U Takalela Fulufhelo Ḽashu
U Takalela Fulufhelo Ḽashu
“[Ri] fulufhela u tshila tshoṱhe he Mudzimu, a sá zwifhiho, a hu amba, zwifhinga zwa kale na kale zwí sathu u vha hone a ri, hu ḓo vha hone.”—TITO 1:2.
KHA RI VUSULUSE
Ri zwi ḓivha hani uri ṱaḓulu hu vha na dakalo musi muṅwe wa vhaḓodzwa a tshi ṱhaphudza vhutshilo hawe ha kha ḽifhasi nga u fulufhedzea?
Fulufhelo ḽa vha dziṅwe nngu ḽi tshimbidzana hani na ḽa vhaḓodzwa?
U itela uri fulufhelo ḽashu ḽi kone u ḓadzea, ndi “matshimbilele makhethwa” na “u ofha Mudzimu” zwifhio zwine ra fanela u zwi sumbedza?
1. Fulufhelo ḽe Yehova a ri ṋea ḽone ḽi nga ri thusa hani uri ri konḓelele?
YEHOVA ndi ‘Mudzimu ane a ṋea fulufhelo.’ Zwenezwo zwo ambiwa nga muapostola Paulo, nahone a dovha a amba uri Yehova a nga ri ‘ḓadza dakalo ḽoṱhe na vhuawelo hoṱhe, arali ro tenda; uri ri simese u vha na fulufhelo nga maanḓa a muya mukhethwa.’ (Vha-Roma 15:13) Arali ri na fulufhelo, ri ḓo kona u kunda vhuimo naho vhu vhufhio vhu konḓaho, mbilu dzashu dzo ḓala dakalo na mulalo. U fana na Vhakriste vho ḓodzwaho, ḽeneḽo fulufhelo ḽi ḓo vha “thikho i sá dzinginyei ya mimuya yashu, thikho yo simiwaho” na kha vhaṅwe Vhakriste. (Vha-Heb. 6:18, 19) Fulufhelo ḽashu ndi tshithu tshine ra nga farelela khatsho musi zwithu zwi tshi konḓa vhutshiloni, ndi tshithu tshine tsha ḓo ri thusa uri ri songo timatima kana u sa vha na lutendo.—Vhalani Vha-Heberu 2:1; 6:11.
2. Ndi afhio mafulufhelo mavhili ane Vhakriste vha vha nao ṋamusi, nahone ndi ngani vha “dziṅwe nngu” vhe na dzangalelo kha fulufhelo ḽa vhaḓodzwa?
2 Vhakriste vhane vha tshila kha tshino tshifhinga tsha vhufhelo vha livhisa ṱhogomelo kha ḽiṅwe ḽa mafulufhedziso mavhili. Miraḓo yo salaho ya “sambi ḽiṱuku” ḽa Vhakriste vho ḓodzwaho i na fulufhelo ḽa vhutshilo ha u sa tsha fa ngei ṱaḓulu, sa mahosi na vhotshifhe na Kristo Muvhusoni wawe. (Luka 12:32; Ndzumb. 5:9, 10) Vha “gogo ḽihulu” ḽa “dziṅwe nngu” vha na fulufhelo ḽa u tshila tshoṱhe kha ḽifhasi ḽa paradiso sa vhalanda vha Muvhuso wa Vhumessia. (Ndzumb. 7:9, 10; Yoh. 10:16) Vha dziṅwe nngu a vho ngo fanela u hangwa uri vha tea u tikedza “vharathu” vha Kristo vho ḓodzwaho vhane vha kha ḓi vha kha ḽifhasi u itela uri vha kone u tshidzwa. (Mat. 25:34-40) Vhaḓodzwa vha ḓo wana malamba avho, nahone fulufhelo ḽa vha dziṅwe nngu ḽi ḓo ḓadzea. (Vhalani Vha-Heberu 11:39, 40.) Kha ri thome ri haseledze nga ha fulufhelo ḽa vhaḓodzwa.
“FULUFHELO ḼI TSHILAHO” ḼA VHAKRISTE VHO ḒODZWAHO
3, 4. Vhakriste vho ḓodzwaho vha ‘bebwa hafhu uri vha vhe na fulufhelo ḽi tshilaho’ nga nḓila-ḓe, nahone ḽeneḽo fulufhelo ndi ḽifhio?
3 Muapostola Petro o ṅwalela Vhakriste vho ḓodzwaho marifhi mavhili. O vha vhidza “vhanangiwa.” (1 Pet. 1:1) O vha ṋea zwidodombedzwa zwa fulufhelo ḽavhuḓi ḽa vha sambi ḽiṱuku. Kha vhurifhi hawe ha u thoma, Petro o ṅwala uri: “Nga hu rendiwe Mudzimu, a re Khotsi-a Murena washu Yesu Kristo, we nga vhunzhi ha khathutshelo yawe a ri beba-hafhu, uri ri vhe vha ná fulufhelo ḽi tshilaho nga u vuwa ha Yesu Kristo vhafuni. Uri ri wane ifa ḽi sá ṱahali, ḽi sí na tshilavhi, ḽi sá puti, ḽo vhetshelwaho vho-inwi ngei ṱaḓulu. Na inwi maanḓani a Mudzimu no lindiwa nga lutendo uri ni ḓo wana u tshidzwa ho lugiselwaho u ḓo dzumbululwa tshifhingani tsha vhufhelo. Ni ḓi-phiṋa nga zwenezwo.”—1 Pet. 1:3-6.
4 Vhakriste vha si gathi vho nangwaho nga Yehova u itela uri vha vhe na Kristo Muvhusoni wa ṱaḓulu vha a ‘bebwa hafhu’ sa vharwa vha Mudzimu vho ḓodzwaho nga muya. Vha ḓodzwa nga muya mukhethwa u itela uri vha vhe mahosi na vhotshifhe na Kristo. (Ndzumb. 20:6) Petro o amba uri honohu u ‘bebwa hafhu’ hu ita uri vha vhe na “fulufhelo ḽi tshilaho,” ḽe a ḽi vhidza uri ndi “ifa ḽi sá ṱahali, ḽi sí na tshilavhi, ḽi sá puti” ḽe vha ḽi vhetshelwa “ngei ṱaḓulu.” A zwi mangadzi uri vhaḓodzwa vha “ḓi-phina” nga fulufhelo ḽavho! Naho zwo ralo, vha fanela u vha na lutendo u itela uri vha wane ḽeneḽo fulufhelo.
5, 6. Ndi ngani Vhakriste vho ḓodzwaho vha tshi fanela u ḓidina uri vha vhe na vhungoho nga ha fulufhelo ḽavho ḽa u tshila ṱaḓulu?
5 Kha vhurifhi hawe ha vhuvhili, Petro o ṱuṱuwedza Vhakriste vho ḓodzwaho uri vha ‘simese u lusa uri vha pfumbise u vhidzwa havho na u nangiwa havho.’ (2 Pet. 1:10) Vha fanela u ḓidina u itela uri vha vhe na pfaneleo dza Vhukriste dzi ngaho lutendo, u ḓikumedza kha Mudzimu na u funa vhahavho. Petro o ri: “Arali zwithu hezwi zwí kha inwi, zwó anda, a ni nga wanali ní vhabva, ni sí na zwiaṋwiwa.”—Vhalani 2 Petro 1:5-8.
6 Kha mulaedza we a u vhudza vhahulwane vho ḓodzwaho nga muya vha tshivhidzo tsha ḓanani ḽa u thoma ḽa miṅwaha tsha ngei Filadelefia, kha ḽa Asia Minor, Kristo o vuswaho o ri: “Ngauri wo londola fhungo ḽanga ḽa u ri: Konḓelela! Na nṋe-vho ndi ḓo U londola nga tshikhathi tsha mulingo, tshiné tsha ḓo ḓela ḽinnḓa ḽoṱhe, tsha u linga vho dzulaho shangoni. Ndi a ḓa zwenezwino; faresa tshiné wa vha natsho’, uri hu si vhe na ane a dzhia dzánga ḽau.” (Ndzumb. 3:10, 11) Arali Mukriste o ḓodzwaho a sa fulufhedzea, a nga si wane “dzánga ḽa vhurena ḽi sá ṱahaliho” ḽe ḽa fulufhedziswa vho nangwaho vhane vha fulufhedzea u swika vha tshi fa.—1 Pet. 5:4; Ndzumb. 2:10.
U DZHENA MUVHUSONI
7. Ndi fulufhelo ḽifhio ḽavhuḓi ḽe Yuda a amba nga haḽo kha vhurifhi hawe?
7 Hu ṱoḓaho u vha nga ṅwaha wa 65 C.E., Yuda murathu wa Yesu o ṅwalela Vhakriste ngae vho ḓodzwaho, vhe a vha vhidza uri ndi “vho vhidzwaho.” (Yuda 1; vhambedzani Vha-Heberu 3:1.) O vha a tshi ṱoḓa u vha ṅwalela vhurifhi nga ha fulufhelo ḽavhuḓi ḽa u tshidzwa ḽine Vhakriste ‘vhoṱhe’ vho vhidzwaho Muvhusoni wa Mudzimu wa ṱaḓulu vha vha naḽo. (Yuda 3) Naho ho vha hu na maṅwe mafhungo o ṱavhanyiswaho e a vha a tshi ṱoḓa u amba nga hao, mafheleloni a honovhu vhurifhi hawe vhupfufhi, o amba nga ha fulufhelo ḽavhuḓi ḽine Vhakriste vhoṱhe vho ḓodzwaho vha vha naḽo. O ṅwala uri: “Ene a konaho u ni lisa ni si khukhulwe, ané a kona u ni imisa phanḓa ha vhurena hawe ní sa solei ní kha mifhululu. Ene Mudzimu é eṱhe Mutshidzi washu nga Yesu Kristo Murena washu, ene vhurena na vhuhulwane na nungo na maanḓa ndi zwawe tsha kale na kale na zwino na lini na lini!”—Yuda 24, 25.
8. U tendelana na Yuda 24, ndi mini zwine zwa sumbedza uri ṱaḓulu hu vha na dakalo musi muṅwe wa vhaḓodzwa a tshi ṱhaphudza vhutshilo hawe ha kha ḽifhasi nga u fulufhedzea?
8 Vhukuma, Vhakriste vho ḓodzwaho vha fulufhedzeaho vha ṱoḓa u tsireledzwa kha zwithu zwine zwa nga ita uri vha si tsha fulufhedzea. Fulufhelo ḽavho ḽo thewaho Bivhilini ndi ḽa uri Yesu Kristo u ḓo vha vusa vhafuni, vha ḓa phanḓa ha Mudzimu vhe zwivhumbiwa zwa muya zwo fhelelaho. Musi muṅwe wa vhaḓodzwa a tshi fa o fulufhedzea, u vha na tshilavhelelwa tsha u ‘vuswa e na muvhili wa muya u sa sini, wa vhugala.’ (1 Vha-Kor. 15:42-44) Arali ‘ngei ṱaḓulu hu tshi vha na dakalo musi muitazwivhi muthihi a tshi rembuluwa,’ edzani u humbula nga ha dakalo ḽine ḽa vha hone musi muṅwe wa vharathu vha Kristo vho ḓodzwaho nga muya a tshi ṱhaphudza vhutshilo hawe ha kha ḽifhasi nga u fulufhedzea. (Luka 15:7) Yehova na zwivhumbiwa zwa muya zwi fulufhedzeaho vha ḓo takala nga “mifhululu” musi muḓodzwa a tshi wana malamba awe.—Vhalani 1 Yohane 3:2.
9. Vhaḓodzwa vha fulufhedzeaho vha ḓo “pfumiswa” hani nga u dzhena Muvhusoni, nahone ḽeneḽi fulufhelo ḽi kwama hani vhaḓodzwa vhane vha kha ḓi vha kha ḽifhasi?
9 Zwi fanaho na zwenezwo, Petro o ṅwalela Vhakriste vho ḓodzwaho uri arali vha khwaṱhisedza u vhidzwa havho nga u fulufhedzea, “ndi hone [vha] tshi ḓo pfumiswa nga u ṋewa vhudzheno muvhusoni wa lini na lini wa Muṋe washu, Mutshidzi washu Yesu Kristo.” (2 Pet. 1:10, 11) Musi Petro a tshi amba uri vha ḓo “pfumiswa” nga u dzhena ṱaḓulu, zwi nga kha ḓi itea uri o vha a tshi khou amba uri vha ḓo dzhena ṱaḓulu nga vhugala. Zwiṅwe hafhu, a nga kha ḓi vha o vha a tshi khou amba nga ha phaṱhutshedzo nnzhi dzine vha ḓo dzi wana ṱaḓulu. Vhaḓodzwa vha ḓo takala musi vha tshi humbula uri vho tshila nga u fulufhedzea. A zwi timatimisi uri tshenetshi tshilavhelelwa tshi ṋea Vhakriste vho ḓodzwaho vhane vha kha ḓi vha kha ḽifhasi nungo dza u ‘ḓishamula dzikhundu’ u itela mushumo wo engedzeaho.—1 Pet. 1:13.
MUTHEO WA ‘FULUFHELO’ WA VHA DZIṄWE NNGU
10, 11. (a) Ndi fulufhelo ḽifhio ḽine vha dziṅwe nngu vha vha naḽo? (b) Fulufhelo ḽa u tshila kha ḽifhasi ḽi tshimbidzana hani na Kristo na u “dzumbululwa ha vharwa vha Mudzimu”?
10 Muapostola Paulo o ṅwala nga ha fulufhelo ḽa vhugala ḽa “vharwa vha Mudzimu” vho ḓodzwaho nga muya vhane ‘vha ḽa ifa’ na Kristo. Nga murahu, o amba nga ha fulufhelo ḽavhuḓi ḽe Yehova a ḽi vhetshela vha dziṅwe nngu vha si na tshivhalo, o ri: “Zwivhumbwa [vhathu] zwo lila zwi tshi ṱulutshelwa u dzumbululwa ha vharwa vha Mudzimu [vhaḓodzwa]. Ngauri zwivhumbwa u ṱavhanya u ṱahala hazwo hu a zwi lemela, a zwi hu funi; zwo itwa nge ha vha na o zwi lemedzisaho. Hone zwi na fulufhedzo ḽa uri zwi ḓo rulwa. Ngauri iṱali na zwone zwivhumbwa zwi tshi ḓo vhofhololwa, zwa bva kha vhupuli ha u pfi zwi ḓo sina; zwa vhó ḓi-langa-vho, musi vhana vha Mudzimu vha tshi ya vhugalani.”—Vha-Roma 8:14-21.
11 Yehova o ṋea vhathu mutheo wa ‘fulufhelo’ musi a tshi fulufhedzisa u vha vhofholola kha “ḽiṋowa ḽa kale,” Sathane Diabolo, nga “mbeu” yo fulufhedziswaho. (Ndzumb. 12:9; Gen. 3:15) Yesu Kristo ndi ene tshipiḓa tsha ndeme tsha yeneyo “mbeu.” (Vha-Gal. 3:16) U fa na u vuswa ha Yesu zwo ita uri vhathu vha vhe na fulufhelo ḽa uri vha ḓo vhofhololwa kha tshivhi na lufu. Ḽeneḽi fulufhelo ḽi tshimbidzana na “u dzumbululwa ha vharwa vha Mudzimu.” Vhaḓodzwa vho ṋewaho vhugala ndi tshiṅwe tshipiḓa tsha “mbeu.” Vha ḓo “dzumbululwa” musi vha tshi ṱanganela na Kristo kha u fhelisa maitele mavhi a zwithu a Sathane. (Ndzumb. 2:26, 27) Zwenezwi zwi ḓo ita uri vha dziṅwe nngu vhe vha ponyoka maṱungu mahulu vha tshidzwe.—Ndzumb. 7:9, 10, 14.
12. U dzumbululwa ha vhaḓodzwa zwi ḓo ḓisela vhathu mbuyelo dzifhio dzavhuḓi?
12 Vhukuma, “zwivhumbwa” kana vhathu vha ḓo vhofhololwa nga Vhuvhusi ha Kristo ha Miṅwaha ya Tshigidi! Nga tshenetsho tshifhinga, “vharwa vha Mudzimu” vho ṋewaho vhugala vha ḓo dovha vha “dzumbululwa” musi vha tshi vha vhotshifhe na Kristo, vha tshi vhuyedza vhathu nga tshiṱhavhelo tsha Yesu tshi rengululaho. Samusi vha tshi ḓo vha vhe vhalanda vha Muvhuso wa ṱaḓulu, vhathu vha ḓo vhofhololwa kha masiandoitwa a tshivhi na lufu. Nga zwiṱuku nga zwiṱuku vhathu vha thetshelesaho vha ḓo ‘vhofhololwa vha bva kha vhupuli ha u pfi vha ḓo sina.’ Arali vha fulufhedzea kha Yehova Miṅwahani ya Tshigidi na musi vha tshi lingwa lwa u fhedzisela, madzina avho a ḓo ṅwalwa lwa tshoṱhe kha “bugu i re ya vhutshilo.” Vha ḓo wana ‘u ḓilanga ha vhana vha Mudzimu hu re na vhugala.’ (Ndzumb. 20:7, 8, 11, 12) Ḽeneḽo ndi fulufhelo ḽavhuḓi vhukuma!
U DZULA RI NA FULUFHELO
13. Fulufhelo ḽashu ḽo ḓitika nga mini, nahone Kristo u ḓo dzumbululwa lini?
13 Marifhi mavhili a Petro o hevhedzwaho a na zwithu zwinzhi zwine zwa thusa vhaḓodzwa na vha dziṅwe nngu uri vha dzule vhe na fulufhelo. O ṱalutshedza uri fulufhelo ḽavho a ḽo ngo ḓitika nga mishumo yavho, fhedzi ḽo ḓitika nga tshilidzi tsha Yehova. O ṅwala uri: “Ḓi-shamuleni dzikhundu dza u ḓi-pfa haṋu ni dzivhuluwe, tshilidzi tshe na ḓiselwa tshone u dzumbululwani ha Yesu Kristo ni tshi fulufhele tshoṱhe.” (1 Pet. 1:13) Kristo u ḓo dzumbululwa musi a tshi ḓa u lambedza vhatevheli vhawe vha fulufhedzeaho na u ḓisela vhathu vha sa ofhi Mudzimu khaṱulo ya Yehova.—Vhalani 2 Vha-Thesalonika 1:6-10.
14, 15. (a) U itela uri ri dzule ri na fulufhelo, ndi mini zwine ra fanela u livhisa ṱhogomelo khazwo? (b) Petro o ṋea nyeletshedzo ifhio?
14 U itela uri ri dzule ri na fulufhelo, ri fanela u livhisa ṱhogomelo kha “ḓuvha ḽa Murena” na u dzula ri tshi elekanya ngaḽo. Yehova u ḓo fhelisa “maṱaḓulu” ane a vha hone zwino, kana mivhuso ya vhathu, na “ḽifhasi,” vhathu vhavhi na ‘thikho’ dzaḽo. Petro o ṅwala uri: “Tshaṋu ndi u vha vhanzani . . . Tshaṋu ndi u dzula nó lindela u ḓa ha ḓuvha ḽa Murena, ni tshi rumeledza uri ḽi ṱavhanye. Ndi musi uné maṱaḓulu a ḓo duga ngawo’ a fhelela, dzithikho dza swa dza ṋoka.”—2 Pet. 3:10-12.
15 ‘Maṱaḓulu na ḽifhasi’ zwine zwa vha hone zwino zwi ḓo dzhielwa vhudzulo nga “maṱaḓulu maswa [Muvhuso wa Kristo] na ḽifhasi ḽiswa [murafho muswa wa vhathu].” (2 Pet. 3:13) Nga murahu, Petro o ṱalutshedza nga nḓila i pfalaho zwine ra fanela u zwi ita uri ri dzule ro “lindela” ḽifhasi ḽiswa ḽo fulufhedziswaho musi a tshi ri: “Ndi zwone, vhafunwa, huufha nó lindela zwenezwo, fungelelani, uri a ni wane ní si na tshika, ní sa solei, ní na mulalo.”—2 Pet. 3:14.
U TSHILA U TENDELANA NA FULUFHELO ḼASHU
16, 17. (a) Ndi “matshimbilele makhethwa” afhio na “u ofha Mudzimu” zwine ra fanela u zwi sumbedza? (b) Fulufhelo ḽashu ḽi ḓo ḓadzea nga nḓila-ḓe?
16 A zwo ngo eḓana u sokou vha na fulufhelo, fhedzi ri fanela u tshila u tendelana naḽo. Ri fanela u livhisa ṱhogomelo kha vhumuya hashu. U vha na “matshimbilele makhethwa” zwi katela na ‘u vha na kutshimbilele kwo nakaho kha vha shango,’ nga nḓila ine ra ḓifara ngayo. (2 Pet. 3:11; 1 Pet. 2:12) Ri fanela “u funana.” Hezwi zwi katela na uri ri ite zwoṱhe zwine ra nga kona u itela u dzula ri na vhuthihi na vhahashu vha shango ḽoṱhe, u katela na vhane ra vha navho tshivhidzoni. (Yoh. 13:35) ‘Matshimbilele makhethwa a u ofha Mudzimu’ ndi mishumo ine ya sumbedza uri ri na vhushaka ha tsini na Yehova. Zwenezwi zwi katela zwithu zwine ra zwi rabelela, u vhala Bivhili ḓuvha ḽiṅwe na ḽiṅwe, pfunzo ya muthu nga eṱhe, vhurabeli ha muṱa, na u ṱanganela nga u fhisea mushumoni wa u huwelela ‘mafhungo-maḓifha a muvhuso.’—Mat. 24:14.
17 Muṅwe na muṅwe washu u ṱoḓa u takalelwa na u tshidzwa nga Yehova musi ano maitele mavhi a zwithu a tshi “ṋoka.” Nga zwenezwo, ri ḓo ṋewa zwe ra fulufhela, “u tshila tshoṱhe he Mudzimu, a sá zwifhiho, a hu amba, zwifhinga zwa kale na kale zwí sathu u vha hone a ri, hu ḓo vha hone.”—Tito 1:2.
[Mbudziso Dza Pfunzo]
[Tshifanyiso kha siaṱari 22]
Vhakriste vho ḓodzwaho vha ‘bebwa hafhu uri vha vhe na fulufhelo ḽi tshilaho’
[Tshifanyiso kha siaṱari 24]
Itani uri muṱa waṋu u dzule u na fulufhelo
