Penjo Moa Kuom Josombwa

Be Jakristo nyalo bedo gi tim mar ng’iyo ponografi mi ochop e okang’ marach ahinya manyalo miyo gole oko mar kanyakla mar Jokristo?

▪ Ee, nyalore. Mano nyiso gimomiyo dwarore ahinya ni ng’ato otamre chuth kit ponografi duto, gibed e buge mondiki, piche moket e gasede, sinembe, vidio, koda e Intanet.

Ponografi yudore kamoro amora e piny mangima. Intanet osemiyo ponografi obedo mayot ahinya yudo maloyo kinde moro amora, kendo mano osemiyo kwan joma ng’iyo ponografi omedore ahinya. Moko kuom jomatindo koda jomadongo osedonjo apoya e Websait manyiso ponografi ka ok ging’eyo. Moko to osedhi e kuondego goyiem, nikech ginyalo ng’iyo ponografi ling’ling’ kar kendgi e pacho kata e ofis. Ang’o momiyo Jokristo onego otang’ ahinya gi timno?

Wayudo gimomiyo e siem ma Yesu nochiwo niya: “Ng’ato ka ng’ato mong’iyo dhako kogombe, oseterore kode e chunye.” (Math. 5:28) En adier ni nindruok e kind dhako gi dichwo mokendore en gimowinjore kendo makelonegi mor. (Nge. 5:15-19; 1 Kor. 7:2-5) Kata kamano, mano ok e gima ponografi jiwo. Kar mano, ponografi nyiso timbe nindruok mag anjawo majiwo paro mag terruok ma Yesu nochiwo siem kuomgi. Somo kata ng’iyo ponografi en tim maok winjre  gi chik Nyasaye mawacho ayanga niya: “E momiyo, neguru dhano machon gi timbene, kaka terruok, tim ma ok ler, hera marach, gombo maricho, kod ich lach, (nikech ich lach en lamo nyiseche manono).”—Kol. 3:5.

To nade kapo ni Jakristo nong’iyo ponografi dichiel kata diriyo kama? Chalne nyalo miyo olwar mayot mana kaka chal mar Asaf jandik-zaburi ma nondiko kama: “To an to, tienda ne both obaro tenge; ondembena ne chiegini kier chutho.” Ere kaka Jakristono nyalo bedo gi chuny maonge bura kendo bedo gi kuwe gi Nyasaye, kapo ni ne ong’iyo piche mag ponografi manyiso dug chwo gi mon, kata dichwo gi dhako materore? Asaf bende ne onge gi kuwe gi Nyasaye, nimar nowacho kama: ‘Osegoya pile ka pile, mi okuma okinyi kokinyi.’—Zab. 73:2, 14.

Jakristo modonjo e richo kaka mano onego ochiew kendo omany kony. Kony ma kamano yudore e kanyakla, nikech ndiko wacho kama: ‘Ka chwanyruok opoyo ng’ato, un joma wuotho kuom roho, duogeuru gi chuny mamuol, kuritoru uwegi mondo un bende kik otemu.’ (Gal. 6:1) Jaduong’ achiel kata jodongo ariyo mag kanyakla nyalo miye kony madwarore, moriwo bende ‘lamo mar yie mareso jatuwo, mi richone inyalo wene.’ (Jak. 5:13-15) Jogo mosemanyo kony mar tieko tim marach mar ponografi oseneno kaka sudo machiegni gi Nyasaye kelonegi ber, mana kaka ne otimore ne Asaf.—Zab. 73:28.

Kata kamano, jaote Paulo nowacho ni nitie jomoko ma ne otimo richo to ok giloko chunygi ‘kuom timgi maok ler gi terruok gi anjawo.’ * (2 Kor. 12:21) Kowuoyo kuom wach mar dho Grik molok ni ‘tim maok ler,’ Profesa Marvin R. Vincent nondiko ni wachno wuoyo kuom “gima olil e okang’ modwanyore ahinya.” Gimalit en ni mopogore gi piche manyiso duge ji kata dichwo gi dhako materore, nitie ponografi moko modwanyore ahinya moloyo. Nitie ponografi modwanyore ahinya manyiso nindruok e kind chwo gi chwo kata mon gi mon, nindruok mitimo karachiel gi ji mang’eny, nindo gi le, ponografi mitimo gi nyithindo, jomahundu manindo gi ng’ato gi thuon, timo ne mon timbe gero, tweyo ji kaka wasumbini, kata yudo mor kuom sando ji e yo marach ahinya. Jomoko ma ne odak e kinde Paulo ne nigi ‘paro motimo mudho ka parogi otho, mi ne giwere ne anjawo mondo gitim timbe duto maok ler ka gigombo.’—Efe. 4:18, 19.

Paulo bende wuoyo kuom “tim ma ok ler” e Jo Galatia 5:19. Jasomo moro ma Ja-Ingresa nowacho ni, “kanyo wachno nyalo [chung’] ahinya ne gombo maricho duto ma ne ok ochwego dhano.” En Jakristo mane manyalo kwer ni ponografi moting’o timbe mochido monyis malogo, gin ‘gombo ma ne ok ochwego dhano’ kendo gin timbe modwanyore moloyo? E Jo Galatia 5:19-21, Paulo nonyiso ni “jogo ma timo” timbe maok lergo “ok nocham gikeni mag pinyruodh Nyasaye.” Omiyo, ka ng’ato omoko e tim mar ng’iyo ponografi modwanyore, ma dipo kata ni osebedo kotimo kamano kuom kinde, to otamore loko chunye kendo weyo timno, ok obi siko ei kanyakla mar Jokristo. Nyaka to gole oko mar kanyakla mondo mi ler kod chuny maber mar kanyakla osiki.—1 Kor. 5:5, 11.

Ber ng’eyo ni nitie jomoko machon ne ng’iyo kit ponografi modwanyore, to gisedhi ir jodong mi giyudo kony kendo timo lokruok madongo e ngimagi. Yesu nosayo Jokristo ma ne ni e Sarde machon kama: “Teg gigo ma pod odong’, ma chiegni tho; . . . par puonjno ma ninwang’o kendo niwinjo; make, kendo lok chunyi. To ka ok ichiewo, . . . ok ining’e ngang’ sano ma abiroe.” (Fwe. 3:2, 3) Ng’ato nyalo loko chunye mi rese kaka ng’ama igolo e mach.—Juda 22, 23.

Kata kamano, donge nyalo bedo gimaber moloyo ka ng’ato ka ng’ato kuomwa ng’ado ni ok obi sudo machiegni gi gimanyalo miyo wahinyre? Ee, onego wang’ad chuth mar tamruok kit ponografi duto!

[Weche moler piny]

[Weche Manie ite mar 30]

Jakristo modonjo e tim moro marach onego ochiew kendo omany kony mar jodongo