Ngad Felfelan’gad ko Athap Rodad
Ngad Felfelan’gad ko Athap Rodad
“[Bay e] yafos ndariy n’umngin nap’an ni ir e nge l’agan’uy ngay. I Got nder ma ban e turguy e re yafos ney ndariy n’umngin nap’an ni nge pi’ ngodad ko ngiyal’ ndawori sunumeg e fayleng riy.”—TITUS 1:2.
NGAN SUL U DAKEN
Mang fan ni bay e felfelan’ u tharmiy u nap’an nra par reb e Kristiano ni kan dugliy nib yul’yul’?
Uw rogon ma athap rok yugu boch e saf e bay rogon ko athap rok e pi Kristiano ni kan dugliyrad?
Ra nge m’ug nib riyul’ e athap rodad, ma uw rogon ni nge par ‘pangidad nib thothup’ ma kad ‘pied gadad nga pa’ Got’?
1. Uw rogon nra ayuwegdad fare athap ni ke pi’ Jehovah ngodad nge yog ni ngad k’adedan’dad?
JEHOVAH e ir e Got ni “ma pi’ e l’agan’.” Ireray e n’en ni yog apostal Paul, miki yog ni Jehovah e nge ‘suguydad ko felfelan’ nge gapas u daken e michan’ rodad ngak, nge yog ni ilal e l’agan’ rodad ngak’ u gelngin nib thothup. (Roma. 15:13) Faanra bay e athap rodad nib gel ma rayog ni ngad k’adedan’dad ko urngin e magawon nra yib ngodad, ma gad par ni gad ba felfelan’ mab gapas lanin’dad. Ma re athap ney e “ke mang angkar” rok laniyan’ urngin e Kristiano. (Heb. 6:18, 19) Athap rodad e ra ayuwegdad u nap’an ni ke yib e magawon ngodad, ya ra ayuwegdad ni nge dabi war e michan’ rodad.—Mu beeg e Hebrews 2:1; 6:11.
2. Mang l’agruw e athap ni bay ni fan ko piin Kristiano e ngiyal’ ney? Mang nib ga’ fan u wan’ “yugu boch e saf” fare athap ni fan ngak e piin ni kan dugliyrad?
2 Piin Kristiano e ngiyal’ ney e bay l’agruw athap rorad. Tin ni ka bay ko ‘fachi ulung’ ara pi Kristiano ni kan dugliyrad e yad ra un ngak Kristus nga tharmiy ngar manged e pi pilung nge prist ko Gil’ilungun Got. (Luke 12:32; Rev. 5:9, 10) Ma “yugu boch e saf” ni yad boor ko piin ni kan dugliyrad e yad be athapeg ni ngar pared u paradis u fayleng u tan Gil’ilungun Kristus ni manemus. (Rev. 7:9, 10; John 10:16) Yugu boch e saf e susun dab ra paged talin nrayog ni ngar thapgad ngak Got ni faanra ngar ayuweged pi ‘walagen’ Kristus ni ku yad bay u fayleng. (Matt. 25:34-40) Piin Kristiano ni kan dugliyrad e rayog e tow’ath ngorad, ma ku arrogon yugu boch a saf. (Mu beeg e Hebrews 11:39, 40.) Som’on e ngad weliyed murung’agen fare athap rok e piin ni kan dugliyrad.
TIN NI KE “L’AGAN’” E PI KRISTIANO NI KAN DUGLIYRAD NGAY
3, 4. Uw rogon ni ke pi’ Jehovah e “yafas nib beech” ngak e pi Kristiano ni kan dugliyrad ni ireray e n’en ni ke l’agan’rad ngay? Mang e be yip’ fan e re n’ey?
3 Ke yoloy apostal Peter l’agruw e babyor ni fan ngak e piin Kristiano ni kan dugliyrad me yog ni yad e piin ni ke ‘mel’egrad Got.’ (1 Pet. 1:1, 2) Babyor rok Peter e be ayuwegdad ni ngad nanged murung’agen e athap rorad. U lan e bin som’on e babyor rok, me yoloy ni gaar: “Ngad pininged e magar ngak Got ni ir e Chitamangin e Somol rodad i Jesus Kristus! Ya bochan e ri be runguydad me pi’ e yafos nib beech ngodad ni fan e faseg Jesus Kristus ko yam’. Ereray fan ni kad nanged ni tin ni ke l’agan’dad ngay e bay yib i m’ug nib riyul’, ere gadad be son ni nge yog ngodad e flaab nib ga’ ni ke chaariy Got ni fan ngak e tirok e girdi’, ni be chaariy e pi tow’ath nem u tharmiy ni fan ngomed ko gin ndabiyog ni nge wod riy ara kireb fe kaday. Pi flaab nem e gimed e fanmed, ni gimed e piin ni ke thapegmed Got ngak u daken gelngin ngu daken e michan’ romed ngak, ma gimed be sonnag e gin ni ngam thapgad ngay, ni kan ngongliy rogon kan ta’ ni ngan dag ko ngiyal’ ni nge mus e rran riy. Ere mfefelan’gad ngay.”—1 Pet. 1:3-6.
4 Ke pi’ Jehovah e “yafas nib beech” ngak e Pi Kristiano ni kan dugliyrad ni ngar uned ngak Kristus ko gagiyeg u tharmiy. Ke fakayrad Got u daken gelngin nib thothup. (Rev. 20:6) Ke yog Peter ni re “yafas nib beech” ney e aram e athap rorad ni “bay yib i m’ug nib riyul’” ma bay e ‘flaab ni ba ga’ ni ke chaariy Got ni fan ngak e tirok e girdi’ ni be chaariy e pi tow’ath nem u tharmiy ni fan ngorad ko gin ndabiyog ni nge wod riy ara kireb fe kaday.’ Aram fan ni yad ba ‘felfelan’ ngay’. Machane rayog ni nge riyul’ e re athap ney ni faanra yad ra par ni yad ba yul’yul’.
5, 6. Mang fan ni pi Kristiano ni kan dugliyrad e thingar ra athamgilgad ni nge dabi mul u pa’rad fare athap rorad ni nga ranod nga tharmiy?
5 U lan e bin l’agruw e babyor rok Peter, me fonownag e piin Kristiano ni kan dugliyrad ni ‘ngar guyed rogon ngar athamgilgad nge yib fan e pong ni ke tay Got ngorad, nge rogon ni ke mel’egrad ngaur pired riy.’ (2 Pet. 1:10) Thingar ra athamgilgad ni nge yog ngorad pi fel’ngin e Kristiano ni bod e michan’, nge yul’yul’ ku Got, nge runguy ngak e pi walag, nge t’ufeg. I yog Peter ni gaar: “Ereray e pi n’en ni nge yog ngomed, ya rayog ngomed ni pire’ ma gimed ra pasig.”—Mu beeg e 2 Peter 1:5-8.
6 I yog Kristus ngak e piin piilal ni kan dugliyrad u lan e ulung nu Philadelphia u Asia Minor ni gaar: “Ya kam fol ko thin ni gog ni ngam par ni gab gum’an’, ere bay gu tiyem ndabi buch ban’en rom ko re ngiyal’ i n’en ni baaram ni bay yib e gafgow riy nga daken e fayleng ni polo’, ni nge skengnag urngin e girdi’ nu fayleng. Dabi n’uw nap’an mu gub. Mu ayuweg e n’en ni ba’ rom, nge dabi fek be’ puluwom ko gel ni kam ta’.” (Rev. 3:10, 11) Fare “teeliyaw ko flaab ndabi math ramaen biid” e ngan pi’ ngak e piin Kristiano ni kan dugliyrad ni yad ra par nib yul’yul’ nge mada’ ko yam’.—1 Pet. 5:4; Rev. 2:10.
NGAR UNED NGA GIL’ILUNGUN GOT
7. Mang athap nib fel’ ni ke weliy Jude u lan fare babyor ni ke yoloy?
7 Sogonap’an e duw ni 65 C.E., me Jude ni walagen Jesus e yoloy reb e babyor ni fan ngak e pi Kristiano ni kan dugliyrad. Ke yog ni yad e “ke piningrad Got.” (Jude 1; mu taarebrogonnag ko Hebrews 3:1.) Som’on e baadag ni nge yol ngorad u murung’agen fare athap ni bay rok urngin e Kristiano ni kan dugliyrad. (Jude 3) Susun ni bay boor ban’en nib ga’ fan nib t’uf ni nge yog ngorad. Machane tin tomuren e thin ko babyor rok e ke weliy murung’agen e athap nib fel’ rok e piin Kristiano ni kan dugliyrad. Ke yog ni gaar: “Ngak e en ni ir e rayog rok ni nge ta’med ndab mmulgad me fekmed i yan ko flaab rok ndariy thibngimed ma ri gimed ba felfelan’ taare Got ni ir e thapegdad ngak u daken Jesus Kristus ni ir e Somol rodad, e ir e nguun ta’ fan, me ir e ngan nang ni ir e ba th’abi tolang, me ir e gubin ma rayog rok, me ir e be gagiyegnag urngin ban’en ko tabolngin nge chiney i yan nga m’on ndariy n’umngin nap’an.”—Jude 24, 25.
8. Rogon ni bay ko Jude 24, mang e be dag nib felfelan’ e piin ni bay u tharmiy u nap’an nra par reb e Kristiano nib yul’yul’?
8 Ba mutrug ni urngin e Kristiano ni kan dugliyrad e yad baadag ni nge ayuwegrad Got ni nge dab ra ‘mulgad’ ara ra mada’niged reb e magawon nrayog ni nge chafegrad nga orel ko tirok Got ban’en. Yad be athapeg nra fasegrad Jesus Kristus ko yam’ ngar manged pi tapigpig rok Got ni yad ba flont ya nge yog ni nga ranod nga p’eowchen Got u fithik’ e felfelan’. Nap’an nra par bagayad nib yul’yul’ nge mada’ ko yam’ mab mudugil ni yira faseg ko yam’ u reb e dowef ni ‘gathi downgin e girdi’’ ma “dab ki yim’ biid . . . , ma kari gamog ma ke gel.” (1 Kor. 15:42-44) Faanra “ba ga’ e felfelan’ ni yira tay u tharmiy ni bochan taareb e tadenen ni ke pi’ keru’ ko kireb ni be ngongliy,” ere ngam susunnag ko uw feni ri kab ga’ e felfelan’ u nap’an nra magey reb i walagen Kristus nib yul’yul’ nge yan i mada’ ko yam’. (Luke 15:7) Nap’an ni yira tow’athnag e en ni kan dugliy ma ra “felfelan’,” maku arrogon Jehovah nge pi engel rok nge piin ni kan dugliyrad.—Mu beeg e 1 John 3:2.
9. Uw rogon me yog nni ‘pi’ mat’awun’ e piin ni kan dugliyrad ni nga ranod nga Gin Suwon Got?
9 Miki yol Peter ngak e pi Kristiano ni kan dugliyrad u murung’agen e tow’ath ni yira pi’ ngorad ni faan yad ra par nib yul’yul’, ya gaar: “Ereray kanawoen me yog nni pi’ mat’awmed ni aram e gimed ra yan nga lan e gin’en ni bayi par ndariy n’umngin nap’an, ni aram gin’en ni suwon e Somol rodad i Jesus Kristus, ni ir e en ni ma thapegdad ngak Got.” (2 Pet. 1:10, 11) Nap’an ni yog Peter ni ngan ‘pi’ mat’awrad’ ni nga ranod nga Gin Suwon Got, ma sana re n’ey be yip’ fan ni nga ranod nga tharmiy nga fithik’ e flaab. Maku yad ra felfelan’ ni ngar lemnaged e yul’yul’ ni kar ted. Re athap ney e ra pi’ gelngin e tin ni ka bay e Kristiano ni kan dugliyrad ni ngar pared ni yad ba yul’yul’.—1 Pet. 1:13.
N’EN NI BE “L’AGAN’” YUGU BOCH E SAF NGAY
10, 11. (a) Mang e be athapeg yugu boch e saf? (b) Uw rogon ni fare athap rok e Kristiano ni yad ra par u roy u fayleng e bay rogon ngak Kristus nge rofen ni “bay i gagiyel pi fak Got”?
10 I yoloy apostal Paul murung’agen e athap rok “pi fak” Got ni ke fakayrad u daken gelngin nib thothup ma kar “uned” ngak Kristus. Ke weliy murung’agen e athap nra pi’ Jehovah ngak yugu boch e saf, ni gaar: “Urngin e pi n’en ni sunumiy Got e ri yad be sonnag e chirofen ni bayi gagiyel pi fak Got. Ya tin ni sunumeg Got e turguy Got ni nge m’ay fan, ni gathi yad e ra lemniged, machane bochan e Got e lemnag ni nge yodorom. Machane yad be son u fithik’ e l’agan’, ni aram e reb e rran e bay ra pired ni gathi yad e sib rok e wod, mi yad un ko flaab rok pi fak Got.”—Roma. 8:14-21, NW.
11 Ke pi’ Jehovah ban’en ngak e girdi’ nrayog ni nge ‘l’agan’rad ngay’ u nap’an ni micheg ngorad nra chuwegrad u tan pa’ Satan ni Moonyan’ u daken “fak” ara owchen fare pin. (Rev. 12:9; Gen. 3:15) Jesus Kristus e ir e en th’abi ga’ fan u fithik’ e piin owchen ara “fak” fare pin. (Gal. 3:16) Bochan ni yim’ Jesus min faseg ko yam’ ma aram e ke yog e athap ko girdi’ ni nge dabkur manged sib ko denen nge yam’. Re athap ney e bay rogon ko ngiyal’ ni “bayi gagiyel pi fak Got,” ni aram e piin ni kan dugliyrad. Pi cha’ney e yad e tin ni ka bay ko piin “owchen” fare pin. Reb e kanawo’ ni yad ra gagiyel riy u tharmiy e aram e nap’an ni yad ra un ngak Kristus ngar thanged e re m’ag rok Satan ney. (Rev. 2:26, 27) Angin e re n’ey e aram e ra magey yugu boch e saf ni yad ba fas u tomuren fare gafgow nib ga’.—Rev. 7:9, 10, 14.
12. Nap’an nra gagiyel e pi Kristiano ni kan dugliyrad, ma uw rogon nra fel’ rogon e girdi’ u puluwrad?
12 Mang ayuw e ngan pi’ ngak e “pi n’en ni sunumiy Got” ara girdi’ u nap’an e Gagiyeg rok Kristus u Lan Taareb e Biyu’ e Duw. Ngiyal’ nem ma “pi fak” Got e yad ra gagiyel u nap’an ni yad ra un ngak Kristus ngar manged pi prist ngar ayuweged e girdi’ nge fel’ rogorad ko fare maligach ni ke pi’ Jesus Kristus ngorad. Nap’an nra gagiyegnag Gil’ilungun Got e fayleng ma girdi’ nib mat’aw e yad ra par ni “gathi yad e sib rok e wod.” Dabki yib e magawon ngorad ni wenegan e denen nge yam’ ni faan yad ra par nib yul’yul’ ngak Jehovah u nap’an fare biyu’ e duw ngu nap’an e bin tomur e skeng ni yira pi’ ngorad, ma yira yoloy fithingrad nga “babyoren e piin kar fosgad.” Mi yad un ko “flaab rok pi fak Got.” (Rev. 20:7, 8, 11, 12) Rib fel’ e re athap ney!
NGE TAMILANG U WAN’UM E ATHAP ROM
13. Mang e def ko athap rodad ma mingiyal’ e ra yib i m’ug Kristus riy?
13 N’en ni ke yog Peter u lan l’agruw e babyor ni ke yoloy e ke ayuweg e pi Kristiano ni kan dugliyrad nge yugu boch e saf nge par nib tamilang e athap rorad u wan’rad. Ke weliy ni ke yog ngorad e re athap ney ni gathi bochan e maruwel rorad, ya bochan e runguy rok Jehovah. I gaar: “Mu fal’eged rogon lanin’med ni ngam ngongolgad. Mi gimed tiyan’med ngarim l’agedan’med ko tow’ath ni yira pi’ ngomed ko ngiyal’ nra yib i m’ug Jesus Kristus.” (1 Pet. 1:13) Ra yib i m’ug Kristus u nap’an nra tow’athnag pi gachalpen nib yul’yul’, ma ra pufthinnag e girdi’ nib kireb.—Mu beeg e 2 Thessalonika 1:6-10.
14, 15. (a) Faanra nge par e athap rodad nib tamilang u wan’dad, ma mang e thingar da tedan’dad ngay? (b) Mang fonow e ke pi’ Peter?
14 Ra nge par e athap rodad nib tamilang u wan’dad, ma thingar da tedan’dad ko fare “Rran” rok Jehovah. Ireray e n’en nra gothey “lan e lang” ara am ko girdi’, nge “fayleng” ni aram e girdi’ nib kireb, nge “urngin ban’en” ni bay riy. Ya gaar Peter: ‘Mit i mang girdi’ e susun e ngam boded? . . . Ma gimed sonnag e chirofen nem, ni ir e Rran rok Got, mi gimed athamgiliy nrogon nrayog romed nge papey nge taw ngay - Rofen ni baaram ni bay yik’ lan e lang nge kireb e urngin ban’en ni bay u lan e lang e bayi ranrannag e gowel.’—2 Pet. 3:10-12.
15 Fare “lan e lang” nge “fayleng” ni bay e chiney e yira chuweg ngan tay fa “bin nib beech e lan e lang [Gil’ilungun Kristus] nge fa bin nib beech e fayleng [ba ulung i girdi’ ni yad ba mat’aw]” nga lon. (2 Pet. 3:13) Ba tamilang ni ke yog Peter ngodad rogon ni ngad ‘sonnaged’ fa bin nib beech lan e lang nge fa bin nib beech e fayleng, ya ke yog ni gaar: “Pi tafager rog, n’umngin nap’an ni gimed be par ni gimed be sonnag e re Rran nem e nguum athamgilyed ngam pired ni gimed mmachalbog ma dariy thibngimed u p’eowchen Got ma ngam pired nib aw e gapas u thilmed Got.”—2 Pet. 3:14.
NGAM DAG NIB TAMILANG U WAN’UM E ATHAP ROM
16, 17. (a) Uw rogon ni nge par ‘pangidad nib thothup’ ma kad ‘pied gadad nga pa’ Got’? (b) Uw rogon ni nge m’ug nib riyul’ e athap rodad?
16 Ra m’ug nib tamilang e athap rodad u wan’dad ko ngongol rodad. Rogon ni yog Peter e ngad athamgilgad ni ngad fel’gad u wan’ Jehovah. Ra nge par ‘pangidad nib thothup’, mab muun ngay ni ‘ngaud pired u fithik’ e piin ndar nanged Got nib fel’ pangidad.’ (2 Pet. 3:11; 1 Pet. 2:12) Thingari ‘bagadad me t’uf rok bagadad.’ Re n’ey e ba muun ngay ni ngad athamgilgad ni ngad pared nib taareban’dad u lan e ulung. (John 13:35) Ngad ‘pied gadad nga pa’ Got’ e bay rogon ko ngongol rodad nra chugurnag e tha’ u thildad Jehovah. Mab muun ngay ni ngad meybilgad, ma ngad beeged e Bible ma gad fal’eg i lemnag, ma ngad ted e fol Bible ni tabinaw, ma ngad uned i machibnag fare ‘thin nib fel’’ u fithik’ e pasig.—Matt. 24:14.
17 Ra bagadad ma baadag ni nge fel’ u wan’ Jehovah ma ra magey nib fas u nap’an ni yira “kirebnag” e re m’ag nib kireb ney. Ere ra yib i m’ug nib riyul’ e n’en ni gad be athapeg ni aram e “yafos ndariy n’umngin nap’an ni ir e nge l’agan’uy ngay. I Got nder ma ban e turguy e re yafos ney ndariy n’umngin nap’an ni nge pi’ ngodad ko ngiyal’ ndawori sunumeg e fayleng riy.”—Titus 1:2.
[Study Questions]
[Picture on page 22]
Piin Kristiano ni kan dugliyrad e ke yog e “yafas nib beech” ngorad
[Picture on page 24]
Nge par e athap rok chon e tabinaw rom nib mudugil
