Dimoun pe rod larepons

“Preski tou dimoun i annan son pwennvi lo lekel li [Zezi]. Me menm si nou annan en kantite lafwa dan li oubyen pa krwar ki i ti egziste, nou tou nou demann nou lekor menm kestyon: ‘Lekel li sa zonm?’”​—EKRIVEN STAN GUTHRIE.

DIMOUN i kontan koz lo Zezi. Bann liv ek film ki’n ganny fer lo li in fer bokou sikse. Me kantmenm sa, dimoun i kontinyen demann kestyon lo Zezi e zot pwennvi lo lekel li i varye.

Detrwa lannen pase, de zournalis ti envit dimoun lo Internet pour reponn sa kestyon: “Lekel li Zezi?” La serten sa bann larepons ki zot ti gannyen:

● “Aparaman i ti en ansenyan ki ti viv en lavi egzanpler lo demontre konpasyon.”

● “I ti en zonm ordiner ki ti viv en lavi ekstraordiner.”

● “I napa okenn laprev ki Zezi ti egziste.”

● “Zezi i Garson Bondye ki’n ne, mor e resisite pour sov nou dan nou pese. I ankor vivan e I pou vin ankor lo later.”

● “Mwan mon krwar ki Zezi Kri i sel garson Bondye, i ti en imen e en bondye an menm tan.”

● “Zezi i zis en personnaz dan bann kont ek lezann pour bann adilt ki ankor annan lespri manrmay.”

Definitivman tou sa bann diferan larepons pa kapab korek. Eski i annan en landrwa kot nou kapab ganny bann lenformasyon korek e egzakt konsernan Zezi? Bann editer sa magazin i krwar ki Labib i Parol Bondye e ki zis sa liv ki kapab dir nou tou laverite lo Zezi. *​—2 Timote 3:16.

Dan sa lartik ki swiv, nou pou egzamin larepons ki Labib i donnen pour serten kestyon ki dimoun i souvan demande konsernan Zezi. Li menm i ti dir ki “nenport ki, ki krwar dan li” pou kapab ganny sove. (Zan 3:16) Nou envit ou pour egzamin larepons sa bann kestyon e apre deside pour ou menm si i neseser pour aprann plis lo Zezi e ki mannyer ou pou kapab demontre lafwa dan li.

[Not anba lo paz]