Suyakuyninchispi kusikusun

‘Wiñay kawsaytan suyakushanchis. Chaytan [...] Dios prometerqan, manaraq kay pachapas kamasqa kashaqtin.’ (TITO 1:2.)

YUYARINAPAQ

¿Imaynapin yachanchis huk akllasqa cristiano wañupunankama hunt’aq kaqtin hanaq pachapi kusikuy kasqanta?

¿Imapin hukllachasqa kashan wak ovejakunaq suyakuynin akllasqa cristianokunaqwan?

¿Imaynatan 2 Pedro 3:11 nisqanman hina kawsasunman suyakuyninchis hunt’akunanpaq?

1. ¿Imaynatan Diospa qowasqanchis suyakuy yanapawasunman sasachakuykunata aguantanapaq?

APÓSTOL Pablon qelqarqan: ‘Suyakusqanchis Diosmi iñiyniykichispi hunt’aykusunkichis kusikuywan thak-kaywan ima, santo espirituq atiyninwan suyakuyniykichis phoqchirinanpaq’, nispa (Rom. 15:13). Diospa qowasqanchis suyakuyniyoq kaqtinchisqa sonqonchismi kusikuymanta thak kaymantawan phoqchirinqaraq, chaytaq yanapawanchis ima sasachakuytapas aguantanapaq. Akllasqa cristianoña kanchis otaq manaña chaypas, chay suyakuyninchismi barcoq ‘anclan’ hina ‘allinta sayachiwasun’ (Heb. 6:18, 19). Ima sasachakuypipas tarikuspaqa, chay suyakuyninchispin hap’ipakunanchis iñiyninchispi ama pisipanapaq, chhaynapin Diosmanta mana karunchakusunchu (leey Hebreos 2:1; 6:11).

2. ¿Ima iskay suyakuyniyoqmi kanchis kay tiempopi cristianokuna? ¿Imaraykun wak ovejakuna interesakunanku akllasqa cristianokunaq suyakuyninpi?

² Kay tukukuy tiempopi cristianokunaqa iskay suyakuyniyoqmi kanchis. Kay pachapiraq kashaq ‘pisi t’aqamanta’ akllasqa cristianokunaqa, hanaq pachapaq suyakuyniyoqmi kanku, chaypin Cristowan kuska reykuna sacerdotekuna kanqaku manataqmi wañunqakuchu (Luc. 12:32; Apo. 5:9, 10). ‘Wak ovejakunamanta’ ‘mana piqpa yupay atinan ancha askha runakunapas’ kay pachapi huk sumaq paraisopi tiyanankupaq suyakuyniyoqmi kanku, chaypin Cristoq kamachisqan kanqaku (Apo. 7:9, 10; Juan 10:16). Wak ovejakunamanta kaqkunaqa kaytan yuyarinanku: salvacionman aypanankupaqqa tukuy sonqowanmi Cristoq ‘wawqenkunata’ yanapananku (Mat. 25:34-40). Akllasqakunaqa chaskinqakupunin premionkuta, kaqllataq wak ovejakunapas (leey Hebreos 11:39, 40). Akllasqa cristianokunaq suyakuyninkumanta yachasun.

 AKLLASQAKUNAQ ‘MANA KUYURIQ SUYAKUYNINKU’

3, 4. ¿Imaynapin ‘wakmanta nacenku’ akllasqa cristianokuna, ima ‘mana kuyuriq suyakuyniyoqmi kanku’?

³ Pedron ñawpaqpi cristianokunaman cartakunata apachispa paykunata ‘akllasqakuna’ nirqan (1 Ped. 1:1). Chaypin astawan willarqan huch’uy t’aqa ovejakunaq sumaq suyakuyninmanta. Ñawpaqtan nirqan: “Señorninchis Jesucristoq Yayan Diosta yupaychasun, paymi hatun khuyapayakuyninman hina wañusqanmanta Jesucristoq kawsarimpusqanwan wakmanta nacechiwarqanchis, mana kuyuriq suyakuyniyoq kananchispaq. Chay hinapin mana ismuq, mana qhellichakuq, mana tukukuq herenciata chaskinkichis. Chaytan Diosqa qankunapaq hanaq pachapi waqaychashan. Qankunaqa Diospi iñisqaykichisraykun paypa atiyninpi waqaychasqa kashankichis qespichisqa kanaykichis p’unchaykama, chay qespikuytan Diosqa wakichirqan p’uchukay p’unchaypi rikuchinanpaq. Chaymi qankunaqa kusisqallapuni kashankichis”, nispa (1 Ped. 1:3-6).

⁴ Chhaynaqa, Cristowan kuska kamachimunankupaq Diospa akllasqan cristianokunaqa ‘wakmantan nacenku’. Diosmi santo espiritunwan wawankuna kanankupaq adoptan, akllantaq Cristowan kuska reykuna sacerdotekuna kanankupaq (Apo. 20:6). Pedroq nisqan hina, ‘wakmanta nacespan’ ‘mana kuyuriq suyakuyniyoq kanku’, ‘chay hinapin mana ismuq, mana qhellichakuq, mana tukukuq herenciata chaskinqaku’. Chaytan Diosqa paykunapaq “hanaq pachapi waqaychashan”. Chaychá ‘kusisqallapuni kashanku’, ichaqa suyakuyninku hunt’akunanpaqqa Diospaqmi hunt’aq kananku.

5, 6. ¿Imaraykun akllasqakuna “Diospa waqyasqan” “akllasqan” kasqankuta asegurananku?

⁵ Iskay kaq cartanpin Pedro nillarqantaq: “Astawanraq kallpachakuychis, Diospa waqyasqan kasqaykichispipas paypa akllasqan kasqaykichispipas”, nispa (2 Ped. 1:10). Paykunaqa allin cristiano kanankupaqmi kallpachakunanku iñiypi, munakuypi, Dios serviypi iñiqmasinkuna munakuypipas. Pedron nirqan: ‘Lliw chaykunachus qankunapi kashan, askhayashantaqchus kanpas chayqa, [...] mana qellakuspan allinta llank’ankichis, hinan llank’asqaykichisqa mana yanqapaqchu kanqa’, nispa (leey 2 Pedro 1:5-8).

⁶ Filadelfia (Asia Menor) iñiq t’aqapi akllasqa cristiano umallikunamanmi, kawsarimpusqan qhepaman Cristo kay willakuyta apachirqan: “Pacienciakunaykipaq kamachisqaytan kasuwarqanki, chaymi ñoqapas kay pachantinman hamuq ñak’ariymanta waqaychasqayki, chay ñak’ariymi hamunqa kay pachapi llapa runakunata probananpaq. Ñoqaqa yaqañan hamusaq, imatachus yachasqaykipi qaqata sayay, ama pipas premioykita qechunasuykipaq”, nispa (Apo. 3:10, 11). ¿Imapin tarikunman hunt’aq kayninta saqepuq akllasqa cristiano? Manan chaskinmanchu ‘mana hayk’aq tukukuq’ “sumaq k’anchashaq coronata”, chaytaqa wañunankukama hunt’aq kaqkunallapaqmi Dios prometerqan (1 Ped. 5:4; Apo. 2:10).

DIOSPA REINONMAN HAYKUNKU

7. ¿Ima suyakuymantan Judas rimarqan carta apachisqanpi?

⁷ 65 watakunapin Jesuspa wawqen Judas huk cartata qelqarqan ‘waqyasqa’ kaq akllasqa cristianokunaman (Jud. 1; tupachiy Hebreos 3:1). Chaytan qelqarqan akllasqakuna Diospa Reinonman haykunankupaq suyakuyninkumanta rimananpaq (Jud. 3). Chaypiqa huk urgente asuntokunamantaña rimarqan chaypas, tukupuyninpin chay sumaq suyakuymanta nirqan: “Mana urmaqta waqaychaqniykichis atiyniyoq Diosman, ancha kusikuywan qhapaq qayllanman mana huchachanata asuykachiqniykichis, sapallan qespichiqninchis Diosman, qhapaqchaypas, hatunchaypas, hatun kamachikuypas, qhapaq-atiypas, qaynapas, kunanpas, wiñay-wiñaypaqpas Señorninchis Jesucristoq sutinpi kachun”, nispa (Jud. 24, 25).

8. Judas 24 nisqan hina, ¿imaynapin yachanchis huk akllasqa cristiano wañupunankama hunt’aq kasqanwan hanaq pachapi kusikuy kasqanta?

 ⁸ Akllasqakunaqa kallpachakunkun Diospaq hunt’aq kanankupaq, hinaspapas cuidakunkun ima huchamanpas urmaymanta. Paykunataqa Jesucriston ch’uya espíritu cuerpoyoqta kawsarichimpunqa, Diospa ñawpaqenpitaq kusikuyta tarinqaku. Diospaq hunt’aq kaspa akllasqa cristiano wañupuqtinqa, “mana ismuq” ‘sumaq cuerpoyoq’ espiritupin kawsarimpunqa (1 Cor. 15:42-44). ¿Imaynan chaywan sientekunku hanaq pachapi espiritukuna? Paykunaqa anchatan kusikunku ‘huk huchasapa Diosman kutirikuqtinqa’, chhaynaqa, ¡maytaraqchá kusikunku huk akllasqa cristiano wañupunankama hunt’aq kaqtinqa! (Luc. 15:7.) Arí, Jehová Diospas angelkunapas askllasqakunawan kuskan q’ochukunku, paykunan premionkuta chaskinku “ancha kusikuywan” (leey 1 Juan 3:2 *).

9. ¿Imaynapin akllasqa cristianokuna ‘sumaq chaskisqa kanku’ Diospa Reinonman haykuqtinku, imapaqmi chay suyakuyninku kallpachan kay pachapiraq kaqkunata?

⁹ Pedropas hunt’aq akllasqakunamantan nin: ‘Señorninchis Qespichiqninchis Jesucristoq wiñay qhapaqsuyunmanmi sumaq chaskiykusqa haykunkichis’, nispa (2 Ped. 1:10, 11). ¿Imaynapin ‘sumaq chaskisqa kanqaku’ hanaq pachaman haykuqtinku? Chaytaqa nishanmanmi hanaq pachaman haykuyninku ancha sumaq kasqanmanta, chaypin k’ancharichinqaku cristiano kawsayninkuta. Hinaspapas kallanmantaqmi llapa wiñay kawsay carrerata tukuqkuna Diospa bendicionninta chaskispa anchata kusikusqanku. Paykunaqa ancha kusikuywanmi yuyarinqaku hunt’aq sonqo kasqankuta. Chay suyakuymi kallpachan kay pachapiraq kashaq akllasqa cristianokunata ‘imachus ruwanankupi’ ‘allintapuni yuyaykunankupaq’ (1 Ped. 1:13).

WAK OVEJAKUNAQ SUYAKUYNIN

10, 11. a) ¿Ima suyakuymi kan wak ovejakunapaq? b) ¿Imaynapin kay pachapaq suyakuy Cristowan hunt’akusqan, hukllachasqa kashan ‘Diospa wawankuna sut’ita rikhurinanwan’?

¹⁰ Apóstol Pablon qelqarqan espirituwan  akllasqa ‘Diospa wawankunaq’ suyakuyninmanta, paykunan ‘herenciata chaskinqaku Cristowan kuska’. Ichaqa rimallarqantaqmi wak ovejakunaq sumaq suyakuyninmanta, chaytan Jehová qonqa, nirqanmi: “Tukuy imaymana kamasqakunaqa [runakunaqa] makillañan suyashanku Diosqa wawankunata [akllasqa cristianokunata] sut’ita rikhurichinanta. Tukuy imaymana kamasqakunaqa manan paykunallamantachu mana valeqman tukupurqanku, aswanpas Diospuni chay hinata unanchaqtinmi, chaywanpas kamasqakunapaqqa suyakuyqa karqanpunin. Kikin kamasqakunatapas ismuqpaq nisqa kaymantan Diosqa kacharichinqa, chaymi Diospa wawankunawan kuska kacharichisqa hatunchayninpi kanqaku”, nispa (Rom. 8:14-21).

¹¹ Diosmi runakunapaq ‘suyakuyta’ qorqan, chaypaqmi prometerqan “ñawpa mach’aqway” Saqramanta runakunata kacharichinanpaq huk ‘miray’ hamunanta (Apo. 12:9; Gén. 3:15). Principal ‘mirayqa’ Jesucriston karqan (Gál. 3:16). Jesuspa wañusqanwan kawsarimpusqanwan iman runakunaqa suyakuyniyoq kanku, huchamanta, wañuymanta kacharichisqa kanankupaq. Chay suyakuypa hunt’akunanqa hukllachasqan kashan ‘Diospa wawankuna sut’ita rikhurinanwan’. ¿Hayk’aqmi ‘sut’ita rikhurimunqaku’? Qhepa kaq ‘miraymanta’ kawsarimpuq akllasqakuna Saqraq kamachisqan pachata chinkachinankupaq Cristoman huñukuqtinku (Apo. 2:26, 27). Chay ruwasqankun wak ovejakunata salvanqa, paykunan manchay ñak’ariyta kawsashaqlla pasanqaku (Apo. 7:9, 10, 14).

12. ¿Ima bendicionkunan runakunapaq kanqa ‘Diospa wawankuna sut’ita rikhurisqanwan’?

¹² Waranqa Wata Cristoq Gobiernamusqanpin “kamasqakunaqa” otaq runakunaqa thak kawsayta tarinqaku. Chay kutipin hukniraymantañataq ‘Diospa wawankuna sut’ita rikhurinqaku’: Cristowan kuska sacerdotekuna kaspan, imaymana bendicionkunata runakunaman apamunqaku Jesuspa wañusqanrayku. Diospa Gobiernonpi kasukuq runakunaqa pisi-pisimantan huchaq imaymana paqarichisqanmanta librakunqaku. ‘Ismuqpaq nisqa kaymantan Diospa kacharichisqan’ kanqaku. Chay waranqa watapi sichus Diospaq hunt’aq kanqaku, hinallataq último pruebatapas atipanqaku chayqa, ‘kawsay libropin’ sutinku wiñaypaq qelqasqa kanqa ‘Diospa wawankunawan kuskataq kacharichisqa hatunchayninpi kanqaku’ (Apo. 20:7, 8, 11, 12). ¡Ancha munaymi chay suyakuyqa!

SUYAKUYNINCHISTA AMA CHINKACHISUNCHU

13. ¿Imaraykun suyakuyniyoq kanchis, hayk’aqmi ‘Jesucristo rikhurimunqa’?

¹³ Pedroq iskay qelqasqan cartakunan yanapan akllasqa cristianokunata, wak ovejakunatapas suyakuyninkuta ama chinkachinankupaq. Pedron willarqan chaytaqa mana imapas ruwasqanchisraykuchu chaskisqanchista, aswanpas Dios khuyapayawasqanchisrayku, nirqanmi: “Allin yuyaywan kawsaychis. Allin-allintapuni suyakuychis Jesucristo rikhurimuqtin Diospa qonasuykichis saminchata”, nispa (1 Ped. 1:13). ¿Hayk’aqmi ‘Jesucristo rikhurimunqa’? Mana kasukuq runakunata wañuchinanpaq, hinallataq hunt’aq sonqo discipulonkunata premiaq hamuqtin (leey 2 Tesalonicenses 1:6-10).

14, 15. a) ¿Imatan ruwananchis suyakuyninchis ama chinkananpaq? b) ¿Imatan Pedro aconsejarqan?

¹⁴ Suyakuyninchis mana chinkananpaqqa ‘Diospa p’unchaynintan’ makilla suyakushana. Chay ‘p’unchaypin’ ‘hanaq pacha’ “kay pachapas” chinkachisqa kanqa, otaq kay pachapi Gobiernokuna, hinallataq millay runakunapas ‘chaypi lliw kaqkunapiwan’. Chaychá Pedroqa nirqan: “Qankunaqa Dios sonqo purispan Diosllapaqña kawsanaykichis, Diospa p’unchaynin chayamunanta makillaña suyaspa.  Chay p’unchaymi hanaq pachaqa ninawan kanaykusqa tukukapunqa, chaypi lliw kaqkunapas rawrarispan unuyapunqa”, nispa (2 Ped. 3:10-12).

¹⁵ Pedron nirqan kay tiempopi kaq ‘hanaq pachapaq’ “kay pachaq” rantinpi ‘mosoq hanaq pacha [Cristoq Gobiernon] mosoq hallp’a [kay pachapi chanin runakuna]’ kananta (2 Ped. 3:13). Chay mosoq pacha suyakuyninchismanta rimaspan aconsejarqan: “Munasqa wawqe-panaykuna, chaykunata suyakushaspaqa, tukuy imapipas k’uchilla kallpachakuychis mana qhelliyoq, mana anyaykuna, paywan thak-kaypi Diospa tarisqan kanaykichispaq”, nispa (2 Ped. 3:14).

SUYAKUYNINCHISMAN HINA KAWSASUN

16, 17. a) ¿Imaynatan rikuchinchis ‘ch’uya kawsayta’, Diosllapaqña kawsasqanchistapas? b) ¿Imatan ruwananchis suyakuyninchis hunt’akusqanta rikunapaq?

¹⁶ Suyakuyninchis ama chinkananpaqqa chayman hinan kawsananchis. Pedroq nisqan hina, qhawarikunanchismi espiritualpi imayna runa kasqanchista. ¿Imaynapi? Ñawpaqtaqa rikuchinanchismi ‘Dios sonqo [“ch’uya kawsayniyoq”, NM] purispa Diosllapaqña kawsasqanchista’, chayqa ‘Diospi mana iñiqkuna ukhupi allintapuni kawsaymi’ (2 Ped. 3:11; 1 Ped. 2:12). Chaymantapas hukkuna hukkunawanmi munanakunanchis, chaypaqmi kallpachakunanchis iñiq t’aqapi hinallataq pachantinpi iñiqmasikunawanpas huk nisqalla kawsanapaq (Juan 13:35). Chaymantapas, ruwayninchiskunawanmi rikuchinanchis Diosllapaqñan kawsasqanchista, chaykunan: sonqomanta mañakuy, sapa p’unchay Bibliata leey, qelqakunata estudianapaq horariota ruway, familiantin Diosta yupaychay, tukuy sonqowan Diospa Gobiernonmanta ‘allin willakuykunata’ willay ima (Mat. 24:14).

¹⁷ Llapanchispas munanchismi Diospa allin qhawarisqan kayta, kay millay pachata chinkachiqtin salvasqa kaytapas. Chaypaq kallpachakuspaqa rikusunchismi ‘wiñay kawsay suyakusqanchis’ hunt’akusqanta. “Chay kawsaytan mana llullakuq Diosqa prometerqan, manaraq kay pachapas kamasqa kashaqtin.” (Tito 1:2.)

[Uranpi willakuy]

[Tapuykuna]

[22 paginapi dibujo]

Akllasqa cristianokunaqa ‘wakmanta nacespan mana kuyuriq suyakuyniyoq kanku’

[24 paginapi dibujo]

Familianchiswan suyakusqanchista ama chinkachisunchu