Haere Tahua

“Kahirakahira taunimanima ibounai be mai edia lalohadai Iesu dekenai. Herevana iseda abidadama be bada o lasi, to ita ibounai ita henanadai, ‘Inai tau be daika’?”​—⁠AUTHOR STAN GUTHRIE.

TAUNIMANIMA idia ura Iesu idia dibaia. Ia idia sivarailaia bukadia be momo ese idia hoia. Danu, gabu momo dekenai Iesu ena laulau be muvini piksa ai idia hahedinaraia. To momo idia do henanadai noho ‘Iesu be daika?’ Edia lalohadai Iesu dekenai be idauidau.

Lagani haida gunanai, ripota rua ese taunimanima idia noia Intanet amo inai henanadai “Iesu be daika?” idia haerelaia totona. Edia haere haida be inai:

● “Ia be rabi tauna (tisa) bona hebogahisi karana dekenai ia be haheitalai namona.”

● “Ia be taunimanima ta sibona, to iena mauri lalonai be gau idau hereadia idia vara.”

● “Gau ta ese ia hamomokania lasi Iesu ia noho.”

● “Iesu be Dirava ena Natuna, ia vara, ia mase bona ia toreisi lou kara dika amo ita ia hamauria totona. Hari ia mauri noho, bona tanobada dekenai do ia giroa mai.”

● “Lau abia dae Iesu Keriso be Dirava ena Natuna tamona, ia be taunimanima bona dirava ta.”

● “Iesu ena sivarai be natudia edia gori ta sibona.”

Momokani, unai lalohadai haida be maoro lasi. Iesu dibaia totona idia henia henanadai edia haere maorodia be edeseniai ita abia diba? Inai magasin idia karaia taudia idia abia dae Dirava ena Hereva, Baibel, sibona ese Iesu ena sivarai momokanina ia gwauraia. *​—⁠2 Timoteo 3:16.

Taunimanima ese Iesu dibaia totona idia henia henanadai haida be Baibel ese ia haerelaia, inai atikol ena kahana iharuana ai unai do ita itaia. Iesu ia gwau “ia idia abidadama henia taudia ibounai” dekenai dala ia noho hahemauri idia abia totona. (Ioane 3:16) Namona be haere oi lalodia namonamo, bona abia hidi oi karaia Iesu dekenai diba ma haida do oi abia o lasi bona edena dala ai ia do oi abidadama henia.

[Footnote]