Mme Mbụme Oro Mme Andikot Ẹbụpde

Ndi Christian ekeme ndise ndise idan̄ tutu edi se ẹsiode enye ke esop?

▪ Ih! Ntak edi oro nnyịn mîkpesehe ndise idan̄ edide edi ke n̄wed, ke fim, ke vidio, m̀mê ke Intanet.

Ndise idan̄ ẹyọyọhọ kpukpru ebiet. Ibat mbon emi ẹsede ndise idan̄ awak etieti koro ndise idan̄ ẹyọyọhọ Intanet. Ndusụk nditọwọn̄ ye ikpọ owo ẹsidedịghe ẹkụt ndise emi ke mme ikpehe Intanet oro ẹdọn̄de mmọ. Edi mbon eken ẹsikaka ẹkeyom ndise emi, sia ẹkerede ke mmimọ imekeme ndidedịbe nse ndise idan̄ ke ufọk m̀mê ke itieutom mmimọ. Ntak emi mîfọnke Christian ese ndise idan̄?

Ntak kiet edi sia Jesus ọkọdọhọ ke “owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ye enye ama ke esịt esie.” (Matt. 5:28) Imọfiọk ke idiọkke ebe ye n̄wan ndinyene ebuana, ndien ke emi ekeme ndinam mmọ ẹkop inemesịt. (N̄ke 5:15-19; 1 Cor. 7:2-5) Edi idịghe se ndise idan̄ ẹsikpepde mme owo edi oro. Enye akam owụt obụrobụt idan̄ emi ekemede ndinam owo ekere ndiọi ekikere oro Jesus akakpande. Ke nditịn̄ in̄wan̄-in̄wan̄, ndikot n̄wed idan̄ m̀mê ndise ndise idan̄ edi nditre ndinam item Abasi emi: “Ẹwot mme  ndido idem mbufo emi ẹdude ke isọn̄ man ẹtre use, mbubiam ido, ọkpọsọn̄ udọn̄ idan̄, idiọk udọn̄, ye edisịn esịt ke n̄kpọ owo, emi edide ukpono ndem.”—Col. 3:5.

Nso ke ẹkpenam edieke Christian esede ndise idan̄ ini kiet m̀mê ikaba? Idaha Christian oro ekpetie nte eke Asaph andiwet psalm, ke ini enye ọkọdọhọde ete: “Amaedi ami, akayak esisịt ukot ekpefebede mi, ikpat mi ama ekpere ndifiọnọde.” Ndi Christian emi esede nte irenowo m̀mê iban ẹdade iferi m̀mê nte erenowo ye n̄wan ẹnamde use ekeme ndinyene eti ubieresịt nnyụn̄ ntie ke emem ye Abasi? Asaph ikenyeneke emem, sia enye ọkodọhọ ete: “Mmonyụn̄ mbọ ufen ofụri usen, ẹnyụn̄ ẹnen̄ede mi kpukpru usenubọk.”—Ps. 73:2, 14.

Christian emi anamde utọ n̄kpọ oro ekpenyene ndidiọn̄ọ ke imọ imenyene mfịna ye Jehovah ndien ke imọ imoyom un̄wam. Esop ekeme ndin̄wam enye, koro Galatia 6:1 ọdọhọ ete: “Okposụkedi owo odụkde idiọk afan̄ mbemiso enye ọfiọkde aban̄a emi, mbufo emi ẹdotde ke n̄kan̄ eke spirit, ẹdomo ndinen̄ede utọ owo oro ke ifụre ifụre ido, nte mbufo owo kiet kiet n̄ko ẹtịn̄de enyịn ke idem mbufo, mbak ẹdidomo mbufo n̄ko.” Ebiowo kiet m̀mê iba ẹkeme ndin̄wam enye, ndien emi esịne ‘akam mbuọtidem emi ekemede ndinam idem ọsọn̄ owo udọn̄ọ, ẹnyụn̄ ẹfen mme idiọkn̄kpọ esie.’ (James 5:13-15) Mbon oro ẹkade ẹbịne mbiowo ẹkebọ un̄wam man ẹtre ndise ndise idan̄ ẹsikụt ke ọfọn ndisan̄a n̄kpere Abasi kpa nte ọkọfọnde ye Asaph.—Ps. 73:28.

Edi apostle Paul ọkọdọhọ ke ndusụk mbon emi ẹkenamde “mbubiam ido ye use ye obukpo ido” ikamaha ndikabade esịt. * (2 Cor. 12:21) Prọfesọ Marvin R. Vincent ekewet ete ke ikọ Greek oro ẹkabarede “mbubiam ido,” ọwọrọ “ndedehe n̄kpọ emi edienerede.” Ọdiọk etieti sia ndusụk ndise idan̄ idịghe sụk ndise emi erenowo m̀mê n̄wan adade iferi m̀mê emi erenowo ye n̄wan ẹnamde use. Enyene mme ndedienede ndise idan̄ emi ẹwụtde idan̄ erenowo ye erenowo m̀mê eke an̄wan ye n̄wan, eke otuowo, eke owo ye unam, eke nditọwọn̄, eke otuowo emi ẹdan̄de owo ke n̄kanubọk, edinam n̄kpọ ibak ibak ye iban, edibọp owo nnịm ndan̄, m̀mê editụhọde owo. Esịt ndusụk mbon eyo Paul emi “[ẹkedude] ke ekịm ke ekikere” ama “[odoro ufiọn tutu] mmọ ẹyak idem ẹnọ obukpo ido ndinam kpukpru orụk mbubiam ido ke idiọkitọn̄.”—Eph. 4:18, 19.

Paul ama etịn̄ n̄ko aban̄a “mbubiam ido” ke Galatia 5:19. Eyen Britain kiet emi edide ata ekpep n̄kpọ mban̄a Bible ọkọdọhọ ke mbubiam ido emi “ekeme ndinen̄ede [n̄wọrọ] kpukpru idiọk udọn̄ idan̄ oro mîkemke ye obot.” Ndi odu Christian ndomokiet emi ọkpọdọhọde ke mme utọ ndise idan̄ oro ẹsiakde ke enyọn̄ emi ‘ekem ye obot’ ndien ke mmọ idienekede? Ke akpatre, Paul ọkọdọhọ ke Galatia 5:19-21 ete ke “mbon oro ẹkade iso ẹnam” utọ mbubiam ido emi “ididaha obio ubọn̄ Abasi inyene.” Ntre, ikpanaha ẹyak owo emi ama ekemehe enye ndise ndedienede ndise idan̄, emi mînyụn̄ imaha ndikabade esịt mfiak edem, aka iso odu ke esop. Ana ẹsio enye ẹfep ke esop man esop Abasi aka iso asana.—1 Cor. 5:5, 11.

Ndi ọmọfiọk ke ndusụk mbon emi ẹkesisede ndise emi ẹma ẹka ẹbịne mbiowo, ndien ke ẹma ẹda Bible ẹn̄wam mmọ ẹkpụhọde? Jesus ọkọdọhọ mme Christian ke Sardis eset ete: “Nam mme n̄kpọ eke ẹsụhọde emi ẹma ẹkekpere ndikpa ẹsọn̄ idem, . . . sụk ti nte akasan̄ade ọbọ ye nte akasan̄ade okop, ndien ka iso mụm enye kama, nyụn̄ kabade esịt. Ibọhọke afo edemede, . . . afo udunyụn̄ ufiọkke hour eke ndidide ndisịm fi idem.” (Edi. 3:2, 3) Owo ekeme ndikabade esịt nnyụn̄ nnam ẹdabade enye ẹsio ke ikan̄ ke ndamban̄a usụn̄.—Jude 22, 23.

Ntem, akpakam ọfọn nnyịn ikûsasan̄a ukpere ndise idan̄ ke usụn̄ ekededi. Ih, ana kpukpru nnyịn ibiere ke nnyịn idisehe ndise idan̄ ekededi!

[Ikọ Idakisọn̄]

[Se ẹwetde ke ikpọ abisi ke page 30]

Christian emi esisede ndise idan̄ ekpenyene ndibịne mbiowo n̄kọbọ un̄wam