M̦õn̦õn̦õ kõn Kõjatdikdik eo Ad
M̦õn̦õn̦õ kõn Kõjatdikdik eo Ad
“[Jej] kõjatdikdik kõn mour indeeo, eo Anij E ban riab, em̦õj An kallim̦ur kake m̦okta jãn eto im eto.”—TAITÕS 1:2.
KWÕMAROÑ KE UWAAK?
Etke jejel̦ã bwe el̦ap m̦õn̦õn̦õ ilañ ñe juon iaan ri kabit ro ijin ioon lal̦ ej tiljek m̦ae iien ej mej?
Ewi wãween kõjatdikdik eo an jiip ro jet ej ekkejell̦o̦k ippãn kõjatdikdik eo an ri kabit ro?
Ta mel̦el̦ein ñe jej ‘mour ilo kwõjarjar’? Im ta jet iaan men ko jej kõm̦m̦ani ilo mour ko ad im jej “aji ñan Anij”?
1. Ewi wãween kõjatdikdik eo ad jãn Jeova emaroñ jipañ kõj?
RIJJELÕK Paul ear ba bwe Jeova ej letok “kõjatdikdik.” Paul ear wõnm̦aanl̦o̦k im ba bwe Jeova emaroñ letok ñan kõj aenõm̦m̦an im lañlõñ bwe en kajoorl̦o̦k wõt kõjatdikdik eo ad. (Rom 15:13) El̦aññe jej kaorõke kõjatdikdik in ad, jenaaj maroñ m̦õn̦õn̦õ im aenõm̦m̦an wõt meñe jej iioon el̦ap apañ ko. Apañ ko ilo mour in rej ãinwõt l̦añ ko rel̦l̦ap. El̦aññe jej iioon l̦añ kein ilo kõkkar, “kõjatdikdik in ad ej ãinwõt juon añkõ ñan bũruod. Ej tõt im pen.” Men in emaroñ jipañ kõj meñe jej uwaan ri kabit ro ak jiip ro jet. (Hibru 6:18, 19, UBS) El̦aññe jej dãpdep wõt ñan añkõ in ad ak kõjatdikdik in ad, jeban pel̦o̦k ak jebwãbwe. Kõjatdikdik in ad enaaj jipañ kõj bwe en kajoor tõmak eo ad im jen jab pere kallim̦ur ko an Anij.—Riit Hibru 2:1; 6:11, UBS.
2. Ta kõjatdikdik ko ruo me ewõr ippãn Kũrjin ro rainin? Etke ro me rej uwaan ‘jiip ro jet’ rej m̦õn̦õn̦õ in katak kõn kõjatdikdik eo ewõr ippãn ri kabit ro?
2 Ewõr ruo kain kõjatdikdik ko ñan Kũrjin ro me rej mour ilo raan kein ãliktata. Ro me rej uwaan “bwij e dik,” ewõr aer kõjatdikdik ñan mour indeeo ilañ. Renaaj kiiñ im bũrij ippãn Kũraij ilo Aelõñ eo an. (Luk 12:32; Revelesõn 5:9, 10) Ak ta kõn ro me rej uwaan ‘jiip ro jet’ me elõñl̦o̦k uwaaer? Eokwe, ewõr aer kõjatdikdik ñan mour indeeo ijin ioon lal̦ ium̦win Aelõñ eo an Anij. (Jon 10:16; Revelesõn 7:9, 10) Armej rein rej aikuj keememej bwe el̦aññe rekõn̦aan bõk lo̦mo̦o̦r, rej aikuj jipañ im jerbal ippãn ri kabit ro me rej mour wõt ijin ioon lal̦ ilo tõrein. (Matu 25:34-40) Ri kabit ro renaaj bõk jeraam̦m̦an eo aer ñan mour ilañ. Ro me rej uwaan jiip ro jet renaaj bar bõk jeraam̦m̦an eo aer ñan mour ijin ioon lal̦. (Riit Hibru 11:39, 40, UBS.) Jen kiiõ kal̦apl̦o̦k ad mel̦el̦e kõn kõjatdikdik eo me Anij ej lel̦o̦k ñan ri kabit ro.
“KÕJATDIKDIK” EO AN RI KABIT RO
3, 4. Ewi wãween an Jeova lel̦o̦k ñan ri kabit ro juon “mour ekããl”? Ta kõjatdikdik eo ewõr ippãn ri kabit ro?
3 Rijjelõk Piter ear je ruo lõta ko ñan Kũrjin ri kabit ro. Ear n̦aetan ri kabit ro “ri kããlõt ro an Anij.” (1 Piter 1:1, UBS) Lõta kein an Piter rej jipañ kõj bwe en l̦apl̦o̦k ad mel̦el̦e kõn kõjatdikdik in em̦m̦an an bwij eo edik. Ilo lõta eo an kein kajuon, Piter ear ba: “Jen kam̦m̦oolol Anij eo ej Jemen ad Irooj Jijej Kũraij! Bwe kõn tũriam̦o eo an el̦ap, ear letok ñan kõj mour ekããl kõn an kajerkakpeje Jijej Kũraij jãn ro remej. Innem jej reim̦aanl̦o̦k ñan ad naaj lutõkl̦o̦k kõn menin jeraam̦m̦an ko Anij ej kõjparoki ñan ro doon. Ej kõjparoki ñan kom̦ ilañ, ijo im rejamin kõt ak mõñ ak mejkwun n̦a ie. Rej ami, kom̦ eo kõn ami tõmak em̦õj lo̦mo̦o̦remi kõn kajoor eo an Anij, ilo ami kõttar lo̦mo̦o̦r eo epojak im naaj wal̦o̦k ñe enaaj itok jem̦l̦o̦k eo . . . ijoke kom̦win lañlõñ kõn ami lo̦mo̦o̦r.”—1 Piter 1:3-6, UBS.
4 Jeova ej lel̦o̦k juon “mour ekããl” ñan ri kabit ro me kar kããlõt er bwe ren irooj ippãn Kũraij ilañ. Jeova ej kõjerbale kajoor eo an ñan bõk rein ãinwõt ro nejin im kabit er ñan aer naaj erom kiiñ im bũrij ippãn Kũraij ilañ. (Revelesõn 20:6) Renaaj bõke kõjatdikdik in aer ilo naaj ‘mour in aer ekããl.’ Ta kõjatdikdik in? Piter ear ba bwe ej juon mour ilañ me enaaj ñan indeeo im reban bar mej. Kõjatdikdik in ej juon jeraam̦m̦an el̦ap im ekam̦õn̦õn̦õ ñan ri kabit ro. Bõtab, renaaj maroñ bõk jeraam̦m̦an in el̦aññe renaaj wõnm̦aanl̦o̦k wõt im tiljek ñan Anij.
5, 6. Etke Kũrjin ri kabit ro rej aikuj tiljek wõt?
5 Ilo lõta eo an kein karuo, Piter ear rõjañ Kũrjin ri kabit ro bwe ren kate er joñan wõt aer maroñ im tiljek wõt bwe ren maroñ bõke jeraam̦m̦an in aer ñan mour ilañ. (2 Piter 1:10) Rej aikuj kwal̦o̦k men ko ãinwõt tõmak, yokwe, im mour ekkar ñan kõn̦aan eo an Anij. Piter ear ba bwe el̦aññe renaaj kõm̦m̦ani men kein, men in enaaj jipañ er bwe ren jab jowan im bwe ren lo tõprak.—Riit 2 Piter 1:5-8.
6 Kũraij ear jiroñ em̦m̦aan ro rej ri kabit im rar lale eklejia eo ilo Philadelphia ilo Eijia Minor: “Kõn am̦ kõjparok naan eo aõ bwe kwõn kijenmej, inaaj bareinwõt kõjparok eok jãn iien inepata eo enaaj buñut aolepen lal̦ bwe en mãlejjoñe ri lal̦ otemjej. Epaak iien aõ iwõj. Kwõn kõjparok men eo ippam̦, bwe ejjel̦o̦k en ko̦o̦te pãllin am̦ anjo̦.” (Revelesõn 3:10, 11, UBS) El̦aññe ri kabit ro rej tiljek wõt ñan mej, renaaj “bõk pãllin aiboojoj.” Bõtab, el̦aññe juon ri kabit ejjab tiljek, eban bõke jeraam̦m̦an in.—1 Piter 5:4; Revelesõn 2:10.
DEL̦O̦ÑL̦O̦K ILO AELÕÑ EO AN ANIJ ILO EL̦AP LAÑLÕÑ
7. Ta kõjatdikdik eo em̦m̦an Jud ear kõnnaan kake ilo lõta eo an?
7 Emaroñ kar ilo iiõ eo 65, l̦eo jatin Jijej etan Jud ear je juon lõta ñan Kũrjin ri kabit ro. Ear n̦aetan rein “ro ar kũr er.” (Jud 1; Hibru 3:1) Jud ear kõn̦aan jeje ñan rein kõn kõjatdikdik eo me ewõr ippãn aolep Kũrjin ri kabit ro. (Jud 3) Bõtab, ear aikuj jeje ñan er kõn men ko jet me ear aikuj kõnnaanek er kaki. Mekarta, ear kajem̦l̦o̦k lõta eo an ilo an kar kõnnaan kõn kõjatdikdik eo em̦m̦an an Kũrjin ri kabit ro. Ear ba: “A ñan Eo ej maroñ in kõjparok kom̦ jãn buñ, im kajutak kom̦ im̦aan mejen wõj eo An ilo lañlõñ bõtata im ejjel̦o̦k n̦otaami, ñan juon wõt Anij eo Ri Lo̦mo̦o̦red, kõn Jijej Kũraij ad Irooj, en aiboojoj, utiejtata, maroñ bõtata im kajoor, m̦okta jãn iien otemjej, im iien in, im indeeo.”—Jud 24, 25.
8. Etke jejel̦ã bwe el̦ap m̦õn̦õn̦õ ilañ ñe juon iaan ri kabit ro ijin ioon lal̦ ej tiljek m̦ae iien ej mej?
8 Aolep Kũrjin ri kabit ro rekõnaan bwe Anij en kõjparok er jãn jabdewõt men me emaroñ kõm̦m̦an bwe ren jab dãpij wõt aer tiljek. Ewõr an ri kabit ro kõjatdikdik bwe Jijej Kũraij enaaj kajerkakpeje er jãn mej im renaaj erom jetõb ro reweeppãn. Ilo naaj iien in, renaaj ilo̦k im pãd ilañ ippãn Anij. Ñe juon ri kabit ej tiljek m̦ae iien eo emej, ejjel̦o̦k pere bwe enaaj ‘jerkakpeje im bõk ãnbwinnin jetõb’ ilo aiboojoj im ejjel̦o̦k wabanban. (1 Korint 15:42-44) El̦aññe enjel̦ ro ilañ rej lañlõñ ñe juon “ri jerawiwi eo ej ukel̦o̦k,” elukkuun l̦apl̦o̦k m̦õn̦õn̦õ ilañ ñe juon iaan ro jatin Kũraij ak ri kabit ro ijin ioon lal̦ in ej tiljek m̦ae iien ej mej. (Luk 15:7) Jeova im enjel̦ ro retiljek renaaj kanooj lañlõñ ñe juon ri kabit ej bõk an jinõkjeej. Ri kabit in bareinwõt enaaj lañlõñ ilo iien in.—Riit 1 Jon 3:2.
9. Ta mel̦el̦ein naan ko an Piter ilo 2 Piter 1:10, 11? Ewi wãween kõjatdikdik in ej kakajoor im jipañ ri kabit ro ijin ioon lal̦?
9 Ãinwõt Jud, Piter ear jejel̦o̦k ñan Kũrjin ri kabit ro kõn jeraam̦m̦an eo renaaj bõke el̦aññe rej tiljek wõt. Ear ba ñan er: “Naaj lewõj ñan kom̦ anemkwoj in del̦o̦ñ Aelõñ eo ej pãd ñan indeeo, eo an ad Irooj im Ri Lo̦mo̦o̦r Jijej Kũraij.” (2 Piter 1:10, 11, UBS) Ta mel̦el̦ein naan kein? Piter emaroñ kar jitõñl̦o̦k ñan iien eo me ri kabit ro renaaj del̦o̦ñe Aelõñ eo an Anij ilo el̦ap lañlõñ. Bõlen ear bareinwõt kõnnaan kõn jeraam̦m̦an ko wõj me ri kabit rein renaaj bõki ilañ. Ri kabit rein renaaj lukkuun m̦õn̦õn̦õ im juburuer el̦aññe rej reilikl̦o̦k im kõl̦mãnl̦o̦kjen̦ kõn aer kar tiljek ke rar pãd ioon lal̦ in. Kõjatdikdik in em̦m̦an ej kakajoor im jipañ ri kabit ro bwe ren tiljek wõt ilo iien in rej pãd im mour ijin ioon lal̦.—1 Piter 1:13, UBS.
“KÕJATDIKDIK” EO AN JIIP RO JET
10, 11. (1) Ta kõjatdikdik eo em̦m̦an ewõr ippãn jiip ro jet? (2) Ewi wãween kõjatdikdik eo an jiip ro jet ej ekkejell̦o̦k ippãn Kũraij im an “Anij kwal̦o̦k wõn ro rej nejin”?
10 Rijjelõk Paul ear jejel̦o̦k ñan ri kabit ro “nejin Anij” kõn kõjatdikdik eo aer bwe renaaj irooj ippãn Kũraij. Innem ear bareinwõt kõnnaan kõn kõjatdikdik eo em̦m̦an me Jeova ej lel̦o̦k ñan jiip ro jet im elõñ uwaaer. Ear ba: “Kõm̦anm̦an otemjej rej kijooror ilo aer kõttar an Anij kwal̦o̦k wõn ro rej nejin. Bwe em̦õj liaakel̦o̦k menin kõm̦anm̦an ko bwe en ejjel̦o̦k tokjãer, ak men in ejjab kõn ankilaaer, ak kõn ankilaan Anij. Ijoke ear wõr kõjatdikdik in: bwe juon raan menin kõm̦anm̦an ko renaaj rõl̦o̦k jãn aer ri kam̦akoko ñan wabanban, bwe ren anemkwoj ippãn ro nejin Anij ilo aer anemkwoj eaiboojoj.”—Rom 8:14-21, UBS.
11 Jeova ear lel̦o̦k kõjatdikdik in em̦m̦an ñan armej ro ilo an kar kallim̦ur bwe enaaj karõl̦o̦k er jãn Setan Tepil̦ ikijjeen “ine eo” kar kallim̦ur kake. (Jenesis 3:15; Revelesõn 12:9) Ine in ej kõkkar kõn wõn? Eokwe, ewõr ruo men ko im ine in ej kõkkar kaki. M̦õttan eo m̦oktata ej Jijej Kũraij. (Galetia 3:16) Mej im jerkakpeje eo an Jijej ear kamaroñ armej ro bwe en wõr aer kõjatdikdik bwe renaaj rõl̦o̦k jãn jerawiwi im mej. Kõjatdikdik in enaaj alikkar ilo an “Anij kwal̦o̦k wõn ro rej nejin,” ak ri kabit ro. Rein rej m̦õttan eo kein karuo ilo ine eo. Juon wãween Anij enaaj kwal̦o̦k kõn ri kabit ro ilañ, ak kwal̦o̦k bwe rej kiiñ ippãn Kũraij, ej ilo iien eo ñe renaaj jipañ Kũraij im ko̦kkure jukjuk im pãd in enana an Setan. (Revelesõn 2:26, 27) Ãlikin men in, naaj lo̦mo̦o̦ren jiip ro jet, ro me renaaj mour im el̦l̦ã jãn eñtaan eo el̦ap.—Revelesõn 7:9, 10, 14.
12. Ta jeraam̦m̦an ko armej ro renaaj bõki ñe Anij ej bar kalikkar wõn ri kabit ro?
12 Enaaj kanooj l̦ap jokwane ilo iien eo Kũraij enaaj irooj ium̦win 1,000 iiõ ko! Ilo naaj tõre en̦, enaaj alikkar wõn ri kabit ro ak “ro rej nejin” Anij ilo bar juon wãween. Ta in? Eokwe, renaaj jerbal ãinwõt bũrij ro ippãn Kũraij im jipañ aolep armej ro bwe ren bõk jeraam̦m̦an ko jãn an kar Jijej aje mour eo an. Ñe Aelõñ eo an Anij ej tõl aolep armej ro ioon lal̦ in, jidik kõn jidik armej ro me rej pokake renaaj “rõl̦o̦k jãn aer ri kam̦akoko ñan wabanban.” Mel̦el̦ein men in bwe renaaj anemkwoj jãn jerawiwi im mej. El̦aññe rej tiljek wõt ñan Jeova ium̦win 1,000 iiõ ko im ilo mãlejjoñ eo ãliktata, naaj je etaer ilo “bok in mour” indeeo. Renaaj erom “ro nejin Anij ilo aer anemkwoj.” (Revelesõn 20:7, 8, 11, 12) Men in ej juon kõjatdikdik ekanooj em̦m̦an!
KAORÕK WÕT KÕJATDIKDIK EO AD
13. Ta unin an wõr ad kõjatdikdik? Ñããt eo Kũraij enaaj weaaktok ilo kõkkar?
13 Lõta ko ruo an Piter rej jipañ ri kabit ro im bar jiip ro jet bwe ren kaorõk wõt kõjatdikdik kein aer. Piter ear kõmel̦el̦e bwe unin an wõr ad kõjatdikdik ej kõn an l̦ap an Jeova jouj, im ejjab jãn jerbal ko ad. Ear ba: “Kom̦win jatõr im kõjatdikdik kom̦ wõt kõn jouj eo naaj bõktok ñan kom̦ ilo weaaktok an Jijej Kũraij.” (1 Piter 1:13) Jijej Kũraij enaaj “weaaktok” ilo kõkkar ilo iien eo ñe enaaj itok ñan an ko̦kkure ro renana im kajeraam̦m̦an rũkal̦oor ro an retiljek ioon lal̦.—Riit 2 Tessalonika 1:6-10, UBS.
14, 15. (1) Bwe jen kaorõk wõt kõjatdikdik eo ad, ta eo jej aikuj keememeje? (2) Ta eo Piter ear ba bwe jej aikuj kõm̦m̦ane?
14 Bwe jen kaorõk wõt kõjatdikdik in ad, aolep iien jej aikuj keememej bwe “raan eo an Jeova” elukkuun epaak. Ñe jej keememej men in, enaaj l̦ap an jelõt men ko jej kõm̦m̦ani ilo mour ko ad. Jeova enaaj ko̦kkure “men ko ilañ” ak kien ko an armej. Enaaj bareinwõt ko̦kkure “lal̦ in” im “men otemjej ilowaan,” eo ej kõkkar kõn ro renana. Piter ear je: “El̦aññe naaj ko̦kkure men otemjej ilo wãween in, ak enaaj kõjkan kom̦, mour rot eo kom̦ naaj mour kake? Mour ko ami ren kwõjarjar im kom̦win aji ñan Anij, ilo ami kõttar Raan eo an Anij, im kate kom̦ bwe en m̦õkajtok. Raan eo ñe lañ ko renaaj bwil im jorrããn, im men ko ilañ renaaj õnl̦o̦k kõn urur.”—2 Piter 3:10-12, UBS.
15 Ekkar ñan Baibõl̦ eo, enaaj wõr “lañ ko rekããl im lal̦ ekããl.” Aelõñ eo an Kũraij enaaj bõk jikin aolep kien ko ilal̦ in. Im armej ro rem̦m̦an renaaj bõk jikin aolep armej ro renana. (2 Piter 3:13) Piter ej jiroñ kõj ta ko jej aikuj kõm̦m̦ani ilo ad kõttar wõt im kaorõk kõjatdikdik in bwe m̦õttan jidik enaaj wõr lañ ko rekããl im lal̦ ekããl. Ear ba: “Kõn men in, ro jitõnbõro, ke kom̦ij kõtmãne kõn men kein, kom̦win kate kom̦ bwe En lo kom̦ ilo aenõm̦m̦an im ejjel̦o̦k ami mããr ak n̦otaami im̦aan Mejen.”—2 Piter 3:14.
KALIKKAR BWE KWÕJ KAORÕK KÕJATDIKDIK EO AD
16, 17. (1) Ta mel̦el̦ein ñe jej ‘mour ilo kwõjarjar’? Im ta jet iaan men ko jej kõm̦m̦ani ilo mour ko ad im jej “aji ñan Anij”? (2) Ta eo jej aikuj kõm̦m̦ane ñan bõke kõjatdikdik eo ad?
16 Jej kalikkar bwe jej lukkuun kaorõke kõjatdikdik in ad ilo wãween ad mour. Ãinwõt an kar Piter kakeememej kõj, jej aikuj kate kõj bwe jen mour ilo wãween eo me ej kabuñbũruon Jeova. El̦aññe jej ‘mour ilo kwõjarjar,’ mel̦el̦ein men in bwe em̦m̦an m̦wilid im etad “ilo bwiljin ri aelõñ ko” kõnke jej kõm̦m̦ani men ko rem̦m̦an ippãn Anij. (2 Piter 3:11, UBS; 1 Piter 2:12) Jej aikuj yokwe ro jeid im jatid ilo tõmak ipel̦aakin lal̦ in. Mel̦el̦ein men in bwe jej kate kõj bwe en wõr wõt aenõm̦m̦an im bõrokuk ilo eklejia eo ad. (Jon 13:35) Piter ear bar ba bwe jen kõm̦m̦ani men ko rem̦m̦an ilo mour ko ad im “aji ñan Anij.” Ta mel̦el̦ein men in? Eokwe, ej jitõñl̦o̦k ñan men ko jej kõm̦m̦ani ñan kõm̦m̦an bwe en epaakl̦o̦k wõt kõtaan eo ad ippãn Jeova. Jet iaan men kein ej jar jãn aolepen bũruod, riit Baibõl̦ kajjojo raan, katak ippãd make im katak ippãn eo rejetad im ajri ro nejid. Jej aikuj bareinwõt niknik ilo jerbal in kwal̦o̦k naan kõn nuuj em̦m̦an ak “gospel in an aelõñ in lañ.”—Matu 24:14.
17 Kõj kajjojo jekõn̦aan kam̦õn̦õn̦õik Jeova im kobal̦o̦k ippãn armej ro me enaaj lo̦mo̦o̦ren er ñe enaaj ko̦kkure jukjuk im pãd in enana. El̦aññe jej kam̦õn̦õn̦õik Jeova, jenaaj bõke kõjatdikdik eo ad kõn “mour indeeo, eo Anij E ban riab, em̦õj An kallim̦ur kake m̦okta jãn eto im eto.”—Taitõs 1:2.
[Kajitõk ko ñan katak]
[Pija eo ilo peij 22]
Kõjatdikdik eo an Kũrjin ri kabit ro ej ñan bõk juon “mour ekããl”
[Pija eo ilo peij 24]
Jipañ eo rejetam̦ im ajri ro nejõm̦ ñan kaorõk wõt kõjatdikdik eo aer
