Kpuyia Mɔɔ Vi Kengavoma Ɛkɛ

Asoo bɛkola bɛtu Keleseɛnenli mɔɔ kɔ zo nea nla nwo nvoninli la bɛfi asafo ne anu?

▪ Ɛhɛe, bɛkola. Ɛhye maa yɛnwu deɛmɔti nwolɛ hyia kɛ yɛkoati nla nwo nvoninli biala mɔɔ wɔ buluku nu, sini nu, video nu, nee Intanɛte zo la.

Nla nwo nvoninli ɛbu ewiade ɛhye anu. Intanɛte ne ɛmaa nla nwo nvoninli dɔɔnwo ɛra na menli dɔɔnwo ɛva bɛ nwo ɛwula ye ɛnleanlɛ nu. Ngakula nee mgbanyinli bie mɔ kɔfinde nla nwo nvoninli zo arɛlevilɛ nu wɔ Intanɛte zo. Bie mɔ anye fuu kɔnea. Ɔnvale bɛ nwo, ɔluakɛ bɛkola bɛkenga nwolɛ edwɛkɛ anzɛɛ bɛnea wɔ bɛ azua nu anzɛɛ ɔfese mɔɔ awie biala ɛnnwu bɛ a. Duzu ati a ɛhye anwo hyia Keleseɛnema ɛ?

Yɛnwu deɛmɔti ɔle zɔhane la wɔ Gyisɛse kɔkɔbɔlɛ ɛhye anu: “Saa nrenya nea raalɛ maa ɔ nwo dɔ ye a ɛnee yeva ye wɔ ye ahonle nu.” (Mat. 5:28) Nɔhalɛ nu, nla nwo ngitanwo le kpalɛ na ɔmaa agyalɛma anye die. (Mrɛ. 5:15-19; 1 Kɔl. 7:2-5) Noko akee, nla nwo nvoninli ɛnleanlɛ ɛnle zɔ. Ɔsi nla mɔɔ tia mɛla la adua na ɔmaa menli nyia nla nwo adwenle ɛtane ne mɔɔ Gyisɛse bɔle nwolɛ kɔkɔ la. Ɔda ali kɛ nla nwo nvoninli ɛnleanlɛ nee Nyamenle adehilelɛ ɛhye ɛnyia fee: “Ɔwɔ kɛ bɛku nwonane nu atiakunluwɔzo ne mɔ mɔɔ wɔ bɛ nu, mɔɔ le kɛ adwɔmane,  ɛbɛla mgbane mgbane ɛbɔlɛ, ɛhulolɛ ɛtane, atiakunluwɔzo ɛtane, yɛɛ anyebolo, ɔluakɛ ɛhye mɔ ɛyɛlɛ le awozonle ɛzonlenlɛ.”—Kɔl. 3:5.

Na saa Keleseɛnenli bie ɛnlea nla nwo nvoninli ko anzɛɛ nwiɔ bie ala ɛ? Ye edwɛkɛ ne bahola ayɛ kɛ tɛnlabelɛ mɔɔ esiane wɔ nu mɔɔ ɛnee edwɛndolɛnli Esafe wɔ nu la: “Na mame, mendule koti menwiele, me gyakɛ ɛdudulɛ nu, ɔhale kyɛkyɛ na meatele.” Kɛ ɔkɛyɛ na Keleseɛnenli anyia adwenle mɔɔ anu te na ɔ nee Nyamenle avinli ayɛ kɛnlɛma wɔ mekɛ mɔɔ ɔnea nla nwo nvoninli mɔɔ mrenya anzɛɛ mraalɛ ɛye bɛ nwo wɔ nu na awie mɔ noko ɛlɛbɔ adwɔmane wɔ nu la ɛ? Eza Esafe hanle kɛ: “Alehyenlɛ muala menwu amaneɛ, nwonlomɔ biala menyia ndeanlɛ.”—Edw. 73:2, 14.

Ɔwɔ kɛ Keleseɛnenli mɔɔ ɛva ɔ nwo ɛwula ɛtaneyɛlɛ zɛhae anu la maa ɔ nye ba ɔ nwo zo ɔkpondɛ sunsum nu moalɛ. Asafo ne anu a ɔbanyia moalɛ a: “Saa bɛnwu awie mɔɔ ɛlɛyɛ ɛtane a, bɛdabɛ mɔɔ Nyamenle Sunsum ne wɔ bɛ nu la ɛdenrɛ ye, noko anrɛɛ bɛyɛ ye bɛtɛɛ wɔ adenle kɛnlɛma nu.” (Gal. 6:1) Asafo nu kpanyinli ko anzɛɛ mgbanyinli nwiɔ bahola aboa ye. Na “saa bɛfa diedi bɛyɛ nzɛlɛlɛ ɛhye a, wuleravolɛ ne anwo baza; Awulae badwazo ye, na saa yeyɛ ɛtane a yeava ye ɛtane yeahyɛ ye.” (Gye. 5:13-15) Bɛdabɛ mɔɔ bɛkpondɛle moalɛ bɛhwenle bɛ nwo bɛvile nla nwo nvoninli ɛnleanlɛ nwo la ɛnwu kɛ Nyamenle mɔɔ bɛbikyele ye la ɛboa bɛ kɛmɔ ɔboale Esafe la.—Edw. 73:28.

Noko akee, ɛzoanvolɛ Pɔɔlo hanle bɛdabɛ mɔɔ “bɛtɛnunle bɛ nwo wɔ bɛ nyɛleɛ . . . mɔɔ anwo ɛnde, nee adwɔmanebɔlɛ nwo la” anwo edwɛkɛ. * (2 Kɔl. 12:21) Mɔɔ fane Giliki edwɛkɛkpɔkɛ ne mɔɔ bɛhile ɔ bo “nyɛleɛ . . . mɔɔ anwo ɛnde” anwo la, Abɔlɔba Marvin R. Vincent hɛlɛle kɛ “ɔ bo kile nyɛleɛ evinli anzɛɛ ɛbɛla mɔɔ ɛkpɔlɔ.” Ɔyɛ alɔbɔlɛ kɛ nla nwo nvoninli bie mɔ ɛkpɔlɔ bɔbɔ ɛdɛla nrenya nee raalɛ mɔɔ bɛye bɛ nwo anzɛɛ bɛlɛbɔ adwɔmane la. Ɛbɛla mɔɔ ɛkpɔlɔ na ɔle bɛkyi mɔɔ bie a le nrenya mɔɔ fa nrenya, raalɛ mɔɔ fa raalɛ, mraalɛ mɔɔ bɛkye bɛ bɛ nee bɛ da, mrenya dɔɔnwo mɔɔ bɛkye raalɛ ko bɛ nee ye da, nane mɔɔ bɛ nee ye da, ngakula mɔɔ bɛ nee bɛ da, mraalɛ mɔɔ bɛ nee bɛ da atisesebɛ nu, mraalɛ mɔɔ bɛkyekye bɛ bɛ nee bɛ da la wɔ nla nwo nvoninli dɔɔnwo anu. Wɔ Pɔɔlo mekɛ zo, menli mɔɔ ɛnee bɛ “adwenle nu le awozinli” na “nyiane ɛnle bɛ nye zo” la, yɛle “ninyɛndane yɛɛ [ɛnee] bɛkulo ɛbɛla mgbane mgbane ɛbɔlɛ.”—Ɛfɛ. 4:18, 19.

Eza Pɔɔlo hanle “ɛbɛla . . . mɔɔ anwo ɛnde” la anwo edwɛkɛ wɔ Galeehyeama 5:19. Britain abɔlɔba bie hanle kɛ edwɛkɛ ɛhye fane “nla nwo atiakunluwɔzo ɛtane kɔsɔɔti” nwo. Keleseɛnenli boni a bazu kpolera kɛ ɛbɛla mɔɔ ɛkpɔlɔ na ɔle bɛkyi mɔɔ bɛha nwolɛ edwɛkɛ wɔ anwuma ɛke la ɛnle “nla nwo atiakunluwɔzo ɛtane” a? Pɔɔlo dwulale edwɛkɛ mɔɔ wɔ Galeehyeama 5:19-21 la kɛ: “Bɛdabɛ mɔɔ bɛyɛ ninyɛne ɛhye mɔ” mɔɔ anwo ɛnde la “ɛnrɛnwu Nyamenle Belemgbunlililɛ ne.” Ɛhye ati, saa awie kɔ zo nea nla nwo nvoninli mɔɔ ɛkpɔlɔ la wɔ mekɛ tendenle na ɔngulo kɛ ɔnu ɔ nwo ɔtwe ɔ nwo ɔfi nwo a, ɔnrɛhola ɔnrɛdɛnla Keleseɛnema asafo ne anu. Ɔwɔ kɛ bɛtu ye amaa asafo ne anwo ade.—1 Kɔl. 5:5, 11.

Ɔyɛ anyelielɛ kɛ bie mɔ mɔɔ ɛnee nea nla nwo nvoninli mɔɔ ɛkpɔlɛ la, ɛhɔ asafo nu mgbanyima ɛkɛ ɛhɔkpondɛ sunsum nu moalɛ na bɛyɛ nzenzaleɛ a. Gyisɛse dule tete Keleseɛnema mɔɔ ɛnee wɔ Saadese la folɛ kɛ: “Miemia mɔɔ ɛlɛ ye la anu kolaa na ɔkɛzɛkye bɔkɔɔ a yeazɛkye. . . . Zɔhane ati, kakye mɔɔ bɛhilehile wɔ nee mɔɔ ɛdele la, di zolɛ, na nu ɛ nwo. Saa wɔanyɛ ɛ nye gyɛlɛmgbɛɛnye a, . . . ɛnrɛnwu mekɛ ko ne mɔɔ mebava meara la.” (Yek. 3:2, 3) Ɛbahola wɔanlu ɛ nwo na bɛalie wɔ bɛavi senle nu wɔ sɛkɛlɛneɛ adenle zo.—Dwu. 22, 23.

Nea kɛzi ɔle kpalɛ kɛ yɛbazi kpɔkɛ kɛ yɛnrɛbikye esiane zɔhane anwo fee a! Nɔhalɛ nu, ɔwɔ kɛ yɛsika yɛ bo yɛkoati nla nwo nvoninli biala.

[Ɔ bo ɛkɛ ne edwɛkɛ]

[Edwɛkɛ mɔɔ bɛkpa wɔ mukelɛ 30]

Ɔwɔ kɛ Keleseɛnenli mɔɔ ɛva ɔ nwo ɛwula ɛtaneyɛlɛ zɛhae anu la maa ɔ nye ba ɔ nwo zo ɔkpondɛ sunsum nu moalɛ