Kan Beiseinaah Chuan Lâwmin
Kan Beiseinaah Chuan Lâwmin
‘Chatuan nunna beiseina . . . chu Pathian, dâwt sawi thei lova chuan khawvêl awm hmain a tiam a.’ —TIT. 1:1, 2.
ENNAWN NAN
Hriak thihte zînga pakhatin rinawm taka a nun a hman zawh hian vânah lâwmna a awm tih engtin nge kan hriat theih?
Engtin nge berâm dangte beiseina thlen famkimna chu hriak thihte beiseina nên a inkûngkaih?
Kan beiseina thlen famkimna hmu tûrin eng ang “awm dân thianghlim” leh “Pathian ngaihsak” thiltihte nge kan lantîr ang?
1. Engtin nge Jehova min pêk beiseina chuan chhel tûra min ṭanpui theih?
TIRHKOH Paula chuan Jehova chu “beiseina [“petu,” NW] Pathian” tiin a ko va. Pathian Jehova chuan ‘thlarau thianghlim thiltihtheihna zâra beiseina kan ngah theihna tûrin, lâwmna leh remna tinrêngin min tikhat’ thei tih a sawi belh a ni. (Rom 15:13) Beiseina kan ngah chuan, dinhmun engpawh kan tuar chhuak thei ang a, kan thinlung chu lâwmna leh remnain a khat ang. Chutiang beiseina chuan hriak thih Kristiante ang bawkin, Kristian dangte tân ‘nunna thîrchakai, rinawm leh nghet’ tak ang a ni a. (Heb. 6:18, 19) Kan beiseina chu nuna thlipui ang hrehawmna kan tawh huna kan vawn tlat theih, rinhlelhna nei lo tûr leh rinna tlachham lo tûra min ṭanpuitu a ni.—Hebrai 2:1; 6:11 chhiar rawh.
2. Tûn laia Kristiante zîngah eng beiseina chi hnih nge awm a, engvângin nge berâm dangte’n hriak thihte neih beiseina chu an ngaihven?
2 Tûn tâwpna huna chêng Kristiante chuan beiseina pahnih zînga a engemaw zâwk chu an nei a. Hriak thih Kristian “pâwl tlêmte” zînga a la bângte chuan Krista ruala a Lalrama lal leh puithiamte anga vâna thih theih lohna nun neih chu an beisei a ni. (Lk. 12:32; Thup. 5:9, 10) An aia tam zâwk “berâm dang” zînga “mipui tam tak” chuan Messia Lalram awpna hnuaia khua leh tuite nia Paradis-a chatuan nun beiseina chu an nei thung a ni. (Thup. 7:9, 10; Joh. 10:16) Berâm dangte chuan an chatuan nunna chu Krista “unau” hriak thih leia la awmte phûr taka an ṭanpuinaah a innghat tih an theihnghilh ngai tûr a ni lo. (Mt. 25:34-40) Hriak thihte chuan an lâwmman chu an dawng ngei dâwn a, berâm dangte beiseina pawh chutiang bawk chuan a thleng famkim ngei ang. (Hebrai 11:39, 40 chhiar rawh.) A hmasain, hriak thihte beiseina neih chu i lo bih chiang phawt ang u.
HRIAK THIH KRISTIANTE NEIH “BEISEINA NUNG” CHU
3, 4. Engtin nge hriak thih Kristiante chu ‘beiseina nung hmu tûra hrin leh’ an nih a, chu beiseina chu eng nge ni?
3 Tirhkoh Petera chuan “thlante” tia a koh hriak thih Kristiante hnênah chuan lehkha ṭum hnih a thawn a. (1 Pet. 1:1, 2) Pâwl tlêmte tâna beiseina ropui tak chu kimchang takin a hrilh a ni. A lehkhathawn hmasa zâwkah Petera chuan: “Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zêlin, mitthi zîng ata Isua Krista thawhlehna avângin beiseina nung hmu tûrin min hring leh a, rochan chhe thei lo, bawlhhlawh kai lo, chuai thei lo, vâna in tâna khêk chu hmuhna tûrin; chhandamna, hun hnuhnûnga lang tûra peih sa chu hmu tûrin, rinna avângin Pathian thiltihtheihnaa vên chu in ni. Chu miah chuan nasa takin in hlim a ni,” tiin a ziak a ni.—1 Pet. 1:3-6.
4 Vân lam Lalrama Krista nêna rorêl tûra Jehova thlan Kristian tlêm tête chu thlarauva hrin Pathian fate ni tûra “hrin leh” an ni a. Anni chu Krista ruala lal leh puithiamte ni tûra thlarauva hriak thih an ni. (Thup. 20:6) Petera chuan he “hrin leh” nihna hian “beiseina nung” neihna kawng a hawng a, chu chu “rochan chhe thei lo, bawlhhlawh kai lo, chuai thei lo, vâna” an tâna khêk angin a sawi a ni. Chuvângin, hriak thihte chu an beiseina nung avânga ‘nasa taka an hlim’ pawh hi a mak lo ve! Mahse, chu an beiseina thlen famkimna chu an rinawmnaah a innghat a ni.
5, 6. Engvângin nge hriak thih Kristiante chuan vân lam beiseina an neih chu chang thei tûra theih tâwp an chhuah a ngaih?
5 A lehkha thawn pahnihnaah, Petera chuan hriak thih Kristiante chu ‘a kohna leh a thlanna tinghet tûra taihmâk chhuah lehzual’ tûrin a fuih a. (2 Pet. 1:10) Anni chuan rinna te, Pathian ngaihsakna te, unau inhmangaihna te, leh hmangaihna te ang chi Kristian miziate hi nei tûrin an thawkrim tûr a ni. Petera chuan heti hian a sawi a: “Chûng chu in ta a nih a, a pun zêl sî chuan . . . thatchhe lo leh rah lo lovin a siam ṭhîn che u a ni,” tiin.—2 Petera 1:5-8 chhiar rawh.
6 Asia Minor-a Philadelphia kohhran upa thlarauva hrinte hnêna a thuchahah, tho leh Krista chuan: “Ka chhelna thu i pawm avâng khân leia awmte fiah tûra khawvêl zawng zawng chunga fiahna hun lo thleng tûr lakah chuan kei pawhin ka humhim ang che. Ka lo kal thuai dâwn e; tuman i lallukhum chu an lâksak loh nân che i thil neih sa kha vawng tlat rawh,” a ti. (Thup. 3:10, 11) Hriak thih Kristian tuemaw chu a rinawm loh chuan, thih thlenga rinawmte chan tûr “ropuina lallukhum vuai thei lo” chu a dawng lo vang.”—1 Pet. 5:4; Thup. 2:10.
LALRAMA LUH THEIHNA
7. Juda chuan a lehkha thawnah eng beiseina ropui tak chungchâng nge a sawi lan?
7 Kum C.E. 65 vêl khân, Isua unaupa Juda chuan “kohvate” tia a sawi a unau hriak thihte hnênah lehkha a thawn a. (Jud. 1; Hebrai 3:1 nên khaikhin rawh.) Kristiante “chan tlân” Pathian vân lam Lalrama chhandam nih beiseina ropui tak chungchâng chu ziah a tum a ni. (Jud. 3) Thu hmanhmawhthlâk dang sawi tûr nei mah se, a lehkha thawn tawi tê tihtâwp nân hriak thih Kristiante neih beiseina ropui tak chungchâng chu a sawi a ni: “Tichuan in tlûk loh nâna vêng thei che u leh a ropuina hma taka nasa zeta hlimin bawlhhlawh kai lova dah theitu che u, kan Chhandamtu Pathian taka chauh hnênah chuan kan Lalpa Isua Krista avângin, hun rêng awm hmaah leh tûnah leh chatuan thlengin chawimawina te, ropuina te, rorêlna te, thuneihnate awm rawh se,” tiin.—Jud. 24, 25.
8. Juda 24-na nêna inmilin, hriak thih tuemawin rinawm taka a nun a hman zawh hian vânah lâwmna a awm tih engin nge târ lang?
8 Hriak thih Kristian rinawmte chuan anmahni boralna lama titlu thei thilte laka vênhim nih chu an duh ngei ang. Bible ṭanchhan an beiseina chu hei hi a ni; Isua Krista’n anni chu thihna ata a kaitho leh ang a, Pathian hmaah thlarau lama ṭha famkimin hlim takin an inlantîr ang, tih hi. Hriak thih tuemaw chu rinawm taka a thih chuan “thlarau lam taksaa kaihthawhin a awm” ang a, “ṭawih thei lova . . . ropui taka” kaihthawhin a awm ngei ang. (1 Kor. 15:42-44) ‘Mi sual pakhat sim chungah mah vâna mi an lâwm’ hle si chuan, thlarauva hriak thih Krista unau pakhatin rinawm taka a nun a hman zawh huna vâna mi an lâwm nasat dân tûr chu han ngaihtuah teh! (Lk. 15:7) ‘Nasa zeta hlim’ chunga a lâwmman dawng hriak thih tuemaw chu Jehova leh thlarau thil siam rinawmte chuan an hlimpui ve ngei ang.—1 Johana 3:2 chhiar rawh.
9. Engtin nge hriak thih rinawmte hnênah Lalram luh theihna ‘pêk ngei’ an nih a, chu chuan engtin nge hriak thih la damte chungah nghawng a neih?
9 Juda ang bawkin, Petera pawhin hriak thih Kristiante hnênah an rinawmna hmanga vân kohna an tihchian chuan, “Isua Krista kan Lalpa leh Chhandamtu chatuan rama luh theihna chu a pe ngei dâwn si che u a,” tiin a ziak a ni. (2 Pet. 1:10, 11) An lâwmman dawn tûr vâna luh theihna chu ‘pêk ngei,’ a nih loh leh nasa taka pêk an ni dâwn a, an Kristian miziate chu ropui takin a lang ang. Nasa taka pe tih chuan nunna atâna intlânsiaknaa theihtâwp chhuahtute dawn tûr malsâwmna ṭhat bîkzia pawh a kâwk thei bawk a. Anni chuan rinawm taka hun an lo hman tawhte chu hlim leh lâwm takin an thlîr lêt thei dâwn a ni. Chu beiseina chuan hriak thih Kristian leia la damte chu rawngbâwl zêl tûra an ‘rilru puan veng’ tûrin a tichak a ni tih a chiang hle.—1 Pet. 1:13.
BERAM DANGTE TANA “BEISEINA”
10, 11. (a) Berâm dangte chuan eng beiseina nge an neih? (b) Lei lam beiseina thlen famkimna chu engtin nge Krista leh “Pathian fate lo lanna” nên a inkûngkaih?
10 Tirhkoh Paula chuan thlarauva hrin Krista “luahpuitute” ni tûra “Pathian fate” beiseina ropui tak chungchâng a ziak a. Chutah, berâm dang chhiarsên lohte hnêna Pathian Jehova pêk beiseina ropui tak chungchâng heti hian a sawi leh a ni: “Thil siam [mihring] zawng zawngte chuan beisei êm êmin, Pathian fate [hriak thihte] lo lanna chu an nghâkhlel hle si. Thil siam zawng zawngte chu thil lawilo thu thua awmtîrin an awm tawh (an duha awm an ni lo va, a awmtîrtu avâng a ni zâwk e); beiseina neiin thil siam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a,” tiin.—Rom 8:14-21.
11 Jehova chuan thutiam ‘thlah’ hmanga “rûlpui tar,” Diabol-Setana laka chhan chhuahna a tiam lai khân, mihringte hnênah “beiseina” a pe a ni. (Thup. 12:9; Gen. 3:15) Chu ‘thlah’ bul ber chu Isua Krista hi a ni a. (Gal. 3:16) A thihna leh a thawh lehna hmangin, Isua chuan mihringte tân sual leh thihna ata zalênna beisei chhan tûr nghet tak a pe a ni. Chu beiseina thlen famkimna chu “Pathian fate lo lanna” nên a inkûngkaih a. Hriak thih chawimawia awmte chu ‘thlah’ zawmpuitute an ni. Setana khawvêl suaksual tihborâlnaa Isua an thawhpui hunah anni chu ‘tihlan’ an ni ang. (Thup. 2:26, 27) Chu chuan hrehawmna nasa tak ata lo chhuak berâm dangte tân chhandamna a thlen ang.—Thup. 7:9, 10, 14.
12. Hriak thihte lanna chuan mihringte tân eng hlâwkna ropui tak nge a thlen dâwn?
12 Krista Kum Sâng Rorêl chhûng chu “thil siam” mihringte tân a va thawventhlâk dâwn êm! Chutih hunah chuan, chawimawia awm “Pathian fate” chu Krista nêna puithiam anga rawngbâwl a, Isua inthawina hlâwkna mihringte chunga an hman hunah chuan ‘tihlan’ lehzual an ni ang. Vân lam Lalram khua leh tuite an nih angin, “thil siam” mihringte chuan sual leh thihnain a nghawng zawng zawngte laka chhan chhuahna chu an hmu ṭan ang a. Thuâwih mihringte chu zawi zawiin “chhiatna bâwih ata tihchhuahin an awm ang.” Kum Sâng Rorêl chhûng leh a tâwpa fiahna hnuhnûng ber chhûnga Jehova laka an rinawm reng chuan ‘nunna buah’ an hming chu kumkhua atâna ziah a ni tawh ang a. “Pathian fate zalênna ropuiah” chuan an lût ang. (Thup. 20:7, 8, 11, 12) Beiseina ropui a va ni tak êm!
KAN BEISEINA TINUNG RENGIN
13. Kan beiseina chu engah nge a innghah a, engtikah nge Krista chu tihlan ni ang?
13 Thlarauva thâwk khum Petera lehkha thawn pahnihahte chuan hriak thihte leh berâm dangte beiseina tinung reng tûra ṭanpui thei thil tam tak a chuang a. An beiseina chu an thiltihah innghat lovin, Jehova khawngaihnaah a innghat zâwk tih a sawi a ni: “In rilru puan vengin ngaihven ula, Isua Krista inlâr hunah chuan khawngaihna a rawn kensak tûr che u chu beidawng lovin beisei zêl rawh u,” tia ziakin. (1 Pet. 1:13) Krista chu a hnungzuitu rinawmte lâwmman pe tûr leh Pathian ngaihsak lote chunga Jehova rorêlna kengkawh tûra a lo kal hunah tihlan a ni ang.—2 Thessalonika 1:6-10 chhiar rawh.
14, 15. (a) Kan beiseina tinung reng tûrin eng nge kan ngaihtuah reng ang? (b) Petera’n eng fuihna nge a pêk?
14 Kan beiseina tinung reng tûr chuan, “Lalpa nî” lo thleng tûr chu ngaihtuah reng chungin kan nun kan hmang tûr a ni. Chu nî chuan tûn laia “vânte,” a nih loh leh mihringte rorêlna, leh “lei,” mihring suaksualte leh a “thil bulte” chu a rawn tiboral vek ang. Petera chuan heti hian a ziak a ni: “Pathian ni lo thlen hun tûr chu beisei leh ṭhahnemngai taka duhin, . . . mi eng ang nge in nih tûr le? Chu mi nî a thlen avângin vânte lo kângin a boral ang a, thil bulte pawh chu meia em tuiin a awm tawh ang,” tiin.—2 Pet. 3:10-12.
15 Tûna awm mêk “vânte” leh “lei” chu “vân tharte [Krista Lalram sawrkârna] leh lei thar [lei lam mipui thar]” hmanga thlâk a ni ang. (2 Pet. 3:13) Tichuan, Petera chuan thutiam khawvêl thar kan ‘beiseina’ ṭanchhanin, hetiang hian fuihna thu tlang tak min pe a ni: “Chuvângin duh takte u, chutiang thilte chu in beisei avângin bawlhhlawh kai lo leh sawisêlbovin, thlamuang taka in awm a hmuh theih nân che u, taihmâk chhuah rawh u,” tiin.—2 Pet. 3:14.
KAN BEISEINA MILA NUNGIN
16, 17. (a) Eng ang “awm dân thianghlim” leh “Pathian ngaihsak” thiltihte nge kan lantîr ang? (b) Engtin nge kan beiseina chu a thlen famkim ang?
16 Kan beiseina chu kan tihnun reng bâkah chu mi nêna inmilin kan nung tûr a ni a. Thlarau lama kan nihna chu kan ngaihven reng tûr a ni. Nungchang, a nih loh leh “awm dân thianghlim” tihah chuan Pathian thu zawmna hmanga ‘Jentailte zînga chêtze mawi taka nun’ a tel a ni. (2 Pet. 3:11, 12; 1 Pet. 2:12) Kan “inhmangaih” tawn tûr a ni a. Chutah chuan tualchhûng kohhrana mite pawh tiamin, khawvêl pum puia kan inunauna vawng reng tûra theihtâwp chhuah a tel a ni. (Joh. 13:35) “Pathian ngaihsak” thiltihte chu Pathian Jehova nên inlaichînna ṭha kan nei tih nemnghettu thiltihte hi a ni a. Chutah chuan awmze nei taka ṭawngṭai te, nî tina Bible chhiar te, mi mala zir chîkna neih te, chhûngkuaa Pathian biakna neih te, leh “ram chanchin ṭha” thatho taka hrilhte a tel a ni.—Mt. 24:14.
17 Kan vai hian, Jehova pawm zâwng mi nih leh he khawvêl suaksual tak a “boral” huna a chhanhim nih chu kan duh ṭheuh a ni. Chutih hunah chuan kan beisei, ‘Pathian dâwt sawi thei lova’n khawvêl awm hmaa a tiam chatuan nun beiseina’ thlen famkimna chu kan hmu tawh ang.—Tit. 1:1, 2. (w12-E 03/15)
[Zirlai Atâna Zawhnate]
[Phêk 24-naa milem]
Hriak thih Kristiante chu ‘beiseina nung hmu tûra hrin leh’ an ni
[Phêk 26-naa milem]
I chhûngkuaah beiseina tinung reng rawh
