D maan sũ-noog d saagrã yĩnga
D maan sũ-noog d saagrã yĩnga
“Bãmb tara tẽeb ne vɩɩm sẽn ka sɛtã yelle, Wẽnnaam sẽn ka tõe n yag ziri sẽn kãab hal [daar zãra, MN].”—TƖT 1:2.
D LEBG N TẼEGE
․․․․․
Bõe n kɩt tɩ d miẽ tɩ kiris-ned sẽn paam zaeebã sã n kell n sak Wẽnnaam n tãag a kũum, sũ-noog bee saasẽ?
․․․․․
Wãn to la piis a taabã saagrã pidsg tũud ne sẽn paam-b zaeebã saagrã pidsgu?
․․․․․
Bõe la d segd n maan n wilg tɩ d ‘yel-manesem yaa sõma,’ la tɩ d ‘sakda Wẽnnaam,’ n wa paam n yã d saagrã pidsgu?
1. Wãn to la saagr ning a Zeova sẽn kõ-dã tõe n sõng-d tɩ d tõog toogo?
TƲM-TƲMD a Poll yeelame t’a Zeova yaa Wẽnnaam sẽn kõt saagre. A paasame t’a Zeova tõe n kõ-d-la sũ-noog la laafɩ, tɩ d gũ d tẽebã bɩ d saagrã pidsg ne d sũy fãa ne vʋʋsem sõngã pãnga. (Rom 15:13, MN) Saag-kãng sã n yaa vẽeneg d yamẽ wã, d na n tõog n maoa ne zu-loɛɛg buud fãa n ket n tar sũ-noog la laafɩ. D yaa kiris-ned sẽn paam vʋʋsem sõngã zaeeb tɩ d bee neb nins a Zezi sẽn bool t’a piis a taabã sʋk me, d saagrã yaa d “sɩɩg baar sẽn ka vigsda, la sẽn ka kaoogde.” (Heb. 6:18, 19) Zu-loeesã yaa wala seb-kãsemse, tɩ d saagrã yaa wa bũmb d sẽn tõe n gãde, tɩ sõng-d tɩ zu-loe-kãens ra wa leng-d wa sebg sẽn lengd bũmbu, n kɩt tɩ d yaam yuus wall koms d tẽebã ye.—Karm-y Hebre dãmb 2:1; 6:11.
2. Saagr a yiib nins kiris-nebã sẽn tarã la bʋse, la bõe yĩng tɩ sẽn paam-b zaeebã saagr tar yõod ne “piis a taabã”?
2 Saagr a yiib n be kiris-nebã yĩnga, tɩ kiris-ned fãa tar a yembre. Yaa sẽn paam-b vʋʋsem sõngã zaeebã la b sẽn boond tɩ “bãg-bilã.” B sʋkã, neb nins sẽn ket tẽngã zugã saagr yaa wa tɩ vɩɩmd saasẽ n pa le tõe n ki, n yɩ maan-kʋʋdb la b naag Kiristã n dɩ naam a Rĩungã pʋgẽ. (Luk 12:32, MN; Wil. 5:9, 10) Kʋʋn-kãsengã sẽn yaa “piis a taabã” sõor sẽn yaa wʋsg n yɩɩdã saagdame n na n wa vɩɩmd tẽngã sẽn na n lebg arzãnã zugu, n yɩ Mesi wã Rĩung nin-buiidu. (Wil. 7:9, 10; Zã 10:16) Piis a taabã pa tog n yĩm tɩ sẽn na yɩl n paam fãagrã, b segd n sõngda sẽn paam-b vʋʋsem sõngã zaeeb n ket tẽngã zugã sẽn yaa Kiristã “ba-biisã” ye. (Mat. 25:34-40) Sẽn paam-b zaeebã na n paama b keoorã. Yaa vẽeneg tɩ piis a taabã me na n paama b rẽndã. (Karm-y Hebre dãmb 11:39, 40.) Bɩ d reng n gom sẽn paam-b zaeebã saagrã yelle.
SẼN PAAM-B VƲƲSEM SÕNG ZAEEBÃ SAAGRÃ
3, 4. Wãn to la a Zeova kõ sẽn paam-b zaeebã ‘rogem paalg tɩ b paam tẽeb sẽn vɩ,’ la tẽeb-kãng yaa bõe?
3 Tʋm-tʋmd a Pɩɛɛr gʋlsa lɛta a yiib n tool kiris-neb sẽn paam vʋʋsem sõngã zaeebo, n bool-b tɩ “nin-tũusdsi.” (1 Pɩɛ. 1:1) A goma saagr ning bãg-bilã neb sẽn tarã yell sõma. A pipi lɛtrã pʋgẽ, a yeela woto: “Pẽgr Wẽnnaam, tõnd Zusoab a Zezi Kirist Ba sẽn kõ tõnd dogem-paalga, sẽn zems bãmb nimbãan-zoeerã sẽn yaa kãsengã tɩ tõnd paam tẽeb sẽn vɩ a Zezi Kirist kũum-vʋʋgr yĩnga, la d paam dogem-pʋɩɩr sẽn ka tõe n sãam, la sẽn ka rẽgemda, la sẽn ka loogda, sẽn bĩng yãmb yĩng [saasẽ, MN]. Yaa yãmb la Wẽnnaam pãngã gũud tẽeb yĩnga, tɩ yãmb paam fãagr sẽn segl n na n puk yaoolem wakate. Bõn-kãng yĩnga, yãmb maanda sũ-noogo.”—1 Pɩɛ. 1:3-6.
4 A Zeova tũusa kiris-neb sõor sẽn yaa bilfu, n kõ-b ‘rogem paalg’ tɩ b na n tɩ naag Kiristã n yɩ saasẽ Rĩungã rĩm-dãmba. A zae-b-la ne a vʋʋsem sõngã tɩ b lebg a kamba, n na n wa naag Kiristã n yɩ rĩm-dãmb la maan-kʋʋdba. (Wil. 20:6) A Pɩɛɛr yeelame tɩ “dogem-paalgã” kɩtame tɩ b tar “tẽeb sẽn vɩ,” n bool tẽeb-kãng tɩ “dogem-pʋɩɩr sẽn ka tõe n sãame, la sẽn ka rẽgemda, la sẽn ka loogda,” b sẽn bĩng-b saasẽ. Pa zaalem tɩ sẽn paam-b zaeebã ‘maand sũ-noog’ b tẽebã bɩ b saagrã yĩng ye! La yaa b ned kam fãa sã n kell n sak Wẽnnaam la a na n yã saag-kãng pidsgu.
5, 6. Bõe yĩng tɩ kiris-neb nins sẽn paam zaeebã segd n kell n yɩ sakdba?
5 A Pɩɛɛr lɛtr a yiib-n-soabã pʋgẽ, a yeela kiris-neb nins sẽn paam zaeebã tɩ b ‘maan b sẽn tõe tɛk n da kong b boolgã ne b tũusgã ye.’ (2 Pɩɛ. 1:10) B segd n maoa b pãng tɛk n paam zʋg-sõma toor-toor kiris-ned sẽn tog n talle. Wala makre, b segd n talla tẽebo, saam-biir nonglem, wẽn-sakre, la nonglem. A Pɩɛɛr yeela woto: “Bõn-kãens sã n pid yãmb n puugi, . . . y kõn yɩ kʋɩɩmba, wall neb sẽn ka womd biis ye.”—Karm-y 2 Pɩɛɛr 1:5-8.
6 Kiristã vʋʋgr poore, a toola Filadɛlfi tigingã sẽn da be Aazimineer soolmẽ wã kãsem-dãmbã koeese. A yeela nin-kãensã sẽn paam vʋʋsem sõngã zaeeb n lebg Wẽnnaam kambã woto: “Yãmb sẽn talld mam koɛɛgã namsg pʋgẽ wã yĩnga, ma-me na n fãaga yãmb makr wakat sẽn na n wa dũniyã tɛk fãa n mak dũniyã rãmbã. Mam wata tao-tao. Bɩ y tall bũmb ning yãmb sẽn tarã, tɩ ned ra reeg yãmb maanf ye.” (Wil. 3:10, 11) Kiris-ned sẽn paam vʋʋsem sõngã zaeeb sã n bas Wẽnnaam sakre, a pa na n paam “naam maanf sẽn ka sãamdã” b sẽn pʋlem nin-tũusds nins sẽn na n kell n sak Wẽnnaam n tãag b kũumã ye.—1 Pɩɛ. 5:4; Wil. 2:10.
B RĨUNGÃ PƲGẼ KÕOMÃ
7. Saag-bʋg yell la a Ziid gom a lɛtrã pʋgẽ?
7 Yʋʋmd 65 soabã sẽnese, a Zezi ma-biig a Ziid gʋlsa lɛtr n tool a tẽed-n-taas sẽn paam vʋʋsem sõngã zaeebo, n yeel tɩ b yaa neb “sẽn paam boolgo.” (Ziid 1; ges-y Hebre dãmb 3:1.) A ra rat n goma ne-b saagr ning sẽn paam-b zaeebã “fãa sẽn tarã” yelle, rat n yeel tɩ b sẽn na n wa paam n zĩnd Wẽnnaam saasẽ Rĩungã pʋgẽ wã yelle. (Ziid 3) Baa a sẽn da tar yɛl a taab sẽn tar yõod wʋsg me n na n togs-bã, a lɛtrã sẽn yɩ koɛɛgã baasgẽ, a goma sẽn paam-b zaeebã fãa saagrã yelle, n yeel woto: ‘Bɩ sẽn tõe n tall-a yãmb tɩ y ra lʋɩ la b wa ne yãmb naamẽ ne sũ-noog wʋsg tɩ rõdb kaẽ, la Wẽnnaam a yembr sẽn yaa tõnd Fãagda, tõnd Zusoab a Zezi Kirist maasem yĩngã reeg waoogr la naam, la pãng la noor wakat fãa sẽn looge, la masã la wakat fãa.’—Ziid 24, 25.
8. Bõe n kɩt tɩ d miẽ tɩ kiris-ned sẽn paam zaeebã sã n kell n sak a Zeova n tãag a kũum, sũ-noog bee saasẽ?
8 Vẽenega, sẽn paam-b zaeebã ned kam fãa tʋllame tɩ Wẽnnaam sõng-a t’a ra wa lʋɩ n wa paam sãoong ye. B saagdame tɩ b kũum poore, a Zezi Kirist na n vʋʋg-b lame tɩ b lebg wa malɛgs n zems zãnga. Rẽ na n kɩtame tɩ b tõog n kẽng Wẽnnaam nengẽ saasẽ ne sũ-no-kãsenga. Kiris-ned sẽn paam vʋʋsem sõngã zaeeb sã n kell n sak a Zeova n tãag a kũum, yaa vẽeneg tɩ b na n vʋʋg-a lame t’a lebg wa malɛk n paam ‘yĩng sẽn ka põogd la sẽn tar waoogre.’ (1 Kor. 15:42-44) A Zezi yeelame tɩ sũ-noog wʋsg ‘bee saasẽ, yel-wẽn soab a yembr yam sã n tek t’a kos sugri.’ Woto wã, tags-y n ges-y sũ-noog ning sẽn na n zĩnd saasẽ, ned sẽn paam zaeeb n lebg Kiristã ba-biig sã n kell n sak Wẽnnaam n tãag a kũum. (Luk 15:7) A Zeova ne malɛg-sakdbã fãa na n naag-a lame n kɩdme, a sẽn wat n deegd a keoorã ne “sũ-noog wʋsgã” sasa.—Karm-y 1 Zã 3:2.
9. B sẽn yeel tɩ sẽn paam-b zaeebã na n kẽe Rĩungã pʋgẽ ne ‘kõom-kãsengã’ võor yaa bõe, la wãn to la rẽ nafd sẽn nan ket-b tẽngã zugã?
9 Tʋm-tʋmd a Pɩɛɛr me gʋlsa kiris-neb sẽn paam zaeebã n tẽeg-b bark ning b sẽn na n paame, b sã n kell n sak Wẽnnaam. A yeel-b lame tɩ Wẽnnaam na n kɩtame tɩ b “paam kõom-kãseng [b] Zusoabã la [b] Fãagd a Zezi Kirist soolem sẽn ka sɛtã pʋgẽ.” (2 Pɩɛ. 1:10, 11) A Pɩɛɛr sẽn yeel tɩ b na n ‘paama kõom-kãsengã,’ tõe t’a ra tagsda b sẽn na n kẽ saasẽ ne ziir wʋsgã yelle. Tõe me t’a ra tagsda bark nins b sẽn na n paam saasẽ wã yelle. Sẽn paam-b zaeebã na n wa tẽegda modgr ning b sẽn maan n tõog n kell n sak Wẽnnaamã yell ne sũ-noog la mi-beoog wʋsgo. Sãmbg sẽn ka be, saag-kãngã kõta sẽn zae-b n nan ket tẽngã zugã raood tɩ b ket n sakd Wẽnnaam.—1 Pɩɛ. 1:13.
PIIS A TAABÃ SAAGRÃ
10, 11. a) Saag-bʋg la piis a taabã tara? b) Wãn to la vɩɩm sẽn kõn sa tẽngã zugã paoong na n tũ ne Kiristã la ne ‘Wẽnnaam kambã pukri’?
10 Tʋm-tʋmd a Poll gʋlsa lɛtr n tool neb sẽn paam vʋʋsem sõngã zaeeb n lebg “Wẽnnaam kamba,” n gom saag-kãseng ning b sẽn tar n na n yɩ “pʋɩt-n-taas ne Kiristã” yelle. Rẽ poore, a goma saagr sẽn be yamleoog yelle, a Zeova sẽn kõ neb nins a Zezi sẽn bool t’a piis a taab tɩ b sõorã ka tɛkã, n yeel woto: “Bõn-naandsã fãa me gũuda Wẽnnaam kambã [rat n yeel tɩ sẽn zae-bã] pukr ne ratem-kãsenga. Tɩ bõe, bõn-naandsã fãa lebga faoore, la ka b mens ratem yĩng ye, yaa sẽn maan-a bãmb tɩ b yɩ woto wã yĩnga. Bãmb yaasdame n gũud tẽeb pidsgu, tɩ bãmb me na paam yolsg ne faoolem yembdo, n paam pʋɩɩr ne Wẽnnaam kambã b lohormã ne b ziirã pʋgẽ.”—Rom 8:14-21.
11 A Zeova sẽn wa n pʋlem t’a na n tũnuga ne “yageng” n sãam “wag-kʋdrã” sẽn yaa a Sʋɩtãanã, kɩtame tɩ ninsaalbã paam saagre. (Wil. 12:9; Sɩng. 3:15) ‘Yagen-kãng’ meng-mengã yaa a Zezi Kirist. (Gal. 3:16) A Zezi kũumã la a vʋʋgrã kɩtame tɩ ãdem-biisã saagd n na n wa paam b mens ne yel-wẽnã la kũumã yembdo. Saag-kãng pidsgã na n tũu ne ‘Wẽnnaam kambã sẽn yaa sẽn paam-b zaeebã pukri.’ Sẽn paam-b zaeebã sã n wa reeg b keoorã, b lebgda “yagengã” yagen-taase. B na n ‘puka’ wakat ning b sẽn na n naag Kiristã n sãam a Sʋɩtãan dũniyã. (Wil. 2:26, 27) Rẽ na n waa ne piis a taab nins sẽn na n põs to-kãsengã sasa wã fãagre.—Wil. 7:9, 10, 14.
12. Sẽn paam-b zaeebã pukr na n waa ne nafa bʋs n kõ ãdem-biisã?
12 Kiristã naam sẽn na n kaoos yʋʋm tusrã na n waa ne yolsg tɛkẽ n kõ ãdem-biisã! Wakat kãnga, “Wẽnnaam kambã” sẽn paam ziirã na n maneg n pukame, b sẽn na n naag Kiristã n yɩ maan-kʋʋdb n sõng ãdem-biisã tɩ b rɩ a Zezi maoongã sẽn yɩ rondã nafa wã. Wẽnnaam Rĩungã sã n wa rɩt naam dũniyã zugu, bilf-bilfu, neb nins sẽn yaa sakdbã na n ‘paamda yolsg ne faoolem yembdã.’ B na n paama b meng ne yel-wẽnã la kũumã sẽn wat ne bũmb ninsã. A Zezi naamã sẽn na n kaoos yʋʋm tusrã sasa la yaoolem makrã sasa me, b sã n kell n sak a Zeova, b na n paamame tɩ b gʋls b yʋyã “vɩɩm sebrã” pʋgẽ wakat fãa yĩnga. B na n paama ‘Wẽnnaam kambã lohormã ne b ziirã.’ (Wil. 20:7, 8, 11, 12) Ad b saagrã sɩd be yamleoogo!
KƖT-Y TƖ Y SAAGRÃ YƖ VẼENEG Y YAMẼ
13. Bõe n kɩt tɩ d paam d saagrã, la Kiristã waoong na n yɩɩ wakat bʋgo?
13 A Pɩɛɛr sẽn yeel bũmb ning a lɛta a yiibã pʋsẽ wã sõngda sẽn paam-b zaeebã la piis a taabã fãa tɩ b tõog tɩ b saagrã kell n yɩ vẽeneg b yamẽ. A bilgame tɩ yaa a Zeova nimbãan-zoeerã yĩng n kɩt tɩ b paam b saagrã lakae, pa b tʋʋm-sõma yĩng ye. A Pɩɛɛr yeela woto: “Gũus-y y mense, n gũ y tẽebã pidsgu, n da yuus ne bark ning yãmb sẽn na n paam a Zezi Kirist waoong wakatã ye.” (1 Pɩɛ. 1:13) Kiristã waoongã yaa wakat ning a sẽn na n keo neb nins sẽn sak-a wã, la a sãam nin-wẽnsã wa a Zeova sẽn datã.—Karm-y 2 Tesalonik rãmb 1:6-10.
14, 15. a) Sẽn na yɩl tɩ d saagrã kell n yɩ vẽeneg d yamẽ, bõe la d segd n maane? b) Sagl-bʋg la a Pɩɛɛr kõ-do?
14 Sẽn na yɩl tɩ d saagrã ket n yaa vẽeneg d yamẽ, segdame tɩ d tẽegd wakat fãa tɩ “Zusoabã daar” ta n saame, la d wilgdẽ tɩ d tẽeda rẽ. A Zeova na n sãama rũndã-rũndã goosneema-rãmbã b sẽn bool tɩ “saasã,” ne nin-wẽnsã b sẽn bool tɩ “tẽngã” n paas “dũniyã bũmb fãa.” A Pɩɛɛr yeela woto: “Yãmb ka rat n yɩ neb b yel-manesem sẽn yaa sõma la sẽn sakd Wẽnnaam n gũud bãmb daarã ne datem-kãseng bɩ? Yaa daar ning saasã sẽn na n dɩ bugum n yẽnege, la dũniyã bũmb fãa sẽn na n wɩng wʋsg n yẽnegã.”—2 Pɩɛ. 3:10-12.
15 Dẽ poore, “yĩngr-paalg la tẽn-paalg” n na n zĩndi. Kiristã goosneema wã ne nin-tɩrsã sẽn sakd-a wã na n ledga ninsaalbã goosneema-rãmbã ne b poorẽ dãmbã fãa sẽn yaa nin-wẽnsã. (2 Pɩɛ. 3:13) A Pɩɛɛr sẽn yeel woto wã poore, a wilga d sẽn tõe n maan tɩ d saagrã kell n yɩ vẽeneg d yamẽ, rat n yeel tɩ d sẽn tõe n gũ dũni-paalgã b sẽn pʋlem-dã to-to. A yeelame: “Yaa woto yĩnga, mam zo-nongdse, yãmb sẽn gũud bõn-kãensã, bɩ y maan yãmb sẽn tõe tɛk tɩ bãmb na mik tɩ yãmb bee laafɩ pʋgẽ, tɩ dẽgd tosb ne dõdb kaẽ ye.”—2 Pɩɛ. 3:14.
D VƖƖMD TƖ ZEMS NE D SAAGRÃ
16, 17. a) B sẽn yeel tɩ d tall ‘yel-manesem sẽn yaa sõma’ la d yɩ neb sẽn ‘sakd Wẽnnaamã’ baooda bõe maanego? b) Wãn to la d saagrã na n pidsi?
16 D saagrã pa segd n yɩ vẽeneg d yamẽ bal ye. D sẽn vɩ to-to wã segd n wilgda rẽ. Wa a Pɩɛɛr sẽn tẽeg tõndã, d segd n mao n yɩɩ neb sẽn tat a Zeova yam. D segd n talla ‘yel-manesem sẽn yaa sõma neb nins sẽn ka pʋʋsd Wẽnnaamã sʋka,’ n tũud Wẽnnaam noyã. (2 Pɩɛ. 3:11; 1 Pɩɛ. 2:12) Segdame tɩ d nong d saam-biisã sẽn be dũniyã gill zugã. Woto rat n yeelame tɩ d maan d sẽn tõe fãa tɩ zems-n-taar kell n zĩnd d tigingã pʋgẽ. (Zã 13:35) A Pɩɛɛr yeelame me tɩ d segd n yɩɩ neb sẽn “sakd Wẽnnaam,” rat n yeel tɩ neb sẽn tar a zoodo. Woto baoodame tɩ d pʋʋsd-a ne d sũur fãa, tɩ d karemd Biiblã daar fãa, n zãmsd-a la d bʋgsd a zugu, tɩ d maand zak pʋgẽ zaabr Biibl zãmsgã la d moond ‘Wẽnnaam soolem koe-noogã’ ne yẽesem.—Mat. 24:14.
17 Tõnd ned kam fãa tʋllame n yɩ ned sẽn tat a Zeova yam la sẽn na n wa paam fãagr dũni-wẽn-kãngã sãoongã sasa. D sã n yaa ned a woto, d na n yãa d saagrã pidsgu, rat n yeel tɩ na n wa paama “vɩɩm sẽn ka sɛtã,” “Wẽnnaam sẽn ka tõe n yag ziri sẽn kãab hal [daar zãrã, MN].”—Tɩt 1:2.
[Zãmsgã sogsgã]
[Foto seb-neng 22]
Kiris-neb nins sẽn paam zaeebã paama “dogem-paalg” n tar saagre
[Foto seb-neng 24]
Sõng-y y zakã rãmb tɩ b saagrã kell n yɩ vẽeneg b yamẽ
