Doldeu a Rengud er a Omeltked
Doldeu a Rengud er a Omeltked
“[Ngar er ngii a] omeltked el mengiil er a diak a ulebengelel klengar, el le dillii a Dios el diak lomulak, er a ngar a mong.”—TITUS 1:2.
NGSEBECHEM EL ONGER?
Kede mekerang e medengei el kmo ngmo er ngii a deurreng er a eanged sel lemelemii a blakerreng er ngii a ta er a rengellitel?
A omeltkir a rengellitel ngerang rullii er a omeltkir a rengodech el sib?
A bo desa otutel a omeltked, e ngua ngera el “chedaol blekeradel” me a “chomeluu ra Dios” a kired el olecholt er ngii?
1. A omeltked el lebilskid a Jehovah, ngmekerang e ngosukid el mo outekangel?
A JEHOVAH a “Dios er chomelatk.” Me a apostol el Paulus a dilechelii el kmo, ngsebechel el ‘mekekemiu ra bek el deourreng ma budech el ngara kloumera el mei, me bo lolsibes chomelatk er kemiu loeak a [oureor el klisichel a Dios].’ (Rom 15:13) Sel lobeketakl a uldesued er tia el omelatk, e ngmo sebeched el outekangel a ngii di el mondai e melemolem el dmeu a rengud, e chelellakl a uldesued. Me sel bo lemeringel a klengar, e tia el omelatk a sebechel el mo ua “ultebechel el diak lolmesim el uak ra rengud,” el kirir a rengellitel me a rebebil el Kristiano. (Hebru 6:18, 19) A dorreked er a omeltked e ngdiak “doberius el mo cheroid,” el uchul e ngmo mechitechut a klaumerang er kid.—Monguiu er a Hebru 2:1; 6:11.
2. Ngera eru el omeltkir a Rekristiano er chelechang? E ngera uchul me a rengodech el sib a semeriar er sel omelatk el lobang a rengellitel?
2 Ngar er ngii a eru el kakerous el omelatk er a Rekristiano er chelechang. A remedechel el chedal a “kekerel delebechel” er a rengellitel el Kristiano a oba omelatk er a diak a ulebengelel el klengar el ngar er a eanged. Te mo king e prist el lobengkel a Kristus el ngar er a Rengedel. (Lukas 12:32; Chocholt 5:9, 10) E a diak el mochur el “kloul seked” er a ‘ngodech el sib’ a bai oba omelatk el mo kiei el diak a ulebengelel el ngar er a paradis el chutem el chederedall er a Rengedel a Messias. (Chocholt 7:9, 10; Johanes 10:16) Tirke el ngodech el sib a diak el kirir el obes el kmo a osobelir a ultuil er a ngelsurir el mo er a rengellitel el “odam” er a Kristus el dirk ngar er tia el chutem. (Matteus 25:34-40) A rengellitel a mo ngmai a omeksullir me a rengodech el sib a dirrek el mo omes a otutel a omeltkir. (Monguiu er a Hebru 11:39, 40.) A kot e bo dorriter er a omelatk er a rengellitel.
A ‘DINGAR LOMELTKIR’ A RENGELLITEL EL KRISTIANO
3, 4. Ngmekerang a rengellitel el Kristiano e ‘mechell el beches’ e mo oba “dingar lomelatk”? E tiang ngera el omelatk?
3 A apostol el Petrus a liluches a eru el babier el mo er a rengellitel el Kristiano “el lullilt er tir a Dios.” (1 Petrus 1:1, 2) Ngmilsaod er a kmal ungil el omelatk el lobang a kekerei el delebechel. Ngar er a kot el babilengel e ngkmo: “Le modanges a Dios el Demal a Rubak er kid el Jesus Kristus! E ngobdois el klechubechub er ngii a uchul me ngmilechellid el beches e lilia er kid a dingar lomelatk loeak chokisel a Jesus Kristus ra chelsir ar mla mad, e rirellemiu el mo oudiukes er sel diak le ngemed el ka le mukidokel el diak le moalech el ulatek ra eanged el kiriu, el kloumera uchul ma klisichel a Dios a mengkar er kemiu, el kirel me lekor kemiu cholsobel el mo chemolt er sel uriul taem. Tia uchul me ngtedeb el mcharm ra bek el bedengel chomengarm, e di ousiangel el dmeu a rengmiu.”—1 Petrus 1:3-6.
4 A kekerei el delebechel er a Rekristiano el mlengilt er a Jehovah a mo ‘mechell el beches.’ Ngoeak a chedaol el klisichel, e a Jehovah a merodel er tir el mo ngelekel e mengilt er tir el mo king e prist el obengkel a Kristus el ngar er a eanged. (Chocholt 20:6) Sel ‘lemechell el beches’ e te mo oba “dingar lomelatk.” Ngera tia el omelatk? A Petrus a milsaod er sel teletelel a diak a ulebengelel el klengar el bo lobang el kmo, ngdiak bo lengemed, e uleketmokl el kirir el ngar er a eanged. Tia el omelatk a mo uchul a klou el deurreng er a rengellitel! Engdi a bo lenguu tia el omelatk e ngkirir el melemolem el blak a rengrir.
5, 6. Ngera me a Rengellitel el Kristiano a kirir el melemolem el blak a rengrir?
5 Ngar er sel ongeru el babilengel, e a Petrus a milengelechel er a rengellitel el Kristiano el kmo lemengal “mo blak a rengmiu e mutebechel a ikel ilekor kemiu lokedong ma ngilt.” (2 Petrus 1:10) Ngkirir el omekeroul aike el blekeradel el ua klaumerang, me a omeluu er a Dios me a bltikerreng. Me a Petrus a dilu el kmo: “Le ikal tekoi a le ngarngii er kemiu e lorael el mo obdois, e . . . ngdiak lak bo mourodech.”—Monguiu er a 2 Petrus 1:5-8.
6 A Kristus a dilu er a rengellitel el mechuodel el ngar er a ongdibel er a Filadelfia er a beluu er a Asia Minor el kmo: “Ke mlo olab a tikingek el kirel a ducherreng, misei e ak mo kokerengau er sel sikang er chomengarm el mochu er ngii ra belulechad el rokir, el kirel mengarm er tirikei el kiei ra belulechad. Ak dimereched lekong; me moreked a ikel molab, me lak a chad el mereberii a krone er kau.” (Chocholt 3:10, 11) A rengellitel el Kristiano el melemolem el blak a rengrir el mo er a kodellir a mo nguu a “krone ra klebkall.” Engdi ngike el loridii a blakerreng er ngii, a diak bo lenguu sel krone.—1 Petrus 5:4; Chocholt 2:10.
A SISEBELLIR EL MO ER A RENGED
7. Ngera el ungil el omelatk a lulsaod er ngii a Judas el ngar er a babilengel?
7 Ngar er a bekord el rak er a 65, e a ochellel a Jesus el Judas a milluches el mo er “tirikel mlokedong,” el tir a rengellitel el Kristiano el uai ngii. (Judas 1; momekesiu er a Hebru 3:1.) Ngmle soal el meluches el mo er tir el kirel sel omelatk er a olsobel el ledul lobang. (Judas 3) Alta e ngmle kirel el mesaod a bebil el orechudel el tekoi, engdi ngdirrek el milsaod er sel kmal ungil el omelatk er a rengellitel el Kristiano er a ulebengelel a babilengel er a loluches el kmo: “Ngikel sebechel mengkar er kemiu el rullemiu el mo diak mesibas e dirrek el rullemiu el mo diak a telemelliu e oba deourreng el dechor er medal a klebkellel, el dital Dios, el Osobeled loeak a Jesus Kristus el Rubak er kid, le bor ngii a klebkall, ma klisichel a klebkall, ma klisiich, ma klisichel chomerreder ra uchelel a taem ra belulechad, me chelechang ma mora diak a ullebengelel.”—Judas 24, 25.
8. Kede mekerang e medengei el kmo ngmo er ngii a deurreng er a eanged sel lemelemii a blakerreng er ngii el mo lmuut er a kodall a ta er a rengellitel?
8 Ngbleketakl el kmo a derta el ngellitel el Kristiano a soal a Dios a lomekerreu er ngii, me lak lemesibas me a lechub e lerellii a tekoi el mo oridii a kengei er a Dios el mo uchul a kodellel. A omeltkir a kmo a Jesus Kristus a mo olekiis er tir er a kodall el mo kiei er a eanged e mo dechor er a medal a Dios. Sel lemad a ta er a blak a rengul el ngellitel, e ngulterekokl el mokiis el “mo chelechad el reng” e “mo diak le ngemed” e “morngii a klebkellel.” (1 Korinth 15:42-44) A lsekum ng “mo klou a deurreng er a eanged el kirel a tal mekngit el chad a lobult,” e ka molatk er a deurreng el mo er ngii sel lemelemii a blakerreng er ngii el mo lmuut er a kodall, a ta el odam er a Kristus. (Lukas 15:7) A Jehovah me a rechanghel er ngii a mo oldeu a rengrir el obengkel ngike el ngellitel sel lebo lenguu a omeksullel el loba ‘klou el deourreng.’—Monguiu er a 1 Johanes 3:2.
9. Ngoeak a ngera el rolel e a grazia a “mo obdois” el mo er a reblak a rengrir el ngellitel sel bo lesiseb er a Renged? Ngmekerang e tia el omelatk a melisiich er a rengellitel el dirk ngar er tia el chutem?
9 A Petrus a dirrek el milluches el mo er a rengellitel el Kristiano el mesaod er a omeksaul el bo lenguu a lolemolem el blak a rengrir. Ngdilu el kmo: “[Ng] mo obdois lekor kemiu a grazia el mo soiseb ra diak a ullebengelel rengedel a Rubak er kid e Osebeled el Jesus Kristus.” (2 Petrus 1:10, 11) A Petrus er a lolekoi el kmo “[Ng] mo obdois” el mo er tir a grazia el mo soiseb er a Renged, e nglocha milsaod er a klebkall el mo er tir sel bo lesiseb er a eanged. Nglocha dirrek el melutk el kirel a betok el klengeltengat el mo er tir sel lebo er a eanged. A rengellitel a kmal mo dmeu a rengrir sel lolatk er a blakerreng el lullechotii er sera lengar er a chutem. Me tia el omelatk a melisiich er tir el mo melemolem el blak a rengrir er chelechang.—1 Petrus 1:13.
OMELATK EL KIRIR A RENGODECH EL SIB
10, 11. (a) Ngera el omelatk a lobang a rengodech el sib? (b) A “demiir ar ngelekel a Dios,” ngngerang mo rullii er a omeltkir tirke el mo kiei er tia el chutem?
10 A apostol el Paulus a milluches el mo er “ar ngelekel a Dios” el kirel a kebkall el omeltkir el mo “oudiukes” el obengkel a Kristus. E sola e milsaod er sel kmal ungil el omeltkir a rengodech el sib, el tir a diak lemochur a ildisir el kmo: “Le bleob [el rechad] a kmal oureng el mengiil ra demiir ar ngelekel a Dios [a rengellitel]; ele bleob el mlo chederdall ra ngemed a dimlak le ngara di uldesuel, e ngbai mlar ngikel riruul el mo chederdall, e loia er ngii chomelatk el kmo, ngmo lmuut ra bleob el mengubet ra blekeradel ra klsibai ra ngemed e mo nguu a ilmokl ra klebkall rar ngelekel a Dios.”—Rom 8:14-21.
11 A Jehovah a milsterir a rechad a “chomelatk” er a letibir el mo olsobel er tir er a Satan el Diabelong el oeak ngike el ‘uldidellel a rasech.’ (Chocholt 12:9; Genesis 3:15) A Jesus Kristus a mle ngike el kot el klou a ultutelel el chad el ultutii a ulaoch el kirel a ‘uldidellel a rasech.’ (Galatia 3:16) A kodellel a Jesus me a okisel a milsterir a rechad a techall el mo mengubet er a klengit me a kodall. E a otutel tia el omelatk er a rengodech el sib a mo omuchel er a taem er a “demiir ar ngelekel a Dios.” A rengellitel a dirrek el oltaut er a ulaoch el kirel a ‘uldidellel a rasech.’ A ta el rolel a be leduum me a lechub e lemocholt a rengellitel el ngar er a eanged, a sel bo lolengeseu er a Kristus el mo okngemedii tia el mekngit el beluulechad er a Satan. (Chocholt 2:26, 27) Tiang a mo uchul a osobelir a rengodech el sib er sel klou el ringel.—Chocholt 7:9, 10, 14.
12. Sel lobeketakl a rengellitel e ngmo uchul a ngera el klungiaol el mo er a rechad?
12 Sel ta el telael el rak er a omengederederel a Kristus a mo uchul a klou el budech el kirir a rechad! E ngar er seikid el taem e te lmuut el mo obeketakl “ar ngelekel a Dios” el okiu a kuk ta er a rolel. A rengellitel a mo oureor el ua prist el obengkel a Kristus el olengeseu er a rechad el mo ngmai a klungiolir el oeak a tengetengel a Kristus. Me sel taem el Rengedel a Dios a mengedereder er a chutem, e a rebekongesenges el chad a mo “mengubet ra blekeradel ra klsibai ra ngemed.” Te dirrek el mo mengubet er a klsibai er a klengit me a kodall. A lsekum te melemolem el olengesenges er a Jehovah er a chelsel sel ta el telael el rak el mo lmuut er sel kot el ulebongel el omelsemai, e a ngklir a mo meluches er a chelsel a “babier ra klengar” el mo cherechar. Te mo “nguu a ilmokl ra klebkall rar ngelekel a Dios.”(Chocholt 20:7, 8, 11, 12) Tiang a kmal ungil el omelatk!
DOLEMOLEM EL URREKODEL ER A OMELTKED
13. A omeltked ngultuil er a ngerang? E oingerang e a Kristus a mo mocholt?
13 Aike el eru el babilengel a Petrus a ngosuterir a rengellitel me a rengodech el sib el mo melemolem el urrekodel aike el kakerous el omeltkir. Ngmileketeklii el kmo a omeltkir a diak lultuil er a omerellir, e ngbai ultuil er a grazia me a lechub e ngbekokuii el bltikerreng er a Jehovah. Ngmilluches el kmo: “Bo mulserechakl, e bo le cherrungel chomeltkiu el mengiil er sel grazia el ekor kemiu sel be le cholt a Jesus Kristus.” (1 Petrus 1:13) A Kristus a mocholt me a lechub e ng “me duum” sel lemei el mo mesterir a omeksullir a reblak a rengrir el chedal e bo lolekngemed er a remekngit.—Monguiu er a 2 Thesalonika 1:6-10.
14, 15. (a) Ngera kired el meruul el mo urrekodel er a omeltked? (b) Ngera el ulekrael a lebilskid a Petrus?
14 A lsekum a tekoi el doruul er a bek el sils a ochotii el kmo kede blechoel el melatk er a merekung el sils er a Jehovah, e kede melemolem el urrekodel er tia el omeltked. A Jehovah a mo okngemedii a “eanged” el melutk er aike el kabelment er a klechad, me a “chutem” el melutk er a remekngit el chad. A Petrus a milluches el kmo: “Ngkol uangera chedaol blekeradel . . . el kiriu lobang, el mengiil a le me klsel a Dios e blak a rengmiu lorreched er ngii; sel sils e a eanged a meseseb el meterakl, ma cheldellel a eanged a mo meseseb el obulech!”—2 Petrus 3:10-12.
15 Me a “beches el eanged [el kabelment er a Kristus] ma beches el chutem [tirke el melemalt el chad el mo kiei er a chutem],” a mo omtechei a kabelment er a klechad me a rokui el mekngit el chad. (2 Petrus 3:13) A Petrus a mle bleketakl el olecholt a tekoi el kired el meruul sel dongiil er tia el beches el beluulechad er a ledu el kmo: “Kemiu el betik ra renguk, misei a uchul e kemiu el mengiil a ikal tekoi bo le blak a rengmiu me lak a cheisech ma ka tellemall er kemiu, el chelellakl a rengmiu er medal a Dios.”—2 Petrus 3:14.
KLENGAR EL OLTIRAKL A OMELTKED
16, 17. (a) Ngmekerang a dolecholt a “chedaol blekeradel” me a “chomeluu ra Dios”? (b) Ngmekerang a bo lemotaut a omeltked?
16 Kede ochotii el kmo kede urrekodel a omeltked el oeak a rolel a klengar er kid. El ua lulemeklatk a Petrus, ngkired el kerekikl me dolemolem el oba kengei er a Jehovah. Ngkired el olecholt a “chedaol blekeradel” el oeak a ‘ungil chomerelled ra delongelir ar Chisentail,’ sel doruul aike el tekoi el lekengei a Dios. (2 Petrus 3:11; 1 Petrus 2:12) Me ngkired el ‘kaubltikerreng’ er a delongeled. Tiang a uldimukl er sel doruul aike el sebeched me lolemolem a budech er a klodam el meliuekl er a beluulechad me a dirrek el chelsel a ongdibel er kid. (Johanes 13:35) A Petrus a dirrek el milsaod er a “chomeluu ra Dios” el melutk er a tekoi el doruul el mo melisiich er a delongeled kid me a Jehovah. Tiang a uldimukl a teletelel a nglunguched, me a omengiued er a Biblia er a bek el sils, me a omesuub e melebedebek a tekoi, me a temel a omengull el ongalek, me sel deblechoel el omerk er a “evangkelio ra rengedel a Dios.”—Matteus 24:14.
17 Kede rokui el soad el nguu a kengei er a Jehovah e mo suobel er sel taem el bo lolekngemed er tia el mekngit el blekeradel er a beluulechad. Me seikid el taem, e kede mo mesa otutel a omeltked er a “diak a ulebengelel klengar, el le dillii a Dios el diak lomulak, er a ngar a mong.”—Titus 1:2.
[Aike el Ker er a Suobel]
[Siasing el ngar er a 22 el llel]
A rengellitel el Kristiano a ‘mechell el beches’ el mo oba “dingar lomelatk”
[Siasing el ngar er a 24 el llel]
Molemolem el urrekodel er a omelatk er a chelsel a telungalek er kau
