Kiʼimakchajak k-óol yoʼolal k-esperanza
Kiʼimakchajak k-óol yoʼolal k-esperanza
«[Yaantoʼon] u alab óolalil le kuxtal minaʼan u xuuloʼ. Dios, máax maʼ tu tuuseʼ, tu yaʼalaj u tsʼáaik le kuxtalaʼ maʼiliʼ káajak yóokʼol kaabeʼ.» (TITO 1:2)
KʼAʼAJSAJ
¿Bix k-ojéeltik ku yantal kiʼimak óolal teʼ kaʼan le ken chúukpajak u yóol juntúul sukuʼun yéeyaʼan tak ken kíimikoʼ?
¿Baʼax yaan u yil le esperanza yaan tiʼ uláakʼ tamanoʼob yéetel le yaan tiʼ le yéeyaʼanoʼoboʼ?
¿Bix unaj k-kuxtal yéetel baʼax unaj k-beetik utiaʼal k-maas natsʼikba tiʼ Jéeoba utiaʼal k-ilik u béeytal le esperanza yaantoʼonoʼ?
1. ¿Bix u yáantkoʼon le esperanza ku tsʼáaiktoʼon Jéeoba utiaʼal k-aktáantik le talamiloʼoboʼ?
APÓSTOL Pabloeʼ tu yaʼalaj: «Jajal Dios máax tsʼáaiktoʼon alab óolaleʼ, ka u chupeʼex yéetel kiʼimak óolal yéetel jeetsʼel óolal le ken a woksaj óolteʼexeʼ utiaʼal ka u chupeʼex yéetel alab óolal [wa esperanza] tu yoʼolal u páajtalil le kiliʼich [muukʼoʼ]» (Rom. 15:13). Wa chuupoʼon yéetel le esperanza ku tsʼáaiktoʼon Jéeobaoʼ, k-puksiʼikʼaleʼ yaan u chuʼupul yéetel kiʼimak óolal bey xan yéetel jeetsʼelil, tsʼoʼoleʼ yaan xan u páajtal u chúukpajal k-óol k-aktáant jeʼel baʼalak talamileʼ. Jeʼex le máaxoʼob kun binoʼob kaʼanoʼ, le uláakʼ tamanoʼoboʼ unaj u yilkoʼob le esperanzaaʼ bey junpʼéel «ancla ku pʼatik jeetsʼelil le cheemoʼ» (Heb. 6:18, 19). Bey túunoʼ jeʼel u páajtal k-chich machikba tiʼ ken k-aktáant jeʼel baʼalak talamil ka u beet u kaʼapʼéeltal k-tuukul yéetel ka pʼáatak minaʼan k-fe, ka tak náachchajkoʼon tiʼ Dios (xokaʼak Hebreob 2:1; 6:11).
2. ¿Máakalmáak le kaʼapʼéel esperanza yaan tiʼ le máaxoʼob meyajtik Dios teʼ kʼiinoʼobaʼ, yéetel baʼaxten le uláakʼ tamanoʼoboʼ jach ku chʼaʼikoʼob en cuentail le baʼax ku páaʼtik le sukuʼunoʼob yéeyaʼanoʼoboʼ?
2 Le máaxoʼob meyajtik Dios teʼ tu tsʼook kʼiinoʼobaʼ kaʼapʼéel esperanza yaantiʼob. Le u yalab tiʼ le u chan múuchʼ tamanoʼob pʼaatloʼob way Luʼumeʼ, táan u páaʼtik u binoʼob kaʼan, teʼeloʼ maʼ kun kíimloʼob yéetel yaan u beetik u reyiloʼob yéetel u j-kʼiiniloʼob yéetel Cristo tu Reino (Luc. 12:32; Apo. 5:9, 10). Yéetel le «yaʼabkach máakoʼob» chíikbesik le «uláakʼ tamanoʼob[oʼ]», táan u páaʼtik u kuxtaloʼob utiaʼal mantatsʼ way Luʼum tiʼ junpʼéel Paraíso yáanal u Reino le Mesíasoʼ (Apo. 7:9, 10; Juan 10:16). Le uláakʼ tamanoʼobaʼ maʼ unaj u tuʼubultiʼobeʼ, utiaʼal u salvarkubaʼobeʼ kʼaʼabéet u yáantkoʼob u «sukuʼunoʼob» Cristo (Mat. 25:34-40). Jeʼex le sukuʼunoʼob yéeyaʼanoʼoboʼ yaan u kʼamkoʼob le baʼax ku páaʼtkoʼoboʼ, le uláakʼ tamanoʼob xanoʼ u yojloʼob yaan u kʼamkoʼob le baʼax ku páaʼtkoʼoboʼ (xokaʼak Hebreob 11:39, 40). Yáaxeʼ koʼoneʼex ilik baʼax ku páaʼtik le sukuʼunoʼob yéeyaʼanoʼoboʼ.
LE KUXAʼAN ESPERANZA YAAN TIʼ LE YÉEYAʼANOʼOBOʼ
3, 4. ¿Bix u kaʼa síijil le sukuʼunoʼob yéeyaʼanoʼoboʼ, yéetel baʼax kuxaʼan esperanzail yaantiʼob?
3 Apóstol Pedroeʼ tu tsʼíibtaj kaʼapʼéel carta tiʼ le sukuʼunoʼob táan u páaʼtik u binoʼob kaʼanoʼ, tu yaʼaleʼ letiʼobeʼ «yéeyaʼanoʼob» (1 Ped. 1:1, NM). Teʼ cartaʼoboʼ tu tsolaj jujunpʼéel tiʼ le baʼaxoʼob yaan yil yéetel le baʼax ku páaʼtik le u chan múuchʼ tamanoʼoboʼ. Jeʼex ichil le yáaxoʼ tu yaʼalaj: «Koʼox kiʼikiʼtʼantik u Jajal Dios yéetel u Taata k-Yuumtsil Jesucristo, máax tu yoʼolal u nojoch chʼaʼ óotsilileʼ tsʼoʼok u beetik k-síijil tu kaʼatéen tu yoʼolal u kaʼapúut kuxtal Jesucristo ichil le kimenoʼoboʼ. Lelaʼ ku tsʼáaiktoʼon junpʼéel kuxtal yéetel alab óolal, yéetel bíin u beet a kʼamkeʼex le ayikʼalil u kanáantmaj a tiaʼalteʼex Jajal Dios teʼ kaʼanoʼ, junpʼéel ayikʼalil maʼ tu páajtal u kʼaskúuntaʼal mix u paʼapakʼaʼal, mix tu tijil jeʼel bix le nikteʼoboʼ. Tumen teʼex yaan a woksaj óoleʼex tiʼ Jajal Dioseʼ, letiʼeʼ ku kanáantkeʼex tiʼ kʼaas yéetel u páajtalil utiaʼal ka yanakteʼex le toksajil u nuʼuktmaj utiaʼal u tsʼáa kʼaj óoltbil tu tsʼook kʼiin. Tu yoʼolal lelaʼ teʼexeʼ chuupeʼex yéetel kiʼimak óolal» (1 Ped. 1:3-6).
4 Jeʼex túun k-ilkoʼ, le sukuʼunoʼob yéeyaʼanoʼob utiaʼal u gobernaroʼob yéetel Cristo teʼ kaʼanoʼ bey ku síijloʼob «tu kaʼatéen[eʼ]». Jéeobaeʼ ku yilkoʼob bey u paalaloʼob le ken tsʼoʼokok u yéeyikoʼob yéetel u kiliʼich muukʼ utiaʼal u beetik u reyiloʼob yéetel u j-kʼiiniloʼob yéetel Cristo teʼ kaʼanoʼ (Apo. 20:6). Jeʼex úuchik u yaʼalik Pedroeʼ le u kaʼa síijloʼoboʼ ku tsʼáaiktiʼob junpʼéel kuxaʼan esperanza, lelaʼ letiʼe u tsʼaʼabaltiʼob le ayikʼalil u kanáantmaj Dios teʼ kaʼan utiaʼaloʼoboʼ. Le oʼolal chuupoʼob «yéetel kiʼimak óolal». Baʼaleʼ unaj u chúukpajal u yóol u meyajtoʼob Dios utiaʼal u kʼamkoʼob le baʼax ku páaʼtkoʼoboʼ.
5, 6. ¿Baʼaxten unaj u chúukpajal u yóol u meyajtoʼob Dios le sukuʼunoʼob yéeyaʼanoʼoboʼ?
5 Teʼ tu kaʼapʼéel cartaoʼ, Pedroeʼ tu yaʼalaj tiʼ le sukuʼunoʼob yéeyaʼanoʼoboʼ: «Ilawileʼex ka u taamkúuns u moots tiʼ teʼex a tʼanaʼanileʼex yéetel a yéeyaʼanileʼex tumen Jajal Diosoʼ» (2 Ped. 1:10). Bey túunoʼ kʼaʼabéet u yilik u yantaltiʼob fe, yaabilaj, u kʼubik u yóol u meyajtoʼob Dios yéetel u yaabiltikoʼob u maasil máaxoʼob meyajtik Jéeobaoʼ. Pedroeʼ tu yaʼalaj: «Wa teʼex yaanteʼex le baʼaloʼobaʼ, yéetel yaanteʼex jach yaʼabeʼ, a kuxtaleʼexeʼ maʼatan u pʼáatal mix baʼal u biilal yéetel x-maʼ ichil» (xokaʼak 2 Pedro 1:5-8).
6 Le tsʼoʼok u kaʼa bin Cristo teʼ kaʼanoʼ, tu yaʼalaj tiʼ le ancianoʼob yéeyaʼanoʼob utiaʼal u binoʼob kaʼan yanoʼob teʼ múuchʼulil yaan tu kaajil Filadelfia (Asia Menor) teʼ yáax siglooʼ: «Tumen ta tsʼoʼokbesaj u tʼaanil in chúukaʼan óolaleʼ, bíin in kanáantech tiʼ le túuntaj óolal bíin taalak tiʼ tuláakal yóokʼol kaaboʼ utiaʼal u túuntik u yóol tuláakal le máaxoʼob kajaʼanoʼob yóokʼol kaaboʼ. Táan in taal tu séebaʼanil, kanáant le baʼax yaantechoʼ, utiaʼal beyoʼ mix máak ka u luʼstech a péet joʼol [wa a corona]» (Apo. 3:10, 11). ¿Baʼax jeʼel u yúuchul tiʼ juntúul sukuʼun yéeyaʼan utiaʼal u bin kaʼan wa ku xuʼulul u meyajtik Dioseʼ? Maʼ ken u kʼam le «nojbeʼen péet joʼol maʼatech u kʼastal[oʼ]», tumen lelaʼ aʼalaʼan u tsʼaʼabal chéen tiʼ le máaxoʼob ku chúukpajal u yóol u meyajtoʼob Dios tak ken kíimkoʼoboʼ (1 Ped. 5:4; Apo. 2:10).
LE KEN OOKKOʼOB TEʼ REINOOʼ
7. ¿Baʼax jatsʼuts esperanzail tu chʼaʼchiʼitaj Judas?
7 Óoliʼ tu jaʼabil 65 tiʼ le yáax siglooʼ, Judas, u yíitsʼin Jesuseʼ tu túuxtaj junpʼéel carta «tiʼ le máaxoʼob tʼanaʼanoʼob», wa yéeyaʼanoʼoboʼ (Jud. 1; ket yéetel Hebreob 3:1). Letiʼeʼ taak kaʼach u tʼaan tiʼ le jatsʼuts esperanza yaan tiʼ le yéeyaʼanoʼob utiaʼal u táakpajloʼob tiʼ u Reino Dios yaan teʼ kaʼanoʼ (Jud. 3). Kex tumen tʼaanaj tiʼ uláakʼ baʼaloʼob jach kʼaʼanaʼantakeʼ, tu tsʼoʼokbal le cartaoʼ tu yaʼalaj yoʼolal le jatsʼuts esperanza yaantiʼoboʼ: «Tiʼ le máax yaan páajtalil tiʼ utiaʼal u kanáantkeʼex x-maʼ lúubulil yéetel utiaʼal u taaskeʼex x-maʼ kʼaasil tu táan u nojbeʼenil yéetel kiʼimak óolaleʼ. Tiʼ le juntúuliliʼ Jajal Dios [k-Salvador] tu yoʼolal Jesucristo k-Yuumtsiloʼ, tiʼ letiʼ yanak le nojbeʼeniloʼ, le nojchiloʼ, le páajtaliloʼ yéetel le jalaʼachiloʼ, maʼiliʼ káajak le kʼiinoʼoboʼ, bejlaʼeʼ, yéetel utiaʼal kʼiinoʼob minaʼan u xuul» (Jud. 24, 25).
8. Jeʼex u yaʼalik Judas 24, ¿bix k-ojéeltik ku yantal kiʼimak óolal teʼ kaʼan le ken chúukpajak u yóol juntúul sukuʼun yéeyaʼan tak ken kíimikoʼ?
8 Cada juntúul tiʼ le sukuʼunoʼob yéeyaʼanoʼoboʼ ku yilik u chúukpajal u yóoloʼob u meyajtoʼob Dios yéetel maʼ u beetkoʼob junpʼéel baʼax jeʼel u beetik u xuʼulsaʼaltiʼobeʼ. Jeʼex u yaʼalik le Bibliaoʼ, letiʼobeʼ táan u páaʼtik u kaʼa kuxkíintaʼaloʼob tumen Jesucristo utiaʼal u binoʼob kaʼan tu táan Dios. Wa chúukaʼan u yóol le sukuʼun yéeyaʼan ken kíimikoʼ, yaan u tsʼaʼabaltiʼ junpʼéel wíinklil maʼatech u kʼastal ken kaʼa kuxlak, «junpʼéel nojbeʼen wíinklil», yéetel junpʼéel kaʼanilbeʼen wíinklil (1 Cor. 15:42-44). ¿Bix u yuʼubikuba u maasil angeloʼob yoʼolal lelaʼ? Le Bibliaoʼ ku yaʼalikeʼ ku yantal «kiʼimak óolal teʼ kaʼanoʼ tu yoʼolal juntúul kʼeban wíinik ku kʼexik u tuukul», wa beyoʼ ku yeʼesiktoʼoneʼ, ku kiʼimaktal u yóoloʼob ken chúukpajak u yóol u sukuʼunoʼob Cristo tak ken kíimkoʼob (Luc. 15:7). Jéeoba yéetel u angeloʼobeʼ jach ku kiʼimaktal u yóoloʼob yéetel le sukuʼunoʼob yéeyaʼanoʼob ku binoʼob teʼ kaʼanoʼ, letiʼob xaneʼ ku kʼamkoʼob yéetel kiʼimak óolal le baʼax ku páaʼtkoʼoboʼ (xokaʼak 1 Juan 3:2).
9. ¿Baʼaxten ku yaʼalaʼal yaan u jeʼebel «junpʼéel kóokoch joonaj» tiʼ le sukuʼunoʼob yéeyaʼanoʼob ken ookkoʼob teʼ Reinooʼ, yéetel baʼax ku péeksaʼal u beet le yéeyaʼanoʼob pʼaatloʼob way Luʼum u yojéeltikoʼob lelaʼ?
9 Pedro xaneʼ tu yaʼalaj baʼax kun úuchul yéetel le yéeyaʼanoʼob kun chúukpajal u yóoloʼoboʼ: «Bíin jeʼebekteʼex junpʼéel kóokoch joonaj utiaʼal a wookleʼex tiʼ u [reino] k-Yuumtsil yéetel [k-Salvador] Jesucristo junpʼéel [reino] minaʼan u xuul» (2 Ped. 1:10, 11). ¿Baʼaxten ku yaʼalik yaan u jeʼebel «junpʼéel kóokoch joonaj» tiʼob ken xiʼikoʼob teʼ kaʼanoʼ? Le tʼaanoʼobaʼ ku tsʼáaik naʼatbil xan le nojbeʼenil kun ilbil ken ookkoʼob teʼ kaʼanoʼ, tumen yaan u yilaʼal tuláakal le jatsʼuts modos yaantiʼoboʼ. Tsʼoʼoleʼ jeʼel xan u tsʼáaik naʼatbileʼ le máaxoʼob ku chúukpajal u yóoloʼob tak tu xuuloʼ yaan u tsʼaʼabaltiʼob yaʼab bendición tumen Dios. Yaan u páajtal u kʼaʼajsikoʼob yéetel kiʼimak óolal le bix úuchik u chúukpajal u yóoloʼoboʼ. Le jatsʼuts baʼax ku páaʼtik le yéeyaʼanoʼoboʼ ku péeksikoʼob utiaʼal ka u tukultoʼob «maʼalob baʼax» ken u beetoʼob le tiaʼanoʼob way Luʼumeʼ (1 Ped. 1:13).
LE BAʼAX TSʼÁAIK ESPERANZA TIʼ LE ULÁAKʼ TAMANOʼOBOʼ
10, 11. 1) ¿Baʼax esperanzail yaan tiʼ le uláakʼ tamanoʼoboʼ? 2) ¿Baʼax yaan yil le esperanza yaan way Luʼum tiʼ le baʼax ken u beet Cristo yéetel «u kʼaj óoltaʼal u paalal Jajal Dios[oʼ]»?
10 Apóstol Pabloeʼ tʼaanaj tiʼ le jatsʼuts esperanza yaan tiʼ «u paalaloʼob Jajal Dios» yéeyaʼanoʼob yéetel le kiliʼich muukʼ kun meyajoʼob «junmúuchʼ yéetel Cristo[oʼ]». Baʼaleʼ tʼaanaj xan tiʼ le jatsʼuts esperanza ku tsʼáaik Jéeoba tiʼ le uláakʼ tamanoʼoboʼ: «Yéetel yaʼab tsʼíibolal yéetel alab óolaleʼ, tuláakal le baʼaloʼob u beetmaj Jajal Diosoʼ táan u páaʼtkoʼob u kʼiinil le ken páatak u kʼaj óoltaʼal u paalal Jajal Dios [wa le yéeyaʼanoʼoboʼ]. Tumen tuláakal baʼax beetaʼaneʼ xotʼkʼintaʼab utiaʼal kʼastal, leloʼ maʼ tumen bey tu yóoltilakiʼ, baʼaleʼ tumen bey tu yaʼaljilak Jajal Dios; baʼaleʼ yaan mantatsʼ alab óolalil. Tuláakal baʼax beetaʼaneʼ yaan u toʼokol tiʼ le palitsililoʼ yéetel tiʼ le xuʼulsajiloʼ, utiaʼal ka yanak baʼal u yil tiʼ u nojbeʼen jáalkʼabtajil u paalaloʼob Jajal Dios» (Rom. 8:14-21).
11 Jéeobaeʼ tu tsʼáaj «alab óolalil» wa esperanza tiʼ tuláakal máak le ka tu yaʼalaj u tsʼáaik junpʼéel «chʼiʼibal» kun jáalkʼabtikoʼob tiʼ Satanás, «le nojoch kaanoʼ» (Gén. 3:15; Apo. 12:9). Le «chʼiʼibal» tu yaʼaloʼ Jesucristo (Gal. 3:16). Le úuchik u kíimil yéetel u kaʼa kuxtaloʼ ku tsʼáaik u páajtalil tiʼ tuláakal máak u salvartikuba tiʼ le kʼeban yéetel tiʼ le kíimiloʼ. U béeytal lelaʼ yaan baʼax u yil yéetel «u kʼaj óoltaʼal u paalal Jajal Dios». Le sukuʼunoʼob yéeyaʼanoʼoboʼ letiʼob u kaʼa jaats le «chʼiʼibaloʼ». ¿Baʼax kʼiin u «kʼaj óoltaʼal u paalal Jajal Dios»? Letiʼe ken táakpajak le sukuʼunoʼob yéeyaʼanoʼob yéetel Cristo utiaʼal u xuʼulsoʼob tiʼ u kʼasaʼan yóokʼol kaab Satanasoʼ (Apo. 2:26, 27). Le baʼax ken u beetoʼoboʼ yaan u tsʼáaik u páajtalil u salvartikuba le uláakʼ tamanoʼob le ken taalak le nojoch muʼyajiloʼ (Apo. 7:9, 10, 14).
12. ¿Baʼax utsiloʼob ken u taas tiʼ tuláakal máak le «u kʼaj óoltaʼal u paalal Jajal Dios[oʼ]»?
12 Tu yáam le Mil Jaʼaboʼob ku Reinar Cristooʼ, «tuláakal baʼax beetaʼan» wa tuláakal máakeʼ yaan u kʼamik yaʼabkach utsiloʼob. Teʼ kʼiinoʼob jeʼeloʼ yaan uláakʼ bix kun kʼaj óoltbil «u paalal Jajal Dios»: ken u beet u j-kʼiiniloʼob yéetel Cristoeʼ, yaan u taaskoʼob u yutsil úuchik u kʼubik u kuxtal Jesús tu yoʼolal tuláakal máak. Yáanal u Reino Dioseʼ, yaan u bin u lukʼul le kʼeban yéetel le kíimil tu wíinklil tuláakal le máaxoʼob meyajtikoʼ. Jujunpʼíitileʼ yaan u jáalkʼabtaʼaloʼob «tiʼ le palitsililoʼ yéetel tiʼ le xuʼulsajiloʼ». Wa ku chúukpajal u yóoloʼob u meyajtoʼob Jéeoba tu yáamil le mil jaʼaboʼob yéetel maʼ kun lúubloʼob teʼ tu tsʼook túuntaj óolaloʼ, yaan u tsʼaʼabal u kʼaabaʼob tu «libroil le kuxtaloʼ» yéetel yaan u tsʼaʼabaltiʼob «u nojbeʼen jáalkʼabtajil u paalaloʼob Jajal Dios» (Apo. 20:7, 8, 11, 12). ¿Máasaʼ jach jatsʼuts le esperanza yaantiʼobaʼ?
MAʼ U TUʼUBULTOʼON LE ESPERANZA YAANTOʼONOʼ
13. ¿Baʼax beetik u yantaltoʼon esperanza, yéetel baʼax kʼiin «ken chíikpajak Jesucristo»?
13 Le kaʼapʼéel carta tu tsʼíibtaj Pedrooʼ jach ku yáantik le sukuʼunoʼob yéeyaʼanoʼob yéetel le uláakʼ tamanoʼob utiaʼal maʼ u tuʼubultiʼob le esperanza yaantiʼoboʼ. Letiʼeʼ tu yaʼaleʼ mix máak náajaltmil, baʼaxeʼ ku tsʼaʼabal tiʼ máak yoʼolal u siibal utsil Jéeoba: «Sáasilchajak a naʼateʼex. Tsʼáaʼex tuláakal a alab óolaleʼex tiʼ le siibal utsil bíin tsʼaʼabakteʼex le ken chíikpajak Jesucristooʼ» (1 Ped. 1:13). ¿Baʼax kʼiin «ken chíikpajak Jesucristo»? Letiʼe ken taalak u salvart le máaxoʼob meyajtik Dios yéetel chúukaʼan óolaloʼ yéetel utiaʼal u xuʼuls tiʼ le kʼasaʼan máakoʼob, jeʼex u yaʼalmil Jéeobaoʼ (xokaʼak 2 Tesalonicailoʼob 1:6-10).
14, 15. 1) ¿Baʼax unaj k-beetik utiaʼal maʼ u tuʼubultoʼon le esperanza yaantoʼonoʼ? 2) ¿Baʼax tsolnuʼukil tu tsʼáaj Pedro?
14 Utiaʼal maʼ k-tuʼubsik le esperanza yaantoʼonoʼ, unaj u chúukpajal k-óol k-páaʼt u kʼuchul u «u kʼiinil Yuumtsil». Teʼ «kʼiin» jeʼeloʼ yaan u xuʼulsaʼal tiʼ le «kaʼanoʼob» yéetel tiʼ le «luʼumoʼ», lelaʼ u kʼáat u yaʼaleʼ tiʼ u gobierno wíinik yéetel le máaxoʼob beetik baʼaxoʼob kʼaastak «paʼteʼ yéetel tuláakal baʼax» kʼaas. Le oʼolal Pedroeʼ ku yaʼalik: «Yéetel bukaʼaj kʼub óolal yéetel kiliʼichil unaj a kuxtaleʼex. 2 Ped. 3:10-12).
Páaʼteʼex yéetel séebkunteʼex u kʼuchbal u kʼiinil Jajal Dios. Tiʼ le kʼiinoʼ le kaʼanoʼoboʼ bíin xuʼulsaʼakoʼob yéetel kʼáakʼ bey xan baʼax beetaʼaniloʼobeʼ bíin yíibikoʼob teʼ kʼáakʼoʼ» (15 Pedroeʼ tu yaʼaleʼ le «kaʼanoʼob» yéetel le «luʼum» yanoʼob bejlaʼaʼ yaan u kʼeʼexloʼob yéetel «le túumben kaʼanoʼoboʼ [wa u gobierno Cristo] yéetel le túumben luʼum [wa le máaxoʼob uts yaniloʼob tu táan Diosoʼ]» (2 Ped. 3:13). Tsʼoʼoleʼ ka tʼaanaj tiʼ le túumben luʼum aʼalaʼanoʼ, tu tsʼáaj le tsolnuʼukaʼ: «Sukuʼuneʼex, kaʼalikil táan a páaʼtikeʼex le baʼaloʼobaʼ, beeteʼex tak tuʼux ku páajtal utiaʼal ka ilaʼakeʼex tumen Jajal Dios ich jeetsʼel óolal x-maʼ kʼaasil yéetel x-maʼ siʼipilil» (2 Ped. 3:14).
EʼES ICHIL A KUXTAL LE ESPERANZA YAANTECHOʼ
16, 17. 1) ¿Bix unaj k-kuxtal yéetel baʼax unaj k-beetik utiaʼal k-maas natsʼikba tiʼ Jéeoba? 2) ¿Baʼax unaj k-beetik utiaʼal k-ilik u béeytal le esperanza yaantoʼonoʼ?
16 Baʼaleʼ maʼ chéen unaj k-kanáantik maʼ u tuʼubultoʼon le esperanza yaantoʼonoʼ, baʼaxeʼ unaj k-eʼesik yéetel bix kuxlikoʼon. Jeʼex úuchik u yaʼalik Pedroeʼ, unaj k-ilik bix kuxlikoʼon tu táan Dios. ¿Baʼax táakaʼan ichil lelaʼ? Yáaxeʼ, unaj k-kʼaj óoltaʼal yoʼolal «bukaʼaj kʼub óolal yéetel kiliʼichil» k-kuxtal, lelaʼ u kʼáat u yaʼaleʼ k-bisik junpʼéel toj kuxtal yéetel k-beetik baʼax «maʼalob ichil le máaxoʼob maʼ u kʼaj óoloʼob Jajal Diosoʼ» (2 Ped. 3:11; 1 Ped. 2:12). Jach kʼaʼabéet xan k-paklan yaabiltikba, lelaʼ táakaʼan k-bisikba tubeel yéetel le sukuʼunoʼob tiʼ tuláakal le yóokʼol kaabaʼ bey xan t-múuchʼulil (Juan 13:35). Tsʼoʼoleʼ kʼaʼabéet k-beetik tuláakal le baʼaxoʼob jeʼel u yáantkoʼon utiaʼal k-maas natsʼikba tiʼ Jéeobaoʼ. Lelaʼ táakaʼan ka payalchiʼinakoʼon mantatsʼ, ka k-xok le Biblia sáamsamaloʼ, ka xakʼalxooknakoʼon t-juunal, ka yanaktoʼon le adoración ich familiailoʼ yéetel ka k-tsʼáa k-óol k-kʼaʼayt «u maʼalob péektsil[il] le [reinooʼ]» (Mat. 24:14).
17 Tuláakloʼon k-tsʼíiboltik ka lúubkoʼon utsil tu táan Jéeoba utiaʼal u salvartikoʼon ken u xuʼuls tiʼ le kʼasaʼan yóokʼol kaabaʼ. Wa k-beetik beyoʼ yaan k-kʼamik «le kuxtal minaʼan u xuuloʼ. Dios, máax maʼ tu tuuseʼ, tu yaʼalaj u tsʼáaik le kuxtalaʼ maʼiliʼ káajak yóokʼol kaabeʼ» (Tito 1:2).
[U kʼáatchiʼiloʼob le xookoʼ]
[Foto yaan teʼ táan juʼun 22]
Le sukuʼunoʼob yéeyaʼanoʼoboʼ ku síijloʼob «tu kaʼatéen» yéetel ku tsʼaʼabaltiʼob junpʼéel kuxaʼan esperanza
[Foto yaan teʼ táan juʼun 24]
Unaj k-áantik k-familia utiaʼal maʼ u tuʼubultiʼ le esperanza yaantoʼonoʼ