Tuhambukuei Nekevelelo Lietu
Tuhambukuei Nekevelelo Lietu
“[Kuna] ekevelelo liomuenyo uhapu, Huku una uhapondola okukemba alaa tunde kohale.” —TITO 1:2.
OMAPULO OKUPITULULA
․․․․․
Oñgeni tutyii okuti keulu kukala ehambu enene tyina omulembulwa atualako nekolelo alo kononkhia?
․․․․․
Oñgeni okufuiswapo kuekevelelo lionongi ononkhuavo tyelikuata nekevelelo liovalembulwa?
․․․․․
Opo ekevelelo lietu lifuiswepo ‘ovituwa patyi viasukuka’ “novilinga vilekesa onthilo na Huku” tuesukisa okukala navio?
1. Oñgeni ekevelelo Jeova etuavela litukuatesako okukoleleya?
APOSTOLU Paulu wapopia okuti Jeova o “Huku wava ekevelelo.” Ayawisako okuti Jeova upondola ‘okutuyulisa nehambu aliho nombembwa mokonda yetavelo lietu, opo tukale nekevelelo enene kepondolo liospilitu sandu.’ (Romanos 15:13) Inkha tukala nekevelelo liapama, matutyivili okukoleleya mu kese tyitateka tyitutumbukila, iya omitima vietu mavikala nehambu enene nombembwa. Ngo Vakristau ovalembulwa, ekevelelo lietu nalio malikala “omphameno yohande, yapama nokuakola” pala Ovakristau ovakuavo. (Hebreus 6:18, 19) Okukakatela mekevelelo lietu momuvo wovitateka, matyitukuatesako okuhasoyo ine okuyekapo ekolelo.—Tanga Hebreus 2:1; 6:11.
2. Omakevelelo patyi evali Ovakristau hono vena? Omokonda yatyi “onongi ononkhuavo” vesuka nekevelelo liovalembulwa?
2 Ovakristau vekahi momuvo uno wonthyulilo, vena omakevelelo evali. Otyihupe ‘tyotyunda otyitutu’ tyo Vakristau ovalembulwa, vena ekevelelo liomuenyo uhankhi keulu, nokukala onohamba, novanakwa kumwe na Kristu Mouhamba wae. (Lucas 12:32; Revelação 5:9, 10) “Otyinyingi otyinene tyovanthu” “tyonongi ononkhuavo” vena ekevelelo liokukala apeho momphangu yombembwa pano pohi, avakatuminwa Nouhamba wa Mesiya. (Revelação 7:9, 10; João 10:16) Onongi ononkhuavo kavapondola okulimbuako okuti eyovo liavo litei kokukuatesako Ovakristau ovalembulwa, “onondenge” mba Kristu nkhele vekahi pano pohi. (Mateus 25:34-40) Ovalembulwa mavapewa ondyambi yavo, mahi ekevelelo lionongi ononkhuavo nalio malifuiswapo. (Tanga Hebreus 11:39, 40.) Tete, tutalei ekevelelo liovalembulwa.
“EKEVELELO LIOMUENYO LIO VAKRISTAU OVALEMBULWA”
3, 4. Oñgeni Ovakristau ovalembulwa “vatyitwa otyivali pala ekevelelo liomuenyo,” iya ekevelelo olio oityi?
3 Apostolu Petulu momikanda vivali ahonekela ovalembulwa, weveihana okuti “ovaholovonwa.” (1 Pedro 1:1) Wahangununa nawa ekevelelo ewa liapewa otyunda otyitutu. Momukanda wae wotete, Petulu wahoneka okuti: “Huku, He ya Tatekulu Jesus Kristu ahivilikwe, tyetyi monkhenda yae onene tuatyitwa otyivali, pala ekevelelo liomuenyo menyina lietutilo lia Jesus Kristu mononkhia, opo tukamone epingo lihanyoneka, lihasilile nokuhapu. Epingo olio liapakwa keulu pala onwe, mukahi nokupakwa nawa nepondolo lia Huku, menyina liekolelo, pala eyovo maliholololwa momuvo wahulililako. Moluotyo, onwe muhambukwa unene.”—1 Pedro 1:3-6.
4 Omuvalu uhehi wo Vakristau vaholovonwa na Jeova opo vakakale na Kristu moutumini Wouhamba keulu “vatyitwa otyivali” avakala ovana voviveli va Huku mopaspilitu. Valembulwa nospilitu sandu opo vakale onohamba novanakwa kumwe na Kristu. (Revelação 20:6) Petulu wapopia okuti “okutyitwa otyivali” tyiveikulila ondyila “yekevelelo liomuenyo,” oe aihana okuti “epingo lihanyoneka, lihasilile nokuhapu,” vapakelwa “keulu.” Otyo ovalembulwa ‘vahambukilwa unene’ ekevelelo liavo! Mahi, opo vehike mekevelelo olio vesukisa okutualako nekolelo liavo.
5, 6. Oityi Ovakristau ovalembulwa vesukisila okulinga ononkhono opo vaihanwe keulu?
5 Momukanda wae wavali, Petulu walondola Ovakristau ovalembulwa opo ‘valinge vali ononkhono ononene opo vakamone ondyambi yavo vaihanenwa.’ (2 Pedro 1:10) Ankho vena okulinga ononkhono opo vakale novituwa Vioukristau, ekolelo, nonthilo na Huku, nohole novakuatate, noluembia. Petulu wati: “Inkha ovipuka ovio vikala muonwe nokuliyawisa, mavimutyilika okukala tyasoya nokuhaave ovinyango.”—Tanga 2 Pedro 1:5-8.
6 Omututiliswa Kristu wapopila ovakulu vewaneno valembulwa nospilitu mewaneno lio Vakristau votete mo Filadelfia, mo Asia Menor, okuti: “Mokonda muetavela ondaka konthele yekoleleyo liange, na ame mandyimuamena moola yokulolwa, maiya kombanda yoohi aiho, pala okulola vana vekahi kombanda yeheke. Ame ndyikahi nokuya liwa-liwa. Tualako okukakatela muetyi una, opo uhapolwe ekolowa liove nomunthu na umwe.” (Revelação 3:10, 11) Inkha Omukristau omulembulwa ayekapo ekolelo, katambula “ekolowa liomunkhima lihahanyauka,” lipewa vana vaholovonwa vatualako nekolelo alo kononkhia.—1 Pedro 5:4; Revelação 2:10.
OKUNYINGILA MOUHAMBA
7. Ekevelelo patyi ewa Juda apopia momukanda wae?
7 Menima 65 P.K., Juda ondenge ya Jesus wahonekela omukanda ovakuatate vae Ovakristau ovalembulwa, eveihana okuti “vana vaihanwa.” (Judas 1; yeeleka na Hebreus 3:1.) Ankho uhanda okuvehonekela omukanda upopia konthele yekevelelo ewa lieyovo Ovakristau vaihanwa Mouhamba wa Huku keulu ‘vena kumwe.’ (Judas 3) Namphila oe ankho ena ovipuka ovikuavo viakolela pala okuvepopila, pokumanuhula omukanda wae, wapopia konthele yekevelelo ewa lio Vakristau ovalembulwa, ati: “Kuna, una upondola okumuyunga opo muhelipunduke, nokumukalesa tyehena esilo nalike komaiho enkhimano liae, nehambu enene, Huku wike vala, Omuyovoli wetu, menyina lia Jesus Kristu Tatekulu yetu, apewe omunkhima, nounanene, nepondolo, noutumini, tunde komavonge-vonge omanima o konyima, no pahe alo komutwe apeho.”—Judas 24, 25.
8. Ngetyi tyipopia Judas 24, oityi tyilekesa okuti keulu kukala ehambu enene tyina umwe povalembulwa atualako noukuatyili alo kononkhia?
8 Tyotyili, kese umwe Povakristau ovalembulwa vekolelo uhanda okuliyunga opo ahahanyueko. Ekevelelo liavo liatuka Mombimbiliya, oliokuti Jesus Kristu mekevetutilisa kononkhia, avakala nolutu luopaspilitu luhena onkhali, avamoneka kolupala lua Huku nehambu enene. Tyina umwe povalembulwa vekolelo ankhia, una onthumbi yokuti “mapinduluapo nolutu luopaspilitu,” okututililswa “nolutu luahavolo . . . nomunkhima.” (1 Coríntios 15:42-44) Inkha ‘keulu kukala ehambu enene mokonda yomunthu walinga onkhali elivele,’ soka kehambu likala keulu tyina umwe povakuatate oviveli vopaspilitu va Kristu atualako noukuatyili alo kononkhia. (Lucas 15:7) Jeova no noandyu vekolelo mavakahambukwa kumwe na kese mulembulwa, iya apewa ondyambi yae “nehambu enene.”—Tanga 1 João 3:2.
9. Oñgeni okunyingila Mouhamba ‘tyiikula omphitilo ongwa’ pala ovalembulwa vekolelo? Oñgeni ekevelelo olio likalesa ovalembulwa nkhele vekahi pano pohi?
9 Konthele yotyo, Petulu wahonekela Ovakristau ovalembulwa okuti inkha vakakatela mekevelelo liavo mokutualako nekolelo, “mavakaikulilwa omphitilo ongwa yokunyingila mouhamba uhapu wa Tatekulu yetu no Muyovoli Jesus Kristu.” (2 Pedro 1:10, 11) Etyi Petulu ati okunyingila Mouhamba ‘matyikeveikulila omphitilo ongwa,’ ankho ukahi nokupopia omunkhima omunene mavakamona tyina vamaende keulu. Tupu hamwe ankho ukahi nokupopia ononkhano onongwa mbavilapo mavakapewa keulu. Ovalembulwa mavakakala nehambu enene nolupandu tyina vamasoko kekolelo vali nalio. Ekevelelo olio lipameka Ovakristau ovalembulwa nkhele vekahi pano pohi opo vatualeko nekolelo.—1 Pedro 1:13.
‘EKEVELELO’ LIONONGI ONONKHUAVO
10, 11. (a) Onongi ononkhuavo vena ekevelelo patyi? (b) Oñgeni ekevelelo lia pano pohi lielikuata na Kristu, ‘nehololoko liovana va Huku’?
10 Apostolu Paulu wahoneka konthele yekevelelo ewa lioviveli vopaspilitu “ovana va Huku,” okuti “onomphinga” kumwe na Kristu. Konyima apopi ekevelelo lihuvisa Jeova aavela otyinyingi tyonongi ononkhuavo: “Ovietuako aviho [ovanthu] vikevelela nesuko enene ehololoko liovana va Huku [ovalembulwa]. Mokonda ovipuka aviho aetako viapakwa menyoneko, hamokonda yehando liavio, mahi oyehando lia una wevipakamo, opo vikale nekevelelo. Mokonda ovanthu tupu mavakayovoka moupika wokuhanyauka, iya avakala neyovo eewa unene liovana va Huku.”—Romanos 8:14-21.
11 Jeova waavela ovanthu ekevelelo etyi alaa okuti “ombuto” yalaelwe maituyovola “konyoka yokonthuko” Satanasi Eliapu. (Revelação 12:9; Gênesis 3:15) “Ombuto” oyo, tete o Jesus Kristu. (Gálatas 3:16) Nononkhia mbae netutilo, Jesus waavela ovanthu ekevelelo liapama liokuyovolwa konkhali nononkhia. Okufuiswapo kuevevelelo olio kuelikuata “nehololoko liovana va Huku.” Ovalembulwa ovankhimanekwa, onthele yavali “yombuto.” “Mavaholololwa” tyina vamakala na Kristu pokuhanyako ouye wovivi wa Satanasi. (Revelação 2:26, 27) Otyo matyikaetela eyovo onongi ononkhuavo, vana mavatundu mononkhumbi ononene.—Revelação 7:9, 10, 14.
12. Ehololoko liovalembulwa malikaetela ovanthu ouwa patyi?
12 Ovanthu mavakakala neyovo limwe enene mokueenda Kuovityita Ekwi Vioutumini wa Kristu! Pomuvo opo, “ovana va Huku” ovankhimanekwa, ‘mavaholololwa’ vali tyina vamakala ovanakwa kumwe na Kristu, nokuetela ovanthu ouwa wotyilikutila tyeyovo tya Jesus. Ovanthu mavakatuminwa Nouhamba wokeulu, mavakayovoka konkhali no nonkhia. Ovanthu ovataveli, katutu-katutu, “mavakayovoka moupika wokuvola.” Inkha vatualako okukolela mu Jeova mokueenda kuomanima Ovityita Ekwi, nomeheteko liahulililako malikeya konthyulilo Yovityita Ekwi, omanyina avo maakahonekwa apeho “mombuingwa yomuenyo.” Mavakanyingila ‘meyovo eewa unene liovana va Huku.’ (Revelação 20:7, 8, 11, 12) Tyotyili, ekevelelo lihuvisa unene!
TUTUALEIKO NEKEVELELO LIAPAMA
13. Ekolelo lietu liapamena mutyi, iya onalupi Kristu mahololoka?
13 Momikanda vivali Petulu atumwa okuhoneka na Huku, muna ovipuka ovinyingi vikuatesako ovalembulwa no nongi onokhuavo okutualako nekevelelo liapama. Wapopia okuti omakevelelo avo kaatuku kovilinga viavo, mahi o mokankhenda tuhatokalele ka Jeova. Oe wahoneka okuti: “Kalei tyapola pokati nokutala vala kekevelelo lienyi mokankhenda muahatokalele mamupewa pehololoko lia Jesus Kristu.” (1 Pedro 1:13; okatoi) Kristu mahololoka tyina ameya okuyamba ovalanduli vae vekolelo, nokuetela ekoyeso lia Jeova ouye uno uhaumbila Huku.—Tanga 2 Tessalonicenses 1:6-10.
14, 15. (a) Opo tutualeko nekevelelo liapama, opi tuesukisa okutala? (b) Elondolo patyi Petulu aava?
14 Opo tutualeko nekevelelo liapama, tuesukisa okutala, nokuviukisila omuenyo wetu “konthiki ya Jeova” ikahi popepi. Onthiki oyo maiya okuhanyako “eulu” likahiko hono, ine outumini wovanthu, no “ohi,” ine ovanthu ovakalavi “novipuka” viao. Petulu wahoneka okuti: “Muesukisa okukala ovanthu patyi . . . , tyina mukevelela nokuanoñgonoka nawa okuya kuonthiki ya Jeova, muna eulu maliya okusengula notupia iya ovipuka maviya okusenguluka nomutokoto omunene!”—2 Pedro 3:10-12.
15 “Eulu” likahiko hono “nohi” mavikapingwa “neulu epe [outumini Wouhamba wa Kristu] noohi omphe [onkhalelo omphe yovanthu pano pohi].” (2 Pedro 3:13) Konyima Petulu aave elondolo liayandyuluka nawa, konthele “yokukevela” ine okutualako nekevelelo lietu liapama momulao oo wouye omupe, okuti: “Moluotyo, nonthyolwa, mokonda mukevelela ovipuka ovio, lingei ononkhono opo konthyulilo emuvase muasukuka tyihena esilo na limwe, nokuna ombembwa.”—2 Pedro 3:14.
OKUENDELA KUMWE NEKEVELELO LIETU
16, 17. (a) ‘Ovituwa patyi viasukuka’ “novilinga vilekesa onthilo na Huku” tuesukisa okukala navio? (b) Oñgeni ekevelelo lietu malikafuiswapo?
16 Onthue katupameka vala ekevelelo lietu, mahi tupu tuenda monkhalelo yelikuata nekevelelo lietu. Tuesukisa okutala nawa oñgeni tukahi mopaspilitu. “Ovituwa viasukuka” viakutikinya ‘okutualako novituwa oviwa pokati kovanthu vouye,’ okukala novituwa viaviuka. (2 Pedro 3:11; 1 Pedro 2:12) Tuesukisa okukala ‘nohole pokati ketu.’ Otyo tyakutikinya okulinga atyiho tuvila opo tutualeko newaneko novakuatate vetu ouye auho, alo umwe mewaneno lietu. (João 13:35) “Ovilinga vilekesa onthilo na Huku” ovio vina vilekesa oupanga omuwa tuna na Jeova. Otyo tyakutikinya omalikuambelo etu, nokutanga Ombimbiliya kese nthiki, nelilongeso lioulike, nefendelo liombunga, nokuundapa nombili movilinga viokuivisa “onondaka onongwa mbouhamba.”—Mateus 24:14.
17 Kese umwe puonthue, uhanda okupandwa na Jeova, nokuyovolwa tyina ouye uno wovivi ‘wamasenguluka.’ Ngotyo, ekevelelo lietu malikafuiswapo, “ekevelelo liomuenyo uhapu Huku, una uhapondola okukemba alaa tunde kohale.”—Tito 1:2.
[Omapuko Elongeso]
[Olutalatu pefo 22]
Ovakristau ovalembulwa ‘vatyitwa otyivali pala ekevelelo liomuenyo’
[Olutalatu pefo 24]
Pameka ekevelelo liombunga yove
