela litaba ze ñwi ze ne ba tokwa ku ziba ka putako, kwa mafelelezo a liñolo la hae le li kuswani, a ama kwa sepo ye nde ye ba na ni yona Bakreste ba ba tozizwe, a li: “Cwale ku yena ya kona ku mi sileleza kuli mu si ke mwa sitatala ni ku mi yemisa mu nze mu si na se si nyazahala fapilaa kanya ya hae ka tabo ye tuna, ku yena Mulimu a nosi, yena Mupilisi wa luna ka Jesu Kreste Mulenaa luna, ku be kanya, ni bulena, ni maata ni bubusi ku zwa kale ko, ku tisa mwa nako ya cwale, mane ni ku ya ku ile.”—Juda 24, 25.
8. Ku likana ni liñolo la Juda 24, ki nto mañi ye bonisa kuli ku banga ni tabo kwa lihalimu yo muñwi wa ba ba tozizwe ha zwelapili ku sepahala ku isa lifu?
8 Kaniti, Mukreste ni Mukreste ya tozizwe ya sepahala u bata kuli Mulimu a mu sileleze kuli a si ke a “sitatala,” kamba ku mu sileleza kwa nto ifi kamba ifi ye kona ku tahisa kuli a si ke a sepahala ni ku mu tahiseza sinyeho. Sepo ya Bakreste ba ba tozizwe ki ya kuli Jesu Kreste u ka ba zusa kwa bafu sina libupiwa za moya ze petehile. Mi seo si ka ba konisa ku taha fapilaa Mulimu. Ya tozizwe ha timela inze a sepahala, ha ku na kakanyo ya kuli u ka “zuswa [a] li mubili wa moya,” mubili wa hae u ka zuswa “u sa boli . . . , u na ni kanya.” (1 Makor. 15:42-44) Haiba, ‘tabo i ba ye tuna kwa lihalimu kabakala muezalibi a li muñwi ya baka,’ mu nahane feela tabo ye ba kwa lihalimu yo muñwi wa banyani ba Kreste ba ba tozizwe ha timela a nze a sepahala. (Luka 15:7) Jehova ni libupiwa za moya ze sepahala ba ka taba hamoho ni mutoziwa ya amuhela mupuzo wa hae ka “tabo ye tuna.”—Mu bale 1 Joani 3:2.
9. Ku kena kwa Bakreste ba ba tozizwe mwa Mubuso ki “mbuyoti ye tuna” kamukwaufi? Sepo ye, i ama cwañi batoziwa ba ba sa li fa lifasi?
9 Ka ku swana, Pitrosi naa ñolezi Bakreste ba ba tozizwe kuli haiba ba zwelapili ku sepahala ba “ka fiwa mbuyoti ye tuna ya ku kena mwa mubuso o sa feli wa Mulenaa luna ni Mupilisi Jesu Kreste.” (2 Pit. 1:10, 11) Pitrosi ha naa bulezi kuli ku kena kwa Bakreste ba ba tozizwe mwa Mubuso ki “mbuyoti ye tuna,” mwendi naa ama kwa taba ya kuli ba ka kena mwa Mubuso ka kanya ye tuna. Hape mwendi naa ama kwa limbuyoti ze ñata ze ba ka amuhela kwa lihalimu. Ba ba tozizwe ha ba ka hupula ka za busepahali bo ne ba bonisize, ba ka ba ni tabo ye tuna mi ba ka ba ni buitebuho bo butuna. Sepo ye i tiisa Bakreste ba ba tozizwe kuli ba zwelepili ku sepahala ha ba sa li fa lifasi.—1 Pit. 1:13.
“SEPO” YA BA LINGU ZE ÑWI
10, 11. (a) Ki sepo mañi ye ba na ni yona ba lingu ze ñwi? (b) Sepo ya ba lingu ze ñwi ya ku pila fa lifasi i itingile cwañi ku Kreste ni kwa “ku patululwa kwa bana ba Mulimu”?
10 Muapositola Paulusi naa ñolezi batoziwa bona “bana ba Mulimu” ka za sepo ya bona ye nde ya ku ba “bacalifa hamoho” ni Kreste. Kihona a bulela za sepo ye nde yeo Jehova a fa kwa batu ba palo ye sa konwi ku balwa ba lingu ze ñwi, a li: “Ze bupilwe [bona batu] li libelezi ka ku nyolelwa hahulu ku patululwa kwa bana ba Mulimu [batoziwa]. Kakuli ze bupilwe ne li beilwe mwa maata a bupilo bwa mbango, isi ka ku lata kwa zona, kono ka yena ya naa li beile mwa maata ao, ka sepo ya kuli ze bupilwe li ka lukululwa hape kwa butanga bwa ku bola ni ku fumana tukuluho ye makaza ya bana ba Mulimu.”—Maro. 8:14-21.
11 Jehova naa file batu “sepo” ha naa sepisize ku ba lukulula ku Satani Diabulosi ka ku itusisa “peu” ye ne sepisizwe. (Sin. 12:9; Gen. 3:15) Jesu Kreste ne li yena kalulo ye tuna ya “peu” yeo. (Magal. 3:16) Lifu la Jesu ni zuho ya hae li konisa batu ku ba ni sepo ya ku lukululwa kwa sibi ni lifu. Ku talelezwa kwa sepo yeo ku itingile fa “ku patululwa kwa bana ba Mulimu,” bona batoziwa. Batoziwa ba ba kanyisizwe ki bona kalulo ya bubeli ya “peu.” Ba ka “patululwa” ka nako ye ba ka tusa Kreste ku yundisa lifasi le li maswe la Satani. (Sin. 2:26, 27) Taba yeo i ka tahisa puluso ya ba lingu ze ñwi, bona ba ba zwa mwa ñalelwa ye tuna.—Sin. 7:9, 10, 14.
12. Ku patululwa kwa ba ba tozizwe ku ka tahiseza batu lituso mañi ze nde hahulu?
12 Puso ya Kreste ya lilimo ze sikiti i ka tahiseza batu kimululo ye tuna! Ka nako yeo, “bana ba Mulimu” ba ka patululwa ka nzila ye ñwi hape. Ba ka sebeza sina baprisita hamoho ni Kreste mi ba ka tusa batu kuli ba amuhele lituso ze ka tahiswa ki sitabelo sa Jesu. Mubuso wa Mulimu ha u ka busa lifasi, batu ba ba ipeya ku utwa ba ka ‘lukululwa kwa butanga bwa ku bola’ hanyinyani-hanyinyani. Ba ka lukululwa kwa lika ze tahiswa ki sibi ni lifu. Haiba ba zwelapili ku sepahala ku Jehova mwa Lilimo ze Sikiti ni ka nako ya tiko ya mafelelezo ye ka ba teñi hamulaho wa lilimo zeo, mabizo a bona a ka ñolwa ku ya ku ile mwa “muputo wa bupilo.” Ba ka ba ni “tukuluho ye makaza ya bana ba Mulimu.” (Sin. 20:7, 8, 11, 12) Yeo ki sepo ye nde luli!
LU ZWELEPILI KU NAHANA ZA SEPO YA LUNA
13. Sepo ya luna i tomile fañi? Kreste u ka patululwa lili?
13 Za naa ñozi Pitrosi mwa mañolo a hae a mabeli li tusa ba ba tozizwe ni ba lingu ze ñwi ku nahananga za sepo ye ba na ni yona. Naa talusize kuli sepo ya bona i tomile fa sishemo sa Jehova, isiñi fa misebezi ya bona. Naa ñozi kuli: “Mu iteekele ku sebeza ka taata mwa minahano ya mina, mu buluke minahano ya mina i nze i iketile; mu sepe sishemo sa Mulimu se mu ka boniswa ka nako ya ku bonahala kwa Jesu Kreste.” (1 Pit. 1:13) Kreste u ka patululwa ha ka taha ku to fa mupuzo balateleli ba hae ba ba sepahala ni ku to yundisa ba ba maswe.—Mu bale 2 Matesalonika 1:6-10.
14, 15. (a) Ki lika mañi ze lu lukela ku eza kuli lu nahanange za sepo ya luna? (b) Ki lika mañi za naa bulezi Pitrosi ze lu swanela ku eza?
14 Kuli lu zwelepili ku nahananga za sepo ya luna, lu swanela ku hupulanga kamita kuli “lizazi la Jehova” li tuha li taha. Mi taba yeo i swanela ku ama bupilo bwa luna kaufela. Jehova u ka sinya milonga ya batu ya cwale, ona “mahalimu,” ni batu ba ba maswe, lona “lifasi” ni “lika” za lona. Pitrosi naa ñozi kuli: “Mu itekule kuli mu lukela ku ba batu ba ba cwañi . . . , ha mu nze mu libelela ni ku hupula ku ba teñi kwa lizazi la Jehova, leo ku lona mahalimu a ka sinyiwa mwa malimi a mulilo, mi lika li ka shengunuka kabakala ku cisa ko kutuna!”—2 Pit. 3:10-12.
15 “Mahalimu” a cwale ni “lifasi” la cwale li ka yoliwa ki “mahalimu a manca [Mubuso wa Kreste] ni lifasi le linca [batu ba ba lukile].” (2 Pit. 3:13) Pitrosi naa lu bulelezi hande se lu swanela ku eza kuli lu ‘libelele’ za sepo ya luna ya mahalimu a manca ni lifasi le li nca, kamba ku zwelapili ku nahananga ka za sepo yeo. Naa bulezi kuli: “Hakulicwalo balatiwa, ha u bona mu libelezi lika zeo, mu eze mo mu konela kaufela kuli mu fumanwe ki yena mu si na koli ni se si nyazahala mi inze mu li mwa kozo.”—2 Pit. 3:14.
LU PILE KA KU LIKANA NI SEPO YA LUNA
16, 17. (a) Ki “likezo ze kenile za muzamao” ni “likezo za busepahali ku Mulimu,” ze cwañi ze lu swanela ku bonisa? (b) Sepo ya luna i ka talelezwa kamukwaufi?
16 Ha lu swaneli feela ku nahananga za sepo ya luna kono hape lu lukela ku pila ka ku lumelelana ni sepo yeo. Lu swanela ku bona teñi kuli lu batu ba bande mwa meto a Jehova. Ku ba ni “likezo ze kenile za muzamao” ku kopanyeleza ku zwelapili “ku ba ni muzamao o munde mwahalaa macaba,” ka ku eza ze lukile mwa meto a Mulimu. (2 Pitrosi 3:11; 1 Pit. 2:12) Lu lukela ku ‘latana mwahalaa luna.’ Ku eza cwalo, ku kopanyeleza ku bukeleza buñwi bwa mwa kopano ya mizwale ba luna kaufela ni bwa puteho ya luna ka mo lu konela kaufela. (Joa. 13:35) Pitrosi hape naa bulezi ka za “likezo za busepahali ku Mulimu,” ili zona lika ze lu eza kuli silikani sa luna ni Jehova si zwelepili ku tiya. Lika zeo li ama litapelo za luna, ku bala Bibele ka zazi, tuto ya Bibele ye tungile, nako ya ku lapela sina lubasi, ni ku abana kamita mwa musebezi wa ku kutaza ‘taba ye nde ya Mubuso.’—Mat. 24:14.
17 Mañi ni mañi wa luna u bata ku ba mutu ya lumelelwa ki Jehova ni ya ka pilisa muta a sinya lifasi le li maswe le. Haiba lu ba batu ba ba cwalo, lu ka bona sepo ya luna ha i ka talelezwa, yona “sepo ya bupilo bo bu sa feli, ili bo Mulimu, ya sa koni ku puma, naa sepisize kale-kale ko.”—Tite 1:2.
[Lipuzo za Tuto]
[Siswaniso se si fa likepe 22]
Bakreste ba ba tozizwe ba ‘pepwa sinca kuli ba be ni sepo ye pila’
[Siswaniso se si fa likepe 24]
Mu tuse lubasi lwa mina ku zwelapili ku nahananga za sepo ye ba na ni yona
