Dipotšišo tše Tšwago go Babadi

Na go tlwaela ga Mokriste go bogela diswantšho tše di kgothaletšago bootswa e ka ba mo go feteletšego kudu moo go ka feleletšago ka gore a kgaolwe ka phuthegong ya Bokriste?

▪ Ee, seo se ka direga. Se se gatelela bohlokwa bja gore re pheme ka mo go feletšego go bogela diswantšho ka moka tše di kgothaletšago bootswa—e ka ba tšeo go ngwadilwego ka tšona goba tšeo di lego ka dimakasineng, difiliming, dibidiong le Inthaneteng.

Diswantšho tše di kgothaletšago bootswa di hwetšwa gohle go dikologa lefase. Inthanete e dira gore go be bonolo go hwetša diswantšho tše di kgothaletšago bootswa go feta le ge e le neng pele gomme e dirile gore palo ya bao ba fetetšwego ke bolwetši bjo bjo bogolo e golele godimo. Batho ba bangwe, go akaretša ba banyenyane le ba bagolo, ba ile ba bogela diswantšho tše di kgothaletšago bootswa Inthaneteng ka phošo. Ba bangwe ba ile ba di bogela ka boomo, ba ikwa ba sa lewe ka dihlong ka gobane ba kgona go bala ka diswantšho tše goba go di bogela ka sephiring—ba le ka gae goba mošomong. Ke ka baka la’ng Bakriste ba swanetše go tshwenyega kudu ka se?

Re hwetša lebaka la motheo go temošo ya Jesu e rego: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” (Mat. 5:28) Go ba gona, dikopano tša botona le botshadi magareng ga banyalani ke selo sa maleba e bile di ka ba thabiša. (Die. 5:15-19; 1 Bakor. 7:2-5) Eupša diswantšho tše di kgothaletšago bootswa ga di fihlelele morero woo. Go e na le moo, di bontšha dikopano tša botona le botshadi tšeo di sego molaong tšeo di šušumeletšago motho go ba le dikgopolo tše di gobogilego tšeo Jesu a re lemošitšego ka tšona. Go molaleng gore go bala goba go bogela diswantšho tše di kgothaletšago bootswa go tloga go thulana ka go lebanya le taelo ya Modimo e rego: “Ka gona bolayang mekgwa  ya lefase yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru, e lego borapedi bja medimo ya diswantšho.”—Bakol. 3:5.

Go thwe’ng ge e ba Mokriste a ile a bogela diswantšho tše di kgothaletšago bootswa ka lekga letee goba a mabedi? Boemo bja gagwe bo ka swana ka tsela e itšego le boemo bjo kotsi bjoo mopsalme Asafa a kilego a ikhwetša a le go bjona ge a bolela gore: “Ge e le nna, dinao tša ka di nyakile di aroga, dikgato tša ka di nyakile di thelela.” Mokriste a ka ba bjang le letswalo le le hlwekilego gomme a ba khutšong le Modimo ge e ba a be a tomoletše mahlo diswantšho tše di kgothaletšago bootswa tša banna goba basadi bao ba sa aparago goba tša batho ba babedi bao ba dirago bootswa? Asafa le yena ga se a ka a ba khutšong e bjalo. O itše: “Ke be ke tlaišega letšatši ka moka, gomme ke phošollwa mesong e mengwe le e mengwe.”—Ps. 73:2, 14.

Mokriste yo a wetšego bobeng bjo bjalo o swanetše go phafoga gomme a lebeletšane le therešo ya gore o nyaka thušo ya moya. Thušo yeo e a hwetšagala ka phuthegong: “Ge motho a gata kgato e fošagetšego pele a lemoga, lena bao le nago le ditshwanelego tša moya lekang go bušetša motho yo bjalo tseleng ka moya wa boleta. Eupša dulang le ipeile leihlo.” (Bagal. 6:1) A ka thušwa ke mogolo o tee goba ba babedi ba Bakriste, go akaretša le go mo rapelela ‘thapelo ya tumelo yeo e tlago go fodiša yo a babjago gomme dibe tša gagwe tša lebalelwa.’ (Jak. 5:13-15) Bao ba ilego ba nyaka thušo ya gore ba tloše sepatso se sa diswantšho tše di kgothaletšago bootswa ba ile ba bona gore go batamela Modimo go ba thušitše kudu, go etša ge go bile bjalo ka Asafa.—Ps. 73:28.

Lega go le bjalo, moapostola Paulo o boletše gore ba bangwe bao ba dirilego sebe ga se ba itsholela “go se hlweke ga bona, bootswa le boitshwaro bjo bo hlephilego.” * (2 Bakor. 12:21) Mabapi le lentšu la Segerika leo le fetoletšwego moo e le “go se hlweke,” Moprofesara Marvin R. Vincent o ngwadile gore le na le “kgopolo ya go se seke mo go sepedišanago le go goboga.” Therešo e kwešago bohloko ke ya gore diswantšho tše dingwe tše di kgothaletšago bootswa ke tše mpe kudu go feta ditiragalo tša ge motho a se a apara goba tša ge monna le mosadi ba dira bootswa. Go na le diswantšho tše dingwe tše di kgothaletšago bootswa tšeo di gobogilego e bile di šišimišago tšeo di akaretšago bosodoma (dikopano tša botona le botshadi magareng ga batho ba bong bjo bo swanago), dikopano tša botona le botshadi tša sehlopha, go robala ga motho le phoofolo, diswantšho tše di kgothaletšago bootswa tšeo go tšona go dirišwago bana, go katwa ga motho ke sehlopha, go tlaišwa ga basadi, batho bao ba bago le dikopano tša botona le botshadi le batho bao ba ba tlemilego, goba go tlaišwa ga batho ka tsela e šoro. Ba bangwe mehleng ya Paulo bao ba bego ba le “leswiswing monaganong” ba ile ba ‘lahlegelwa ke maikwelo ohle a boitshwaro gomme ba ikgafela boitshwaro bjo bo hlephilego go dira ditšhila tša mohuta o mongwe le o mongwe ka megabaru.’—Baef. 4:18, 19.

Le gona Paulo o dirišitše polelwana “go se hlweke” go Bagalatia 5:19. Seithuti se sengwe sa Brithania se boletše gore polelwana yeo “mo e ka [šupa] ka mo go kgethegilego dikganyogo ka moka tšeo e sego tša tlhago.” Ke Mokriste ofe yo a ka ganago gore mekgwa yeo go boletšwego ka yona ka mo godimo yeo e šišimišago le e lešago dihlong ya dikopano tša botona le botshadi yeo e tšwelelago diswantšhong tše dingwe tšeo di kgothaletšago bootswa ke ‘dikganyogo tšeo e sego tša tlhago’ e bile di gobogile? Paulo o phethile go Bagalatia 5:19-21 gore “bao ba tlwaelago go dira” dilo tše bjalo tša go se hlweke “ba ka se je bohwa bja Mmušo wa Modimo.” Ka mo go swanago, ge e ba motho yo a itšego a tlwaela go bogela diswantšho tše bjalo tše di kgothaletšago bootswa tše di šišimišago le tše di lešago dihlong, mohlomongwe a dirile seo ka nako e teletšana, gomme a sa itshole ke moka a sokologa, gona a ka se tšwele pele a le ka phuthegong ya Bokriste. O swanetše go kgaolwa e le gore go šireletšwe bohlweki le moya wa phuthego.—1 Bakor. 5:5, 11.

Ke mo go thabišago go tseba gore ba bangwe bao ba ilego ba wela molabeng wa go bogela dibopego tše di šišimišago tša diswantšho tše di kgothaletšago bootswa ba ile ba ya go bagolo gomme ba newa thušo ya moya yeo e bego e nyakega gore ba dire diphetogo kapelapela. Jesu o ile a bolela le Bakriste ba kua Sarede ya bogologolo gore: ‘Matlafatšang dilo tše di šetšego tšeo di bego di tla tloga di ehwa, le tšwele pele le nagana kamoo le amogetšego ka gona le kamoo le kwelego ka gona seo, le dule le kgomaretše seo gomme le itshole. Ruri ge e ba le sa tsoge, le gatee le ka se ke la tseba nako yeo ke tla tlago go lena ka yona.’ (Kut. 3:2, 3) Go a kgonega gore motho a sokologe gomme a ubulwe mollong ka kgopolo ya seswantšhetšo.—Juda 22, 23.

Lega go le bjalo, ruri go kaone gore yo mongwe le yo mongwe wa rena a phethe le pelo ya gagwe gore a ka se batamele le ganyenyane boemong bjoo bjo kotsi. Ee, re swanetše go ikemišetša ka dipelo tša rena ka moka gore re pheme dibopego ka moka tša diswantšho tše di kgothaletšago bootswa!

[Mongwalo wa tlase]

[Ntlhakgolo go letlakala 30]

Mokriste yo a wetšego bobeng o swanetše go phafoga gomme a lebeletšane le therešo ya gore o nyaka thušo ya moya