Ni rinabadiidxaʼ cani ruundaʼ

Ñee zanda guiree ti xpinni Cristu de ndaaniʼ xquidxi Dios pa gueeda gapa viciu de guʼyaʼ idxa guidxa la?

▪ Zanda pue. Nga runi, cadi liica naquiiñeʼ guʼyaʼ binni nin ti clase idxa guidxa o cosa dxabaʼ, guʼndaʼ de laani, guʼyaʼ ni lu revista, película, videu o lu Internet.

Ca videu ne película de idxa guidxa nuucani guiráʼ ladu. Cumu laaca nuuni lu Internet la? zeʼ dxi jma zidale binni ni zanda guʼyaʼ ni racá, ne guiráʼ clase binni nga zanda guiaba lu trampa ca, cásica ni nahuiiniʼ zaqueca ni huaniisi. Nuu tu huayuuyaʼ ni purtiʼ ora maʼ nuu lu Internet málasi riree ni. Peru zacaca nuu xcaadxi ni riyúbipecaʼ gúʼyacaʼ o gúʼndacaʼ de laani, nuu tu laa ruuyaʼ ni ora maʼ nuu ralidxi o ra oficina, ra guirutiʼ zanda guʼyaʼ laa. Xiñee malu guʼyaʼ ca xpinni Cristu idxa guidxa yaʼ.

Jesús bizeeteʼ tobi de ca razón nabé risaca ora guníʼ ca diidxaʼ riʼ: «Neca chuʼlaʼdxi si tuuxa ti gunaa ni cadi xheelaʼ, ne icá ique chuʼ né laabe la? ma bichee, neca qué ñuu né pe laabe» (Mat. 5:28). Dxandíʼ, ora si maʼ bichaganáʼ binni nga zanda gatané xheelaʼ ne chuʼcaʼ nayecheʼ (Pro. 5:15-19; 1 Cor. 7:2-5). Peru ora ruuyaʼ binni idxa guidxa raca biidiʼ xpiaaniʼ ne riníʼ ique cosa malu. Tuuxa ni guʼyaʼ o guʼndaʼ de laani cusihuinni cadi zinanda conseju cudii Dios riʼ: «Lagaxha irá ni zeeda  de guidxilayú ri ndaani ladxidóʼ to. Nin tobi de laatu cadi chuʼ né ni cadi xheelaʼ, nin guni gasti ni nadxabaʼ. Cadi chi nanda tu ni na ique tu, nin uluiʼlaʼdxi tu guni tu ni cadi jneza. Ne cadi nisi bidxichi ma cá ique tu gapa tu, purti ra guni tu zacá la? ma nga nga ni cusisaca tu, ne cadi Dios» (Col. 3:5).

Yanna, pa maʼ biiyaʼ ti xpinni Cristu idxa guidxa tobi o chupa biaje yaʼ. Zanda guininu nuube lu ti guendanagana cásica guyuu Asaf ora guníʼ gastiʼ biaadxaʼ para ñaba purtiʼ bixooñeʼ ñee. Pa maʼ huayuuyabe ra cá hombre ne gunaa xieeladi o cayúnicaʼ cosa dxabaʼ, qué zanda chuʼ xquendabiaanibe nayá ne qué zanda chúʼnebe Dios tobi si. Ne zuni sentirbe casi biʼniʼ sentir Asaf ora guníʼ: «Guidubi dxi racanaʼyaʼ ne guiráʼ siadóʼ riguu jnézacabe naa» (Sal. 73:2, 14).

Ti pecadu nga guʼyaʼ ti xpinni Cristu idxa guidxa, ne naquiiñeʼ ganna zuxhéleni laa de Dios ne caquiiñeʼ chuʼ tu gacané laa. Biblia cuzeeteʼ zanda guidxélabe tu gacané laabe lade ca binni ridagulisaa. Sicaríʼ nani: «Hermanu caʼ, pa guʼya tu cuchee tobi de laatu la? laatu, cani zinanda Espíritu Santu, laulidxe laabe ne diidxa nadóʼ. Ne laca laguuya gá laatu» (Gál. 6:1). Nga runi, ti binnigola o chupa de laacaʼ zanda gacanecaʼ laabe, guni orarcaʼ Dios pur laabe ne gápacaʼ fe zacané Jiobá laabe chuʼbe galán né laa sti biaje ne zutiidilaʼdxiʼ Jiobá stóndabe (Sant. 5:13-15). Cani maʼ huayubi chuʼ tu gacané laa gusaana viciu de guʼyaʼ idxa guidxa runi sentircaʼ casi biʼniʼ sentir Asaf ora guníʼ: «Guizáʼ galán runeʼ sentir chuaaʼ gaxha de Dios» (Sal. 73:28).

Peru apóstol Pablu bisiene guyuu caadxi ni qué niná nusaana «enda rapa jnadxii [ne «cosa dxabaʼ», NM] ne irá ni cadi jneza ni riulaʼdxi xcuerpu» (2 Cor. 12:21). a Diidxaʼ griegu ni biquiiñeʼ Pablu para «cosa dxabaʼ» riniʼni «xiixa nabé nabiidiʼ o nayuudxuʼ», casi guníʼ ti maestru ni láʼ Marvin R. Vincent. Peru nuu caadxi clase de idxa guidxa jma nayuudxuʼ que guʼyaʼ si binni ra cá tuuxa xieeladi o ra rihuinni chupa binni cayuni cosa dxabaʼ. Nuu biaje rihuinni cosa nabé feu ni ribixhilaʼdxiʼ binni lu ca película ne ca videu de idxa guidxa ca, casi ra riuunécabe muxeʼ, ra ratanécabe chupa chonna binni oraqueca, ra riuunécabe maniʼ, ra riuunécabe xcuidihuiiniʼ, ra rilaxoo chupa chonna binni ti gunaa, ra cayuninácabe gunaa ne ra rundiibicabe tuuxa ne riguíñecabe laa ante gatanécabe laa. Pablu guníʼ de caadxi binni ni «nacahui xquenda biaani caʼ» ne «qué rituí lú ca guni ca intiica ni na ique caʼ, ne irá ni nadxabaʼ, dede biaʼ gapa ca gana» (Efe. 4:18, 19).

Pablu laaca bizeeteʼ diidxaʼ «ni nadxabaʼ» lu Gálatas 5:19. Ti teólogo de Gran Bretaña na diidxaʼ ca zeeda gácani guiráʼ ni cadi naquiiñeʼ guni binni, casi ora riuunecaʼ ti maniʼ. Guiráʼ ca xpinni Cristu laaca nanna dxíchicaʼ nabé nabiidiʼ o nayuudxuʼ ca cosa ni maʼ bizéʼtenu ca. Lu Gálatas 5:19-21, bisihuinni Pablu «qué ziuu cani runi irá nga ra runi mandar Dios». Yanna, xi zazaaca pa ti xpinni Cristu napa viciu —zándaca maʼ ziné stale tiempu— de guʼyaʼ idxa guidxa ra rihuinni cosa yuudxuʼ yaʼ. Pa qué gaca arrepentirbe ne qué gusaanabe viciu ca zareebe de ndaaniʼ xquidxi Dios, ti zacá chuʼ neza binni ridagulisaa nayá ne gápacaʼ ndaayaʼ stiʼ Dios (1 Cor. 5:5, 11).

Galán gánnanu maʼ huayacané ca binnigola caadxi de ca xpinni Cristu ni huayuuyaʼ caadxi clase idxa guidxa nabé feu, ne maʼ bíʼnicaʼ stale stipa para gusaanacaʼ viciu ca. Guidúʼyanu ximodo gudixhená Jesús caadxi de ca xpinni Cristu ni guyuu Sardis: «Caʼru ixele chaahui pe tu, nuu xcaadxi ra zinanda tu ni jneza. [...] Lauzuhuaa dxiichi lu ni napa ru tu, purti mayaca initilú ni. Laguietenalaʼdxi ni ma biziidi tu. Lachinanda ni ne lainaba perdón Dios. Pa qué guni tu ni la? ziaa ra nuu tu sin ganna tu» (Apo. 3:2, 3). Nanna dxíchinu zanda gaca arrepentir cani maʼ biiyaʼ idxa guidxa ne gúnicaʼ stipa ti cadi guiábacaʼ lu trampa stini (Jud. 22, 23).

Peru pa cada tobi de laanu quixhe ique cadi liica guʼyaʼ idxa guidxa la? qué ziuu dxi gacaná ne guixeleʼ de Dios. Nga runi, ¡gúninu stipa pur cadi gúʼyanu nin ti clase idxa guidxa!

[Nota]

[Ni caníʼ yaza 30]

Pa guchee ti xpinni Cristu, naquiiñeʼ ganna napa xidé gacané ca binnigola laa