Amamas Long Samting Yumi Bilip Na Wetim
Amamas Long Samting Yumi Bilip Na Wetim
“[Yumi] bilip na wet long kisim laip oltaim . . . Na God, em man i no inap giaman, bipo yet em i bin promis long givim dispela laip.”—TAI. 1:2.
YU INAP BEKIM?
Olsem wanem yumi save ol lain long heven i amamas taim wanpela Kristen God i makim i holimpas bilip i go inap long em i dai?
Olsem wanem samting ol Kristen God i makim i bilip na wetim, i helpim ol arapela sipsip long kisim ol samting ol i bilip na wetim?
Sapos yumi laik bai samting yumi bilip na wetim i kamap tru, orait yumi mas mekim wanem bilong soim olsem yumi “wokabaut long pasin i holi” na “mekim yet ol gutpela pasin namel long ol manmeri bilong graun”?
1. Jehova i tok promis long gutpela samting yumi ken wetim, olsem wanem dispela i helpim yumi long karim hevi?
APOSEL POL i tok Jehova em “i as bilong ol gutpela samting yumi bilip na wetim.” Na Pol i tok moa olsem Jehova i ken givim amamas na bel isi long yumi “na long strong bilong holi spirit pasin bilong bilip na wetim gutpela samting i ken pulap tru long [yumi].” (Rom 15:13) Sapos dispela samting yumi bilip na wetim i stap strong long tingting bilong yumi, orait yumi inap karim ol hevi na stap amamas na bel isi. Ol hevi bilong laip i kain olsem bikpela win na ren. Taim ol hevi i painim yumi, maski yumi insait long lain God i makim o ol arapela sipsip, orait ol samting yumi bilip na wetim i olsem “anka bilong laip bilong yumi. Em i stap strong na i no inap surik liklik.” (Hib. 6:18, 19) Sapos yumi tingting strong long samting yumi wetim, orait bilip bilong yumi bai i no lus. Dispela gutpela samting yumi bilip na wetim, olsem hop yumi gat, bai strongim bilip bilong yumi na yumi no gat tupela tingting.—Ritim Hibru 2:1; 6:11.
2. Ol Kristen God i makim na “ol arapela sipsip” i bilip na wetim wanem samting? Bilong wanem “ol arapela sipsip” i laik save long hop bilong ol lain God i makim?
2 Ol Kristen i stap nau long dispela taim bilong pinis i bilip na wet long kisim laip oltaim. Ol bratasista bilong “liklik lain sipsip” husat i stap yet long graun i bilip na wet long kisim laip long heven na ol i no inap dai moa. Ol bai wok king na pris wantaim Krais long Kingdom bilong em. (Luk 12:32; Rev. 5:9, 10) “Ol arapela sipsip,” em ol i planti tru winim “liklik lain,” ol i bilip na wet long kisim laip oltaim long Paradais bai kamap long graun aninit long Kingdom Bilong Mesaia. (Jon 10:16; Rev. 7:9, 10) Ol arapela sipsip i no ken lusim tingting olsem bilong God i ken kisim bek ol, ol i mas sapotim ol brata bilong Krais husat i stap yet hia long graun. (Mat. 25:34-40) Ol Kristen God i bin makim ol bai kisim pe bilong ol, na ol arapela sipsip tu bai kisim pe bilong ol. (Ritim Hibru 11:39, 40.) Pastaim yumi ken kisim sampela save moa long dispela hop God i givim long ol Kristen em i makim ol long holi spirit.
SAMTING EM OL KRISTEN GOD I MAKIM I WETIM
3, 4. Jehova i mekim wanem na ol Kristen em i makim i “bon gen” na ol inap “wetim samting em tru tru bai kamap”? Ol i wetim wanem samting?
3 Aposel Pita i salim 2-pela pas i go long ol Kristen God i makim. (1 Pita 1:1) Ol pas bilong Pita i helpim yumi long save moa long ol gutpela samting em liklik lain sipsip i wet long en. Long namba 1 pas em i tok: “Yumi litimapim nem bilong God na Papa bilong Bikpela bilong yumi, Jisas Krais. Long rot bilong bikpela pasin marimari bilong em, em i mekim na yumi bon gen, na long rot bilong kirap bek bilong Jisas Krais yumi wetim samting em tru tru bai i kamap. Bai yupela i kisim dispela samting i save stap oltaim, em laip i no inap bagarap na i klin olgeta. Em samting God i redim bilong yupela long kisim long heven. Yupela dispela lain em God i lukautim long rot bilong strong bilong em, long wanem, yupela i gat bilip. God i lukautim yupela bilong kisim bek yupela, na dispela pasin bilong kisim bek yupela em bai kamap ples klia long taim bilong pinis. Long dispela as yupela i amamas tru.”—1 Pita 1:3-6.
4 Jehova i mekim na liklik lain Kristen em i makim bilong mekim wok king wantaim Krais long heven, ol i “bon gen.” Jehova i yusim holi spirit bilong em long adoptim ol olsem pikinini bilong em na makim ol bilong mekim wok king na pris wantaim Krais long heven. (Rev. 20:6) Long dispela rot ol i “bon gen” na ol inap “wetim samting em tru tru bai kamap.” Ol i wetim wanem samting? Pita i tok em laip oltaim we i no inap bagarap na God i redim bilong ol long heven. Dispela gutpela hop i mekim na i gat as na ol Kristen God i makim i ken amamas. Tasol bilong kisim dispela kain laip, ol i mas stap gut long God.
5, 6. Bilong wanem ol Kristen God i makim i mas stap gut long em?
5 Long namba 2 pas, Pita i tokim ol Kristen God i makim long wok strong tru long stap gut long God, na bai ol inap kisim laip long heven. (2 Pita 1:10) Ol i mas kamapim yet ol pasin olsem bilip, givim bel tru long God, na laikim ol brata. Pita i tok: “Sapos ol dispela pasin i stap long yupela na i pulap na kapsait, orait stretpela save bilong yupela long Bikpela bilong yumi Jisas Krais bai i no inap i stap nating. Nogat. Em bai i karim planti kaikai.”—Ritim 2 Pita 1:5-8.
6 Krais i tokim ol elda Kristen God i makim em ol i stap long kongrigesen Filadelfia, long Esia Maina, olsem: “Yu bin bihainim ol tok ol man i mekim long pasin bilong mi long sanap strong, olsem na bai mi lukautim yu long dispela taim bilong traim. Dispela traim bai kamap long olgeta hap bilong graun bilong traim olgeta manmeri i stap long en. Mi bai kam kwiktaim. Yu mas wok yet long holim strong samting yu holim pinis, nogut wanpela i kisim prais bilong yu.” (Rev. 3:10, 11) Dispela “prais” i bilong ol man God i makim husat i stap gut long em i go inap long ol i dai. Sapos wanpela Kristen God i makim i no stap gut long Em, orait em i no inap kisim dispela prais.—1 Pita 5:4; Rev. 2:10.
GO INSAIT LONG KINGDOM WANTAIM GLORI
7. Long pas bilong em, Jut i stori long wanem gutpela hop?
7 Klostu long 65 C.E., brata bilong Jisas, em Jut, i raitim wanpela pas i go long ol Kristen God i makim. Em i kolim ol olsem “ol manmeri God i bin singautim.” (Jut 1; skelim Hib. 3:1.) Em i gat laik long stori long hop bilong ol Kristen God i bin makim, olsem God bai kisim bek ol. (Jut 3) Tasol nogat, em i mas stori long ol arapela bikpela samting. Tasol long pinis bilong pas em i stori long hop bilong ol Kristen God i makim. Em i tok: “God em inap tru long lukautim yupela na bai yupela i no ken pundaun, na em inap long mekim yupela i stap klin na bai yupela i ken lukim glori bilong en wantaim bikpela amamas. God em i Seivia bilong yumi, na long rot bilong Jisas Krais, Bikpela bilong yumi, God i ken kisim glori, biknem, strong, na namba inap oltaim oltaim, long nau na long olgeta taim bihain.”—Jut 24, 25.
8. Olsem wanem yumi save ol lain long heven i amamas taim wanpela Kristen God i makim i holimpas bilip i go inap long em i dai?
8 Tru tumas, olgeta wan wan Kristen God i makim i laik bai God i lukautim ol na ol i “no ken pundaun” na kisim bagarap. Ol Kristen God i bin makim i bilip na wet long Jisas Krais i kirapim ol bek na ol bai stap gutpela olgeta long heven. Long dispela rot ol inap i stap long hap God i stap long en. Taim wanpela bilong ol i stap gut long God i go inap long em i dai, em bai kirap bek long “bodi bilong heven,” em bodi i gat “biknem” na “i no inap bagarap.” (1 Kor. 15:42-44) Sapos bikpela “amamas i kamap long heven taim wanpela sinman i tanim bel,” orait tingim bikpela amamas i kamap long heven taim wanpela brata bilong Krais i holimpas bilip i go inap long em i dai. (Luk 15:7) Ol wan wan Kristen God i makim i kisim “bikpela amamas” taim ol i kisim pe bilong ol, na Jehova na ol gutpela spirit long heven i amamas wantaim ol.—Ritim 1 Jon 3:2.
9. Olsem wanem ol Kristen God i makim bai go insait long Kingdom na “kisim gutpela blesing tru”? Dispela i mekim wanem long ol Kristen God i makim, husat i stap yet hia long graun?
9 Olsem Jut, Pita i raitim pas long ol Kristen God i makim na em i stori long pe ol bai kisim sapos ol i holimpas bilip bilong ol. Em i tokim ol: “Bai yupela i kisim gutpela blesing tru, em olsem yupela bai kisim tok orait long i go insait long kingdom bilong Jisas Krais, em Bikpela na Seivia bilong yumi, na dispela kingdom bai stap oltaim oltaim.” (2 Pita 1:10, 11) Taim Pita i tok ol bai go insait long Kingdom na ol bai “kisim gutpela blesing tru,” ating em i stori long ol bai go insait long heven wantaim bikpela glori. Na tu, ating em i stori long planti blesing ol bai kisim long heven. Ol Kristen God i makim bai pilim bikpela amamas taim ol i tingim bek pasin bilong ol yet long stap gut long God. Dispela i strongim ol Kristen God i makim long holimpas bilip taim ol i stap yet hia long graun.—1 Pita 1:13.
OL SAMTING OL ARAPELA SIPSIP I WETIM
10, 11. (a) Ol arapela sipsip i bilip na wetim wanem gutpela samting? (b) Olsem wanem Krais na pasin bilong ‘ol pikinini bilong God long kamap ples klia’ bai helpim ol manmeri long kisim ol samting ol i bilip na wet long en?
10 Aposel Pol i raitim pas long ol Kristen God i makim na stori long gutpela hop bilong ol long i stap “wanlain wantaim Krais na kisim ol samting long papa.” Bihain em i stori long gutpela samting em Jehova i givim long ol arapela sipsip: “Ol samting God i wokim i gat laik stret long dispela taim i mas kamap we glori bilong ol pikinini bilong God bai kamap ples klia. Olgeta samting God i bin wokim, ol i stap nogut na i bagarap, dispela i no kamap long laik bilong ol yet, nogat. Em i kamap long laik bilong God, bai ol i ken bilip na wet long taim olgeta samting God i bin wokim bai lusim dispela kalabus bilong bagarap, na ol bai kisim dispela pasin bilong i stap fri i nambawan tru olsem bilong ol pikinini bilong God.”—Rom 8:14-21.
11 Taim Jehova i tok promis olsem long rot bilong “lain bilong meri” ol man bai i no stap moa aninit long wok bos bilong Satan, dispela i mekim na ol manmeri i ‘ken bilip na wetim’ gutpela samting. (Stt. 3:15; Rev. 12:9) Namba wan man long dispela lain bilong meri em Jisas Krais. (Gal. 3:16) Indai na kirap bek bilong Jisas i opim rot long ol man long lusim kalabus bilong sin na dai. Tasol bilong dispela samting i ken kamap, ‘ol pikinini bilong God i mas kamap ples klia’ pastaim, em ol Kristen God i makim na ol i stap long heven. Ol tu i insait long dispela lain bilong meri. Ol dispela pikinini bilong God bai kamap ples klia, o kamapim klia olsem ol i stap king wantaim Krais, taim ol i helpim Krais long bagarapim dispela graun Satan i bosim. (Rev. 2:26, 27) Long dispela rot God bai kisim bek ol arapela sipsip husat i winim dispela traipela hevi tru.—Rev. 7:9, 10, 14.
12. Wanem ol gutpela samting bai painim ol man taim ol Kristen God i makim i kamap ples klia?
12 Ol samting i kamap long 1,000 yia bilong Krais i stap king bai mekim ol manmeri i amamas tru! Long dispela taim “ol pikinini bilong God” bai kamap ples klia long narapela rot. Ol bai wok pris wantaim Krais na mekim wok long sakrifais bilong en bilong helpim ol manmeri. Taim Kingdom Bilong God i bosim graun, isi isi ol manmeri i save bihainim tok bai “lusim dispela kalabus bilong bagarap.” Hevi bilong sin na dai i no kalabusim ol moa. Sapos ol i stap gut long Jehova long taim bilong 1,000 yia na long taim bilong laspela traim, orait nem bilong ol bai stap oltaim long “skrol bilong laip.” Ol bai kisim “dispela pasin bilong i stap fri i nambawan tru olsem bilong ol pikinini bilong God.” (Rev. 20:7, 8, 11, 12) Em wanpela gutpela samting tru ol i wetim!
SAMTING YU BILIP NA WETIM I MAS STAP STRONG LONG TINGTING
13. Ol samting yumi bilip na wetim inap kamap long wanem rot? Wanem taim bai Krais i kamap ples klia?
13 Ol tok Pita i raitim long tupela pas bilong en i helpim ol Kristen God i makim na ol arapela sipsip long holim strong long tingting samting ol i bilip na wetim. Em i tok samting ol i bilip na wetim inap kamap long rot bilong bikpela pasin helpim bilong Jehova, na i no long wok bilong ol yet. Em i tok: “Oltaim tingting bilong yupela i mas sap. Bilip na wet long dispela bikpela pasin helpim yupela bai kisim long taim Jisas Krais i kamap ples klia.” (1 Pita 1:13) ‘Jisas Krais bai kamap ples klia’ taim em i kam bilong givim pe long ol man i bihainim tok bilong en na bilong bagarapim ol man nogut.—Ritim 2 Tesalonaika 1:6-10.
14, 15. (a) Yumi mas mekim wanem na bai samting yumi bilip na wetim i ken stap strong long tingting? (b) Pita i tok yumi mas mekim wanem?
14 Bilong samting yumi bilip na wetim i ken stap strong long tingting, oltaim yumi mas tingim “de bilong Jehova” i kam klostu pinis. Dispela tingting i mas bosim olgeta samting yumi mekim. Jehova bai bagarapim ol gavman bilong nau, olsem “skai,” na ol man nogut, olsem “graun na ol samting i stap long en.” Pita i tok: “Olsem na yupela i mas tingting long pasin yupela i mas bihainim. Yupela i mas wokabaut long pasin i holi na bihainim pasin bilong givim bel tru long God. Yupela i mas mekim olsem na tingim na wetim de bilong Jehova i kamap. Long dispela de skai bai paia na pinis na ol samting bilong skai na graun bai hat nogut tru na tanim i kamap olsem wara!”—2 Pita 3:10-12.
15 Long dispela taim bai i gat “nupela skai na nupela graun.” Gavman bilong Krais na ol stretpela manmeri i stap aninit long en bai kisim ples bilong ol man nogut na ol gavman bilong graun. (2 Pita 3:13) Pita i tokim yumi long samting yumi mas mekim bilong “wetim” o holim strong long tingting dispela hop bilong yumi long nupela heven na graun em God i tok promis long en. Em i tok: “Ol pren tru, yupela i wetim ol dispela samting, olsem na long ai bilong God yupela i mas wok strong tru long stap klin olgeta, na i stap olsem man i no gat rong, na stap bel isi.”—2 Pita 3:14.
SOIM OLSEM SAMTING YU BILIP NA WETIM I STAP STRONG LONG TINGTING
16, 17. (a) Olsem wanem yumi ken “wokabaut long pasin i holi” na “mekim yet ol gutpela pasin namel long ol manmeri bilong graun”? (b) Olsem wanem samting yumi bilip na wet long en bai kamap tru?
16 Pasin yumi bihainim long olgeta de i soim olsem samting yumi bilip na wetim i stap strong long tingting. Olsem Pita i tok, yumi mas i stap man em Jehova i orait long en. Yumi “wokabaut long pasin i holi” taim yumi “mekim yet ol gutpela pasin namel long ol manmeri bilong graun,” olsem mekim ol samting God i tok i stret long mekim. (2 Pita 3:11; 1 Pita 2:12) Yumi mas laikim bikpela lain brata bilong yumi i stap long olgeta hap. Na yumi mas wok strong long stap wanbel insait long kongrigesen. (Jon 13:35) Pita i stori tu long “pasin bilong givim bel tru long God,” em ol samting yumi mas mekim bilong pas gut tru wantaim Jehova. Olsem, yumi mas mekim ol beten yumi pilim tru long bel, ritim Baibel long olgeta de, mekim stadi bilong yumi yet, famili lotu, na oltaim autim “gutnius bilong Kingdom.”—Mat. 24:14.
17 Yumi olgeta i laik bai Jehova i orait long yumi na kisim bek yumi taim em i pinisim pasin nogut bilong dispela graun. Sapos yumi kamap kain man em Jehova i orait long en, dispela samting yumi bilip na wetim bai kamap tru, em ‘laip oltaim we God, em man i no inap giaman, i bin promis long givim.’—Tai. 1:2.
[Askim Bilong Stadi]
[Piksa long pes 22]
Ol Kristen God i makim i ‘bon gen, na wetim samting em tru tru bai kamap’
[Piksa long pes 24]
Helpim famili long holimpas hop bilong yumi
