Tusanke mu ditekemena dietu
Tusanke mu ditekemena dietu
‘Kudi ditekemena dia muoyo wa tshiendelele, udi Nzambi, udi kayi mua kudinga, mulaye diambedi bikondo bia tshiendelele kabiyi bianji kuikalaku.’—TITO 1:2.
NKONKO YA DIAMBULULA
Tshidi tshienza bu tuikale bajadike ne: kudi disanka mu diulu padi muela manyi ushala ne muoyo mutoke too ne ku lufu, ntshinyi?
Dikumbana dia ditekemena dia mikoko mikuabu didi dipetangana ne dia bela manyi mushindu kayi?
Bua ditekemena dietu kukumbanadi, “bienzedi bia tshijila” ne “bienzedi bia tshijila bia Nzambi” bitudi ne bua kuleja mbienzedi kayi?
1. Leja mudi ditekemena didi Yehowa mutupeshe mua kutuambuluisha bua kutantamena ntatu.
MUPOSTOLO PAULO wakamba ne: Yehowa ‘Nzambi wa ditekemena atuwuje tente ne disanka ne ditalala dia mu ditabuja dietu, bua tuetu tukumbane mu ditekemena mu bukole bua nyuma muimpe.’ (Lomo 15:13) Ditekemena dietu diodi dikole didi mua kutuambuluisha bua kutantamena bualu buonso budi mua kutufikila ne mitshima miule ne disanka ne ditalala. Anu bu mudibi bua bena Kristo bela manyi, ditekemena edi nedikale ‘bu luongo lua muoyo, didi dikuata bikole’ bua bena Kristo bakuabu. (Eb. 6:18, 19) Ditekemena dietu didi mua kutuambuluisha mu nsombelu mikole ne didi kabidi mua kutuambuluisha bua kubenga kuikala ne dielakana anyi kupanga ditabuja.—Bala Ebelu 2:1; 6:11.
2. a) Tela mishindu ya ditekemena ibidi idi nayi bena Kristo lelu. b) Leja bua tshinyi ‘mikoko mikuabu’ idi ne bua kusanka bua ditekemena dia bela manyi.
2 Bena Kristo badi ne muoyo mu matuku a ku nshikidilu aa mbatume lungenyi luabu ku ditekemena dimue dia ku abidi adiku. Bashadile ba mu ‘kasumbu kakese’ ka bena Kristo bela manyi badi ne ditekemena dia kupeta muoyo udi kauyi ufua mu diulu bu bakalenge ne bakuidi ne Kristo mu Bukalenge buende. (Luka 12:32; Buak. 5:9, 10) Kadi bantu ba bungi ba mu ‘musumba munene’ wa ‘mikoko mikuabu’ badi ne ditekemena dia kupeta muoyo wa kashidi pa buloba bukudimuna mparadizu ku bulombodi bua Bukalenge bua Masiya. (Buak. 7:9, 10; Yone 10:16) Mikoko mikuabu kayena ne bua kupua muoyo ne: bua buobu kupeta lupandu badi ne bua kukuatshisha ne muoyo mujima ‘bana babu ne Kristo’ batshidi pa buloba. (Mat. 25:34-40) Bela manyi nebapete difutu diabu, ne ditekemena dia mikoko mikuabu nedikumbane bushuwa. (Bala Ebelu 11:39, 40.) Tuanji tuakulayi bua ditekemena dia bela manyi.
“DITEKEMENA DIDI NE MUOYO” DIA BENA KRISTO BELA MANYI
3, 4. Bela manyi badi ‘baledibua tshiakabidi bua ditekemena didi ne muoyo’ mushindu kayi? Nditekemena kayi adi?
3 Mupostolo Petelo wakafundila bena Kristo bela manyi bavuaye mubikile ne: “bantu basungudibue” mikanda ibidi. (1 Pet. 1:1) Wakumvuija bimpe ditekemena dia mushinga dia kasumbu kakese. Petelo wakafunda mu mukanda wende wa kumpala ne: ‘Batumbishe Nzambi udi kabidi Tatu wa Mukalenge wetu Yezu Kristo, nyeye wakatulela tshiakabidi bu mudi luse luende lunene, bua kutupaye ditekemena didi ne muoyo bua dibika dia Yezu Kristo dia ku bafue; bua tuikale ne bumpianyi budi kabuyi bubola, budi kabuyi bunyanguka, budi kabuyi bufubidila, buakutekibua mu diulu bua bualu buenu, nuenu mbadi balamibue ku bukole bua Nzambi bua ditabuja too ne ku lupandu lulongolola luabuluibua mu tshikondo tshia ku nshikidilu. Bua muanda eu nudi nutamba kusanka.’—1 Pet. 1:3-6.
4 Bena Kristo bakese badi Yehowa musungule bua kuenza mudimu ne Yezu mu Bukalenge bua mu diulu badi ne bua ‘kuledibua tshiakabidi’ bu bana ba Nzambi baledibue ku nyuma. Mbabele manyi a nyuma muimpe bua kuluabu bakalenge ne bakuidi pamue ne Kristo. (Buak. 20:6) Petelo udi wamba ne: ‘diledibua dia tshiakabidi’ edi didi dibapetesha “ditekemena didi ne muoyo” didiye ubikila ne: ‘bumpianyi budi kabuyi bubola, budi kabuyi bunyanguka, budi kabuyi bufubidila’ budibu babalamine “mu diulu.” Kabiena bikemesha bua mudi bela manyi ‘batamba kusanka’ bua ditekemena diabu didi ne muoyo. Kadi dikumbana dia ditekemena edi didi dilondeshila mudibu bashala ne lulamatu.
5, 6. Bua tshinyi bela manyi badi ne bua kudienzeja bikole bua dibikidibua diabu dia mu diulu dikumbane?
5 Mu mukanda wende muibidi, Petelo wakasengelela bela manyi bua ‘batambe kunanukila bua kujadika dibikidibua diabu ne disungudibua diabu.’ (2 Pet. 1:10) Badi ne bua kudienzeja bua kuikala ne ngikadilu ya buena Kristo bu mudi ditabuja, lulamatu, dinanga dia Nzambi ne dia bena Kristo nabu. Petelo wakamba ne: ‘Bikala malu aa ngenu ne biavulanganawu, adi anuvuija kanuyi batuke ne kanuyi nupanga mamuma.’—Bala 2 Petelo 1:5-8.
6 Pakabika Yezu ku lufu, wakambila bakulu bela manyi ba mu tshisumbu tshia Filadelefia ba mu bidimu lukama bia kumpala ba mu Asia mukese ne: ‘Bualu bua wakalama dîyi dia kutantamana kuanyi, nenkulame kabidi ku dîba dia kuteta, diodi didi diamba kulua kudi ba pa buloba buonso, bua kuteta badi bikale pa buloba. Ndualua lubilu, ukuate bikole tshiudi natshi, bua muntu kanyengi tshifulu tshiebe tshia butumbi.’ (Buak. 3:10, 11) Muela manyi yeye mujimije lulamatu luende kudi Nzambi kakupeta ‘tshifulu tshia butumbi tshidi katshiyi tshifubidila’ tshivuabu balaye bela manyi bavua ne bua kushala ne lulamatu too ne ku lufu to.—1 Pet. 5:4; Buak. 2:10.
DIBUELA MU BUKALENGE
7. Yuda wakakula bua ditekemena kayi dimpe mu mukanda uvuaye mufunde?
7 Bu mu tshidimu tshia 65, Yuda muanabu ne Yezu wakabikila bana babu bela manyi mu mukanda uvuaye mubafundile ne: “bantu badi babikidibue.” (Yuda 1; fuanyikija ne Ebelu 3:1.) Uvua musue kubafundila bua ditekemena dia butumbi dia lupandu didi bena Kristo bela manyi ‘nadi.’ (Yuda 3) Nansha muvuaye ne malu makuabu a mushinga a kubambila, mu mêyi a ndekelu a mukanda wende wakakula bua ditekemena dimpe didi nadi bena Kristo bela manyi, wamba ne: ‘Katataka kudi yeye udi mumanye mua kunulama bua nuenu kanulenduki, ne udi mua kunuteka kumpala kua butumbi buende ne disanka ditambe bunene, kanuyi ne tshilema; kudi Nzambi umuepele, Musungidi wetu, bua Yezu Kristo Mukalenge wetu, kuikale butumbi ne bunême ne bukokeshi ne bukole, kumpala kua bikondo ne katataka ne tshiendelele.’—Yuda 24, 25.
8. Bilondeshile Yuda 24, tshidi tshileja ne: kudi disanka mu diulu padi umue wa ku bela manyi ushala ne muoyo mutoke ntshinyi?
8 Kakuyi mpata, bena Kristo bela manyi ba lulamatu badi ne bua kudimukila bantu babi bua kababanyangi. Badi ne ditekemena dia mu Bible dia ne: Yezu Kristo neababishe ku lufu ne neabafikishe ku dikala bapuangane mu nyuma kumpala kua Nzambi ne disanka dia bungi. Padi muela manyi ushala ne lulamatu too ne ku lufu, udi upeta ditekemena dia ‘kubishibua ne mubidi wa nyuma udi kawuyi ubola mu butumbi.’ (1 Kol. 15:42-44) Bikalaku ne: kudi ‘disanka dia bungi mu diulu bua muntu umue mubi padiye ukudimuna mutshima wende,’ kadi elabi meji bua disanka didi mua kuikalamu padi muela manyi ushikija lubilu luende pa buloba ne muoyo mutoke. (Luka 15:7) Yehowa ne banjelu ba lulamatu nebasanke pamue ne bela manyi bikala mua kupeta difutu diabu ne ‘disanka.’—Bala 1 Yone 3:2.
9. a) Mmunyi mudi dibuela dia mu Bukalenge ‘ditamba kukumbajibua’ kudi bela manyi badi balamate Nzambi? b) Ditekemena edi didi diambuluisha kabidi bela manyi batshidi pa buloba munyi?
9 Bia muomumue, Petelo wakafundila bena Kristo bela manyi ne: bobu bangate dibikidibua diabu ne mushinga pa kushala ne lulamatu, ‘nebatambe kubakumbajila pa kubuelela mu Bukalenge bua tshiendelele bua Mukalenge wetu, udi kabidi Musungidi Yezu Kristo.’ (2 Pet. 1:10, 11) Diakalenga diabu dia kuya mu diulu ‘neditambe kukumbajibua,’ ngikadilu yabu ya buena Kristo idi ileja disanka didibu nadi. Tshiambilu tshia ne: ‘ditamba kukumbajibua’ tshidi kabidi mua kumvuija ne: aba bikala ne bua kushala ne lulamatu mu nsombelu wabu nebapete dibenesha dinene. Padibu bela meji bua muvuabu bashale balamate Nzambi pavuabu ne muoyo pa buloba, badi bumvua disanka dia bungi. Kakuyi mpata, dibenesha edi didi dipesha bena Kristo bela manyi batshidi pa buloba bukole bua ‘kutungunuka ne kuteka meji abu ku mudimu.’—1 Pet. 1:13, MMM.
TSHISHIMIKIDI TSHIA “DITEKEMENA” BUA MIKOKO MIKUABU
10, 11. a) Mikoko mikuabu idi ne ditekemena kayi? b) Mmunyi mudi dikumbana dia ditekemena dia muoyo wa kashidi pa buloba ditangila Kristo ne “dimueneshibua dia bana ba Nzambi”?
10 Mupostolo Paulo wakafunda bua ditekemena dia butumbi dia “bana ba Nzambi” balela ku nyuma bu ‘bapianyi’ diatshimue ne Kristo. Wakakula kabidi bua ditekemena dimpe didi Yehowa mulongoluele musumba munene wa mikoko mikuabu wamba ne: ‘Bualu bua ditekemena dikole dia bifukibua didi dindila dimueneshibua dia bana ba Nzambi. Bualu bua bifukibua biakatekibua kunyima kua malu a patupu, ki mbualu bua kudisunguila kuabi, kadi bua Nzambi wakabiteka nunku mu ditekemena edi ne bifukibue mene ne bipikudibue kabidi ku bupika bua dibola diabi, ne bibuejibue mu budishikaminyi bua butumbi bua bana ba Nzambi.’—Lomo 8:14-21.
11 Yehowa wakapesha bantu tshishimikidi tshia ‘ditekemena’ pavuaye mulaye bua kubapandisha kudi Satana Diabolo “nyoka wa kale,” ku diambuluisha dia ‘dimiinu’ dilaya. (Buak. 12:9; Gen. 3:15) Yezu Kristo ke muntu wa kumpala uvua ‘dimiinu.’ (Gal. 3:16) Ku diambuluisha dia lufu ne dibishibua diende, Yezu wakapesha bantu tshishimikidi tshia ditekemena bua kupikudibuabu ku bupika bua bubi ne lufu. Ditekemena edi didi dikumbana ku “dimueneshibua dia bana ba Nzambi.” Bela manyi badi benza tshitupa tshibidi tshia ‘dimiinu.’ Nebikale ne bua ‘kumueneshibua’ pikalabu mua kuditua pamue ne Yezu mudimu bua kubutula bulongolodi bubi bua Satana ebu. (Buak. 2:26, 27) Bualu ebu nebupeteshe mikoko mikuabu yapanduka mu dikenga dinene muoyo wa tshiendelele.—Buak. 7:9, 10, 14.
12. Dimueneshibua dia bela manyi nedipeshe bantu masanka kayi?
12 “Bifukibua” nebipete disulakana dinene mu bidimu tshinunu bia bumfumu bua Kristo. Tshikondo atshi, “bana ba Nzambi” bikala ne butumbi nebatambe ‘kumueneshibua’ pikalabu mua kukokesha ne Kristo bu bakuidi, bua kupesha bantu masanka adi afumina ku mulambu wa Yezu. Bu muikala bantu ku bulombodi bua bukalenge bua mu diulu, ‘bifukibua’ nebipanduke ku malu mabi makebesha kudi bubi ne lufu. Bantu badi batumikila Nzambi ‘nebapikudibue ku bupika bua dibola’ ku kakese ku kakese. Bobu bashale balamate Yehowa mu bidimu tshinunu too ne ku diteta dia ndekelu, nebafunde mêna abu mu ‘mukanda wa muoyo.’ Nebabuele mu ‘budishikaminyi bua butumbi bua bana ba Nzambi.’ (Buak. 20:7, 8, 11, 12) Bushuwa edi nditekemena dimpe be.
TULAME DITEKEMENA DIETU BIMPE
13. a) Ditekemena dietu ndimanyine pa tshinyi? b) Ndîba kayi dikala Kristo ne bua kumueneshibua?
13 Mikanda ibidi ivua Petelo mufunde idi ne malu a bungi adi ambuluisha bela manyi ne mikoko mikuabu bua kulama bimpe ditekemena dia malu adibu babalaye. Petelo wakaleja patoke ne: ditekemena diabu kadiena difumina ku bienzedi biabu to, kadi nku luse lua Yehowa. Wakafunda ne: ‘Nuikale talalaa, nujadike ditekemena dienu tshishiki mu ngasa udibu balua nende kunudi ku dibuluibua dia Yezu Kristo.’ (1 Pet. 1:13) Kristo neamueneshibue paluaye bua kufuta bayidi bende ba lulamatu ne kubutula bantu babi.—Bala 2 Tesalonike 1:6-10.
14, 15. a) Bua kulama ditekemena dietu bimpe, tudi ne bua kutuma lungenyi luetu ku tshinyi? b) Petelo uvua mufile mubelu kayi?
14 Bua tuetu kulama ditekemena dietu bimpe, tudi ne bua kutuma lungenyi luetu ku ‘dituku dia Yehowa’ ne kuenza malu bamanye ne: dikadi pabuipi. Mu dituku edi nebabutule “diulu,” anyi bukokeshi bua bana ba bantu, ne “buloba” anyi bulongolodi bubi ebu ne “bintu bidimu.” Petelo wakafunda ne: ‘Bunudi nabu mbua kuikala bantu ba mushindu kayi panudi nutekemena ne panudi nuendesha lukasa dilua dia dituku dia Nzambi? Bua bualu buadi diulu diakukuata kapia nedijimine ne bintu bidimu nebienguluke ne kapia kakole.’—2 Pet. 3:10-12.
15 “Diulu” ne “buloba” bidiku lelu eu nebapingane pa muaba wabi kudi ‘diulu dipiadipia’ mbuena kuamba ne: Bukalenge bua Kristo ne ‘buloba bupiabupia’ mmumue ne: bantu bakane bapiana buloba. (2 Pet. 3:13) Petelo wakafila mubelu muimpe uvua muimanyine pa ‘ditekemena’ dietu dia bulongolodi bupiabupia pakambaye ne: ‘Nunku bananga, bualu bua nudi nutekemena malu aa, nanukilayi bua banusangane mu ditalala kanuyi ne katoba, kanuyi ne kadiwu kudiye.’—2 Pet. 3:14.
TUENDE MU DIUMVUANGANA NE DITEKEMENA DIETU
16, 17. a) “Bienzedi bia tshijila” ne “bienzedi bia tshijila bia Nzambi” bitudi ne bua kuleja mbienzedi kayi? b) Ditekemena dietu nedikumbane mushindu kayi?
16 Katuena amu ne bua kulama ditekemena dietu bimpe patupu to, kadi tudi ne bua kuikala ne nsombelu udi umvuangana nadi. Tudi ne bua kutabalela menemene malanda etu ne Nzambi. “Bienzedi bia tshijila” bidi biumvuija ‘kuikala ne bienzedi bimpe munkatshi mua bisamba bia bende’ pa kuikala ne bikadilu bimpe. (2 Pet. 3:11; 1 Pet. 2:12) Tudi ne bua ‘kunangangana.’ Mmumue ne: tudi mua kuenza muetu muonso bua kulama buobumue buetu bua pa buloba bujima, ne munkatshi mua tshisumbu tshietu. (Yone 13:35) Kuikala ne “bienzedi bia tshijila bia Nzambi” kudi kumvuija kuenza malu adi aleja mutudi mu malanda makole ne Yehowa. Ebi bidi bimuenekela ku mushindu wa masambila atudi tuenza, patudi tubala Bible dituku dionso, tudilongela ne muoyo mujima, tuenza ntendelelu wa mu dîku ne tuyisha ne muoyo mujima ‘lumu luimpe lua bukalenge.’—Mat. 24:14.
17 Yonso wa kutudi mmusue kuikala muntu udi Yehowa wanyisha ne waluaye kupandisha ‘pajimijaye’ bulongolodi bubi ebu. Nunku netumone dikumbana dia ditekemena dietu, ‘ditekemena dia muoyo wa tshiendelele, udi Nzambi udi kayi mua kudinga mulaye diambedi bikondo bia tshiendelele kabiyi bianji kuikalaku’—Tito 1:2.
[Nkonko ya dilonga]
[Tshimfuanyi mu dibeji 22]
Bena Kristo bela manyi badi ‘baledibua tshiakabidi bua ditekemena didi ne muoyo’
[Tshimfuanyi mu dibeji 24]
Lamayi ditekemena dienu bimpe mu dîku
