Oli Wantem Save Se Jisas Hem i Hu

“Klosap evri man i gat defren tingting se [Jisas] hem i hu. Nomata yumi bilif strong long Jisas no nogat, yumi evriwan i tingbaot kwestin ya se, ‘?Hu ya man ya?’”—STAN GUTHRIE, WAN MAN BLONG RAETEM OL BUK.

OL MAN oli wantem save se Jisas hem i hu. Plante man oli pem ol buk mo ol muvi we i tokbaot Jisas. Be i no klia yet long olgeta se Jisas hem i hu. Ol man oli gat defdefren tingting long saed ya.

Sam yia i pas, wan man mo woman we tufala i stap raetem ol nius, tufala i askem long ol man long Intenet se: “?Jisas hem i hu?” Hemia sam ansa we ol man oli talem:

● “I luk olsem se hem i wan rabae (tija) we i yusum laef blong hem blong tijim ol man se oli mas sore long narafala.”

● “Hem i wan man olsem ol narafala man, be hem i mekem plante gudfala samting long laef blong hem.”

● “I no gat samting we i pruvum se Jisas i wan tru man we i laef long wol.”

● “Jisas i Pikinini blong God. Hem i bon, i ded, mo i laef bakegen blong tekemaot ol sin blong yumi. Tede hem i laef, mo bambae hem i kam long wol bakegen.”

● “Mi mi bilif se Jisas Kraes nomo i pikinini blong God. Hem i wan man mo hem i wan god long semtaem.”

● “Stori blong Jisas i wan kastom stori nomo. Sipos man i bilif long stori ya, hem i olsem pikinini.”

Ol tingting ya oli no sem mak nating. I klia se i no evriwan we i stret. ?I gat wan buk we yumi save trastem, we i ansa long ol kwestin long saed blong Jisas? Ol man we oli wokem magasin ya oli bilif se Baebol nao i Tok blong God, mo Baebol nomo i talem trutok se Jisas i hu. *—2 Timoti 3:16.

Long haf we i kam biaen, bambae yumi tokbaot ansa we Baebol i givim long sam kwestin we plante man oli askem long saed blong Jisas. Jisas i talem se ‘olgeta man we oli bilif long hem’ bambae oli no save lus. (Jon 3:16) Plis yu ridim gud ansa blong ol kwestin ya. Mo biaen, i gud yu tingbaot sipos yu mas lanem moa long saed blong Jisas, blong yu faenemaot wanem we yu mas mekem blong bilif long hem.

[Futnot]