Tisekelere mu Cigomezgo Cithu
Tisekelere mu Cigomezgo Cithu
“[Pali] cigomezgo ca umoyo wamuyirayira uwo Ciuta uyo wangateta cara, wakalayizga mu nyengo zakale comene.”—TITO 1:2.
KUWELERAMO
Kasi tikumanya wuli kuti kucanya kukuŵa cimwemwe para wakuphakazgika walutilira kugomezgeka?
Kasi cigomezgo ca ŵa mberere zinyake cikukolerana wuli na ca ŵakuphakazgika?
Kuti tizakawone cigomezgo cithu cikufiskika, kasi “makhaliro ghatuŵa” na “milimo ya kusopa Ciuta mwakujipeleka” ivyo tikwenera kulongora ni vici?
1. Kasi cigomezgo ico Yehova watipa cingatovwira wuli kuti tizizipizge?
MPOSITOLE Paulosi wakati Yehova ni “Ciuta uyo wakupeleka cigomezgo.” Wakatiso, Yehova ‘wangatizuzga na cimwemwe na mtende cifukwa tili ŵakugomezga, mwakuti tizare mu cigomezgo pamoza na nkhongono ya mzimu utuŵa.’ (Rom. 15:13) Usange tazara mu cigomezgo, tizizipizgenge suzgo lililose ilo tingakumana nalo, ndipo mu mitima yithu muzurenge cimwemwe na mtende. Cigomezgo ici cili nga “ni nyanguru wa umoyo, nchanadi na cakukhora” ku Ŵakhristu ŵakuphakazgika na ŵa mberere zinyake. (Heb. 6:18, 19) Mu nyengo za suzgo tikwenera kudemelera comene ku cigomezgo cithu mwakuti tileke kukayika na kupatukako ku cipulikano.—Ŵazgani Ŵahebere 2:1; 6:11.
2. Zunurani vigomezgo viŵiri ivyo Ŵakhristu ŵali navyo, ndipo cifukwa wuli ŵa “mberere zinyake” ŵakunweka na cigomezgo ca ŵakuphakazgika?
2 Mu mazuŵa ghaumaliro agha, Ŵakhristu ŵakudodoliska pa cimoza mwa vigomezgo viŵiri ivyo Yehova wapeleka. Ŵa “kamskambo kacoko” panji kuti Ŵakhristu ŵakuphakazgika awo ŵacali pa caru capasi, ŵali na cigomezgo ca umoyo wambura kufwa kucanya, ndipo ŵazamuŵa mathemba na ŵasofi lumoza na Khristu mu Ufumu wake. (Luka 12:32; Uvu. 5:9, 10) “Mzinda ukuru” wa “mberere zinyake” uli na cigomezgo ca kuzakakhala kwamuyirayira mu paradiso pa caru capasi ndipo uzamuwusikanga na Ufumu wa Mesiya. (Uvu. 7:9, 10; Yoh. 10:16) Ŵa mberere zinyake ŵaleke kuluwa kuti ciponosko cawo cagona pa kukolerana comene na “ŵabali” ŵa Khristu awo ŵacali pano pa caru capasi. (Mat. 25:34-40) Ŵakuphakazgika ŵazamupokera njombe yawo, ŵa mberere zinyake nawo ntheura pera. (Ŵazgani Ŵahebere 11:39, 40.) Cakwamba, tiyeni tisande cigomezgo ca ŵakuphakazgika.
“CIGOMEZGO CAMOYO” CA ŴAKHRISTU ŴAKUPHAKAZGIKA
3, 4. Kasi Ŵakhristu ŵakuphakazgika ŵakupika wuli ‘kubabika kuphya kuti ŵaŵe na cigomezgo camoyo,’ ndipo cigomezgo ici ni vici?
3 Mpositole Petrosi wakalembera Ŵakhristu ŵakuphakazgika makalata ghaŵiri ndipo wakati ‘mbakusoleka.’ (1 Pet. 1:1) Wakalongosora za cigomezgo capadera ico cili kupika ku kamskambo kacoko. Mu kalata yakwamba, Petrosi wakalemba kuti: “Watumbikike Ciuta na Wiske wa Fumu yithu Yesu Khristu, cifukwa mwakuyana na cisungusungu cake cikuru, wakatipa kubabika kuphya kuti tiŵe na cigomezgo camoyo kwizira mu ciwuka ca Yesu Khristu ku ŵakufwa, kuti tiŵe na ciharo cambura kuvunda, cambura kufipirwa ndiposo cambura kuchujuka. Ciharo ici cili kusungikira imwe kucanya, mwaŵeneimwe mukusungika na nkhongono ya Ciuta kwizira mu cipulikano kuti muponoskeke. Ciponosko ici canozgekera kuzakavumbukwa mu umaliro wa nyengo. Mukusekelera comene mu fundo iyi.”—1 Pet. 1:3-6.
4 Ŵakhristu ŵacoko waka awo ŵakusoleka na Yehova kuti ŵakawuse lumoza na Khristu mu boma la kucanya, ŵakupika “kubabika kuphya” nga mbana ŵauzimu ŵa Ciuta. Ŵakuphakazgika na mzimu utuŵa kuti ŵazakaŵe mathemba na ŵasofi pamoza na Khristu. (Uvu. 20:6) Petrosi wakati “kubabika kuphya” uku kukuŵajulira “cigomezgo camoyo,” ico wakati nchiharo “cambura kuvunda, cambura kufipirwa ndiposo cambura kuchujuka” ico Ciuta wali kuŵasungira “kucanya.” Nchakuzizika yayi kuti ŵakuphakazgika ‘ŵakusekelera comene’ na cigomezgo camoyo. Kweni ŵakukhumbikwira kulutilira kugomezgeka kuti ŵazakawone kufiskika kwa cigomezgo ici.
5, 6. Cifukwa wuli Ŵakhristu ŵakuphakazgika ŵakwenera kuyezgayezga comene kuti kucemeka kwawo kuŵe kwanadi?
5 Mu kalata yake yaciŵiri, Petrosi wakaciska Ŵakhristu ŵakuphakazgika kuti ‘ŵayezge comene nkhanira kuti kucemeka na kusoleka kwawo kuŵe kwanadi.’ (2 Pet. 1:10) Ŵakuphakazgika ŵakwenera kuyezgayezga comene kuŵa na cipulikano, kusopa Ciuta mwakujipeleka, kutemwa ŵabali, na citemwa. Petrosi wakati: “Usange vinthu ivi vilimo mwa imwe na kufuluka, vimovwiraninge kuti muleke kukhala waka panji kuŵa ŵambura vipambi.”—Ŵazgani 2 Petrosi 1:5-8.
6 Mu uthenga uwo Khristu wakatuma ku ŵalara ŵakuphakazgika ŵa mu mpingo wa Filadefiya, ku Asiya, wakati: “Pakuti ukasungilira mazgu gha cizizipizgo cane, nane nizamukusungilira mu ora la kuyezgeka, ilo likwiza pa caru cose, kuzakayezga awo ŵakukhala pa caru capasi. Nkhwiza mwaluŵiro. Lutilira kukoleska ico uli naco, kuti paŵavye munthu wapoke mphumphu yako.” (Uvu. 3:10, 11) Usange Mkhristu wakuphakazgika wangaleka kugomezgeka, wangazakapokera yayi “mphumphu ya ucindami yambura kufota” iyo yalayizgika ku ŵakusoleka awo ŵagomezgekenge mpaka nyifwa.—1 Pet. 5:4; Uvu. 2:10.
KUNJIRA MU UFUMU
7. Kasi nchigomezgo wuli capadera ico Yuda wakazunura mu kalata yake?
7 Cadera mu cilimika ca 65 C.E., Yuda munung’una wa Yesu, wakalembera kalata Ŵakhristu ŵakuphakazgika, ndipo wakati ‘mbakucemeka.’ (Yuda 1; yaniskani na Ŵahebere 3:1.) Wakakhumbanga kuŵalembera kalata yakulongosora za cigomezgo ca ciponosko ico Ŵakhristu wose ŵakuphakazgika ‘ŵali naco.’ (Yuda 3) Nangauli wakaŵa na vinthu vinyake vyakuzirwa vyakuti walembe, kweni paumaliro wa kalata yake yifupi, wakazunurapo za cigomezgo capadera ca Ŵakhristu ŵakuphakazgika, kuti: “Sono kwa uyo wakumanya kumuvikilirani kuti muleke kukhuŵara na kumuzgorani kuŵa ŵambura kalema panthazi pa ucindami wake na cimwemwe cikuru, kwa Ciuta yekha pera uyo ni Mponoski withu kwizira mwa Yesu Khristu Fumu yithu, kuŵenge ucindami, ufumunkhuru, nkhongono na mazaza kufuma ku nyengo zamuyirayira na sono, mpaka muyirayira wose.”—Yuda 24, 25.
8. Mwakuyana na Yuda 24, nchivici cikulongora kuti kucanya kukuŵa cimwemwe cikuru para wakuphakazgika wagomezgeka mpaka nyifwa?
8 Nchakuwonekerathu kuti Ŵakhristu ŵakuphakazgika ŵakukhumba kuti Ciuta waŵavikilire kuti ŵaleke kukhuŵara na kuzakaparanyika. Cigomezgo cawo cakufuma mu Baibolo nchakuti Yesu Khristu wazamuŵawuska ku ŵakufwa, ndipo ŵamuwonekera pa maso pa Ciuta na cimwemwe cikuru. Para wakuphakazgika wagomezgeka mpaka nyifwa, ‘wakuwuskika mu thupi lauzimu,’ ilo ndambura “kuvunda,” ndipo likuŵa ‘laucindami.’ (1 Kor. 15:42-44) Usange ‘kucanya kukuŵa cimwemwe cikuru pa wakwananga yumoza uyo wapera,’ ghanaghanirani waka cimwemwe ico cikuŵako para yumoza wa ŵabali ŵa Khristu wagomezgeka mpaka nyifwa. (Luka 15:7) Yehova na ŵangelo ŵake ŵakugomezgeka ŵakukondwa pamoza na wakuphakazgika uyo wakupokera njombe yake na “cimwemwe cikuru.”—Ŵazgani 1 Yohane 3:2.
9. Kasi ŵakuphakazgika ŵakunjira wuli “mwaucindami” mu Ufumu, ndipo cigomezgo ici cikuŵawovwira wuli awo ŵacali pano pasi?
9 Petrosi nayo wakalembera Ŵakhristu ŵakuphakazgika kuti usange ŵakuyezgayezga kuti kucemeka kwawo kuŵe kwanadi mwa kuŵa ŵakugomezgeka, ŵazamunjira “mwaucindami mu ufumu wamuyirayira wa Fumu yithu na Mponoski Yesu Khristu.” (2 Pet. 1:10, 11) Kuti ŵazakanjire “mwaucindami” mu Ufumu, ŵakukhumbikwira kulongora mikhaliro Yacikhristu. Mazgu ghakuti “mwaucindami” ghangalongoraso vitumbiko ivyo ŵazamusanga ŵakuphakazgika awo ŵakuyezgayezga nkhanira pa ciphalizgano ca umoyo. Mitima yawo yizamuzura na cimwemwe kweniso viwongo cifukwa cakuti ŵakagomezgeka mpaka nyifwa. Cigomezgo ici cikovwira Ŵakhristu ŵakuphakazgika awo ŵacali pano pasi ‘kuvwara zikhore mu maghanoghano ghawo na kunozgekera nchito.’—1 Pet. 1:13.
“LUFURA LWA CIGOMEZGO” CA ŴA MBERERE ZINYAKE
10, 11. (a) Kasi ŵa mberere zinyake ŵali na cigomezgo wuli? (b) Kasi kufiskika kwa cigomezgo ca ŵa mberere zinyake kukukolerana wuli na Khristu ndiposo “kuvumbulika kwa ŵana ŵa Ciuta”?
10 Mpositole Paulosi wakalemba za cigomezgo capadera ico ŵakuphakazgika panji kuti “ŵana ŵa Ciuta” ŵali naco pakuŵa “ŵahaliri ŵamoza” na Khristu. Pamasinda wakazunura za cigomezgo cakukondweska ico Yehova wanozgera ŵa mberere zinyake. Wakati: “Pakuti cilengiwa [awo mbanthu], na kunweka comene cikulindilira kuvumbulika kwa ŵana ŵa Ciuta [ŵakuphakazgika]. Cifukwa cilengiwa cikalambikika ku vyawaka, kuti na khumbo lake cara, kweni kwizira mwa uyo wakacilambika, pa lufura lwa cigomezgo cakuti cilengiwa icocene cizamufwatukaso ku wuzga wa kuvunda na kuŵa na wanangwa waucindami wa ŵana ŵa Ciuta.”—Rom. 8:14-21.
11 Yehova ndiyo wali kupeleka “lufura lwa cigomezgo” ku ŵanthu apo wakalayizga kuti wazamuŵathaska ku “njoka ya papo kale,” Satana Dyabulosi, kwizira mu “mphapu” yakulayizgika. (Uvu. 12:9; Gen. 3:15) Cigaŵa cakwamba ca “mphapu” iyi ni Yesu Khristu. (Gal. 3:16) Yesu wakati wafwa na kuwuskika, wakapeleka lufura lwakukhora lwa cigomezgo cakuti ŵanthu ŵazamuwombokwa ku wuzga wa kwananga na nyifwa. Kufiskika kwa cigomezgo ici kukukolerana na “kuvumbulika kwa ŵana ŵa Ciuta.” Ŵakuphakazgika nchigaŵa caciŵiri ca “mphapu.” ‘Ŵazamuvumbulika’ apo ŵazamuŵa na Khristu pakuparanya mgonezi uheni wa Satana uwu. (Uvu. 2:26, 27) Ici cizamupangiska kuti ŵa mberere zinyake awo ŵazamufuma mu suzgo yikuru ŵaponoskeke.—Uvu. 7:9, 10, 14.
12. Kasi ŵanthu ŵazamusanga vitumbiko wuli cifukwa ca kuvumbulika kwa ŵakuphakazgika?
12 Mu Muwuso wa Khristu wa Vilimika Cikwi, “cilengiwa,” panji kuti ŵanthu, cizamufwatuka ku masuzgo ghose. Mu nyengo iyi, “ŵana ŵa Ciuta” ŵazamulutilira “kuvumbulika” apo ŵazamucita mulimo wa usofi lumoza na Khristu, mwakuti ŵanthu ŵasange vyandulo vya sembe yakuwombora ya Yesu. Pasi pa Ufumu wa kucanya, ŵanthu ŵazamuwombokwa ku wuzga wa kwananga na nyifwa. Mwapacokopacoko ŵanthu ŵakupulikira ‘ŵazamufwatuka ku wuzga wa kuvunda.’ Usange ŵazamulutilira kugomezgeka kwa Yehova mu nyengo ya Vilimika Cikwi ivi na kutonda ciyezgo caumaliro, mazina ghawo ghazamulembeka kwamuyirayira mu “mpukutu wa umoyo.” Ŵazamunjira mu “wanangwa waucindami wa ŵana ŵa Ciuta.” (Uvu. 20:7, 8, 11, 12) Ici nchigomezgo cakukondweska nadi.
CIGOMEZGO CITHU CILEKE KUFWA
13. Kasi cigomezgo cithu cikuthemba pa vici, ndipo Khristu wazamuvumbukwa pawuli?
13 Makalata ghaŵiri agho Petrosi wakalemba, ghali na vinandi ivyo vingawovwira Ŵakhristu ŵakuphakazgika na ŵa mberere zinyake kuti cigomezgo cawo cileke kufwa. Petrosi wakati cigomezgo cawo cikuthemba pa milimo yawo yayi, kweni pa lusungu lukuru lwa Yehova. Wakalemba kuti: “Sungilirani maghanoghano ghinu fikepo; ŵikani cigomezgo cinu pa lusungu lukuru ulo luzamutolekera kwa imwe pa kuvumbukwa kwa Yesu Khristu.” (1 Pet. 1:13) Khristu wazamuvumbukwa apo wazamupeleka njombe ku ŵalondezgi ŵake ŵakugomezgeka na kweruzga ŵanthu ŵambura kopa Ciuta.—Ŵazgani 2 Ŵatesalonika 1:6-10.
14, 15. (a) Kasi tikwenera kukumbuka vici kuti cigomezgo cithu cileke kufwa? (b) Kasi Petrosi wakapeleka ulongozgi wuli?
14 Tikwenera kukumbuka “zuŵa la Yehova” ilo likwiza, kuti cigomezgo cithu cileke kufwa. Zuŵa ili lizamuparanya “macanya” panji kuti maboma gha ŵanthu, na “caru” kung’anamura ŵanthu ŵaheni pamoza na “visinkho” vyake. Petrosi wakalemba kuti: “Mughanaghanire mtundu wa ŵanthu uwo mukwenera kuŵa . . . , uku mukulindilira na kukumbuka nyengo zose kuŵapo kwa zuŵa la Yehova, mu leneilo macanya pakuŵa mu moto, ghazamusongonoka ndipo visinkho, pakuŵa vyakocha comene vizamukwengetuka!”—2 Pet. 3:10-12.
15 “Macanya ghaphya [boma la Khristu] na caru capasi ciphya [ŵanthu ŵarunji]” ndivyo vizamunjira m’malo mwa “macanya” na “caru” ivyo vilipo sono. (2 Pet. 3:13) Pamasinda, Petrosi wakapeleka ulongozgi wakudunjika uwo ukajintha pa fundo ya ‘kulindilira’ caru ciphya, panji kusungilira cigomezgo cithu ici kuti cileke kufwa. Iyo wakati: “Ntheura, ŵakutemweka, pakuti mukulindilira vinthu ivi, yezgani comene kuti paumaliro, iyo wazakamusangani ŵambura kabanga na ŵambura kalema ndiposo mu mtende.”—2 Pet. 3:14.
KWENDA MWAKUYANA NA CIGOMEZGO CITHU
16, 17. (a) Kasi “makhaliro ghatuŵa” na “milimo ya kusopa Ciuta mwakujipeleka” ivyo tikwenera kulongora ni vici? (b) Kasi cigomezgo cithu cizamufiskika wuli?
16 Padera pa kuŵa na cigomezgo camoyo, tikweneraso kucita vinthu mwakukolerana na cigomezgo ici. Tikwenera kughanaghanira mtundu wa munthu uwo ise tili. Tikulongora kuti tili na “makhaliro ghatuŵa” para ‘tikusungilira makhaliro ghithu ghawemi pakati pa mitundu,’ mwa kukana ubendezi uliwose. (2 Pet. 3:11; 1 Pet. 2:12) Tikwenera kuŵa na ‘citemwa pakati pithu.’ Fundo iyi yikuticiska kuti ticite cilicose ico tingafiska kuti tivikilire umoza withu wa pa caru cose, uwo ukwambira pa mpingo withu. (Yoh. 13:35) Petrosi wakayowoyaso vya “milimo ya kusopa Ciuta mwakujipeleka,” iyo ni vinthu ivyo tikucita kuti tikhozge ubwezi withu na Yehova. Vinyake mwa vinthu ivi, nkhulomba kufumira pasi pa mtima kweniso kuŵazga Baibolo zuŵa lililose, kusambira patekha na kughanaghanirapo, kusopa kwa mbumba, na kupharazga mwamwamphu ‘makani ghawemi gha Ufumu.’—Mat. 24:14.
17 Tose tikukhumba kukondweska Yehova na kuzakapona apo caru ciheni ici ‘cizamusongonoka.’ Para tikukondweska Yehova, cigomezgo cithu ca “umoyo wamuyirayira uwo Ciuta uyo wangateta cara, wakalayizga mu nyengo zakale comene” tizamuciwona kuti cafiskika.—Tito 1:2.
[Mafumbo]
[Cithuzithuzi pa peji 22]
Ŵakhristu ŵakuphakazgika ŵakupika ‘kubabika kuphya kuti ŵaŵe na cigomezgo camoyo’
[Cithuzithuzi pa peji 24]
Cigomezgo ca mbumba yinu ciŵe camoyo
