Kükkütta Pölüwan Kewe

“Lap ngeni aramas meinisin a wor ar ekiek usun iö ena [Jises]. Ese lifilifil ükükün ach lükü are sia tipemwaramwar, nge meinisin kich sia kan eis, ‘Iö ei mwän?’”​—ALON EMÖN SOU MAK ITAN STAN GUTHRIE.

ARAMAS ra mochen silei pworausen Jises. Ekkewe puk usun i ra kon möölo. Chommong aramas ra sani le katol kachitoon kewe. Iwe nge, ra chüen kakkapas eis usun Jises. A sokkopat ekiekin aramas ika wesewesen iö ena Jises.

Fitu ier a lo, a wor rüüemön chon mak pworaus ra etiwa aramas ar repwe pölüweni ei kapas eis woon internet “Iö ena Jises?” Ikkeei met ra pölüwen ngeni:

● “Ese mwääl i emön sense mi pwäraatä ümöümöch lon manauan.”

● “I emön chök aramas kisikis nge a manaueni manau mi aüchea.”

● “Ese wor pisekin pwäraatä pwe Jises a manau.”

● “Jises i Nöün Kot we mi uputiw, mälo me manausefäl seni mälo pwe epwe angasakichelo seni ach kewe tipis. A manau iei, me epwe pwal liwinsefälito ngeni fönüfan.”

● “Ua lükü pwe Jises Kraist i chök nöün Kot we, me pwal lon eü chök fansoun i emön aramas me emön kot.”

● “Pworausen Jises eü chök tutulap.”

A ffat pwe sanne epwe pwüng meinisin ekkena ekiek mi sokkofesen. Iwe, itä a wor eü puk mi tongeni awora ngenikich pworaus mi enlet pwe epwe pölüweni ach kewe kapas eis usun Jises? Ekkewe chon makkeei ei puk ra lükü pwe ewe Paipel ina än Kot we Kapas me iei chök ewe puk a tongeni äitingenikich unusen ewe enlet usun Jises. *​—2 Timoti 3:16.

Lon ewe lesen mwirin ei, sipwe käeö pölüwen ekkoch kapas eis usun Jises seni ewe Paipel. I pwisin a apasa pwe a suuk ngeni “meinisin mi lükü i” ewe al ngeni amanau. (Jon 3:16) Sia peseok le etittina pölüwen ekkena kapas eis, iwe mwirin, pwisin filatä ika mi lamot kopwe alapaalo om käeö usun Jises me ifa usun kopwe anganga om lükü i.