Mga Pamangkot Gikan sa mga Bumalasa

Mahimo bala i-disfellowship ang isa gikan sa Cristianong kongregasyon kon naadik na sia sa pagtan-aw sang tuman kalain nga pornograpiya?

▪ Huo, posible ini. Amo kon ngaa nga dapat gid likawan sang isa ang tanan nga sahi sang pornograpiya. Nagalakip ini sang mga libro, magasin, pelikula, video, kag mga site sa Internet nga nagalaragway ukon nagapagua sini.

Ang pornograpiya yara bisan diin. Mahapos gid ini matigayon sa Internet kag nagadamo pa gid ang naapektuhan sini nga salot. Ang pila, bata man ukon tigulang, di-hungod nga nakabukas sang mga Web site nga may pornograpiya. Samtang ang iban hungod nga nagtan-aw sini, nga wala nagapangalag-ag kay mabasa nila ini ukon matan-aw sing sekreto sa ila balay ukon opisina. Ngaa dapat gid mabalaka sa sini ang mga Cristiano?

Ang panguna nga rason masapwan sa paandam ni Jesus: “Ang tagsatagsa nga padayon nga nagatulok sa isa ka babayi nga may kaibog sa iya nakapanghilahi na sa iya sa tagipusuon niya.” (Mat. 5:28) Matuod nga nagakaigo kag normal para sa mag-asawa nga mag-sex. (Hulu. 5:15-19; 1 Cor. 7:2-5) Apang indi amo sini ang ginapatuhuyan sang pornograpiya. Sa baylo, nagapadaku ini sang imoral nga sekso nga nagapukaw sang imoral nga mga panghunahuna nga ginpaandam ni Jesus. Maathag nga ang pagbasa ukon pagtan-aw sang pornograpiya nagasupak sa sugo sang Dios: “Busa, patya ninyo ang mga bahin sang inyo lawas nga yara sa duta may kaangtanan sa pagpakighilawas,  kahigkuan, kailigbon sa sekso, makahalalit nga handum, kag pagkamahamkunon, nga isa ka idolatriya.”—Col. 3:5.

Apang ano abi kon pila ka beses nga nakatan-aw ang isa ka Cristiano sang pornograpiya? Ang iya kahimtangan mapaanggid sa delikado nga sitwasyon nga naeksperiensiahan ni Asaf: “Apang ako, ang akon mga tiil diotayan lang makadanlog, ang akon mga tikang diotayan lang makadalin-as.” Kon ang isa ka Cristiano nagatan-aw sang laragway sang mga tawo nga nagahublas ukon sang naga-sex nga lalaki kag babayi, indi gid mangin matinlo ang iya konsiensia kag wala sia sing maayo nga kaangtanan sa Dios. Mangin kaangay sia kay Asaf nga nagsiling: “Kay sa bug-os nga adlaw ginsakit ako, kag ginsilotan agaaga.”—Sal. 73:2, 14.

Ang Cristiano nga nakahimo sini nga sayop dapat magbugtaw kag dapat magpabulig. Ini nga bulig matigayon sa kongregasyon: “Bisan pa ang isa ka tawo makahimo sang sayop nga tikang antes niya matalupangdan ini, kamo nga may espirituwal nga mga kalipikasyon magtinguha nga pasibuon ina nga tawo sa espiritu sang kalulo, samtang ginabantayan sang kada isa ang iya kaugalingon.” (Gal. 6:1) Mahimo sia buligan sang isa ukon duha ka gulang, lakip ang ‘pagpangamuyo nga may pagtuo nga magaayo sa isa nga nagamasakit, kag patawaron ang iya sala.’ (Sant. 5:13-15) Napamatud-an sang mga nagpabulig nga madula ang dagta sang pornograpiya nga maayo para sa ila ang pagpalapit sa Dios, subong ni Asaf.—Sal. 73:28.

Apang, si apostol Pablo nagsiling nga ang pila nga nakasala wala maghinulsol “sa ila kahigkuan kag pagpakighilawas kag lugak nga paggawi.” * (2 Cor. 12:21) Parte sa Griegong tinaga nga ginbadbad sing “kahigkuan,” si Propesor Marvin R. Vincent nagsulat nga “nagakahulugan ini sang kadagtaan nga may labot sa kangil-aran.” Mas malain pa gid kay ang iban nga pornograpiya indi lamang parte sa mga tawo nga nagahublas ukon naga-sex nga lalaki kag babayi. Ang makangilil-ad pa gid nga pornograpiya amo ang nagapakita sang homoseksuwalidad (pag-sex sang pareho sing sekso), group sex, bestialidad (pagpakig-sex sa sapat), child pornography, gang rape, pagpintas sa mga babayi, paggapos sa isa samtang nagapakigsekso, kag sadista nga pagpaantos. Ang iban sang adlaw ni Pablo nga ‘nadulman sa ila hunahuna’ “wala na sang tanan nga igbalatyag sa maayo kag malain [kag] nagpatuyang sila sa lugak nga paggawi sa paghimo sang tanan nga sahi sang kahigkuan nga may kakagod.”—Efe. 4:18, 19.

Ginsambit man ni Pablo ang “kahigkuan” sa Galacia 5:19. Suno sa isa ka Britaniko nga iskolar ini nga “kahigkuan” nagapatuhoy sa tanan nga indi natural nga kailigbon. Nagaugyon gid ang tanan nga Cristiano nga ang mga sahi sang pornograpiya nga nasambit na mahigko kag makapukaw sang indi natural nga mga kailigbon. Sa Galacia 5:19-21 si Pablo nagsiling nga “ang mga nagabuhat” sini nga kahigkuan “indi makapanubli sang Ginharian sang Dios.” Gani, kon naadik na ang isa sa pagtan-aw sang mahigko kag makahuluya nga pornograpiya kag madugay na ini, kag indi maghinulsol kag magbag-o, indi sia makapabilin sa Cristianong kongregasyon. Dapat sia i-disfellowship agod maamligan ang katinlo kag espiritu sang kongregasyon.

Makalilipay nga ang pila nga nakatan-aw sang makangilil-ad nga porma sang pornograpiya nagpalapit sa mga gulang kag nabuligan sa espirituwal agod magbag-o. Ginpalig-on ni Jesus ang mga Cristiano sa Sardis sadto: “Pabakura ang mga butang nga nabilin nga malapit na mapatay, . . . padayon nga dumduma ang imo nabaton kag ang imo nabatian, kag padayon nga tumana ini, kag maghinulsol. Kon indi ka magmata, . . . indi mo gid mahibaluan kon ano nga oras ako magaabot sa imo.” (Bugna 3:2, 3) Posible nga maghinulsol ang isa kag masabnit sa kalayo kon sa aton pa.—Jud. 22, 23.

Apang mas maayo pa gid kon ang kada isa sa aton mamat-od nga indi magpalapit sa makatalagam nga kahimtangan. Huo, dapat determinado gid kita nga likawan ang tanan nga sahi sang pornograpiya.

[Nota]

[Blurb sa pahina 30]

Ang Cristiano nga nakasayop dapat magbugtaw kag magpabulig sa espirituwal