Lipaxuw Kakgalhkgalhiw
Lipaxuw Kakgalhkgalhiw
“Lakimpi kgalhkgalhimaw latamat wantu xaliʼankgalhin wantu xalipulana ntimalaknulh Dios wanti niʼukxni akgsaninan.” (TITO 1:2)
TUKU AKXILHWI
¿Tuku likatsiyaw pi anan lhuwa tapaxuwan kʼakgapun akxni niy chatum xatalaksakni chu nikxni makgxtakgli Jehová?
¿Tuku xtalakxtum xtakgalhkgalhinkan xaʼamakgapitsi borregos chu xatalaksakni?
¿Tuku «xasantujlani kilatamatkan» kilikgalhitkan chu la “nakakninaniyaw Dios” xlakata naʼakxilhaw nakgantaxtu tuku kgalhkgalhimaw?
1. ¿La kinkamakgtayayan natayaniyaw, takgalhkgalhin nema kinkamaxkiyan Jehová?
PABLO katsokgnanilh natalan: «Dios nti mastay ntakgalhkgalhitin, [...] xatakgatsin tapaxuwan, chu ntatanksni nkakalixajni lantla nkanajlayatit, lakimpi [...] takgalhkgalhitin nakgalhiyatit xpalakata xlitliwakga spiritu santo» (Rom. 15:13). Xlakata takgalhkgalhin nema kinkamaxkiyan Jehová, lu napaxuwayaw, tlan natawilayaw chu natayaniyaw putum taʼakglhuwit. Maski xatalaksakni akinin o ni, uma takgalhkgalhin «tliwakglh liwiliy» kilatamatkan (Heb. 6:18, 19). Nakinkamakgtayayan natayaniyaw maski tuwa tuku natitaxtuyaw kilatamatkan xlakata ni naxlajwanan kintakanajlakan chu nakatsiyaw tuku natlawayaw (kalikgalhtawakga Hebreos 2:1 chu 6:11).
2. ¿Tuku akgtiy takgalhkgalhin kgalhiyaw tiku lamaw uku, chu tuku xlakata xlakaskinka akxilhkgo «amakgapitsi borregos» xtakgalhkgalhinkan xatalaksakni?
2 ¿Tuku akgtiy takgalhkgalhin kgalhiyaw kstalaninanin Cristo tiku lamaw xaʼawatiya kilhtamaku? Tiku tapakgsikgo «ni xalhuwa borregos» nema lamakgolhku kKatiyatni kgalhkgalhimakgolh naʼankgo kʼakgapun, niku nikxni nanikgo, mapakgsinanin chu sacerdotes nawankgo kxTamapakgsin Cristo (Luc. 12:32, NM; Apo. 5:9, 10). Chu tiku tapakgsikgo «lhuwa ntachixkuwitat» o latamanin xla «amakgapitsi borregos» kgalhkgalhimakgolh nalatamakgo kKatiyatni akxni akgtum paraíso nawan chu natapakgsinikgo Cristo (Apo. 7:9, 10; Juan 10:16, NM). Xaʼamakgapitsi borregos nalakapastakkgo pi xlakata tlan nalakgtaxtukgo talakaskin pi namakgtayakgo “xnatalanin” Cristo (Mat. 25:34-40). Xatalaksakni nakamaxkikan tuku kgalhkgalhimakgolh pero xaʼamakgapitsi borregos na nakamaxkikan tuku kgalhimakgolh (kalikgalhtawakga Hebreos 11:39, 40). Pulana kaʼakxilhwi tuku kgalhkgalhimakgolh xatalaksakni.
“XTAKGALHKGALHINKAN” TIKU KALAKSAKKANIT NAʼANKGO KʼAKGAPUN
3, 4. ¿Tuku «xasasti latamat» kgalhikgo xatalaksakni, chu tuku “takgalhkgalhin” kgalhikgo?
3 Pedro katsokgnanilh akgtiy carta natalan tiku “xatalaksakni” (1 Ped. 1:1, 2). Anta kawanilh lu tlan takgalhkgalhin nema kgalhikgo ni xalhuwa borregos. Akgtum liʼakxilhtit, xapulana katsokgnanilh: «Katamaxkilh mpaxkatsinit Dios, wa cha xtlat nkimpuchinakan Jesucristo. Wa xpalakata ntlanka xtalakgalhaman, kinkalimasastinitan xasasti latamat lakimpi nalikgalhkgalhitiyaw, ntamalaknun, xpalakata xtalakastakwan Jesucristo klinin, chu mpi nalikgalhiyaw wa ntu nkinkalakgchanan ntu ni kgalhiy xlisputni, chu na ni lay mpasa ntu ni tlan, [...] kinkatamakininitan nkʼakgapun. Xlimakgwa nkin, litamakinitaw xlitliwakga Dios xpalakata kintakanajlakan nalilakgchanaw akgaputaxtut wantu ntakaxwilinit natasiyuy akxni nachin yuma awatiya kilhtamaku. Wa ntu wixin limakgapaxuwakanatit» (1 Ped. 1:3-6).
4 Chuna la akxilhaw, tiku kalaksaknit Jehová xlakata natamapakgsinankgo Cristo kʼakgapun nakgalhikgo «xasasti latamat» akxni xkamanan Dios litaxtukgo. Kalilaksakkan espíritu santo xlakata la Cristo, mapakgsinanin chu sacerdotes nawankgo (Apo. 20:6). Chuna la wan Pedro, uma «xasasti latamat» tlawa pi nakgalhikgo “takgalhkgalhin”, «ni kgalhiy xlisputni, chu na ni lay mpasa ntu ni tlan» nema nakamaxkikan «nkʼakgapun». ¡Wa xlakata lu “lipaxuwamakgolh”! Xlakata namakglhtinankgo tuku kgalhkgalhimakgolh, talakaskin ni namakgxtakgkgo Dios.
5, 6. ¿Tuku xlakata talakaskin pi tiku kalaksakkanit nikxni namakgxtakgkgo Dios?
5 Xliʼakgtiy xcarta, Pedro kawani xatalaksakni: «Kamalakatanksatit mpi [...] ntalaksaknitantit, chu ntatasaninitantit» (2 Ped. 1:10). Lu talakaskin nakgalhikgo laktlan tayat la takanajla, tapaxkit, nakakninanikgo Dios chu nakapaxkikgo natalan kcongregación. Apóstol kawanipa: «Wa palapi wixin paks kgalhiyatit wantu kit kawaniman, chu akgstitum makgantaxtipatit, nialh kaj xman chunatiya katilatapatit» (kalikgalhtawakga 2 Pedro 1:5-8, Hua Xasasti Talaccaxlan, 1999).
6 Akxni Cristo xmalakastakwanikanita kamalakgachanilh tamakatsin lakgkgolotsin xatalaksakni kcongregación xalak Filadelfia (Asia menor) kxapulana siglo: «Xampi kgalhakgaxpatnita ntachuwin xla kintapaxuwanaliyan, pus na nakmakgtayayan akxni namin ni tlan kilhtamaku xla talakgaputsit lantla xlikatlanka nkatuxawat, lakimpi naliʼukxilhkgokan xtakanajlakan xlipaks nti lamakgo nkatuxawat. Kuintaj katlawa, xampi kaj lakapala nakmin; tliwakglh kakgalhi wa ntu nkgalhiya kminaku, lakimpi tini achatum napalakgakgalhiyan mintatlajan» (Apo. 3:10, 11). ¿Tuku xakgspulalh tiku xatalaksakni komo xmakgxtakgli Dios? Ni xmakgamakglhtinalh tuku «ni kgalhiy xlisputni, chu na ni lay mpasa ntu ni tlan» xlakata uma nakamaxkikan tiku nikxni namakgxtakgkgo Dios (1 Ped. 5:4; Apo. 2:10).
AKXNI NATANUKGO KXTAMAPAKGSIN DIOS
7. ¿Tuku lu tlan takgalhkgalhin lichuwinan Judas kxcarta?
7 Kkata 65, Judas xtutala Jesús kamalakgachanilh carta, natalan tiku “xkalaksakkanit” (Jud. 1; katamalakxtumi Hebreos 3:1). Judas xkalitachuwinamputun takgalhkgalhin nema kgalhikgo tiku kalaksakkanit namapakgsinankgo xTamapakgsin Dios (Jud. 3). Maski atanu tuku na lu xlakaskinka lichuwinalh, pero limakgalhsputulh uma takgalhkgalhin: «Nti nkgalhiy litliwakga nakalimakiyan ni naʼakgchakgxatit, chu nakamakamastayan kxlakatin ntani naukxilhatit lantla ntlanka xlakatsukut, [...] wata kaj namakgapaxuwakanatit lipikua. [...] Dios nti nkgalhiy ntastakat, kimakgaputaxtinakan, wa mininiy nti natamaxkiy nkakni, chu nkatamatlankilh, chu nkamapakgsinalh, chu nkakgalhilh litliwakga, chiyu, chu asta kaxani liwayaj» (Jud. 24, 25).
8. Xlakata tuku wan Judas 24, ¿la katsiyaw pi anan lhuwa tapaxuwan akxni niy xatalaksakni tiku nikxni makgxtakgli Dios?
8 Putum tiku xatalaksakni lu liskujkgo ni namakgxtakgkgo Dios chu ni natlawakgo tuku nitlan chu ni nakamasputukan. Kgalhkgalhimakgolh pi akxni nanikgo, Cristo nakamalakastakwani, nialh lakgalhinanin katiwankgolh chu lu napaxuwakgo nachankgo kxlakatin Dios. Akxni xatalaksakni niy chu nikxni makgaxtakgli Dios, malakastakwanikan chu «nialh [...] katitalakgalhilh», «kgalhiy xkakni» chu nakgalhi «makni wa ntu xala kʼakgapun» (1 Cor. 15:42-44). ¿La makgkatsikgo amakgapitsi ángeles? Kalakpuwaw: xlakata kʼakgapun anan lhuwa tapaxuwan akxni «nchatum lakgalhina chixku wa nti ntalakgaspittayaniy xtalakgalhin», ¡tlakg lhuwa anan tapaxuwan akxni niy tiku natamapakgsinan Cristo chu nikxni makgxtakgli Dios! (Luc. 15:7.) Akxni uma kilhtamaku, Jehová chu xʼángeles “napaxuwakgo” akxni xatalaksakni nalakastakwanankgo (kalikgalhtawakga 1 Juan 3:2).
9. ¿Tuku wamputun “chapaxuwana nakalimanukan” xatalaksakni kTamapakgsin, chu la kamakgtaya tiku lamakgolhku kKatiyatni?
9 Pedro na lichuwinan tuku nakamaxkikan xatalaksakni tiku nikxni makgxtakgkgo Dios: «Chapaxuwana nakalimanuyan ntani xaliʼankgalhin namapakgsinan nkimpuchinakan, na kimakgaputaxtinakan Jesucristo» (2 Ped. 1:10, 11). ¿Tuku wamputun “chapaxuwana nakalimanukan” kʼakgapun? Wamputun pi akxni natanukgo kʼakgapun nakamaxkikan kakni xlakata lakwan xtayatkan. Na kilhchanima lhuwa tasikulunalin nema nakamaxkikan kʼakgapun. Tiku laksakkanit lu nalipaxuwa akxni naʼakxilha pi nikxni makgxtakgli Dios. Uma takgalhkgalhin tlawa pi “skgalalh katawi xtapuwankan” akxni lamakgolhku kkatiyatni (1 Ped. 1:13).
«NTAKGALHKGALHITIN» XLAKATA MAKGAPITSI BORREGOS
10, 11. 1) ¿Tuku kgalhkgalhimakgolh xaʼamakgapitsi borregos? 2) ¿La tlawa Cristo xlakata tlan nalatamayaw Katiyatni chu wantiku litaxtukgo «xlakgskgatan Dios»?
10 Apóstol Pablo tsokgnalh xlakata takgalhkgalhin nema kgalhikgo «xlakgskgatan Dios» tiku kalilaksakkanit espíritu santo, «na nakinkalakgchanan wa ntu xla nkgalhi [Cristo]». Pero na lichuwinalh lu tlan takgalhkgalhin nema Jehová nakamaxki lhuwa tiku tapakgsikgo xaʼamakgapitsi borregos: «Xampi xlipaks ntamalakatsukun, kgalhkgalhitimakgo akxni na akgtum malakatanksakgokan wa lantla [...] chuna xliwanat xlakgskgatan Dios. Xampi xlipaks ntamalakatsukun, ni kaj xtalakgatinkan limapatinikgoka yuma ntu ni kgalhi xkilhtsukut; wampi wa xpalakata mpi kaj chuna lakaskilh nti nchuna liwililh, wampi na timaxkikgolh ntakgalhkgalhitin nalakgtaxtukgoy. Xampi na chuna xlipaks ntamalakatsukun nalakgtaxtunikgoy yuma ntu ntliwakglh kgalhikgoy lantla ankgalhin sputtilhay, lakimpi makxtum natalipaxuwakgoy xlakgskgatan Dios wa yuma lilakgatit ntalakgtaxtun ntu namin» (Rom. 8:14-21).
11 Jehová kamaxkilh «ntakgalhkgalhitin» latamanin akxni lichuwinalh pi «xkamanan puskat» xʼama kalakgmaxtu kxmakan Satanás, «xamakgan luwa» (Gén. 3:15; Apo. 12:9). Uma «kamanan» wa Jesucristo (Gál. 3:16, NM). Xlakata Cristo nilh chu malakastakwanika, tlawalh pi tlan xkalakgmaxtuka latamanin ktalakgalhin chu klinin. Akxni uma kilhtamaku «malakatanksakkgokan [...] xlakgskgatan Dios». ¿Tukuya kilhtamaku nakatsiyaw pi umakgolh xlakgskgatan Dios? Akxni tiku xatalaksakni nalakastakwanankgo tiku na litaxtukgo «xkamanan puskat» chu namasputukgo xalixkajni xkakilhtamaku Satanás (Apo. 2:26, 27). Chu uma tuku nala nakalakgmaxtu xaʼamakgapitsi borregos, tiku nalakgtaxtukgo klanka tapatin (Apo. 7:9, 10, 14).
12. ¿Tuku lu tlan nakakitaxtuni latamanin akxni natakatsi tiku «xlakgskgatan Dios»?
12 Akxni Cristo namapakgsinan Akgtum Mil Kata «ntamalakatsukun» o latamanin nakalakgmaxtukan. Akxni uma kilhtamaku natakatsi tiku «xlakgskgatan Dios», uma na kilhchanima: tiku na sacerdotes nawankgo la Cristo, nakalimakgtayakgo latamanin xlakata xtamakamastan Jesús. KxTamapakgsin Dios, tiku nakgalhakgaxmatnankgo chuna la natitaxtutilha kilhtamaku nialh katikgalhikgolh talakgalhin chu nialh katinikgolh. Nachuna nakalakgmaxtukan nema «ntliwakglh kgalhikgoy» tuku nitlan. Akxni Cristo namapakgsinan Akgtum Mil Kata, komo chuntiya ni namakgxtakgkgo Jehová chu natayanikgo tuku xaʼawatiya nakaliʼakxilhkan, nawilikan xtukuwanikan «[k]libro, wa cha xla latamat» chu «natalipaxuwakgoy xlakgskgatan Dios wa yuma lilakgatit ntalakgtaxtun» (Apo. 20:7, 8, 11, 12). ¡Lu tlan takgalhkgalhin!
CHUNTIYA KAKGALHIW TAKGALHKGALHIN
13. ¿Tuku xlakata kgalhiyaw takgalhkgalhin chu tukuya kilhtamaku natakatsi «akxni namin Jesucristo»?
13 Maktiy carta nema Pedro tsokgli lu kamakgtaya tiku naʼankgo kʼakgapun chu xaʼamakgapitsi borregos na chuntiya nakgalhikgo takgalhkgalhin. Pedro wa pi ni kaj xlakata lu tlan likatsikgo, wata uma xtalakgalhaman Jehová: «Skgalalh katawi mintapuwankan, kaʼakkatsitawilatit, xamakgtum tunkan kakgalhkgalhititit ntu nakalakgchanan lipaxkatsinit akxni namin Jesucristo» (1 Ped. 1:13). ¿Tukuya kilhtamaku natakatsi «akxni namin Jesucristo»? Akxni nakamaxki tuku kalakgchan tiku nikxni makgxtakgkgolh chu nakamasputu tiku lixkajni likatsikgo (kalikgalhtawakga 2 Tesalonicenses 1:6-10).
14, 15. 1) ¿Tuku kilitlawatkan xlakata chuntiya nakgalhiyaw takgalhkgalhin? 2) ¿Tukuya tastakyaw mastalh Pedro?
14 Xlakata chuntiya nakgalhiyaw takgalhkgalhin talakaskin pi nakgalhkgalhiyaw «xkilhtamaku Dios». Uma «xkilhtamaku» nakamalakgsputukan «akgapun» chu «ntiyat», uma wamputun mapakgsinanin xalak Katiyatni chu tiku lixkajni likatsikgo wantu «litustuka ntiyat». Wa xlakata Pedro wa: «Ti nchixkuwin miliwanatkan, [...] nti nkgalhkgalhitipatit namin xkilhtamaku Dios, mpi kachilha mpuwanatit, akxni nalhkuy akgapun, paks nalakgsputa» (2 Ped. 3:10-12).
15 Pedro wa pi «akgapun» chu «ntiyat» nema wilakgolh la uku natawila xlakgxokgo «xasasti akgapun [xTamapakgsin Cristo] chu xasasti tiyat [latamanin tiku kgalhakgaxmatnankgo]» (2 Ped. 3:13, NM). Alistalh, lichuwinampa pi xlakata kgalhkgalhimaw xasasti kakilhtamaku nema wankan pi namin, mastalh uma tastakyaw: «Ntu nkgalhkgalhipatit yuma nkatuwaj, xatapaxkinin, kana wixin fuerzaj katlawanitit ni tu ntalakgalhin ntilitatakgsniyatit akxni namin» (2 Ped. 3:14).
KALATAMAW XLAKATA TUKU KGALHKGALHIMAW
16, 17. 1) ¿Tuku «xasantujlani kilatamatkan» kilikgalhitkan chu la “nakakninaniyaw Dios”? 2) ¿Tuku kilitlawatkan xlakata naʼakxilhaw nakgantaxtu tuku kgalhkgalhimaw?
16 Chuntiya nakgalhiyaw takgalhkgalhin pero na talakaskin chuna nalatamayaw xlakata tuku kgalhkgalhimaw. Chuna la wa Pedro, talakaskin pi kuenta natlawayaw kintakanajlakan. ¿Tuku wamputun uma? Pulana, natasiya «lantla xasantujlani kilatamatkan kgalhiyaw» chu lakatitum linaw kilatamatkan «kxlakgstipankan xakgmakgat chixkuwin» (2 Ped. 3:11; 1 Ped. 2:12). Na lu xlakaskinka nalapaxkiyaw, chu lu naliskujaw tlan natalalinaw putum kinatalankan chu nachuna kcongregación (Juan 13:35). Lu xlakaskinka pi «xkakninanin Dios nawanatit», wa uma tuku tlakg nakinkamalakatsuwiyan Jehová, la akxni tlawayaw oración, chu akxni chali chali nalikgalhtawakgayaw Biblia, nakgalhiyaw akgtum programa xlakata nakgalhtawakgayaw, nakakninaniyaw Dios kfamilia chu xatapaxuwan nalichuwinanaw «xatlan tamakatsinin xla Tamapakgsin» (Mat. 24:14, NM).
17 Putum lakaskinaw pi Jehová tlan nakinkaʼakxilhan chu nakinkalakgmaxtuyan akxni namasputu uma xalixkajni kakilhtamaku. Komo chuna natlawayaw, naʼakxilhaw la nakgantaxtu tuku “kgalhkgalhimaw latamat wantu xaliʼankgalhin wantu xalipulana ntimalaknulh Dios wanti niukxni akgsaninan” (Tito 1:2).
[Takgalhskinin]
[Dibujo xla página 22]
Natalan xatalaksakni kgalhikgo «xasasti latamat»
[Dibujo xla página 24]
Kifamiliajkan na chuntiya kakgalhikgolh takgalhkgalhin
