Manliket ed Ilalo Tayo

“[Wala so] ilalon bilay ya andi-anggaan ya abayag lan insipan na Dios, ya agnayarin mantila.”​—TITO 1:2.

BILANG REPASO

Panon tayon amta ya walay liket ed tawen sano manmatoor so sakey ya alanaan?

Antoy pankonektaan na pakasumpal na ilalo na arum a karnero tan na saray alanaan?

Pian nasumpal so iilaloan tayo, anton ‘masanto ya ugali’ tan ‘gawa a maridios a debosyon’ so nepeg tayon ipatnag?

1. Panon ya ontulong so ilalon inter nen Jehova ed sikatayo pian makapansungdo?

SI Jehova so “Dios a mangiiter na ilalo,” so inkuan nen apostol Pablo. Tan imbaga to ni ya sarag nen Jehova a ‘panoen itayo na gayaga tan deen diad panamegley na pananisia tayo ed sikato, ta pian ondaak tayo ed ilalo diad pakayari na masanton espiritu.’ (Roma 15:13) No malinlinew iyan ilalo ed isip tayo, nasungdoan tayo so antokaman a situasyon tan napano so kapusoan tayo na liket tan deen. Sano wala ray problema, say ilalo tayo et magmaliw a singa “angkla na kamarerwa [a] segurado tan malet,” balanglan alanaan tayo odino arum a karnero. (Heb. 6:18, 19) Ontulong itan pian ag-itayo “niyarawi,” manduaruwa, nisay onkapuy so pananisia tayo.​—Basaen so Hebreos 2:1; 6:11.

2. Anto so ilalo na saray Kristiano natan, tan akin ya interesado so arum a karnero ya aralen so ilalo na saray alanaan?

² Diad sayan panaon na anggaan, akasentroy imano na saray Kristiano ed sakey ed saray duaran klase na ilalo. Say ilalo na saray nakekeran membroy “melag a pulok” na alanaan iran Kristiano et imortal a bilay ed tawen bilang arari tan saserdote kaibay Kristo ed Panarian to. (Luc. 12:32; Apo. 5:9, 10) Say ilalo balet na “baleg ya ulop” na ‘arum a karnero’ et diad paraison dalin ya uleyan na Mesianikon Panarian. (Apo. 7:9, 10; Juan 10:16) Nepeg ya aglingwanan na arum a karnero ya akadepende so kililiktar da diad aktibon panuporta ed saray alanaan ya ‘agagi’ nen Kristo a wadia nid dalin. (Mat. 25:34-40) Awaten na saray alanaan so tumang da, tan seguradon ontan met ed arum a karnero. (Basaen so Hebreos 11:39, 40.) Pantongtongan tayo pa nin unona so ilalo na saray alanaan.

 “AGMANGANGGAN ILALO” NA SARAY ALANAAN

3, 4. Panon ya ‘iyanak lamet diad sakey ya agmanganggan ilalo’ iray alanaan a Kristiano, tan anto itan ya ilalo?

³ Amiduan sinulat nen apostol Pedro iray alanaan a Kristiano ya tinawag ton “saray pinili.” (1 Ped. 1:1) Impaliwawa to so marakdakep ya ilalo na sayan melag a pulok. Inkuan tod unonan sulat to: “Narayew komon so Dios tan Ama na Katawan tayon Jesu-Kristo, ta unong ed baleg a panangasi to et nianak itayo lamet diad sakey ya agmanganggan ilalo diad panamegley na inkioli nen Jesu-Kristo manlapud inaatey, diad agnaderal tan agnarutakan tan ag-onkupas a tawir. Nigana itan ed tawen parad sikayo, a sasalimbengan na pakayari na Dios diad panamegley na pananisia yo parad sakey a kilalaban ya akaparaan lan iparungtal diad kaunoran a panaon. Lapud saya et manliliket kayon maong.”​—1 Ped. 1:3-6.

⁴ Sarayan daiset a Kristiano ya pinili nen Jehova pian nakaiba nen Kristo diad Panarian ed tawen et ‘iyanak lamet’ bilang nilanaan na espiritun ananak na Dios. Sikaray nalanaan na masanton espiritu pian magmaliw ya arari tan saserdote kaibay Kristo. (Apo. 20:6) Imbaga nen Pedro a nakaukolan so ‘kianak lamet’ pian nagamoran day “agmanganggan ilalo,” a tinawag ton “agnaderal tan agnarutakan tan ag-onkupas a tawir” a nigana parad sikara “ed tawen.” Agpankelawan a saray alanaan et ‘manliket a maong’ ed agmanganggan ilalo ra! Balet, say pakaawat dad satan ya ilalo et akadepende ed katooran da.

5, 6. Akin et nepeg a gawaen na saray alanaan so anggaay nayarian da pian naawat day tumang dad tawen?

⁵ Diad komaduan sulat nen Pedro, binilin to ray alanaan a Kristiano ya ‘gawaen day anggaay nayarian dan mansiansia a matoor bilang saray tinawag tan pinili.’ (2 Ped. 1:10) Kaukolan dan panggunaetan a paaligwasen iray Kristianon kualidad a singa say pananisia, debosyon ed Dios, panamabli ed agagi, tan panangaro. Inkuan nen Pedro: “No sarayan bengatla et walad sikayo tan ondaraak iratan, agkayo magmaliw a mangiras odino agmabunga.”​—Basaen so 2 Pedro 1:5-8.

⁶ Oniay inkuan nen Kristo ed saray alanaan a mamasiken diad kongregasyon na Filadelfia ed Asia Minor: “Lapud ginawam so salitan nadngel mo nipaakar ed impansungdok, salimbengan ta ka no oras na subok, ya onsabi ed interon dalin, pian suboken iramay manaayam ditan. Onsabi ak a tampol. Bembenan mon malet so walad sika, pian anggapoy mangala ed koronam.” (Apo. 3:10, 11) Say “maglorian korona ya ag-onkupas” et insipan ed saray pinili a manmatoor anggad patey. No agmanmatoor so sakey ya alanaan a Kristiano, agto itan naawat.​—1 Ped. 5:4; Apo. 2:10.

PAKALOOB ED PANARIAN

7. Anton makapadinayew ya ilalo so sinalambit nen Judas ed sulat to?

⁷ Nen manga 65 C.E., si Judas, ya agi nen Jesus ed ina, et nansulat ed saray kapara ton alanaan ya tinukoy ton saray “atawag.” (Jud. 1; ikompara so Hebreos 3:1.) Plano ton sulatan ira nipaakar ed “kilalaban ya iilaloan” na amin ya alanaan a Kristiano. (Jud. 3) Balet, wala ni ray arum ya kakkaukolan ton ibaga. Anggaman ontan, diad sampot na antikey a sulat to et sinalambit to nin siansia so marakdakep ya ilalo na saray alanaan, inkuan to: “Natan diad samay sakey a makayarin manalimbeng ed sikayo pian agkayo natiror tan agkayo namantsaan ed arap na gloria to tekep na baleg a liket, diad alenleneg a Dios a Manangilaban tayo, diad panamegley nen  Jesu-Kristo a Katawan tayo, so kawalaan komon na gloria, katagyan, pakapanyari tan pakauley manlapud gapoy gapo, natan, tan diad andi-anggaan.”​—Jud. 24, 25.

8. Mitunosan ed Judas 24, antoy mangipapanengneng ya walay liket ed tawen sano manmatoor so sakey ya alanaan?

⁸ Seguradon labay na saray matoor ya alanaan so nasalimbengan ed ‘pakatiroran’ odino ed antokaman ya pansengegay agda panmatoor tan manresultad kadederal. Unong ed Biblia, paolien ira nen Jesu-Kristo tan sikaray perpekto ed espiritual ya onarap ed Dios. Sano matoor anggad patey so sakey ya alanaan, seguradon sikatoy ‘paolien ed espiritual a laman,’ “ed agkabubulok” tan “ed gloria.” (1 Cor. 15:42-44) No “panliketan ed tawen so sakey a nagbabawin managkasalanan,” di lalon panlikliketan ed tawen no nanmatoor anggad patey so sakey ed saray alanaan ya agagi nen Kristo. (Luc. 15:7) On, manliket si Jehova tan saray matoor ya espiritun pinalsa sano aawaten na sakey ya alanaan so tumang to “tekep na baleg a liket.”​—Basaen so 1 Juan 3:2.

9. Panon a say pakaloob na saray matoor ya alanaan ed Panarian et “mabunbunlok a niiter,” tan antoy epekto na saya ed saray alanaan a wadia nid dalin?

⁹ Mipadpara, insulat nen Pedro ed saray alanaan ya no manmatoor ira, “mabunbunlok a niiter ed [sikara] so pribilehyon pakaloob ed andi-anggaan a panarian na Katawan tan Manangilaban tayo, si Jesu-Kristo.” (2 Ped. 1:10, 11) Sanen imbaga nen Pedro ya say pakaloob da ed Panarian et “mabunbunlok a niiter,” nayarin say tutukoyen to et magloria so iloob dad tawen. Nayarin ipapanengneng met na saya ya anggapo lay mipara ed bendisyon a naawat na saray alanaan ya nansagpot anggad patey. Agaylay panlikliket tan pisasalamat da sano nanonotan day matoor ya impanbilay da. Seguradon sayan ilalo et mamaseseg ed saray alanaan a wadia nid dalin pian ‘iparaan day nonot da parad impasyan kimey.’​—1 Ped. 1:13.

 “ILALO” NA ARUM A KARNERO

10, 11. (a) Anto so ilalo na arum a karnero? (b) Panon a mikonektaan so ilalo na arum a karnero ed si Kristo tan ed “kiparungtal na ananak na Dios”?

¹⁰ Insulat nen apostol Pablo so nipaakar ed marakdakep ya ilalo na saray nilanaan na espiritun “ananak na Dios” bilang “tomatawir a kaiba nen Kristo.” Insan to sinalambit so alay abig ya ilalon iter nen Jehova ed agnabilang ya arum a karnero: “Saray [totoon] pinalsa a manaalagar ed kiparungtal na ananak na Dios [saray alanaan] et maniilalon maong. Ta saray pinalsa et nipasakop ed kaapaan, aliwan lapud panlabay da noagta diad panamegley na samay angipasakop ed satan, unong ed ilalo a nibulos met iray pinalsa ed impakaaripen ed kabubulok pian magmaliw iran ananak na Dios a walaan na maglorian kawayangan.”​—Roma 8:14-21.

¹¹ Inikdan nen Jehova na “ilalo” so katooan sanen insipan to ya diad panamegley na “bini” et iliktar to ra manlapud “daan ya uleg,” si Satanas a Diablo. (Gen. 3:15, NW; Apo. 12:9) Say manunan kabiangan na satan a “bini” et si Jesu-Kristo. (Gal. 3:16) Diad impatey tan inkioli nen Jesus, sikatoy angitarya ed katooan na malet ya ilalo, say kibulos manlapud impakaaripen ed kasalanan tan ipapatey. Say pakasumpal na sayan ilalo et mikonektaan ed “kiparungtal na ananak na Dios.” Saray niglorian alanaan so onkokomaduan kabiangan na “bini.” Sikaray ‘iparungtal’ sano nakaiba ray Kristo a maneral ed mauges a sistema nen Satanas. (Apo. 2:26, 27) Saya so manresulta ed kiliktar na arum a karnero a nanlapud baleg ya irap.​—Apo. 7:9, 10, 14.

12. Anto ran marakdakep a bendisyon ed totoo so ipagamor na “kiparungtal” na saray alanaan?

¹² Seguradon nainawaan iray totoon “pinalsa” legan na Sanlibon Taon ya Uley nen Kristo! Diad satan, saray “ananak na Dios” et nagkalalon ‘niparungtal’ sano onkiwas la ra bilang saserdoten kaiba nen Kristo, tan ipagamor dad totoo iray bendisyon na dondon bagat nen Jesus. Bilang sakop na mangatatawen a Panarian, naeksperiensya lad satan na totoon “pinalsa” so kibulos manlapud saray epekto na kasalanan tan patey. Saray matulok a totoo et kalkalnan “nibulos . . . ed impakaaripen ed kabubulok.” No manmatoor ira ed si Jehova ed loob na Sanlibon Taon tan legan na unor a subok diad sampot na satan, permanentin nisulat so kangaranan da diad “lukot na bilay.” Tan makaloob ira ed ‘maglorian kawayangan na ananak na Dios.’ (Apo. 20:7, 8, 11, 12) Agaylan dakep ya ilalo!

PANSIANSIAEN A MABILABILAY SO ILALO TAYO

13. Iner aka-base so ilalo tayo, tan kapigan niparungtal so Kristo?

¹³ Saray duaran pinuyanan a sulat nen Pedro et makatulong a maong ed saray alanaan tan ed arum a karnero pian mansiansian mabilabilay so ilalo ra. Indanet ton say ilalo ra et ag-akabase ed kimey da, noagta diad agnaparaan a kaabigan nen Jehova. Insulat to: “Manlikas kayon maong; iteen yoy ilalo yo ed agnaparaan a kaabigan ya ipagamor ed sikayo sano omparungtal lay Jesu-Kristo.” (1 Ped. 1:13) Niparungtal so Kristo sano sikatoy onsabi pian tumangan iray matoor a papatumbok to tan ipaakseb so panangukom nen Jehova ed saray mauges.​—Basaen so 2 Tesalonica 1:6-10.

14, 15. (a) Pian mansiansian mabilabilay so ilalo tayo, iner tayo isentro so imano tayo? (b) Anto so insimbawa nen Pedro?

¹⁴ Pian mansiansian mabilabilay so ilalo tayo, kaukolan ya isentro tayoy imano tan kabibilay tayo ed onsasabin “agew nen Jehova.” Satan so maneral ed kaplesan a “katawenan” odino uley na too, tan “dalin,” say mauges a katooan tan saray “bengatlan” walad saratan. Insulat nen Pedro: “Imano yoy inkatoo yo, . . . legan ya  aalagaren tan sankanonot yo lawas so isabi na agew nen Jehova, a diad satan et naderal lay katawenan lapud napoolan iratan tan natunaw iray bengatlan walad tawen tan dalin lapud ampetapetang iratan!”​—2 Ped. 3:10-12.

¹⁵ Saray kaplesan a “katawenan” tan “dalin” et salatan na “balon katawenan [say Panarian nen Kristo] tan balon dalin [saray matunong a totoo].” (2 Ped. 3:13) Insan prangkan animbawa si Pedro nipaakar ed ‘panaalagar’ odino panggugunaet tayon pansiansiaen a mabilabilay so ilalo tayo ed sayan insipan a balon mundo. Inkuan to: “Kanian inad-arok ira, lapud aalagaren yo irayan bengatla, gawa yoy anggaay nayarian yo pian naromog to kayon andiay mantsa tan andiay pakabalawan tan walad kareenan.”​—2 Ped. 3:14.

MANBILAY UNONG ED ILALO TAYO

16, 17. (a) Anton ‘masanto ya ugali’ tan ‘gawa a maridios a debosyon’ so nepeg tayon ipatnag? (b) Panon a nasumpal so iilaloan tayo?

¹⁶ Nepeg ya agti labat pansiansiaen a mabilabilay so ilalo tayo noagta manbilay itayo a mitunosan ed satan. Kaukolan ya imanoen tayoy espiritualidad tayo. Say ‘masanto ya ugali’ et kabaliksan toy ‘pamasiansiad maabig ya ugali tayo ed limog na saray totoo ed mundo’ diad panggawa ed no antoy ibabaga na Dios ya duga. (2 Ped. 3:11; 1 Ped. 2:12) Nepeg a ‘manaaroan tayo.’ Kaibad saya so panggawad anggaay nayarian tayon pansiansiaen so pankakasakey na sankamundoan ya impanaagi, pati diad lokal a kongregasyon tayo. (Juan 13:35) Saray ‘gawa a maridios a debosyon’ et ontutukoy ed pansasagpot tayo pian onapit so relasyon tayod si Jehova. Lalanoren na saya so masimoon a pikakasi tayo, inagew-agew a panagbasa na Biblia, aralem a personal ya panagaral, panagdayew na pamilya, tan aktibon pibibiang ed panangipulong na “maong a balita na panarian.”​—Mat. 24:14.

¹⁷ Labay na balang sakey ed sikatayo so abobonan nen Jehova tan niliktar sano sayan mauges a sistema et “natunaw.” Diad satan et panliketan tayo la so pakasumpal na iilaloan tayon “bilay ya andi-anggaan ya abayag lan insipan na Dios, ya agnayarin mantila.”​—Tito 1:2.

[Tepetepet Parad Panagaral]

[Litrato ed pahina 22]

Saray alanaan a Kristiano et ‘iyanak lamet diad sakey ya agmanganggan ilalo’

[Litrato ed pahina 24]

Pansiansiam a mabilabilay so ilalo na pamilyam