Ia Olioli i lo Tatou Faamoemoe
Ia Olioli i lo Tatou Faamoemoe
“[O loo iai] le faamoemoe o le ola e faavavau lea na folafola mai i aso anamua e le Atua, e lē mafai ona tala pepelo.”—TITO 1:2.
O SE AUTALUGA
E faapefea ona tatou iloa le olioli i le lagi, pe afai e tumau pea i le faamaoni se tasi o le ʻaufaauuina seʻia oo i le oti?
O le ā le sootaga o le faamoemoe o isi mamoe ma le faamoemoe o le ʻaufaauuina?
Ina ia tatou vāai i le faataunuuga o lo tatou faamoemoe, o ā “amioga paia” ma “galuega o le faamaoni i le Atua” e tatau ona tatou faaalia?
1. E faapefea i le faamoemoe mai iā Ieova ona fesoasoani iā i tatou ina ia onosaia ai so o se tulaga?
NA FAAPEA mai le aposetolo o Paulo, o Ieova o “le Atua e aumaia . . . le faamoemoe.” Na ia taʻua atili, e mafai e Ieova ona ʻfaatutumuina i tatou i le olioli uma ma le filemu ona o lo tatou talitonu, ina ia tupu tele ai lo tatou faamoemoe i le mana o le agaga paia.’ (Roma 15:13) Pe afai e mausalī lo tatou faamoemoe, o le a mafai ona tatou onosaia so o se tulaga e tulaʻi mai, ma faatumuina ai o tatou loto i le olioli ma le filemu. O lenā faamoemoe o le a avea ʻo se taula mo le ola, e mautinoa ma mausalī’ mo Kerisiano faauuina ma isi Kerisiano. (Epe. 6:18, 19) E mafai ona tatou taofimau i lo tatou faamoemoe a o feagai ma faigatā o le olaga, ma ua avea ma fesoasoani ina ia aua neʻi o tatou masalosalo, pe mou atu ai foʻi le faatuatua.—Faitau le Eperu 2:1; 6:11.
2. O ā faamoemoe e lua e maua e Kerisiano o loo ola i aso nei, ma aiseā e tāua ai i “isi mamoe” le faamoemoe o le a mauaina e le ʻaufaauuina?
2 O loo taulaʻi atu Kerisiano o loo ola i nei taimi o le iʻuga, a lē o le faamoemoe i le lagi, o le faamoemoe i le lalolagi. E maua e le vaega totoe o “le lafu mamoe itiiti” o Kerisiano faauuina, le faamoemoe o le ola i le lagi e lē mafai ona oti, ma avea o ni tupu ma ositaulaga faatasi ma Keriso i lona Malo. (Luka 12:32; Faaa. 5:9, 10) Peitaʻi, e maua e le “motu o tagata e toʻatele” o “isi mamoe,” le faamoemoe o le ola e faavavau i se lalolagi parataiso, o ni tagatānuu o le Malo faa-Mesia. (Faaa. 7:9, 10; Ioa. 10:16) E lē tatau ona galo i isi mamoe, e faalagolago lo latou faaolataga i le lagolagoina ma le maelega o “uso” faauuina o Keriso, o loo totoe pea i le lalolagi. (Mata. 25:34-40) O le a maua e le ʻaufaauuina lo latou taui, ae e mautinoa foʻi o le a faataunuuina le faamoemoe o isi mamoe. (Faitau le Eperu 11:39, 40.) Muamua, seʻi o tatou iloiloina le faamoemoe o le a maua e le ʻaufaauuina.
O LE “FAAMOEMOE OLA” O KERISIANO FAAUUINA
3, 4. E faapefea i Kerisiano faauuina ona ʻfanaufouina i se faamoemoe ola,’ ma o le ā lenā faamoemoe?
3 Na tusia e le aposetolo o Peteru ni tusi se lua i Kerisiano faauuina, o ē na ia taʻua o “ē ua filifilia.” (1 Pete. 1:1) Sa ia faamatalaina mai le faamoemoe matagofie o le a mauaina e le lafu mamoe itiiti. Na taʻua e Peteru i lana tusi muamua e faapea: “Ia viia le Atua le Tamā o lo tatou Alii o Iesu Keriso, auā e tusa ma lona alofa mutimutivale tele, ua ia fanaufouina ai i tatou i se faamoemoe ola e ala i le toe faatūina o Iesu Keriso mai i le oti, i se tofi e lē pala, e lē faaleagaina, ma e lē mavae. Ua taofia mo outou i le lagi, o ē ua leoleomaluina e le mana o le Atua i le faatuatua mo le faaolataga, lea ua saunia e faaalia mai i le taimi mulimuli. Ua outou matuā olioli ai ona o lenei mea.”—1 Pete. 1:3-6.
4 E manaʻomia ona “fanaufouina” o ni atalii ua faauuina e le agaga paia o le Atua, ia Kerisiano e faatapulaa lo latou aofaʻi, o ē ua filifilia e Ieova ina ia faatasi ma Keriso i le Malo i le lagi. Ua faauuina i latou i le agaga paia e avea o ni tupu ma ositaulaga faatasi ma Keriso. (Faaa. 20:6) Na faapea mai Peteru o lenei “fanaufouina,” ua tatala mai ai le avanoa e latou te maua ai “se faamoemoe ola,” lea na ia taʻua o “se tofi e lē pala, e lē faaleagaina, ma e lē mavae,” o loo taofia mai mo i latou “i le lagi.” E lē o se tulaga la e faateʻia ai, ona o le “matuā olioli” o le ʻaufaauuina i lo latou faamoemoe ola! Peitaʻi, e faalagolago lo latou mauaina o lenā faamoemoe, i lo latou tumau pea i le faamaoni.
5, 6. Aiseā e tatau ai i Kerisiano faauuina, ona saga finafinau ina ia faamautinoa le valaauina o i latou i le lagi?
5 I lana tusi lona lua, na apoapoaʻi atu ai Peteru i Kerisiano faauuina, ina ia ʻsaga finafinau ina ia faamautinoa le valaauina ma le filifilia o i latou.’ (2 Pete. 1:10) E tatau ona latou matuā finafinau ina ia atiaʻe uiga faa-Kerisiano e pei o le faatuatua, faamaoni i le Atua, alofa i le ʻauuso, ma le alofa. Na taʻua e Peteru: “Afai e iai nei mea iā te outou ma ua tele foʻi, e taofia ai outou ina neʻi outou paiē ma lē fua mai.”—Faitau le 2 Peteru 1:5-8.
6 Sa fetalai atu Keriso i toeaina na faauuina i le agaga paia, i le faapotopotoga o Filatelefaia i Asia Itiiti e faapea: “Auā ua e tausia le upu e uiga i loʻu tumau, ou te tausia foʻi oe i le itula o tofotofoga, lea o le a oo mai i le lalolagi uma, ina ia tofotofoina ai i latou o ē o nonofo i le lalolagi. Ou te vave alu atu. Ia taofimau i mea ua iā te oe, ina neʻi aveesea e se tasi lou pale.” (Faaa. 3:10, 11) Pe afai e lē faamaoni se Kerisiano faauuina, e na te lē mauaina “le pale mamalu e lē mamae,” lea na folafolaina i ē ua filifilia, ma e tumau pea i le faamaoni seʻia oo i le oti.—1 Pete. 5:4; Faaa. 2:10.
ULUFALE ATU I LE MALO
7. O le ā le faamoemoe matagofie na taʻua e Iuta i lana tusi?
7 Pe tusa o le tausaga e 65 T.A., na tusi atu ai Iuta le ʻafa uso o Iesu i ana aumea o ni Kerisiano faauuina, o ē na ia taʻua o “ē ua valaauina.” (Iuta 1; faatusatusa i le Eperu 3:1.) Sa mafaufau Iuta e faamamafa i lana tusi le manatu e faapea, o Kerisiano o ē ua valaauina i le Malo o le Atua i le lagi, e ʻlatou’ te mauaina le faamoemoe pupula o le faaolataga. (Iuta 3) E ui lava sa iai isi mataupu na manaʻomia ona faailoa atu e Iuta, ae i le faaiʻuga o lana tusi, sa ia taʻua ai le faamoemoe matagofie o le a maua e Kerisiano faauuina: “O le Atua o lē na te leoleoina outou ina neʻi paʻuʻū i le agasala, ma ia lē ponā i luma o lona mamalu ma le olioli tele. O ia o lo tatou Atua e toʻatasi o lo tatou Faaola lea, ia iā te ia i le taimi nei e ala iā Iesu Keriso lo tatou Alii, le viiga, le mamalu, le malosi ma le pule, e mai i le vavau e oo i le faavavau.”—Iuta 24, 25.
8. E tusa ai ma le Iuta e 24, e faapefea ona iloa le olioli i le lagi pe afai e tumau pea i le faamaoni se tasi o le ʻaufaauuina seʻia oo i le oti?
8 O le mea mautinoa, e mananaʻo Kerisiano faamaoni ua faauuina e leoleoina i latou mai i le oo atu i se tulaga e tautevateva ai, ma iʻu i le faaumatiaga. E tusa ai ma lo latou faamoemoe lea e faavae mai i le Tusi Paia, e talitonu Kerisiano faamaoni ua faauuina, o le a toe faatutūina i latou e Iesu Keriso mai i le oti, ma tutulaʻi ai i luma o le Atua ma le olioli tele, i ni tino agaga e lelei atoatoa. Pe a maliu se tasi o le ʻaufaauuina ae o loo tumau pea i le faamaoni, o le mea mautinoa lava o le a ʻtoe faatūina mai o ia i se tino faaleagaga, e lē pala ma e mamalu.’ (1 Kori. 15:42-44) Pe afai e sili atu ona “olioli le lagi ona o le tagata agasala e toʻatasi ua salamō,” seʻi manatu la i le olioli i lotoā faalelagi, pe afai e māeʻa le faiva i le lalolagi a se tasi o uso o Keriso ua faauuina i le agaga paia, ae o loo tumau pea i le faamaoni. (Luka 15:7) O le a olioli Ieova ma foafoaga agaga faamaoni, faapea ma se tasi o le ʻaufaauuina pe a maua lona taui “ma le olioli tele.”—Faitau le 1 Ioane 3:2.
9. E faapefea ona “mamalu” le ulufale atu o Kerisiano faamaoni ua faauuina i le Malo, ma o le ā le aafiaga o lenei faamoemoe i le ʻaufaauuina o loo totoe pea i le lalolagi?
9 E talitutusa lava lenā manatu ma le tusi a Peteru i Kerisiano faauuina e faapea, pe afai e latou te faamautinoa le valaauina o i latou e ala i le tumau pea i le faamaoni, “o le a faataga [i latou] e ulufale atu ma le mamalu i le malo e faavavau o lo tatou Alii ma le Faaola o Iesu Keriso.” (2 Pete. 1:10, 11) O le a “mamalu” le ulufale atu o Kerisiano faauuina i lo latou taui faalelagi, ma o le a susulu atu o latou uiga faa-Kerisiano. Atonu foʻi e uiga atu le “mamalu” i se tulaga silisili ona faamanuiaina, lea o le a maua e i latou nei o ē na matuā finafinau i le tuuga mo le ola. E mafai ona toe tomānatu Kerisiano faauuina i la latou faiva sa faia ma le faamaoni a o iai i le lalolagi, ma loto e tumu i le fiafia ma le faafetai. E mautinoa lava ua avea lenei faamoemoe ma itu e faamalosia ai Kerisiano faauuina o loo totoe pea i le lalolagi, ina ia ʻsauniuni o latou mafaufau mo galuega fitā.’—1 Pete. 1:13.
ʻSAUNIA LE FAAMOEMOE’ MO ISI MAMOE
10, 11. (a) O le ā le faamoemoe o loo ofoina mai mo isi mamoe? (e) O le ā le sootaga o le faataunuuga o le faamoemoe o le ola e faavavau i le lalolagi, iā Keriso ma “le faaalia mai o atalii o le Atua”?
10 Na tusi le aposetolo o Paulo e faatatau i le faamoemoe pupula “o atalii o le Atua,” o ē ua faauuina i le agaga paia, e avea o ni “suli faatasi ma Keriso.” Ona ia taʻua lea o le faamoemoe matagofie, lea o loo ofoina mai e Ieova mo isi mamoe e lē faatapulaaina lo latou aofaʻi: “O loo faatalitali ma le matuā naunau atu le foafoaga [tagata] i le faaalia mai o atalii o le Atua [o le ʻau faauuina]. Ua faatoʻilaloina le foafoaga i le iʻuvale, e lē ona o lona lava loto, ae e ala iā te ia na faatoʻilaloina ai, ma saunia foʻi le faamoemoe ina ia saʻoloto ai le foafoaga mai i le faapologaina i mea leaga, ma maua ai le saʻolotoga mamalu o le fanau a le Atua.”—Roma 8:14-21.
11 Na “saunia . . . [e Ieova] le faamoemoe” mo le fanau a tagata, ina ua ia folafolaina o le a faasaoina i latou mai i le “uluaʻi gata” o Satani le Tiapolo, e ala i le “fanau” na folafolaina. (Faaa. 12:9; Kene. 3:15) O le vaega autū o lenā “fanau” o Iesu Keriso. (Kala. 3:16) E ala i lona maliu ma le toetū, na saunia ai e Iesu Keriso se faavae mautū mo le faamoemoe o tagata, ina ia faasaʻolotoina mai i le pologa i le agasala ma le oti. E iai le sootaga o le faataunuuga o lenei faamoemoe, “i le faaalia mai o atalii o le Atua.” O le ʻaufaauuina ua faamamaluina, o le vaega lona lua lea o le “fanau.” O le a “faaalia” mai i latou, pe a aufaatasi ma Keriso, i le faaumatiaga o lenei faiga leaga o mea a Satani. (Faaa. 2:26, 27) O lenā tulaga o le a aumaia ai le faaolataga mo isi mamoe, o i latou ia o le a faasaoina mai i le puapuaga tele.—Faaa. 7:9, 10, 14.
12. O ā aogā mataʻina o le a maua e le fanau a tagata pe a faaalia mai le ʻaufaauuina?
12 Maʻeu se mapusaga o le a maua e tagata po o “foafoaga,” a o faagasolo le Pulega a Keriso i le Afe Tausaga. I lenā taimi, o le a “faaalia” atili mai “atalii o le Atua,” pe a avea i latou o ni ositaulaga faatasi ma Keriso, ma latou faasoa mai aogā o le taulaga togiola a Iesu i le fanau a tagata. I le avea ai ma tagatānuu o le Malo i le lagi, o le a amata ona maua e tagata po o “foafoaga,” le laveaʻiina mai i āuga o le agasala ma le oti. O le a faasolosolo ona ʻfaasaʻolotoina tagata usiusitaʻi mai i le faapologaina i mea leaga.’ Pe a latou faamaoni pea iā Ieova a o faagasolo le Afe Tausaga ma le tofotofoga mulimuli e sosoo mai ai, o le a tusia o latou igoa e faavavau i ʻle tusi tāʻai o le ola.’ O le a latou ulu atu i le “saʻolotoga mamalu o le fanau a le Atua.” (Faaa. 20:7, 8, 11, 12) O le mea moni, o se faamoemoe e matagofie!
IA AUA NEʻI MOU ATU LO TATOU FAAMOEMOE
13. O le ā e faalagolago i ai le mauaina o lo tatou faamoemoe, ma o afea o le a faaalia mai ai le Keriso?
13 E tele ni faamatalaga sa iai i tusi faagaeeina e lua a Peteru, e fesoasoani ai i le ʻaufaauuina ma isi mamoe, ina ia aua neʻi mou atu ai lo latou faamoemoe. Na ia taʻua e lē faalagolago le mauaina o lo latou faamoemoe i galuega e latou te faia, ae o le agalelei faifua o Ieova. Sa tusi Peteru: “Ia faaauau ona outou matuā mafaufau lelei; ia taulaʻi atu lo outou faamoemoe i le agalelei faifua lea e tuuina atu iā te outou i le faaaliga o Iesu Keriso.” (1 Pete. 1:13) O le a faaalia le Keriso pe a afio mai e tauia ona soo faamaoni, ma faaoo mai sala faafaamasinoga a Ieova i tagata amioleaga.—Faitau le 2 Tesalonia 1:6-10.
14, 15. (a) O le ā e tatau ona tatou uaʻi atoatoa atu i ai, ina ia aua neʻi mou atu lo tatou faamoemoe? (e) O le ā le fautuaga na avatu e Peteru?
14 Ina ia aua neʻi mou atu lo tatou faamoemoe, e tatau ona uaʻi atoatoa, ma faaautū o tatou olaga i “le aso o Ieova” ua lata mai. O le taimi lenā o le a aumaia ai le faaumatiaga o le “lagi” i aso nei, po o pulega faaletagata, ma le “lalolagi” po o tagata amioleaga, ma “mea o loo fai aʻe ai” le lalolagi. Na tusi Peteru: “Ia outou manatunatu pe e faapeʻī la outou amio e tatau ona iai, . . . a o faatalitali ma tāmau i mafaufau le oo mai o le aso o Ieova, lea o le a mavae atu ai le lagi ina ua mū, ma liusuavai ai foʻi mea o loo fai aʻe ai ona o le aasa tele!”—2 Pete. 3:10-12.
15 O le a suia le “lagi” ma le “lalolagi” o loo iai i aso nei, i le “lagi fou [pulega o le Malo a Keriso] ma le lalolagi fou [o tagata amiotonu o ē o le a ola i le lalolagi].” (2 Pete. 3:13) Na aumaia foʻi e Peteru se fautuaga tuusaʻo, e faavae i le mea moni e uiga i lo tatou “faatalitali,” po o le aua neʻi mou atu lo tatou faamoemoe mo lenā lalolagi fou ua folafolaina mai: “O le mea lea le ʻaupele e, a o outou faatalitali i nei mea, ia outou finafinau ai ina ia maua mai outou e ia, e leai so outou ila, e lē ponā, ma e filemu.”—2 Pete. 3:14.
IA OLA E ŌGATUSA MA LO TATOU FAAMOEMOE
16, 17. (a) O ā “amioga paia” ma “galuega o le faamaoni i le Atua” e tatau ona tatou faaalia? (e) O le a faapefea ona faataunuuina lo tatou faamoemoe?
16 E lē gata e tatau ona faatumauina lo tatou faamoemoe, ae e tatau foʻi ona tatou ola e ōgatusa ma lenā faamoemoe. E ao ona tatou iloilo totoʻa le ituaiga o tagata faaleagaga e iai i tatou. E aofia i “amioga paia” le ʻtausisia o ā tatou amioga lelei i luma o tagata o le lalolagi,’ e ala i le faia o le mea e tonu i le silafaga a le Atua. (2 Pete. 3:11; 1 Pete. 2:12) E tatau ona tatou alolofa i lo tatou ʻauuso i le lalolagi aoao. E aofia ai lo tatou faia o taumafaiga uma, ina ia faatumauina le autasi i totonu o a tatou faapotopotoga. (Ioa. 13:35) Na taʻua foʻi e Peteru “galuega o le faamaoni i le Atua,” o mea ia e tatau ona tatou faia ina ia faamalosia ai pea la tatou faiā ma Ieova. E aofia ai tatalo uigā, faitauina o le Tusi Paia i aso taʻitasi, suʻesuʻega loloto o le Tusi Paia a le tagata lava ia, tapuaʻiga a le aiga, ma le faia o se sao e lē aunoa i le talaʻia o le “tala lelei o le malo.”—Mata. 24:14.
17 E tatou te mananaʻo uma lava ina ia avea i tatou o ni ē e finagalo malie i ai Ieova, ma ia faasaoina pe a ia aumaia le faaumatiaga o lenei faiga amioleaga o mea. Pe afai o i tatou o ni ē e finagalo malie i ai Ieova, e mautinoa lava o le a faataunuuina lo tatou faamoemoe, o le “faamoemoe o le ola e faavavau lea na folafola mai i aso anamua e le Atua, e lē mafai ona tala pepelo.”—Tito 1:2.
[Fesili mo le Suʻesuʻega]
[Ata i le itulau 22]
E manaʻomia i Kerisiano faauuina ona ʻfanaufouina i se faamoemoe ola’
[Ata i le itulau 24]
Ia aua neʻi mou atu le faamoemoe o lo outou aiga
