Tusepelelei mu Kukulupila Kwetu
Tusepelelei mu Kukulupila Kwetu
“[Kudi] kukulapila kwa būmi bwa nyeke, bwālaile Leza, aye kayūkile kubepa, kala ne kalā, ne myaka ya ngalwilo mīne keyafikile.”—TET. 1:2.
TUPITULUKEI’MO
Le tubayuka namani amba mūlu mwikalanga nsangaji kitatyi kilama mushingwe māni bululame mu būmi bwandi?
Lelo kufikidila kwa lukulupilo lwa mikōko mikwabo kukwatañene namani na kufikidila kwa lukulupilo lwa bashingwe māni?
Pa kusaka tumone kufikidila kwa lukulupilo lwetu, lelo tufwaninwe kumwekeja bilongwa’ka ‘bya bu-bakola’ ne bya ‘bwine Leza’?
1. Le kukulupila kwitupēle Yehova kuketukwasha tūminine muswelo’ka?
MUTUMIBWA Polo wānene amba Yehova i “Leza wa kukulupila.” Kadi ubweja’ko amba Yehova ubwanya ‘kwituyuja ne tusepo tonso ne ndoe, monka mu kwitabija’mba, tutabuke mu kukulupila umbukomo bwa Mushipiditu Sandu.’ (Loma 15:13) Shi tuvudilwe mu kukulupila kwetu tukabwanya kūminina ngikadilo yo-yonso ibwanya kwitutana, koku mityima yetu miyule nsangaji ne ndoe. Ku Bene Kidishitu bashingwe māni, luno lukulupilo lukekala bu “kikwatyijo kya ku mutyima, ne binebine, ne bukankamane ponka” kya Bene Kidishitu bakwabo. (Bah. 6:18, 19) Lukulupilo lwetu i kintu kyotufwaninwe kulamata’ko mu kitatyi kya bimpumpu bya mu būmi, kintu kiketukwasha tuleke kuponena mu kutatana ne kubulwa lwitabijo.—Tanga Bahebelu 2:1; 6:11.
2. I nkulupilo’ka ibidi idi na Bene Kidishitu dyalelo, ne mwanda waka “mikōko mikwabo” itele mutyima mu lukulupilo ludi na bashingwe māni?
2 Bene Kidishitu ba mu ano mafuku a mfulo batele mutyima mu lukulupilo lumo pa ino ibidi. Basheleshele’ko ba mu “kaluombe katyetye” ka Bene Kidishitu bashingwe māni badi na lukulupilo lwa būmi bwampikwa kufwa momwa mūlu, mobakekala na Kidishitu bu balopwe ne bapidishitu mu Bulopwe bwandi. (Luka 12:32; Kus. 5:9, 10) “Kibumbo kikatampe kīne” kekibadika kya “mikōko mikwabo” kidi na lukulupilo lwa kwikala nyeke mu paladisa pano pa ntanda bu babikalwa ba Bulopwe bwa Meshiasa. (Kus. 7:9, 10; Yoa. 10:16) Mikōko mikwabo keifwaninwepo kwilwa amba lupandilo lwabo lwimanine pa kukwatakanya na kininga ‘banababo’ na Kidishitu bashingwe māni bakidi pano pa ntanda. (Mat. 25:34-40) Bashingwe māni bakatambula mpalo yabo, ino lukulupilo lwa mikōko mikwabo nalo lukafikidila. (Tanga Bahebelu 11:39, 40.) Dibajinji, tubandaulei bidi lukulupilo ludi na bashingwe māni.
“KUKULUPILA KWA BŪMI” KWA BENE KIDISHITU BASHINGWE MĀNI
3, 4. Le Bene Kidishitu bashingwe māni ‘babutulwanga kupya na kukulupila kwa būmi’ namani, ne luno lukulupilo i lukulupilo’ka?
3 Mutumibwa Petelo wāsonekēle Bene Kidishitu bashingwe māni mikanda ibidi, mwāebatelele bu “batongibwe.” (1 Pet. 1:1) Wālombwele myanda palapala itala lukulupilo lwa kutendelwa lupelwe kabumbo katyetye. Mu mukanda wandi umbajinji Petelo wāsonekele amba: “Ino Leza Shandya Mfumwetu Yesu Kidishitu ēkale mutōkwe aye, ponka pa lusa lwandi lukatampe, wetubutwile kupya ku kukulupila kwa būmi pa kusanguka kwa Yesu Kidishitu mu lufu, ku bupyane bwa kubulwa kubola, nansha kujilulwa, nansha kujimina kwine mpika, bwimubīkilwe mūlu, bānwe balamininwe bukalama ku bukomo bwa Leza pa kwitabija ku lupandilo lulongolwele kala kusokolwa kuno kumfulo kwa mwaka. Monka mo musepelela nakampata.”—1 Pet. 1:3-6.
4 Yehova i mutonge Bene Kidishitu batyetye kete bakukabikala na Kidishitu mu umbikalo wa Bulopwe bwa mūlu ‘bakabutulwa kupya’ bu bana ba ku mushipiditu ba Leza. I bashingwe māni a mushipiditu mwanda wa kwikala bu balopwe ne bapidishitu pamo na Kidishitu. (Kus. 20:6) Petelo unena amba bano ‘bakubutulwa kupya’ ibapebwe “kukulupila kwa būmi” bwine bwatela bu “bupyane bwa kubulwa kubola, nansha kujilulwa, nansha kujimina kwine mpika, [bwibabikilwe] mūlu.” Ke kya kutulumukapo shi bashingwe māni ‘basepelela nakampata’ mu kukulupila kwabo kwa būmi! Inoko, kufikidila kwa luno lukulupilo kwimanine pa kikōkeji kyabo.
5, 6. Mwanda waka Bene Kidishitu bashingwe māni bafwaninwe kulonga bukomo pa kutambula lwito lwabo lwa mūlu?
5 Mu mukanda wandi wa bubidi, Petelo wēsāshile’mo Bene Kidishitu bashingwe māni ‘batabuke’mo kupyasakana nakampata kuningija lwito lwabo, ne kutongibwa kwabo.’ (2 Pet. 1:10) Bafwaninwe kulonga bukomo bwa kutamija ino ngikadilo ya bwine Kidishitu pamo bwa lwitabijo, kwipāna kwa bwine Leza, kisanso kya bu bana na bana, ne buswe. Petelo wānene amba: “Bino namino shi i byenu, bivule ne kuvula; nankyo bikemulonga, ino bānwe mulele mpika, nansha bakubulwa bipa.”—Tanga 2 Petelo 1:5-8.
6 Mu musapu wandi waātumine bakulumpe babutulwe ku mushipiditu ba mu kipwilo kya mu myaka katwa kabajinji kya Filadefia, mu Azia Minele, Kidishitu musanguke wānene amba: “Ke-wi-muntu abe walamine mwanda wa kutūkija mutyima wami, ino ami nami nkakulama ku mwaka wa kutompibwa, owa usa kukāya ku bantu bonso ba panopantanda, kwibatompa bekele panopanshi. Ino yao ngiya bukidibukidi; uminina ku kino kyōdi nakyo, mwanda wa kunena’mba, umo wakakutekwina kilukwa kyobe.” (Kus. 3:10, 11) Shi mwine Kidishitu mushingwe māni wabulwe lukulupilo, kakatambulapo “kilukwa kya būmi” kilailwe batongwe balamine kikōkeji kufika ne ku lufu.—1 Pet. 5:4; Kus. 2:10.
KUTWELA MU BULOPWE
7. Le i lukulupilo’ka lwa kutendelwa lwisambile’po Yude mu mukanda wandi?
7 Mu mwaka wa 65 K.K., Yuda mwanabo na Yesu wa munda mwa inandi wāsonekēle banababo Bene Kidishitu bashingwe māni mukanda, wāebatelele’mo bu “bētyilwe.” (Yude 1; dingakanya na Bahebelu 3:1.) Wādi usaka kwibasonekela mukanda wimanine pa lukulupilo lwa kutendelwa lwa lupandilo ludi na Bene Kidishitu “bonso” betyilwe mu Bulopwe bwa Leza bwa mūlu. (Yude 3) Nansha byaādi na myanda mikwabo ya kampeja-bukidi ya kunena, ku mfulo kwa mukanda wandi mwīpi wēsambīle pa lukulupilo lwa kutendelwa ludi na Bene Kidishitu bashingwe māni na kusoneka amba: “Ino pano kudi aye uyūkile kwimulama’mba, bakakukala, ne kwiumbīka mu kifuko kya ntumbo yandi kwampikwa bulema, mu tusepo tukatakata twine. Kudi Leza umo enka kasuku kandi, Umpandiji wetu, padi Yesu Kidishitu Mfumwetu, kwikale ntumbo, ne bukatampe, ne bulopwe, ne lupusa, ku myaka ya diko’ya, ne ya pano mīne, ne ku ya nyeke na nyeke īdi kumeso. Amena.”—Yude 24, 25.
8. Kukwatañana na Yude 24, i bika bilombola amba kusepelela kudi mūlu kitatyi kilombola mushingwe māni bululame bwandi?
8 Na bubine, Bene Kidishitu bashingwe māni ba kikōkeji basakanga kulamwa ku kintu kyo-kyonso kibwanya kukebafikija ku bonakani. Lukulupilo lwabo lwimanine pa Bible i lwa amba, Yesu Kidishitu ukebasangula mu lufu ne kwibakwasha bafikile pa bubwaninine bwa ku mushipiditu kumeso a Leza bekele na nsangaji mikatampe. Shi mushingwe māni umo wafu na kikōkeji, udi na kyepelo kya binebine kya ‘kusangulwa ke ngitu ya bu mushipiditu,’ ke kusangulwa “ke kyampikwa kubola . . . , kya ntumbo” kadi. (1 Kod. 15:42-44) Shi ‘kusepelela kwikalanga mūlu pa umo kipya-mambo wa kwalamuka pa mutyima,’ fwatakanya’po nsangaji ikalanga mu bipango bya mūlu shi umo wa mu banababo na Kidishitu mubutulwe ku mushipiditu wavuya lwendo lwandi na bululame. (Luka 15:7) Yehova ne bipangwa bya ku mushipiditu bya kikōkeji bakasangala pamo na mushingwe mani ukatambula mpalo yandi ne “tusepo tukatakata twine.”—Tanga 1 Yoano 3:2.
9. I muswelo’ka ukapebwa bashingwe māni ba kikōkeji “bungibungi” bwa kitwelelo kya mu Bulopwe, ne luno lukulupilo lutala namani bashingwe māni bakidi’ko pano pa ntanda?
9 Mu muswelo umo onka, Petelo wāsonekēle Bene Kidishitu bashingwe māni amba shi batambule lwito lwabo na kikōkeji, ‘kukebapebwanga bungibungi kitwelelo kya monka mu bulopwe bwa nyeke bwa Mfumwetu, Umpandiji Yesu Kidishitu.’ (2 Pet. 1:10, 11) Bakekala na “bungibungi” bwa kitwelelo kya mūlu, mu buluji bwa amba bakatwela mu ntumbo mikatampe ya momwa mūlu. Buno “bungibungi” bukokeja ne kuleta mulangwe wa dyese dya ludingo lwa peulu dikekala na bano bantu baputumina mu lubilo lwa mu būmi. Bakokeja kutala kobatamba mu būmi bwabo bwa kikōkeji koku mityima miyule kusepelela ne kufwija’ko. Ne kutatana kwine mpika, kino kyepelo kipanga Bene Kidishitu bashingwe māni bakidi’ko pano pa ntanda bukomo bwa ‘kulangula ñeni mwa kwendelela na mwingilo.’—1 Pet. 1:13.
“KUKULUPILA” KWA MIKŌKO MIKWABO
10, 11. (a) Lelo i lukulupilo’ka ludi na mikōko mikwabo? (b) Le kufikidila kwa lukulupilo lwa pano pa ntanda kukwatañane namani na Kidishitu ne kusokolwa kwa “bana ba Leza”?
10 Mutumibwa Polo wāsonekele pangala pa lukulupilo lwa ntumbo lwa “bana ba Leza” babutulwe ku mushipiditu amba i “bampyana” ba Kidishitu. Ebiya watela lukulupilo lwa kutendelwa lupele Yehova mikōko mikwabo keibadika amba: “Bipangwa nabyo bitengele, bitala meso so-o, kukasokokelwa kwa bāna ba Leza [bashingwe māni]. Ke-bintu bipangwa nabyo byanekenībwe ku bukobakane, ke kiswa-mutyima wabyopo, mhm, nanshi i pa mwanda wa enka aye wanekenye’byo, mu kukulupila’mba, bipangwa abyo bīne bikakūlwanga ku bupika bwa kubola, nabyo ke byana bya bene bya ntumbo bwa bāna ba Leza.”—Loma 8:14-21.
11 “Kukulupila” kwa muzo wa muntu kwāletelwe na Yehova kitatyi kyaālaile kwibanyongolola kudi “nyoka wa kala na kalā” Satana Dyabola, kupityila ku “lukunwa” lwālailwe. (Kus. 12:9; Ngal. 3:15) Yesu Kidishitu ye wādi kipindi kibajinji kya luno “lukunwa.” (Ngat. 3:16) Kupityila ku lufu ne ku kusangulwa kwandi, Yesu waādile kyalwilo kikomo kya lukulupilo lwa muzo wa muntu lwa kunyongololwa mu bupika bwa bubi ne lufu. Kufikidila kwa luno lukulupilo i kukwatañane na ‘kusokolwa kwa bana ba Leza.’ Bashingwe māni batumbijibwe ntumbo i kipindi kya bubidi kya “lukunwa.” ‘Bakasokolwa’ kitatyi kyobakonakanya pamo na Kidishitu ngikadilo imbi ya bintu ya Satana. (Kus. 2:26, 27) Kino kikaletela mikōko mikwabo lupandilo, mine ikapanda ku malwa makatakata.—Kus. 7:9, 10, 14.
12. Lelo bantu bakamona byabuyabuya’ka bya ntumbo pa kusokolwa kwa bashingwe māni?
12 Bine buno i busengi bukasengibwa “bipangwa” bya bantu mu bula bwa Myaka Kanunu ya Umbikalo wa Kidishitu! Mu kino kitatyi, “bana ba Leza” batumbijibwe ntumbo ‘bakasokolwa’ kitatyi kyobakengila bu bapidishitu pamo na Kidishitu, bapa bantu byabuyabuya bya kitapwa kya kikūlwa kya Yesu. Pamo bwa babikalwa ba Bulopwe bwa mūlu, “bipangwa” bya bantu bikashilula kwimwena bunyongolodi bobakanyongololwa ku bubi ne lufu. Bityebitye bantu ba kikōkeji bakakūlwa “ku bupika bwa kubola.” Shi bashale nyeke bakōkele kudi Yehova kufika ne mu Myaka Kanunu enka ne mu kitatyi kya kutompibwa kwa mfulo kukaya’ko ku mfulo kwa Myaka Kanunu, nabya majina abo akalembwa lonso mu “mukanda . . . wa būmi.” Bakekala “ke byana bya bene bya ntumbo bwa bāna ba Leza.” (Kus. 20:7, 8, 11, 12) Bine luno shalo i lukulupilo lwa ntumbo!
TULAMEI LUKULUPILO LWETU LŪMI
13. Lelo lukulupilo lwetu lwimanine pa bika, ne i kitatyi’ka kikasokolwa Kidishitu?
13 Mu mikanda ibidi ya Petelo ya ku bukomo bwa mushipiditu, mudi myanda mivule ya kukwasha bashingwe māni ne mikōko mikwabo, balame lukulupilo lūmi lobadi nalo. Wālombwele patōka amba lukulupilo lwabo kelwimaninepo pa mingilo yabo, ino i pa buntu bwa Yehova. Wāsonekele amba: “Mutūkijei ne kukulupidila biyampe, senene shē, buntu bwakukemuletelwa pa kukasokolwa kwa Yesu Kidishitu.” (1 Pet. 1:13) Kidishitu ukasokolwa kitatyi kyakāya kupala balondi bandi mpalo ne kuleta butyibi bwa Yehova pa bantu bakulwa bwine Leza.—Tanga 2 Tesalonika 1:6-10.
14, 15. (a) Pa kusaka tulame lukulupilo lwetu lūmi tufwaninwe kuta mutyima wetu ku bika? (b) Lelo Petelo wāletele madingi’ka?
14 Pa kulama lukulupilo lwetu lūmi, tufwaninwe kuta mutyima ne kwimika būmi bwetu pa kwiya kwa “difuku dya [Yehova].” Dino difuku dikonakanya “madiulu” adi’ko dyalelo, nansha buludiki bwa bantu, ne “ntanda,” kisaka bya bantu babi ne “byamūlu” byayo. Petelo wāsonekele amba: “Lelo kitufwaninwa kwikala muswelo wa bu-bantu ka? . . . , bakutengela ne kusakidila byamalwa kwiya kwa difuku dya Leza, i monka mukasungulukila madiulu pa kutema’o mudilo, ne byamūlu bīne bikasunguluka ku kyanga kikatampe.”—2 Pet. 3:10-12.
15 “Madiulu” ne “ntanda” bidi’ko dyalelo bikapingakanibwa na “madiulu mapya [umbikalo wa Bulopwe bwa Kidishitu] ne na ntanda impya [kisaka kipya kya bantu ba pano pa ntanda].” (2 Pet. 3:13) Kupwa Petelo wāleta madingi mapotoloke emanine pa bubinebine butala ‘kutengela’ kwetu, nansha kulama lukulupilo lwetu lūmi lutala mulao wa ntanda impya amba: “Penepo kadi, bānwe baswedibwe, byo mutengele bine bino’bi, taimo mityima’mba mukatānwe mu talala, nyā, bakubulwa kiko, nansha kakoba kēne kakutopeka mu meso andi.”—2 Pet. 3:14.
TUNANGEI MUNGYA KUKULUPILA KWETU
16, 17. (a) Lelo ‘bilongwa bya bu-bakola’ ne ‘bilongwa bya bwine Leza’ byotufwaninwe kumwekeja, i bilongwa’ka? (b) Le lukulupilo lwetu lukafikidila muswelo’ka?
16 Ketufwaninwepo enka kulama lukulupilo lwetu lūmi ino tufwaninwe ne kwiendeja mungya kukulupila kwetu. Tufwaninwe kuta mutyima ku muswelo otwikele ku mushipiditu. Mu ‘bilongwa bya bu-bakola’ mubadilwa ne ‘kulama mwikadilo wetu wikale wakufwaninwa umbukata mwa Bajentaila,’ na kulonga byoloke. (2 Pet. 3:11; 1 Pet. 2:12) Tufwaninwe ‘kwisanswa batwe bene na bene.’ Mu kwisanswa mubadilwa kulonga bukomo bwetu bonso bwa kulama bumo bwa bubana na bana bwa ntanda yonso nansha ke mubukata mwa boba badi mu kyetu kipwilo. (Yoa. 13:35) ‘Bilongwa bya bwine Leza’ i bilongwa bilombola kipwano kya mpwaninine kyotupwene na Yehova. Mu bino bilongwa mubadilwa ne; milombelo yetu, butangi bwetu bwa Bible bwa difuku ne difuku, kwifunda kwa pa kasuku kwa mushike, butōtyi bwa kisaka, ne kusapula na kininga “myanda-miyampe ya . . . bulopwe.”—Mat. 24:14.
17 Batwe bonso tusakanga kwikala bu bantu betabijibwe na Yehova ne bakapandija kitatyi ‘kikasunguluka’ ngikadilo imbi ya dyalelo. Tukemwena kufikidila kwa lukulupilo lwetu, ke “kukulapila kwa būmi bwa nyeke, bwālaile Leza, aye kayūkile kubepa, kala ne kalā, ne myaka ya ngalwilo mīne keyafikile” kadi.—Tet. 1:2.
[Bipangujo bya Kifundwa]
[Kifwatulo pa paje 22]
Bene Kidishitu bashingwe māni ‘babutulwanga kupya na kukulupila kwa būmi’
[Kifwatulo pa paje 24]
Lama lukulupilo lūmi mu kisaka kyobe
