Prisiri fu di yu abi howpu

„Wi abi a howpu fu libi fu têgo. Na dati Gado, di no man lei, pramisi wi langa ten pasa kaba.”​—TITUS 1:2.

YU KAN GI PIKI?

Fa wi du sabi taki prisiri de na hemel te wan fu den salfuwan gi yesi na Gado te na dede?

Fa a howpu fu den tra skapu abi fu du nanga a howpu fu den salfuwan?

Efu wi wani taki a howpu fu wi kon tru, dan fa wi musu sori taki wi e ’tyari wisrefi na wan santa fasi’ èn taki wi e „dini Gado fayafaya”?

1. Fa a howpu di Yehovah gi wi kan yepi wi fu horidoro?

YEHOVAH na „a Gado di e gi sma howpu”, na so na apostel Paulus taki. A taki tu dati Yehovah kan ’gi wi furu prisiri nanga freide fu di wi e frutrow na en tapu. Dan wi o kisi moro howpu nanga yepi fu a krakti fu a santa yeye’ (Rom. 15:13). Efu wi hori a howpu fu wi bun na prakseri, dan wi o man horidoro awinsi sortu problema e miti wi, wi o man tan prisiri, èn wi o tan abi freide. Problema kan de leki bigi winti na se. Te den e miti wi, dan a howpu fu wi de leki ’wan ankra gi wi libi. A tranga èn a e hori wi tanapu’, awinsi wi na salfu Kresten noso tra skapu (Hebr. 6:18, 19). Efu wi tan prakseri a howpu fu wi, dan wi no o „drifi gowe”. A howpu fu wi o yepi wi fu abi wan tranga bribi èn fu no tweifri.​—Leisi Hebrewsma 2:1; 6:11.

2. (a) Sortu difrenti howpu Kresten abi na ini a ten disi? (b) Fu san ede den „tra skapu” musu poti prakseri na a howpu di den salfuwan abi?

² Kresten di e libi na ini den lasti dei disi kan abi tu difrenti howpu. Den salfuwan di de na grontapu ete èn di de fu a „pikin ipi” abi a howpu fu libi na hemel pe den no man dede noiti moro. Drape den o de kownu nanga priester makandra nanga Krestes na ini a Kownukondre fu en (Luk. 12:32; Openb. 5:9, 10). Den „tra skapu”di de wan moro bigi grupu, abi a howpu fu libi fu têgo na ini wan paradijs na grontapu ondro a tiri fu a Mesias Kownukondre (Openb. 7:9, 10; Yoh. 10:16). Den tra skapu no musu frigiti noiti taki den kan kisi frulusu soso te den e horibaka fayafaya gi den salfu „brada” fu Krestes di de na grontapu ete (Mat. 25:34-40). Den salfuwan sa kisi a pai fu den, èn a no de fu taki dati den tra skapu sa kisi a di fu den tu. (Leisi Hebrewsma 11:39, 40.) Meki wi poti prakseri fosi na a howpu di den salfuwan abi.

 SALFU KRESTEN ABI „WAN HOWPU DI NO E LASI GOWE”

3, 4. (a) Fa Yehovah e meki den salfuwan kon „gebore nyun baka fu kan abi wan howpu di no e lasi gowe”? (b) San a howpu dati wani taki?

³ Na ini den tu brifi di na apostel Petrus skrifi gi den salfu Kresten a taki dati den na „den wan di kisi wan kari” (1 Petr. 1:1). Den brifi fu Petrus e leri wi moro fu a tumusi moi howpu di a pikin ipi abi. Na ini a fosi brifi fu en, Petrus skrifi: „Blesi fu a Gado nanga a Tata fu wi Masra Yesus Krestes, bika na fu di a abi furu sari-ati nanga wi, meki wi gebore nyun baka fu kan abi wan howpu di no e lasi gowe. Wi abi a howpu disi fu di a gi Yesus Krestes wan opobaka, so taki wi kan kon abi libi di no man pori, di no doti èn di no o lasi gowe. A libi disi na wan gudu di poti na wan sei na ini hemel gi unu. Unu na den wan di e kisi kibri nanga yepi fu a krakti fu Gado fu di unu abi bribi. Gado e kibri unu fu kan frulusu unu na wan fasi di o kon na krin na ini den lasti dei. A sani disi e gi unu bigi prisiri srefisrefi.”​—1 Petr. 1:3-6.

⁴ Yehovah teki wan pikin grupu Kresten fu tiri makandra nanga Krestes èn a meki den „gebore nyun baka”. Yehovah gebroiki en santa yeye fu teki den leki en manpikin èn fu poti den leki sma di o tiri leki kownu nanga priester makandra nanga Krestes na hemel (Openb. 20:6). Petrus taki dati den „gebore nyun baka” fu kan abi „wan howpu di no e lasi gowe”. A howpu disi na taki den o kisi „libi di no man pori, di no doti èn di no o lasi gowe”. Den o abi a libi dati „na ini hemel”. A tumusi moi howpu disi e gi den salfuwan „bigi prisiri”. Ma a howpu fu den o kon tru soso te den tan gi yesi na Gado.

5, 6. Fu san ede den salfu Kresten musu tan gi yesi na Gado te na dede?

⁵ Na ini a di fu tu brifi fu en, Petrus gi den salfu Kresten a deki-ati fu „du ala muiti fu tan de wan fu den sma di Gado kari èn di a teki” (2 Petr. 1:10). Den musu meki tranga muiti fu abi bribi, fu dini Gado fayafaya, fu lobi den brada fu den, èn fu lobi ala sma. Petrus ben taki: „Efu unu abi den sani disi bogobogo, dan dati o yepi unu fu no de sma di no e du noti.”​—Leisi 2 Petrus 1:5-8.

⁶ Krestes taigi den salfu owruman na ini a gemeente fu Filadelfia na Pikin Asia: „Fu di yu horidoro soleki fa mi ben du dati, meki mi o kibri yu sosrefi te a yuru fu tesi kon. A yuru dati o kon na heri grontapu, fu tesi den sma di e libi na grontapu. Mi o kon esi-esi. Tan hori steifi na san yu abi, so taki nowan sma o teki a pai di yu musu kisi” (Openb. 3:10, 11). Den salfuwan di e tan gi yesi na Gado te na dede, o kisi „wan moi kransi”. Ma efu wan salfu Kresten drai baka gi Yehovah, dan a no o kisi a kransi dati.​—1 Petr. 5:4; Openb. 2:10.

DEN O GO NA INI A KOWNUKONDRE

7. Fu sortu moi howpu Yudas taki na ini a brifi fu en?

⁷ Na a pisi ten fu a yari 65, Yudas, na afu brada fu Yesus, skrifi wan brifi gi den tra salfu Kresten. A taki dati den na ’den wan di Gado kari’. (Yud. 1; luku Hebrewsma 3:1.) A ben abi na prakseri fu skrifi den fu a tumusi moi howpu di ala salfu Kresten abi fu kisi frulusu (Yud. 3). Ma a ben abi fu skrifi den fu tra prenspari tori. Toku, na a kaba fu a syatu brifi fu en, a taki fu a moi howpu di salfu Kresten abi. A skrifi: „We, Gado man kibri unu fu no fadon èn fu de sondro fowtu. Na so unu kan de nanga bigi prisiri na fesi Gado di abi glori. En na a wan-enkri Gado, wi Frulusuman, èn na en meki wi Masra Yesus Krestes frulusu wi. Iya, na Gado abi a glori, a grani, a makti, nanga a reti fu tiri sensi owruten, sosrefi now èn fu têgo.”​—Yud. 24, 25.

8. Fa wi du sabi taki prisiri de na hemel te wan fu den salfuwan tan gi yesi na Gado te na dede?

⁸ A no de fu taki dati ibri salfu Kresten  wani taki Gado kibri en, so taki a no fadon èn kisi pori te fu kaba. Bijbel e gi den a howpu taki te den dede, Yesus Krestes sa gi den wan opobaka. Dan den o tron yeye, den no o abi sondu èn den o kon na fesi Gado nanga bigi prisiri. Te wan fu den salfuwan tan gi yesi na Gado te na dede, dan seiker a o „opo baka leki wan yeye”. A o kisi wan skin di „no man pori” èn a o opo baka „nanga glori” (1 Kor. 15:42-44). Efu furu ’prisiri de na hemel te wán sondari abi berow’, dan wi kan frustan o furu prisiri de na hemel te wan fu den salfu brada fu Krestes tan gi yesi na Gado te na dede (Luk. 15:7). Yudas tyari kon na krin taki „bigi prisiri” de na hemel te wan salfuwan di kisi wan opobaka, kon na fesi Yehovah.​—Leisi 1 Yohanes 3:2.

9. (a) San den wortu fu Petrus na ini 2 Petrus 1:10, 11 wani taki? (b) Sortu deki-ati den salfu Kresten di de na grontapu ete, e kisi fu a tekst disi?

⁹ Neleki Yudas, Petrus skrifi wan brifi gi den salfu Kresten pe a e fruteri den fu a blesi di den o kisi te den tan gi yesi na Gado. A taigi den: „Unu o kisi bigi blesi, fu di unu o go na ini a têgo Kownukondre fu wi Masra nanga wi Frulusuman Yesus Krestes” (2 Petr. 1:10, 11). Di Petrus taigi den taki den o kisi „bigi blesi” fu di den o go na ini a Kownukondre, dan kande a ben e taki fu a bigi glori di den ben o kisi te den ben o go na hemel. Kande a ben e taki tu fu den furu tra blesi di den ben o kisi na hemel. Den salfuwan o prisiri srefisrefi èn den o de nanga bigi tangi te den e prakseri fa den gi yesi na Gado te na dede. A howpu disi e gi den salfu Kresten deki-ati fu tai hori na Gado aladi den de na grontapu ete.​—1 Petr. 1:13.

„HOWPU DE” GI DEN TRA SKAPU

10, 11. (a) Sortu howpu de gi den tra skapu? (b) San Krestes abi fu du nanga a howpu fu den tra skapu? (c) Bijbel e taki dati „a glori fu den manpikin fu Gado o de fu si”. Fu san ede disi prenspari fu meki a howpu fu den tra skapu kon tru?

¹⁰ Na apostel Paulus ben skrifi taki den salfu „manpikin fu Gado” abi a tumusi moi  howpu fu „kisi wan gudu” makandra nanga Krestes. Baka dati Paulus taki fu a kefalek moi howpu di Yehovah gi a bigi grupu tra skapu: „Ala den sani [sobun, ala libisma] di Gado meki, e wakti fayafaya te a glori fu den manpikin fu Gado [noso den salfuwan] o de fu si. Bika den sani di Gado meki tron soso sani, a no fu di densrefi wani, ma na fu di Gado meki den kon de so. Ma toku howpu de taki den sani di Gado meki, kon fri fu wan skin di e dede. Na so den o kon fri na wan tumusi moi fasi leki pikin fu Gado.”​—Rom. 8:14-21.

¹¹ Yehovah gi libisma „howpu” di a pramisi den taki a o fri den fu „a fosi sneki” Satan Didibri. Gado ben o du dati nanga yepi fu wan „pikin”, soleki fa a ben pramisi (Openb. 12:9; Gen. 3:15). Yesus Krestes ben de a moro prenspari sma di meki a profeititori di abi fu du nanga a „pikin” disi, kon tru (Gal. 3:16). A dede nanga na opobaka fu Yesus meki taki libisma kon abi a howpu fu kon fri fu sondu nanga dede. Boiti dati, a howpu disi abi fu du nanga a ten te „a glori fu den manpikin fu Gado [noso den salfuwan] o de fu si”. Den salfuwan e meki a profeititori di abi fu du nanga a „pikin”, kon tru tu. Te Bijbel e taki dati „a glori fu den manpikin fu Gado o de fu si”, dan disi wani taki dati a o de krin fu si taki den salfuwan na hemel na kownu di e tiri makandra nanga Krestes. Wán fasi fa wi o sabi disi, na te den o yepi Krestes fu pori a grontapu fu Satan (Openb. 2:26, 27). Na so den tra skapu di komoto na ini a bigi banawtu, o kisi frulusu.​—Openb. 7:9, 10, 14.

12. Sortu moi blesi libisma o kisi te a glori fu den salfuwan o de fu si?

¹² A Dusun Yari Tiri fu Krestes o tyari frulekti gi libisma trutru! Na a ten dati, a glori fu den „manpikin fu Gado” o de fu si na wan tra fasi tu. Den o dini leki priester makandra nanga Krestes, èn den o yepi libisma fu kisi wini fu a frulusu-ofrandi fu Yesus. Te a Kownukondre fu Gado o tiri grontapu, dan libisma di e gi yesi na Gado, safrisafri o „kon fri fu wan skin di e dede”. Den o kon fri fu den takru bakapisi di sondu nanga dede tyari kon. Efu den e tan gi yesi na Yehovah na ini den dusun yari èn na a ten fu a lasti tesi di o kon na a kaba fu den dusun yari dati, dan den nen o skrifi na ini „a buku fu libi” fu têgo. „Den o kon fri na wan tumusi moi fasi leki pikin fu Gado” (Openb. 20:7, 8, 11, 12). Disi na trutru wan tumusi moi howpu!

HORI A HOWPU FU YU BUN NA PRAKSERI

13. (a) San meki taki wi abi wan howpu? (b) O ten a o de krin fu si taki Krestes kon?

¹³ Den sani di Petrus skrifi na ini den tu brifi fu en e yepi den salfuwan èn den tra skapu fu hori a howpu fu den bun na prakseri. A tyari kon na krin taki den no kisi a howpu disi fu di den e du bun wroko, ma den kisi en fu di Yehovah abi bigi bun-ati. Petrus skrifi: „De nanga krin frustan dorodoro. Hori a bun na prakseri di Gado o du gi unu te a o de krin fu si taki Yesus Krestes kon” (1 Petr. 1:13). „A o de krin fu si taki Yesus Krestes kon” te a o blesi den trutru bakaman fu en èn te a o pori den ogriwan.​—Leisi 2 Tesalonikasma 1:6-10.

14, 15. (a) San wi musu du fu hori a howpu fu wi bun na prakseri? (b) Sortu rai Petrus gi wi?

¹⁴ Efu wi wani hori a howpu fu wi bun na prakseri, dan wi no musu frigiti taki „a dei fu Yehovah” o kon heri esi. Disi musu abi krakti tapu wi heri libi. Yehovah o pori „den hemel”, dati na den libisma tirimakti fu a ten disi. A o pori „grontapu” tu, dati na den ogri libisma. Boiti dati, a o pori ’den sani di de wan pisi fu grontapu’. Petrus ben skrifi: „Un  musu luku sortu sma un musu de. . . . Tan fruwakti a dei fu Yehovah. Tan hori bun na prakseri taki a dei dati e kon. Na a ten dati den hemel o bron na ini faya. A bigi faya disi o smèlter den sani di de wan pisi fu hemel nanga grontapu!”​—2 Petr. 3:10-12.

¹⁵ Baka dati „nyun hemel nanga wan nyun grontapu” o de. A tirimakti fu Krestes èn den reti-ati sma di a o tiri, o kon na ini a presi fu den libisma tirimakti nanga ala den ogri sma (2 Petr. 3:13). Fu di wi e fruwakti nyun hemel nanga wan nyun grontapu, meki Petrus taigi wi krin san wi musu du fu hori a howpu dati bun na prakseri. A taki: „Fu dati ede un lobiwan, now di unu e fruwakti den sani disi, du ala muiti fu meki Gado si unu te fu kaba leki sma di de sondro flaka, sondro fowtu èn di e libi na ini freide.”​—2 Petr. 3:14.

SORI TAKI YU E HORI A HOWPU FU YU BUN NA PRAKSERI

16, 17. (a) Fa wi kan sori taki wi e ’tyari wisrefi na wan santa fasi’ èn taki wi e „dini Gado fayafaya”? (b) Fa a howpu fu wi o kon tru?

¹⁶ A fasi fa wi e libi musu sori taki wi e hori a howpu fu wi bun na prakseri. Petrus memre wi taki wi musu sorgu taki wi na sma di Yehovah feni bun. Te wi e du san Gado feni bun, dan wi e tyari wisrefi ’na wan bun fasi na mindri den grontapusma’, èn na so wi e ’tyari wisrefi na wan santa fasi’ (2 Petr. 3:11; 1 Petr. 2:12). Boiti dati, wi musu „lobi makandra”. Sobun, wi musu du ala san wi man fu tan abi wánfasi na heri grontapu èn na ini a gemeente fu wi (Yoh. 13:35). Petrus taki tu dati wi musu „dini Gado fayafaya”. Dati wani taki dati wi musu du sani di e yepi wi fu tan de bun mati fu Yehovah. Den sani di wi musu du, na fu begi nanga wi heri ati, leisi Bijbel ibri dei, studeri Bijbel bun, hori na Osofamiri Anbegi, èn preiki a ’bun nyunsu fu a Kownukondre’ doronomo.​—Mat. 24:14.

¹⁷ Ibriwan fu wi wani de wan sma di Yehovah feni bun èn di a o frulusu te na ogri grontapu disi o „smèlter gowe”. Efu yu na so wan sma, dan ’a howpu di yu abi fu libi fu têgo’ o kon tru. „Na dati Gado, di no man lei, pramisi wi langa ten pasa kaba.”​—Tit. 1:2.

[Aksi fu a tori disi]

[Prenki na tapu bladzijde 22]

Salfu Kresten e „gebore nyun baka fu kan abi wan howpu di no e lasi gowe”

[Prenki na tapu bladzijde 24]

Yepi yu osofamiri fu hori a howpu fu unu bun na prakseri