Laga Nos Alegrá den Nos Speransa
“[Nos tin] e speransa di bida eterno ku Dios, kende no por gaña, a primintí hopi tempu pasá.”—TITO 1:2.
1. Kon e speransa ku Yehova ta duna nos por yuda nos perseverá?
YEHOVA ta “e Dios ku ta duna speransa.” Despues di a ekspresá e palabranan ei, apòstel Pablo a bisa ku Yehova por ‘yena nos ku pleno goso i pas pa medio di nos konfiansa den dje, pa asina nos por abundá den speransa ku poder di spiritu santu.’ (Rom. 15:13) Si nos ta abundá den speransa, nos lo por soportá kualke situashon ku presentá, sin pèrdè nos goso i pas. Pues, sea ku nos ta kristian ungí òf di e otro karnénan, si nos ta abundá den speransa, esei lo ta ‘un anker sigur i firme pa nos alma.’ (Heb. 6:18, 19) Sí, ora nos ta pasa den momentonan difísil, nos mester tene duru na nos speransa, pasobra esaki lo yuda nos pa nos no kuminsá duda i drif bai for di e fe.—Lesa Hebreonan 2:1; 6:11.
2. Kua dos speransa kristiannan tin awe, i dikon e ‘otro karnénan’ ta interesá den e ungínan?
2 Tur kristian ku ta biba den e tempu di fin akí tin un speransa. Esnan ungí, esta e restu di e “tou chikitu,” ku ta riba tera tin e speransa di risibí bida inmortal den shelu; nan lo sirbi komo rei i saserdote huntu ku Kristu den e Reino di Dios. (Luk. 12:32; Rev. 5:9, 10) E ‘otro karnénan,’ ku ta un kantidat muchu mas grandi, tin e speransa di biba pa semper den paradeis riba tera; nan lo ta súpditonan di e Reino Mesiániko. (Rev. 7:9, 10; Huan 10:16) No opstante, e otro karnénan no mester lubidá nunka ku nan salbashon ta dependé di e manera ku nan ta apoyá Kristu su “rumannan” ungí ku ainda ta riba tera. (Mat. 25:34-40) Na e debido tempu, e ungínan lo haña nan rekompensa, i e speransa ku e otro karnénan tin tambe lo bira realidat. (Lesa Hebreonan 11:39 i 40.) Pero awor, laga nos analisá promé e speransa ku e ungínan tin.
E “SPERANSA BIBU” DI KRISTIANNAN UNGÍ
3, 4. Kon kristiannan ungí ta “nase di nobo pa un speransa bibu,” i kiko e speransa ei ta enserá?
3 Apòstel Pedro a dirigí dos karta na e kristiannan ungí, kendenan el a yama “esnan skohí.” (1 Ped. 1:1) Den e kartanan akí, el a duna detaye di e speransa maravioso ku e trupa chikitu akí tin. Den su promé karta, el a skirbi: “Alabá sea e Dios i Tata di nos Señor Hesukristu, pasobra di akuerdo ku su gran miserikòrdia, el a laga nos nase di nobo pa un speransa bibu pa medio di e resurekshon di Hesukristu for di morto, pa un herensia ku no por kaba na nada, ku ta sin mancha i ku no ta marchitá. Esei ta reservá pa boso den shelu, boso ku Dios ta protehá pa medio di su poder pasobra boso tin fe. Dios ta protehá boso pa un salbashon ku ta kla pa keda revelá den tempu di fin. Debí na esaki boso ta alegrá mashá.”—1 Ped. 1:3-6.
4 Yehova a skohe un kantidat limitá di kristian pa sirbi huntu ku Kristu den e Reino selestial. E kristiannan akí ta “nase di nobo” ya ku nan ta ser engendrá pa spiritu santu; asina nan ta bira yunan di Dios. Ademas, nan ta ser ungí ku spiritu santu pa bira rei i saserdote huntu ku Kristu. (Rev. 20:6) Pedro a bisa ku e ‘nasementu di nobo’ akí ta duna nan “un speransa bibu,” loke el a deskribí komo “un herensia ku no ta kaba na nada, ku ta sin mancha i ku no ta marchitá.” Anto el a bisa ku e herensia akí ‘ta reservá pa nan den shelu.’ P’esei, no ta nada straño ku e ungínan ta “alegrá mashá” den nan speransa bibu. Pero ta solamente si nan keda fiel, nan speransa lo bira realidat.
5, 6. Dikon kristiannan ungí mester hasi tur nan esfuerso pa nan por ta sigur di nan yamamentu?
5 Den su di dos karta, Pedro a urgi kristiannan ungí pa nan ‘hasi tur nan esfuerso pa nan por ta sigur di nan yamamentu i skohementu.’ (2 Ped. 1:10) Nan mester traha duru pa kultivá kualidatnan kristian, manera fe, deboshon na Dios, kariño pa rumannan i amor. Pedro a bisa nan: “Si boso tin e kualidatnan akí na abundansia, boso lo no sinta pòrnada ni keda sin duna fruta.”—Lesa 2 Pedro 1:5-8.
6 Kristu a bisa e ansianonan ungí di e kongregashon di Filadelfia na Asia Menor: ‘Komo ku boso a sigui e ehèmpel di mi perseveransia, ami tambe lo protehá boso durante e ora di prueba ku lo bini riba henter e tera pa pone esnan ku ta biba riba dje na prueba. Mi ta bini pronto. Sigui tene duru na loke boso tin, pa ningun hende no kita boso korona.’ (Rev. 3:10, 11) Beibel ta primintí ku esnan skohí ku keda fiel te na morto lo risibí “e korona di gloria ku no ta marchitá.” Pues, si un kristian ungí bira infiel, lo e no risibí e korona ei.—1 Ped. 5:4; Rev. 2:10.
UN GLORIOSO ENTRADA DEN E REINO
7. Ki speransa maravioso Hudas a menshoná den su karta?
7 Alrededor di aña 65 di nos era, Hudas, mitar ruman di Hesus, tambe a skirbi e kristiannan ungí un karta. Den e karta ei, el a referí na su kompañeronan ungí komo “esnan yamá.” (Hudas 1; kompará ku Hebreonan 3:1.) Hudas su intenshon tabata pa skirbi nan tokante e glorioso speransa di salbashon ku kristiannan ungí “tin en komun.” (Hudas 3) Pero debí ku tabatin otro asuntunan urgente ku e mester a skirbi nan tokante dje, e no a hasi esei. Ma na final di su karta kòrtiku, el a hasi menshon di e speransa maravioso ku kristiannan ungí tin. El a skirbi: “Awor bon, Dios por protehá boso pa boso no trompeká, i e por pone boso para sin mancha, ku gran goso, dilanti di su gloria. Na e úniko Dios ei, nos Salbador pa medio di nos Señor Hesukristu, sea gloria, mahestat, poder i outoridat pa tur e eternidat ku a pasa, pa awor i te den tur eternidat.”—Hudas 24, 25.
8. Kon Hudas 24 ta indiká ku tin goso den shelu ora un ruman ungí muri fiel na Yehova?
8 Sin duda, tur fiel kristian ungí ke pa Dios protehá nan pa nan “no trompeká,” esta bira infiel, i ser destruí. Nan tin e speransa ku Hesukristu lo lanta nan for di morto komo kriaturanan selestial perfekto pa asina nan por presentá dilanti di Dios. Sí, ora un kristian ungí muri fiel na Yehova, lo e ser ‘lantá den gloria i ku un kurpa spiritual, ku lo no kaba na nada.’ (1 Kor. 15:42-44) Beibel ta bisa ku ‘ora ún pekadó arepentí tin goso den shelu.’ Awor, bo por imaginá bo kuantu goso lo tin den shelu ora ún di Kristu su rumannan ungí ku spiritu santu a keda fiel te na morto? (Luk. 15:7) Sí, tantu Yehova komo e kriaturanan selestial lo alegrá huntu ku e persona ungí ku lo risibí su rekompensa ku “gran goso.”—Lesa 1 Huan 3:2.
9. (a) Segun Pedro, ki rekompensa e kristiannan ungí por ta sigur di dje si nan keda fiel te na morto? (b) Ki efekto e speransa akí tin riba e ungínan ku ainda ta riba tera?
9 Pedro tambe a skirbi e kristiannan ungí ku nan por ta sigur di nan yamamentu si nan keda fiel te na morto. El a bisa nan: “Boso lo risibí un entrada glorioso den e Reino eterno di nos Señor i Salbador Hesukristu.” (2 Ped. 1:10, 11) Sí, nan entrada den e Reino selestial lo ta “glorioso.” Podisé Pedro tabata ke men tambe ku nan lo risibí hopi bendishon den shelu. Ora e rumannan ungí kòrda riba nan bida riba tera, nan lo keda kontentu ku nan a keda fiel te na morto. No tin duda, e speransa akí ta duna e kristiannan ungí ku ainda ta riba tera forsa pa sigui ‘faha nan mente pa aktividat.’—1 Ped. 1:13.
E SPERANSA DI E OTRO KARNÉNAN
10, 11. (a) Ki speransa e otro karnénan tin? (b) Ki relashon tin entre e speransa pa biba riba tera i Kristu i e ‘revelashon di e yunan di Dios’?
10 Apòstel Pablo a skirbi e ‘yunan di Dios,’ esta e kristiannan ungí ku spiritu santu, tokante nan speransa glorioso komo “heredero” huntu ku Kristu. Despues, el a hasi menshon di e maravioso speransa ku Yehova ta ofresé e otro karnénan, ku ta un kantidat ilimitá. Pablo a bisa: “Kreashon [esta hende] ta spera ku gran ekspektativa riba revelashon di e gloria di e yunan di Dios [esta e ungínan]. Pasobra kreashon a keda sometí na un bida di banidat, no di su mes boluntat, sino pa boluntat di Dios ku a somet’é a base di e speransa akí: kreashon mes tambe lo ser librá di sklabitut na un kurpa ku ta kaba na nada i lo tin e glorioso libertat di e yunan di Dios.”—Rom. 8:14-21.
11 Yehova a duna humanidat speransa ora el a primintí ku, pa medio di e “simia” primintí, lo e libra nan for di gara di “e kolebra original,” ku ta Satanas e Diabel. (Rev. 12:9; Gén. 3:15) Hesukristu ta e parti prinsipal di e “simia.” (Gal. 3:16) Hesus, pa medio di su morto i resurekshon, a hasi posibel ku humanidat por tin e speransa di ser librá di sklabitut na piká i morto. E speransa akí tin di haber ku e ‘revelashon di e yunan di Dios.’ Kon asina? Wèl, komo e parti sekundario di e “simia,” e ungínan ta ser ‘revelá’ ora nan yuda Kristu destruí Satanas su mundu malbado. (Rev. 2:26, 27) Anto esei lo nifiká salbashon pa e otro karnénan ku ta sali for di e tribulashon grandi.—Rev. 7:9, 10, 14.
12. Ki bendishon glorioso e revelashon di kristiannan ungí lo trese pa humanidat?
12 Kristu su Reinado di Mil Aña lo trese berdadero alivio pa e “kreashon,” esta humanidat. Durante e periodo ei, “e yunan di Dios” lo ser ‘revelá’ na un otro manera. Huntu ku Kristu, nan lo sirbi komo saserdote i yuda humanidat risibí e bendishonnan di Kristu su sakrifisio di reskate. Bou di e gobernashon di e Reino di Dios, hende obediente gradualmente “lo ser librá di sklabitut na un kurpa ku ta kaba na nada.” Sí, nan lo ser librá di e efektonan di piká i morto. Anto si nan keda fiel na Yehova durante e Milenio i durante e último prueba ku ta bini na final di esaki, nan nòmber lo ser skirbí permanentemente den “e buki di bida.” Nan lo haña “e glorioso libertat di e yunan di Dios.” (Rev. 20:7, 8, 11, 12) Ki un speransa maravioso!
LAGA NOS TENE NOS SPERANSA BIBU
13. Di kiko nos speransa ta dependé, i na ki tempu Kristu lo keda revelá?
13 E dos kartanan ku Pedro a skirbi ta kontené hopi informashon balioso ku por yuda tantu e kristiannan ungí komo e otro karnénan tene nan respektivo speransa bibu. Pedro a indiká ku nan speransa no ta dependé di nan obranan, sino di Yehova su bondat inmeresí. El a skirbi: “Mantené boso sano huisio kompletamente; pone boso speransa den e bondat inmeresí ku lo ser mustrá na boso na e revelashon di Hesukristu.” (1 Ped. 1:13) Kristu lo keda revelá ora e bini pa rekompensá su fiel siguidónan i pa destruí e malbadonan.—Lesa 2 Tesalonisensenan 1:6-10.
14, 15. (a) Kon nos por tene nos speransa bibu? (b) Kiko Pedro a konsehá nos?
14 Pa tene nos speransa bibu, nos mester keda kòrda ku e “dia di Yehova” ta bini pronto. I nos bida mester demostrá ku nos ta konsiente di esaki. Sí, Yehova lo destruí “shelu,” esta gobernashon humano, i tambe “tera,” esta hende malbado, i su “elementonan.” Pedro a skirbi: “Ki sorto di hende boso mester ta . . . segun ku boso ta spera i kòrda semper riba e binida di e dia di Yehova! Durante e dia ei vlam di kandela lo destruí shelu, i e elementonan lo dirti di e kayente intenso.”—2 Ped. 3:10-12.
15 E “shelu” i “tera” aktual lo ser remplasá respektivamente pa un “shelu nobo [Kristu su gobernashon] i un tera nobo [un sosiedat nobo riba tera].” (2 Ped. 3:13) I Pedro a bisa nos bon kla kiko nos mester hasi segun ku nos ta “spera” e shelu nobo i e tera nobo ei; ku otro palabra, kon nos por tene nos speransa bibu. El a bisa: “P’esei, mi rumannan stimá, komo ku boso ta spera riba e kosnan akí, hasi tur boso esfuerso pa Dios haña boso finalmente sin mancha, sin defekto i na pas.”—2 Ped. 3:14.
LAGA NOS BIBA NA ARMONIA KU NOS SPERANSA
16, 17. (a) Kiko un “kondukta santu” ta enserá, i kiko ta e “obranan ku ta demostrá deboshon na Dios?” (b) Kon nos speransa lo ser realisá?
16 Sí, no solamente nos mester tene nos speransa bibu, ma nos tin ku biba tambe na armonia kuné. Manera Pedro a konsehá, nos mester hasi esfuerso pa nos ta e sorto di persona ku tin Yehova su aprobashon. Pues, na promé lugá nos mester tin un “kondukta santu.” Esaki ta enserá: “mantené un kondukta ekselente meimei di hende di e nashonnan,” hasiendo loke ta korekto den bista di Dios. (2 Ped. 3:11; 1 Ped. 2:12) Di dos, nos mester “stima” nos rumannan. Esei ta enserá ku nos mester hasi nos máksimo esfuerso pa mantené union den nos hermandat mundial, kuminsando den nos mes kongregashon. (Huan 13:35) Di tres, nos mester tin “obranan ku ta demostrá deboshon na Dios.” Esakinan ta enserá kosnan ku ta fortalesé nos relashon ku Yehova, manera por ehèmpel orashon, lesamentu diario di Beibel, estudio personal profundo, adorashon komo famia i partisipashon aktivo den e trabou di prediká e ‘bon notisia di Reino.’—Mat. 24:14.
17 Nos tur ke ta e sorto di persona ku Yehova ta aprobá i ku lo e salba ora e “destruí” e mundu malbado akí. E ora ei, nos speransa lo bira realidat, esta, “e speransa di bida eterno ku Dios, kende no por gaña, a primintí hopi tempu pasá.”—Tito 1:2.
[Preguntanan di Estudio]
[Plachi na página 22]
Kristiannan ungí ta “nase di nobo pa un speransa bibu”
[Plachi na página 24]
Tene boso speransa bibu komo famia
