¿Jesusajj khitïnsa?

“[Jesusatjja] jaqenakajj kunayman amuyapjje. Diosaruw yupaychta sirinakasa ukat Diosat pächasirinakasa, ¿khitipunïns Jesusajja? Sasaw jisktʼasipjje.” (STAN GUTHRIE, QELLQERI)

JESUSAJJ khitipunipachänsa sasajj wal yatiñ munapjje. Ukatwa jupa toqet parlir walja libronaka ukat peliculanaks wal aljarapjje. Ukampis jaqenakajj Jesusjjat jistʼasisipkakiwa, sapa mayniw kunayman amuyapjje, janiw mayak amuyapkiti.

Pasïr maranakanjja pä periodistaw “¿khitïns Jesusajja?” sasin Internetnam jisktʼapjjatayna. Ukat Internetar mantirinakajja kamsapjjänsa uk mä qhawqha qhanañchäwinakap uñjañäni.

● “Jesusajj mä yatichirïnwa (Dios toqet yatichiri) jupajja jaqenakar khuyaptʼayasirit uñtʼatänwa.”

● “Jiwasjam jaqekirakïnwa, jakäwipakiw mayjänjja.”

● “Utjpachänt janich ukajj janiw yatiskiti.”

● “Jesusajj Diosan yoqapawa, jiwasanakar qhespiyañatakiw nasiwayi, jiwawayi ukat jaktawayjjaraki. Jichhajj alajjpachankaskiwa ukat aka oraqerojj wasitampiw kuttʼanini.”

● “Amuyatajja, Diosan mä sapa yoqapawa, jupakiw jaqjjamaraki ukat diosjamaraki.”

● “Jaqenakan uñstayat siwsäwinakapan jupjjat parli.”

Taqe uka amuyunakat ¿kawkïris cheqajja? Cheqas janiw taqpach amuyunakajj cheqäkaspati. Ukhamajj ¿kunatï cheqäki uk kawkins jikjjatsna? Aka revista qellqerinakjamajja, Bibliaw Diosan cheqa Arupajja, ukat ukaw kunatï cheqäki uk Jesusat sum qhanañchistaspa sasaw amuyapjjta (2 Timoteo 3:16). *

Jutïr yatichäwinwa kuntï jaqenakajj Jesusjjat jisktʼasipki ukat kunjamsa Bibliajj uka jisktʼanakar qhanañchi uk yatjjataskañäni. Jesús pachpaw “taqe khitinakatejj jupar iyawsapki” ukanakajj qhespipjjaniwa sasajj yatichäna (Juan 3:16). Ukhamajj kamsis Bibliajj uka toqet uk yatjjatañamatakiw chʼamañchtʼapjjsma. Ukjjarusti, juma pachpaw jupar iyawsäwinïñatakejj yatjjatätati janich uk amtjjäta.

[Qhanañchäwi]